ភ្នំពេញ ថ្ងៃទី២៨ ខែមករា ឆ្នាំ២០២០ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានបង្ហាញនូវការគាំទ្រសម្រាប់ការពង្រឹងនិងពង្រីក កិច្ចសហប្រតិបត្តិការលើវិស័យវិនិយោគ និងពាណិជ្ជកម្ម រវាងកម្ពុជា-អូស្ត្រាលី ដោយសម្ដេចតេជោបានបញ្ជាក់ថា ទំនាក់ទំនង នយោបាយរឹងមាំ គឺផ្តើមចេញពីទំនាក់ទំនងពាណិជ្ជកម្ម។
នេះបើតាមការឱ្យដឹងរបស់ឯកឧត្តម អ៊ាង សុផល្លែត ជំនួយការសម្តេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាន អនុញ្ញាតឱ្យ ឯកឧត្តម ប៉ាប៊ីយ៉ូ ឈីហ៊ូ កាង (Pabio Chiho Kang) ឯកអគ្គរដ្ឋទូតអូស្ត្រាលីថ្មី ប្រចាំកម្ពុជា ចូលជួបសម្ដែងការគួរសម នាព្រឹកថ្ងៃទី ២៨ ខែមករា ឆ្នាំ២០២០ នៅវិមានសន្តិភាព។
ឯកឧត្តម Pablo Chiho Kang បានបង្ហាញក្តីរីករាយ ដោយបានតែងតាំងជាឯកអគ្គរដ្ឋទូតអូស្ត្រាលី ប្រចាំនៅកម្ពុជា ហើយនេះគឺជាបេសកកម្មគួរជាទីរីករាយមួយ ជាពិសេសមក កាន់ប្រទេស ដែលមានទំនាក់ទំនង និងកិច្ចសហប្រតិបត្តិការល្អជាមួយអូស្ត្រាលី។ ឯកឧត្តម ឯកអគ្គរដ្ឋទូត បានជម្រាបជូនសម្ដេចតេជោថា នៅពេលនេះ អូស្ត្រាលីកំពុងបង្វែរ កិច្ចសហប្រតិបត្តិការ រវាងអូស្ត្រាលីនិងកម្ពុជា ទៅលើស្ថាប័នតែម្ដង នោះគឺកំពុងពង្រឹង ពង្រីកកិច្ចសហប្រតិបត្តិការជាមួយក្រសួងនានានៅកម្ពុជា ដូចជាក្រសួងសេដ្ឋកិច្ចនិងហិរញ្ញវត្ថុ លើវិស័យពន្ធដារ ក្រសួងរ៉ែនិងថាមពល ក្រសួងសាធារណការ និងដឹកជញ្ជូន ក្រសួងសុខាភិបាល ក្រសួងមហាផ្ទៃ ក្រសួងកសិកម្ម រុក្ខាប្រមាញ់ និងនេសាទ ក៏ដូចជាក្រសួងការពារជាតិផងដែរ។ ឯកឧត្ដមឯកអគ្គរដ្ឋទូតបានបន្ដថា ក្នុងបេសកកម្មកាទូត របស់ឯកឧត្តម មកកាន់ កម្ពុជានៅពេលនេះ ឯកឧត្តមនឹងបន្តជំរុញ កិច្ចសហប្រតិបត្តិការ ជាមួយស្ថាប័នទាំងអស់ នៅកម្ពុជា ហើយក៏ផ្ដោតកិច្ចសហប្រតិបត្តិការ ជាពិសេសទៅលើពាណិជ្ជកម្ម។ ឯកឧត្តមបន្ថែមថា អូស្ត្រាលី បើកចំហជូនប្រជាជនកម្ពុជា ដើម្បីទៅធ្វើទស្សនកិច្ច ដើម្បីទៅវិនិយោគ ក៏ដូចជាដើម្បីទៅបន្តការសិក្សានៅទីនោះផងដែរ។ ក្នុងន័យនេះ ឯកឧត្តមឯកអគ្គរដ្ឋទូតបានបន្ថែមថា ឯកឧត្តមនឹងយកចិត្តទុកដាក់ ជាពិសេសលើបញ្ហាវិនិយោគ និងពាណិជ្ជកម្មតែម្ដង ជាមួយនឹងកិច្ចសហប្រតិបត្តិការជាមួយកម្ពុជា។
