ទីប្រឹក្សាពិសេសរបស់អគ្គខាធិការអង្គការសហប្រជាជាតិ អះអាងពីការត្រៀមជានិច្ច ដើម្បីជួយកម្ពុជាក្នុងការអភិវឌ្ឍប្រកបដោយចីរភាព

26

ភ្នំពេញ ថ្ងៃទី១០ ខែមករា ឆ្នាំ២០២០ — ឯកឧត្ដម សាស្ត្រាចារ្យ Jeffrey D. Sachs ទីប្រឹក្សាពិសេសរបស់អគ្គខាធិការអង្គការ​   ស​ហ​​ប្រជាជាតិ បានមានប្រសាសន៍ថា ឯកឧត្ដមត្រៀមជានិច្ច ដើម្បធ្វើយ៉ាងណាជួយដល់​កម្ពុ​ជា​ ជំរុញការអភិវឌ្ឍរបស់កម្ពុជា តំបន់អាស៊ាន និងតំបន់ដទៃទៀត ឱ្យមាន​កា​​រ​អភិវឌ្ឍ​ប្រកប​ដោយចីរភាព។

នេះបើយោងតាមការឱ្យដឹងរបស់ ឯកឧត្ដម អ៊ាង សុផល្លែត ជំនួយការសម្ដេចតេជោ   ប​ន្ទា​ប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណា ចក្រ កម្ពុជា បានអនុញ្ញាតឱ្យឯកឧត្ដម សាស្ត្រាចារ្យ Jeffrey D. Sachs ទីប្រឹក្សាពិសេសរបស់​អគ្គខា​ធិ​ការ​អង្គការសហប្រជាជាតិ ចូលជួបសម្ដែងការគួរសម និងពិភាក្សាការងារ នាព្រឹកថ្ងៃទី ១០ ខែមករា ឆ្នាំ២០២០ នៅវិមានសន្តិភាព ក្នុងខណៈដែលឯកឧត្ដមមកបំពេញ​ទស្សនកិច្ចនៅ​កម្ពុ​ជា​​។

