រដ្ឋមន្រ្ដីក្រសួងមហាផ្ទៃ៖ រាជរដ្ឋាភិបាលដាក់វិធានការផ្សព្វផ្សាយតាមភូមិ ឃុំ ដល់ពលករខ្មែរ ដែលបានវិលត្រឡប់មកពីប្រទេសថៃ ក្នុងរង្វង់ជាង១ម៉ឺននាក់

11

ភ្នំពេញ ថ្ងៃទី២៤ ខែមីនា ឆ្នាំ២០២០ — សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ  បានគូស​បញ្ជាក់ថា រាជរដ្ឋាភិបាលដាក់ចេញនូវវិធានការក្នុងការផ្សព្វផ្សាយតាមភូមិ ឃុំ ដល់ពលករខ្មែរ​ដែលបានទៅធ្វើការនៅប្រទេសថៃ ហើយបានវិលត្រឡប់ចូលមកស្រុកកំណើតវិញប្រមាណ​១ម៉ឺន ៥ពាន់នាក់ ដើម្បីទប់ស្កាត់ការឆ្លងជំងឺកូវីដ-១៩ ។

ថ្លែងក្នុងឱកាសអញ្ជើញជួបសំណេះសំណាលជាមួយមន្ត្រីអន្តោរប្រវេសន៍ នៅព្រលាន​យន្ត​ហោះអន្តរជាតិភ្នំពេញ នាព្រឹកថ្ងៃទី២៤ ខែមីនា ឆ្នាំ២០២០  សម្ដេចក្រឡាហោម ស ខេង បានលើកឡើងថា ចំពោះការវិលត្រឡប់របស់បងប្អូនពលករខ្មែរមកពីប្រទេសថៃវិញនេះ គឺ​មិន​បានធ្វើការត្រួតពិនិត្យសុខភាពឱ្យបានអស់ទេ ដូច្នេះសម្តេចបានធ្វើសំណើទៅសម្តេច តេជោ ហ៊ុន  សែន ដើម្បីឱ្យរដ្ឋបាលនៅតាមមូលដ្ឋានទៅជួបពលករទាំងនោះនៅផ្ទះ និងបាន​ដឹង​ពីស្ថានភាពរបស់គាត់។ សម្ដេចក្រឡហោមបានបន្ដថា ក្នុងករណីដែលមាន​ការឆ្លងជំងឺ​កូវីដ-១៩​នេះ អាចនឹងបិទធ្វើដំណើរនៅក្នុងភូមិ ឬកន្លះភូមិ ព្រោះថានៅកម្ពុជាមិនដូចជា​ប្រទេស​គេនោះទេ។ សម្ដេចក្រឡាហោមបានបន្ដទៀតថា នៅកម្ពុជាមិនទាន់ឈានដល់ធ្វើ​ការ​បង្ខាំងមនុស្សមិនឱ្យចេញពីផ្ទះដូចប្រទេសអ៊ីតាលី  ឬប្រទេសផ្សេងនោះទេគឺ ធ្វើការអំពាវនាវ​សិន។ ប៉ុន្តែបើនៅប្រទេសផ្សេងបើមិនស្តាប់នឹងមានការផាកពិន័យ ហើយអាចជាប់គុកទៀត។

សម្ដេចក្រឡាហោមបានបន្ថែមថា “ឥឡូវយើងយកវិធានការប្រៀបដូចជាការឃោសនា បោះឆ្នោតអីច្ចឹង គឺចាក់មេក្រូ ប្រកាសតាមភូមិ រហូតដល់ប្រជាពលរដ្ឋយល់  ហើយធ្វើការដូរ​ទីតាំងផ្សេង រហូតដល់ប្រជាពលរដ្ឋយល់”៕

ដោយ ប៊ុនរិទ្ធ