ប្រធានរដ្ឋ​នៃ​សា​ធារណរដ្ឋប្រជាធិបតេយ្យប្រជាមានិតឡាវ​បញ្ចប់ដំណើរទស្សនកិច្ចផ្លូវរដ្ឋនៅកម្ពុជា

36

ភ្នំពេញ ថ្ងៃទី១០ ខែកុម្ភៈ ឆ្នាំ២០២០ — បន្ទាប់ពីបានដឹកនាំគណៈប្រតិភូជាន់ខ្ពស់បំពេញទស្សនកិច្ចផ្លូវរដ្ឋរយៈពេលពីរថ្ងៃនៅលើ​ទឹកដីនៃព្រះរាជាណាចក្រកម្ពុជាប្រកបដោយជោគជ័យ ឯកឧត្ដម ប៊ុនញ៉ាំង វរជីត ( Bo​u​n​n​h​ang VORA​C​H​I​​​TH) អគ្គលេខាធិការនៃគណៈកម្មាធិការមជ្ឈឹមបក្ស​ប្រជាជនបដិវត្ត​ន៍​ឡា​​វ និង​ជា​ប្រធានរដ្ឋ​នៃ​សា​ធារណរដ្ឋប្រជាធិបតេយ្យប្រជាមានិតឡាវ បានអញ្ជើញចាកចេញ​ពី​កម្ពុជា​ហើ​យ នារសៀលថ្ងៃទី ១០ ខែកុម្ភៈ ឆ្នាំ២០២០ តាមជើងយន្តហោះពិសេស។

អញ្ជើញជូនដំណើរគណៈប្រតិភូជាន់ខ្ពស់​សា​ធារណរដ្ឋប្រជាធិបតេយ្យប្រជាមានិតឡាវ ដល់​ព្រលានយន្តហោះអន្តរជាតិភ្នំពេញ មានវត្តមានសម្ដេចចៅហ្វាវាំង គង់ សំអុល ឧបនាយ​ក​រដ្ឋមន្ត្រី រដ្ឋមន្ត្រីក្រសួងព្រះបរមារាជវាំ ព្រមទាំងមន្ត្រីអ្នកមុខអ្នកការ និងមន្ត្រីរាជការ​យ៉ាង​ច្រើន​កុះ​ករ។ ក្នុ​ង​​អំឡុងពេលទស្សនកិច្ចរយៈពេលពីរថ្ងៃនៅកម្ពុជា  ឯកឧត្ដម ប៊ុនញ៉ាំង វរជីត បាន​អ​ញ្ជើញចូលក្រាបបង្គំគាល់ព្រះកុរុណា ព្រះ​បា​ទសម្តេចព្រះបរមនាថ នរោត្តម សីហមុនី ព្រះម​ហា​ក្សត្រនៃព្រះរាជាណាចក្រកម្ពុជា និងមាន​ជំ​នួ​បដោយឡែកពីគ្នាជាមួយ សម្ដេចវិបុល​សេនាភក្ដី សាយ ឈុំ ប្រ​ធា​​នព្រឹទ្ធសភា សម្ដេច​អគ្គ​​ម​​ហា​ពញាចក្រី ហេង សំរិន ប្រធានរដ្ឋ​​សភា និងសម្ដេច​អគ្គមហា​សេ​នា​បតីតេជោ ហ៊ុន សែន នាយករដ្ឋមន្រ្តីនៃព្រះរាជា​ណា​ចក្រ​កម្ពុជាផងដែរ។ ជាមួយគ្នានេះ ក្នុ​ង​​អំឡុងពេលស្នាក់នៅប្រទេសកម្ពុជា ឯកឧត្ដម ប៊ុនញ៉ាំង វរជីត (Bounnhang VORA​C​HI​TH)​ ក៏បានអញ្ជើញដាក់កម្រង​ផ្កានៅវិមាន​ឯ​​ក​​រាជ្យ និងគោរព​ព្រះវិញ្ញាណក្ខន្ធនៅមណ្ឌប ព្រះ​ក​រុ​​ណា ព្រះបាទ សម្ដេចព្រះ នរោត្ដម សី​ហ​នុ​ ព្រះបរមរតន​កោដ្ឋ អតីតព្រះមហាក្សត្រកម្ពុជា​ផ​ង​ដែរ។

គួរបញ្ជាក់ដែរថា ឯកឧត្ដម ប៊ុនញ៉ាំង វរជីត ( Bounnhang VORA​C​HI​TH) អគ្គលេខា​​ធិ​កា​រ​នៃគណៈកម្មាធិការមជ្ឈឹមបក្សប្រជាជនបដិវត្តន៍ឡាវ និងជាប្រធានរដ្ឋនៃសាធារណរដ្ឋ​ប្រ​ជា​​ធិបតេយ្យប្រជាមានិតឡាវ បានដឹកនាំគណៈប្រតិភូមកដល់កម្ពុជាកាលព្រឹកថ្ងៃទី០៩ ខែ​    កុ​​ម្ភៈ ឆ្នាំ​២០២០ ដើម្បីបំពេញទស្សនកិច្ចផ្លូងរដ្ឋ​នៅព្រះរា​​ជា​ណា​ច​ក្រ​កម្ពុជា រយៈពេលពីរថ្ងៃ (ថ្ងៃ​ទី​០​៩​-១០ ខែកុម្ភៈ ឆ្នាំ២០២០) ដែលជាការតបតាម​ការ​អញ្ជើ​ញ​រប​ស់ ព្រះករុណា ព្រះបាទ​សម្តេច​ព្រះ​បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ជាមួយ​គ្នានេះ ដំណើរទស្សនកិច្ចផ្លូវ​រដ្ឋ​រប​ស់​ឯក​ឧត្ដម ប៊ុនញ៉ាំង វរជីត ( Bounnhang VORA​C​HI​TH) គឺជាព្រឹត្តការណ៍ដ៏មាន​អត្ថន័យជ្រាល​ជ្រៅ​បន្ថែមទៀត ដើម្បី​ព​ង្រឹង​ភាពជាដៃគូយុទ្ធ​សាស្ត្រ​គ្រប់​ជ្រុងជ្រោយ និងយូរអង្វែង ក៏ដូចជា រឹត​ចំណងមិត្តភាព សា​ម​​គ្គីភាព និងកិច្ច​សហ​ប្រតិបត្តិការលើគ្រប់វិស័យ រវាងប្រទេស និងប្រ​ជា​ជន​ ដែលជាអ្នកជិត​ខា​ង​ល្អទាំងពីរ ឱ្យកាន់​តែប្រសើរឡើងថែមទៀត៕

ដោយ ជឹម ណារី