ឯកឧត្ដម Jeffrey D. Sachs បានមានប្រសាសន៍ជម្រាបជូនសម្ដេចតេជោថា ឯកឧត្ដម​ពិត​ជា​មានកិត្តិយស និងសប្បាយរីករាយយ៉ាងខ្លាំង ដែលបានជួបសម្ដេចតេជោសារជាថ្មី​ម្ដង​ទៀតបន្ទាប់ពីបានជួបសម្ដេចតេជោនាយករដ្ឋមន្ត្រីកាលពី១៥ឆ្នាំ​មុននៅគេហដ្ឋានរបស់​សម្ដេច នៅឯវិមានឯករាជ្យ។ ឯកឧត្ដមបានបន្ដថា ក្នុងដំណើរទស្សនកិច្ចរបស់ឯកឧត្ដម​មក​កាន់​​កម្ពុ​ជា នាពេលនេះ គឺឯកឧត្ដមបានឃើញដោយផ្ទាល់ភ្នែកនូវការអភិវឌ្ឍរបស់កម្ពុជា ដែល​ក្នុ​ង​​​នោះ​មានការអភិវឌ្ឍលើវិស័យសេដ្ឋកិច្ច សុខាភិបាល និងវិស័យដទៃទៀត ដែលហួសពី​កា​រ​ស្មាន​របស់​ឯកឧត្ដម។ ឯកឧត្ដមក៏បានលើកឡើងផងដែរថា ក្នុងដំណើរទស្សនកិច្ចនេះ ឯ​ក​ឧត្ដម​នឹងធ្វើដំណើរទៅកាន់ប្រទេសឡាវ កម្ពុជា និងប្រទេសម៉ាឡេស៊ី ដើម្បីធ្វើយ៉ាងណា​ព​ង្រឹ​ង និងជំរុញលើកទឹកចិត្តកិច្ចសហប្រតិបត្តិការ រវាងប្រទេសអាស៊ាន និងសហគមន៍អឺរ៉ុប ជា​ពិ​សេសជំរុញកិច្ចសហប្រតិបត្តិការ លើវិស័យពាណិជ្ជកម្ម សេដ្ឋកិច្ច ដឹកជញ្ជូន និងព័ត៌មានវិ​ទ្យា​ ជាដើម ដើម្បីឱ្យសហគមន៍អឺរ៉ុប និងអាស៊ាន មានទំនាក់ទំនងនិងកិច្ចស​ហ​ប្រ​តិ​បត្តិការល្អ។ ឯកឧត្ដមបានបន្តទៀតថា ឯកឧត្ដមនឹងទៅធ្វើទស្សនកិច្ច និងជួបថ្នាក់ដឹកនាំសហ​គ​​មន៍​អឺរ៉ុប​នៅសប្ដាហ៍បន្ទាប់ ដើម្បីពិភាក្សា និងជំរុញលើកស្ទួយកិច្ចសហប្រតិបត្តិការ រវាង​សហ​គមន៍​អឺរ៉ុប និងអាស៊ាន ដែលសង្កត់ធ្ងន់អំពីសារៈសំខាន់នៃកិច្ចសហប្រតិបត្តិការរវាងតំបន់ និង​តំបន់នេះ។ ឯកឧត្ដមក៏បានបន្ថែមថា ឯកឧត្ដមពុំចង់ឃើញមានការបែក​បា​ក់​​គ្នារវាងតំបន់ និងតំបន់នោះទេ ផ្ទុយទៅវិញ នឹង​ឆ្លុះ​បញ្ចាំងនូវភាពខ្លាំង និងសារៈសំខាន់នៃកិច្ចសហ​ប្រតិបត្តិ​ការរវាងតំបន់ និងតំបន់ទៅវិញ។ ឯ​ក​ឧត្ដមក៏បានគូសបញ្ជាក់ដែរថា អាស៊ាន គឺមានសក្ដានុ​ពល​ខ្ពស់ ហើយអាស៊ានបើបូកបញ្ចូល​ជា​មួយ អាស៊ាន-ចិន អាស៊ាន-ជប៉ុន និងអាស៊ាន-កូរ៉េ នោះ តំបន់អាស៊ាន និងមានការ​អភិវឌ្ឍ​​​ដោយ​គ្មានដែនកំណត់ ជាពិសេសលើវិស័យបច្ចេក​វិទ្យា ដែលបច្ចេកវិទ្យាទាំងនេះ អាចយក​មក​ប្រើ​ប្រាស់ជំរុញការអភិវឌ្ឍប្រកបដោយចីរភាព។

ឯកឧត្ដម Jeffrey D. Sachs បានអះអាង​ថា ឯកឧត្ដមត្រៀមជានិច្ច ដើម្បធ្វើយ៉ាង​ណា​ជួយដល់កម្ពុជា ជំរុញការអភិវឌ្ឍរបស់កម្ពុជា តំបន់អាស៊ាន និងតំបន់ដទៃទៀត ឱ្យមានការ​អភិវឌ្ឍប្រកប​ដោយចីរភា​ព​។

