ភ្នំពេញ ថ្ងៃទី២១ ខែមករា ឆ្នាំ២០២០ — ឯកឧត្ដម ឧត្ដមសេនីយ៍ទោ Goh Si Hoo មេបញ្ជាការកងទ័ពជើងគោកនៃសាធារណរដ្ឋសិង្ហបុរី បានកត់សម្គាល់ពីការរីកចម្រើនរបស់កម្ពុជា ដែលផ្ដើមចេញពីសុខសន្តិភាព និងការអភិវឌ្ឍ ហើយការអភិវឌ្ឍនោះសោតគឺជាការអភិវឌ្ឍរយៈពេល២០ឆ្នាំជាប្រវត្តិសាស្ត្ររបស់កម្ពុជា។
នេះបើតាមការឱ្យដឹងពីឯកឧត្ដម អ៊ាង សុផល្លែត ជនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្ដម ឧត្ដមសេនីយ៍ទោ Goh Si Hoo មេបញ្ជាការកងទ័ពជើងគោកនៃសាធារណរដ្ឋសិង្ហបុរី ចូលជួបសម្ដែងការគួរសម និងពិភាក្សាការងារ នារសៀលថ្ងៃទី ២១ ខែមករា ឆ្នាំ២០២០ នៅវិមានសន្តិភាព ក្នុងខណៈដែលឯកឧត្ដមដឹកនាំគណៈប្រតិភូមកបំពេញទស្សនកិច្ចនៅព្រះរាជាណាចក្រកម្ពុជា។
នៅក្នុងជំនួបនោះ ឯកឧត្ដម Goh Si Hoo បានជម្រាបជូនសម្តេចតេជោថា ឯកឧត្តមធ្លាប់មកកាន់ព្រះរាជាណាចក្រកម្ពុជា ហើយដំណើរទស្សនកិច្ចជាផ្លូវការរបស់ឯកឧត្តមនៅពេលនេះ ឯកឧត្ដមមានអារម្មណ៍ថា ប្រទេសកម្ពុជាមានសុខសន្តិភាពនិងការអភិវឌ្ឍ ហើយការអភិវឌ្ឍន៍នោះសោត គឺជាការអភិវឌ្ឍរយៈពេល២០ឆ្នាំជាប្រវត្តិសាស្ត្ររបស់កម្ពុជា។ ឯកឧត្តមបានបញ្ជាក់បន្ដថា សន្តិភាពដែលកម្ពុជាទទួលបានមកនេះ គឺបានមកដោយលំបាក ហើយសន្តិភាពនេះគឺនឹងស្ថិតនៅជាកត្តាដ៏សំខាន់របស់កម្ពុជាសម្រាប់រយៈពេលវែងថែមទៀត។ ឯកឧត្តម Goh Si Hoo ក៏បានគោរពជម្រាបជូនសម្ដេចតេជោផងដែរថា ឯកឧត្តមពិតជាមានកិត្តិយសណាស់ ដែលបានមកបំពេញទស្សនកិច្ចផ្លូវការនៅកម្ពុជា ហើយក៏បានជួបពិភាក្សាជាមួយឯកឧត្តម ហ៊ុន ម៉ាណែត ផងដែរ ដើម្បីពង្រីក និងពង្រឹងកិច្ចសហប្រតិបត្តិការ ពង្រឹងចំណងមិត្តភាពរវាងកងទ័ពនៃប្រទេសទាំងពីរ។ ឯកឧត្តមបន្ដថា ឯកឧត្តមរួមជាមួយនឹងឯកឧត្តម ហ៊ុន ម៉ាណែត នឹងបន្តធ្វើការជាមួយគ្នា ដើម្បីធ្វើយ៉ាងណាពង្រឹងកិច្ចសហប្រតិបត្តិការរវាងកងទ័ពទាំងពីរ ដើម្បីផលប្រយោជន៍ប្រយោជន៍នៃប្រទេសនីមួយៗផង