ភ្នំពេញ ថ្ងៃទី២៣ ខែមីនា ឆ្នាំ២០២០ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានប្រកាសដាក់ចេញវិធានការឱ្យមន្ទីរសុខាភិបាលតាមខេត្តទាំងអស់ ជ្រើសរើសអគារក្នុងសាលារៀន ដើម្បីធ្វើជាកន្លែងត្រៀមបង្ការចាំទទួលអ្នកជំងឺបណ្តាលមកពីវីរុសCovid-19 ដោយតម្រូវមានការបំពាក់សម្ភារ បរិក្ខារពេទ្យ បណ្តាញទឹក ភ្លើង ឱ្យបានរួចរាល់។ នេះបើយោងតាមប្រព័ន្ធ Telegram ដែលបានផ្ញើដល់អាជ្ញាធរគ្រប់ខេត្ត ក្រុង។
ក្នុងសារសំឡេងរបស់សម្តេចតេជោនាយករដ្ឋមន្ត្រីជូនថ្នាក់ដឹកនាំ ជាពិសេសអភិបាល ខេត្ត ដែលជាប្រធានគណៈកម្មការប្រយុទ្ធប្រឆាំងកូវីត-១៩នៅតាមខេត្តបានថ្លែងថា “យើង បានឃើញហើយថា អ្នកជំងឺរបស់យើងជួនកាលកន្លែងខ្លះមានការកើនឡើង ដូចជានៅខេត្តព្រះសីហនុជាដើម។ អីច្ចឹងបើកើតឡើងរបៀបនេះ ធ្វើឱ្យកន្លែងដែលយើងទទួល គឺវាមិនគ្រប់គ្រាន់ទេ។ អីច្ចឹង ខ្ញុំបានពិភាក្សាជាមួយនឹងឯកឧត្តម ម៉ម ប៊ុនហេង យើងត្រូវប្រើប្រាស់ សាលារៀន ហើយខ្លះមានអ្នលជូនយោបល់ខ្ញុំ ថាឱ្យយកកុងទីន័ររមកកែច្នែធ្វើជាបន្ទប់ ប៉ុន្តែគឺវាមិនល្អទេ។” សម្ដេចតេជោបានបន្ដថា សម្ដេចគិតថា ត្រូវប្រើប្រាស់សាលារៀន ហើយសាលារៀនដែលសម្ដេចបានធ្វើកន្លងមកគឺស្អាតៗណាស់ គឺនៅទីរួមខេត្តនិងកន្លែងមួយចំនួន គឺយើងយកសាលារៀនតែម្តង អ្វីដែលជាបញ្ហាបន្ទាន់ គឺត្រូវជ្រើសរើសទីតាំងណាមួយឬពីរ ក្នុងខេត្តមួយ ហើយគឺថា និងរៀបចំប្រព័ន្ធទឹក ភ្លើង ចូលឱ្យដល់ជាបន្ទាន់ នេះជាកិច្ចការបន្ទាន់នៅតាមខេត្តត្រូវយកចិត្តទុកដាក់។ សម្ដេចតេជោបានបន្ដទៀតថា ចំពោះរាជធានីភ្នំពេញមិនជាចំណោទទេ ដោយសារយើងមានមន្ទីរពេទ្យរុស្ស៊ី ហើយអគារនៅចាក់អង្រែ ក្រៅពីនោះ នៅមន្ទីរពេទ្យ UT ហើយសណ្ឋាគារអាំងទែកុងទីណង់តាល់ហើយ មិនជាចំណោទទេ។ ប៉ុន្តែអ្វីដែលជាចំណោទគឺនៅតាមបណ្តាខេត្ត ដែលត្រូវធ្វើបន្ទាន់ ដោះស្រាយធ្វើម៉េចត្រូវជ្រើសរើសសាលារៀនដែលយើងកំពុងតែបិទ យកអគារមួយ ឬពីរ គឺឱ្យមានច្រើនបន្ទប់ រៀបចំបន្ទប់ រៀបចំគ្រែ ដើម្បីដំណើរការតែម្តង ដោយប្រើប្រាស់កម្លាំងសរុប ដែលអាចយកទាំងកម្លាំងប៉ូលីស កម្លាំងទាហាន និងប៉េអឹម ដើម្បីយកមកជួយការងារនេះតែម្តង។ ជាពិសេសគឺសម្រុកដោះស្រាយបញ្ហាតភ្ជាប់ប្រព័ន្ធទឹក ប្រព័ន្ធភ្លើង ចូលទៅក្នុងសាលាតែម្តង ហើយរៀបចំគ្រែ ដោះស្រាយគ្រែ ដើម្បីដាក់សម្រាប់ទទួលអ្នកជំងឺ ដែលយើងត្រូវមានការចំបាច់។ សម្ដេចតេជោបានបន្ថែមថា នេះជាវិធីដែលដោះស្រាយបន្ទាន់ ហើយយើងមានអគារស្រាប់ទាំងអស់ មិនចាំបាច់ដូចនៅប្រទេសចិនគេកសាងអគារភ្លាមៗ ដែលយើងគឺមិនចំបាច់ទេ គឺយើងយកអគារសាលារៀនតែម្តង បន្ទប់សាលារៀនដែលយើងបានធ្វើកន្លងទៅស្អាតៗណាស់ ហើយរឿងដែលខ្វះគឺថាខ្វះតែបន្ទប់ទឹកទេ ប៉ុន្តែបើនិយាយពីសាលាមានកន្លែងខ្លះគឺមានបន្ទប់ទឹក។ ប៉ុន្តែបណ្តាញទឹកដែលត្រូវផ្គត់ផ្គង់គឺវាត្រូវឱ្យគ្រប់ ដែលត្រូវខិតខំដោះស្រាយបញ្ហានឹងបន្ទាន់។ សម្ដេចតេជបានស្នើសូមឱ្យយកចិត្តទុកដាក់អំពីបញ្ហានេះ ព្រោះដើម្បីចៀសសវាងគឺនៅពេលមានអ្នកជំងឺច្រើន យើងមិនអាចរកកន្លែងដាក់បាន តែយើងបានត្រៀមបម្រុងទុកហើយ។ ទន្ទឹមនេះ សូមឱ្យថ្នាក់ខេត្ត ឯកឧត្តម ម៉ម ប៊ុនហេង ក៏ដូចជាថ្នាក់ដឹកនាំក្រសួង គឺចូលរួមផ្តល់មតិបន្ថែមទៅឱ្យសុខាភិបាលខេត្ត រួមជាមួយនឹងគណៈអភិបាល ដើម្បីពិនិត្យទៅថា គួរយកកន្លែងណាដែលសមស្រប យើងមិនមែនចេះតែដើរយកទេ គឺយកកន្លែងណាដែលសមស្រប ដែលមានលទ្ធភាព ហើយដែលមិនអាចរីករាលដាលទៅកន្លែងដទៃ៕