ជាការឆ្លើយតប សម្តេចតេជោនាយករដ្ឋមន្ត្រី បានស្វាគមន៍ និងសម្ដែងការអបអរសាទរ ចំពោះឯកឧត្តម Pablo Chiho Kang ដែលត្រូវបានតែងតាំងជា ឯកអគ្គរដ្ឋទូតវិសាមញ្ញ និងពេញសមត្ថភាព របស់ប្រទេសអូស្ត្រាលីប្រចាំនៅព្រះរាជាណាចក្រកម្ពុជា។ សម្ដេចតេជោ យល់ស្រប ចំពោះការលើកឡើងរបស់ឯកឧត្តមឯកអគ្គរដ្ឋទូត ចំពោះទំនាក់ទំនងរវាងប្រទេសទាំងពីរ។ សម្ដេចតេជោបន្ដថា ជាការពិតកម្ពុជានិងអូស្ត្រាលី មានទំនាក់ទំនងយ៉ាងច្រើនវិស័យ ជាមួយនឹងស្ថាប័ននិងស្ថាប័នជាដើម ហើយក៏មានទំនាក់ទំនងជាពិសេសផងដែរ ក្នុង ក្របខ័ណ្ឌអង្គការសហប្រជាជាតិ ក្របខ័ណ្ឌអាស៊ាន ក្របខ័ណ្ឌអាស៊ីបូព៌ា ក៏ដូចជាដៃគូ កិច្ចសហប្រតិបត្តិការគ្រប់ជ្រុងជ្រោយផងដែរ។ ជាងនេះទៀត អូស្ត្រាលី ក៏មានកិច្ចសហប្រតិបត្តិការទ្វេភាគីពិសេស បន្ថែមទៅលើអ្វីដែលឯកឧត្តមឯកអគ្គរដ្ឋទូត បានលើកឡើង គឺអូស្ត្រាលីបានជួយដល់កម្ពុជា ក្នុងការស្វែងរកសុខសន្តិភាពកន្លងមក ហើយជាពិសេសទៅទៀត អូស្ត្រាលីកាលពីដើមឡើយ បានដាក់អាទិភាពសំខាន់ ជួយដល់កម្ពុជាលើវិស័យកសិកម្ម។ ចំពោះលើវិស័យកសិកម្មនេះ អូស្ត្រាលី បានបង្កើតនៅវិទ្យាស្ថានកាឌី CARDI មួយ ដែលវិទ្យាស្ថាននេះ បានជួយជំរុញឱ្យស្រូវកម្ពុជា បង្កើនបានទិន្នផលខ្ពស់ និងបានជួយស្រូវកម្ពុជា ឱ្យក្លាយទៅជាអង្ករលេខ ១ នៅក្នុងពិភពលោកផងដែរ។ សម្ដេចតេជោនាយករដ្ឋមន្ត្រី ក៏បានឯកភាព និងសម្ដែងនូវការរីករាយ ចំពោះអ្វីដែលឯកឧត្តម Pablo Chiho Kang បានលើកឡើងនិងចំពោះការយកចិត្តទុកដាក់ ទៅលើកិច្ចសហប្រតិបត្តិការ លើវិស័យពាណិជ្ជកម្ម។ ក្នុងន័យនេះ សម្ដេចតេជោមានប្រសាសន៍បញ្ជាក់ថា ទំនាក់ទំនងនយោបាយរឹងមាំ គឺចេញពីទំនាក់ទំនង ពាណិជ្ជកម្មនេះឯង ដោយសម្ដេចសូមគាំទ្រនូវអ្វីដែលឯកឧត្តម ឯកអគ្គរដ្ឋទូត បានលើកឡើង ក្នុងបេសកកម្មការទូតរបស់ឯកឧត្តម មកកាន់កម្ពុជាពេលនេះ៕
ដោយ ជឹម ណារី