ជាការឆ្លើយតប សម្ដេចតេជោនាយករដ្ឋមន្ត្រីបានថ្លែងអំណរគុណចំពោះ ឯកឧត្ដម សា​ស្ត្រា​ចារ្យ Jeffrey D. Sachs ហើយក៏បានមានប្រសាសន៍ថា ការអភិវឌ្ឍន៍ទាំងឡាយណាដែល​មាន​នៅកម្ពុជា នោះសុទ្ធសឹងតែជាកិច្ចខិតខំប្រឹងប្រែងរបស់ប្រជាជន និងរាជរដ្ឋាភិបាលកម្ពុជា ដែលនាំកម្ពុជាមកដល់ការអភិវឌ្ឍដល់ចំណុចនេះ។ សម្ដេចតេជោបានបន្តថា កម្ពុជាមាន​ម​ហិ​ច្ឆិតា ធ្វើយ៉ាងណាជំរុញកម្ពុជាឱ្យក្លាយទៅជាប្រទេសមានចំណូលកមធ្យមកម្រិតខ្ពស់​នៅឆ្នាំ​២​០៣០ និងជាប្រទេសមានចំណូលខ្ពស់នៅឆ្នាំ២០៥០។ កន្លងមកកម្ពុជាបានដាក់ចេញនូវគោ​ល​​នយោបាយផលិតស្បៀង និងនាំអង្ករចេញ ហើយក៏បានទទួលជោកជ័យ ជាពិសេស​ទៅ​លើ​​គោល​នយោ​បាយផលិតស្បៀង ដែលកម្ពុជា ជាប្រទេសមួយធ្លាប់ខ្វះស្បៀងអាហារ បាន​ប្រែ​​ក្លាយទៅជាប្រទេសមួយមានអតិរេកស្បៀងទៅវិញ។ ជាងនេះទៀត កម្ពុជាក៏បានដាក់​ចេ​ញ​នូវគោលនយោបាយឧស្សាហកម្មផងដែរ ដើម្បីធ្វើយ៉ាងណាជំរុញកម្ពុជាឱ្យឆ្ពោះទៅកាន់ ប្រ​ទេ​សដែលមានចំណូលមធ្យមកម្រិតខ្ពស់ និងប្រទេសមានចំណូលខ្ពស់នៅឆ្នាំ២០៥០។ សម្ដេ​ច​​តេជោបានលើឡើងថា កាលពី១៥ឆ្នាំមុន សម្ដេចបានជួបជាមួយនឹង ឯកឧត្ដម Jeffrey  គឺ​បា​ន​ពិភាក្សាគ្នា អំពីបញ្ហាការអភិវឌ្ឍសហវត្សរ៍។ ប៉ុន្តែនៅពេលនេះ គឺពិភាក្សាជាថ្មីម្ដងទៀត លើ​ការអភិវឌ្ឍប្រកបដោយចីរភាពវិញ ហើយការអភិវឌ្ឍន៍ ប្រកបដោយចីរភាពនេះ គឺមាន​សារៈ​សំខាន់ណាស់ សំខាន់ជាងគេបំផុតគឺវិស័យបរិស្ថានតែម្តង។ សម្តេចតេជោបន្តថា ប​ញ្ហា​ប​ច្ចុ​ប្ប​ន្ន​នេះ គឺបញ្ហាស្ទះចរាចរណ៍ ដែលកាលពី១៥ឆ្នាំមុន មិនដែលបានឃើញទេ ហើយក៏ដូច​ជា​បញ្ហាចំណតរថយន្ត បញ្ហាសំណល់រឹង សំណល់រាវ ជាពិសេសទៅទៀតនោះ គឺបញ្ហា​ប្រែ​ប្រួ​លអាកាសធាតុ ដែលបញ្ហានេះបាននាំមកនូវការបារម្ភសម្រាប់កម្ពុជា ជាពិសេស​លើ​វិស័​យ​ក​សិកម្ម និងធនធានទឹកផងដែរ ដែលធ្វើឱ្យកម្រិតទឹកនៅកម្ពុជាមានកម្រិតទាប។ ក្នុងន័យនេះ​ស​ម្ដេចតេជោ បានគូសបញ្ជាក់បន្ថែមថា យើងគប្បីណារួមគ្នាធ្វើការដោះស្រាយ ជាពិសេស​បញ្ហា​ប្រែ​ប្រួលអាកាសធាតុ ដែលកម្ពុជាគាំទ្រគោលនយោបាយ និងរាល់អ្វីៗដែលជា​ពាក់ព័ន្ធ​នឹង​ប​ញ្ហា​​នេះ ដែលអង្គការសហប្រជាជាតិបានដាក់ចេញមក៕

ដោយ ជឹម ណារី