និងផលប្រយោជន៍សម្រាប់អាស៊ានផងដែរ។ ជាងនេះទៀតឯកឧត្តមក៏បានគោរពជម្រាបជូនសម្ដេចតេជោផងដែរថា កងទ័ពនៃប្រទេសទាំងពីរ កន្លងមកមានកិច្ចសហប្រតិបត្ដិការគ្នាយ៉ាងល្អ ហើយឯកឧត្តម និងឯកឧត្តម ហ៊ុន ម៉ាណែត នឹងបន្តនូវកិច្ចសហប្រតិបត្តិការល្អនេះបន្តទៀត។
ជាការឆ្លើយតប សម្ដេចតេជោ ហ៊ុន សែន បានស្វាគមន៍នូវកិច្ចពិភាក្សារវាងឯកឧត្តម Goh Si Hoo និងឯកឧត្តម ហ៊ុន ម៉ាណែត ហើយសម្ដេចក៏បានមានប្រសាសន៍ផងដែរថា ជាការពិតណាស់ កងទ័ពទាំងពីរ ចាំបាច់ត្រូវចែករំលែកនូវបទពិសោធន៍រវាងគ្នាទៅវិញទៅមក ចែករម្លែកព័ត៌មានគ្នានឹងគ្នាទៅវិញទៅមក ក៏ដូចជាការហ្វឹកហ្វឺនរួមគ្នាផងដែរ។ សម្ដេចតេជោ បន្តថា នៅពេលនេះពិភពលោកគឺមានការរត់ប្រណាំងសព្វាវុធកាន់តែខ្លាំងឡើង បើប្រៀបធៀបទៅនឹងជំនាន់សង្គ្រាមត្រជាក់។ ក្នុងន័យនេះ កិច្ចសហប្រតិបត្តិការរវាងកងទ័ពទាំងពីរគឺពិតជាមានសារៈសំខាន់ណាស់។ សម្ដេចតេជោក៏បានជម្រាបជូនឯកឧត្តម Goh អំពីនយោបាយរបស់កម្ពុជា ដែលនោះគឺប្រជាជន គឺជាខឿនការពារជាតិកម្ពុជា កងទ័ពមានតួនាទីសំខាន់ក្នុងការពារជាតិដែរ។ ប៉ុន្តែកងទ័ពកម្ពុជាក៏មានតួនាទីក្នុងការចូលរួមបង្កបង្កើនផល ការចូលរួមសង្គ្រោះប្រជាជននៅពេលមានគ្រោះមហន្តរាយ និងការចូលរួមនូវការថែរក្សាសន្តិភាពក្រោមឆ័ត្រអង្គការសហប្រជាជាតិ។
សម្តេចតេជោនាយករដ្ឋមន្ត្រីបានថ្លែងទៀតថា សម្ដេចពុំមានការជឿជាក់ថា ការប្រើកម្លាំងអាចដោះស្រាយបញ្ហានោះទេ ផ្ទុយទៅវិញការចរចា កិច្ចសហប្រតិបត្តិការ និងការអភិវឌ្ឍទេ ដែលដោះស្រាយរាល់បញ្ហាទាំងឡាយ។ ក្នុងន័យនេះ សម្ដេចបានមានប្រសាសន៍ថា កម្ពុជាកំពុងតែប្រឹងប្រែងធ្វើយ៉ាងណាកែប្រែព្រំដែន កម្ពុជាជាមួយប្រទេសជិតខាង ឱ្យក្លាយទៅជាព្រំដែន សន្តិភាព មិត្តភាព កិច្ចសហប្រតិបត្តិការនិងការអភិវឌ្ឍ ហើយប្រែក្លាយតំបន់ដែលធ្លាប់ជាសមរភូមិប្រយុទ្ធ ឱ្យក្លាយទៅជាតំបន់ទីផ្សារ៕
ដោយ ជឹម ណារី
