ឯកឧត្តមកិត្តិនីតិកោសលបណ្ឌិត ប៊ិន ឈិន អញ្ជើញជាអធិបតីបិទធ្វើលំហាត់សមយុទ្ធទ្រង់ទ្រាយធំ ស្តីពីសន្តិសុខ នៅអាកាសយានដ្ឋានអន្តរជាតិភ្នំពេញ

40

នៅព្រឹកថ្ងៃទី១០ ខែមករា ឆ្នាំ២០២០ ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្ដីប្រចាំការ រដ្ឋមន្រ្ដីទទួល​បន្ទុកទីស្ដីការ​​គណៈរដ្ឋមន្រ្ដី និងជាប្រធានគណៈកម្មាធិការជាតិសន្តិសុខអាកាសចរណ៍ស៊ីវិល បានអញ្ជើញជាអធិបតីក្នុងពិធីបិទធ្វើ​លំហាត់​សមយុទ្ធទ្រង់ទ្រាយធំ ស្តីពីសន្តិសុខ នៅអាកាសយានដ្ឋានអន្តរជាតិភ្នំពេញ។ អញ្ជើញចូលរួមក្នុងពិធីនេះដែរមានឯកឧត្តម ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ ឯកឧត្តម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល ឯកឧត្តម សឹង សំណាង មេបញ្ជាការ-បញ្ជាការដ្ឋានកងទ័ពជើងគោក លោក អាឡាំង ប៊្រង អគ្គនាយកក្រុមហ៊ុន Cambodia Airport។

អង្គពិធីក៏បានធ្វើលំហាត់សមយុទ្ធ     នៅអាកាស​យាន​ដ្ឋាន​អន្តរជាតិភ្នំពេញផ្ទាល់តែម្តង ដោយបានប្រព្រឹត្តទៅតាមកូដ AIRPEX-19 ដែលមានលំដាប់នៃ​ព្រឹត្តិការណ៍​សេណារីយ៉ូ ដូចតទៅ៖ ជំហានទី១ ការចុះឈ្មោះអ្នកដំណើរឡើងយន្តហោះនៅបញ្ជារចុះឈ្មោះក្នុងស្រុកចំនួន៣០នាក់ ជំហានទី២ ការឆែកឆេរអ្នកដំណើរ និងឥវ៉ាន់ ជំហានទី៣ ការដឹកជញ្ជូនអ្នកដំណើរតាមរថយន្តទៅកាន់ផ្លូវបរ ជំហានទី៤ អ្នកដំណើរ​ឡើងយន្តហោះ ជំហានទី៥ ការស្នើសុំហោះហើរ និងជនល្មើសចាប់ផ្តើមសកម្មភាព ជំហានទី៦ កម្លាំងអន្តរាគមន៍ធ្វើ​ការឡោម​ព័ទ្ធ​យន្តហោះ ជំហានទី៧ កម្លាំងអន្តរាគមន៍ធ្វើការចរចារដើម្បីរំដោះចំណាប់ខ្មាំង ជំហានទី៨ កម្លាំងអន្តរាគមន៍ធ្វើការវាយ​ប្រហារយន្ត​ហោះដើម្បីរំដោះចំណាប់ខ្មាំង ជំហានទី៩ ការឲ្យអ្នកដំណើរចុះពីយន្តហោះដើម្បីធ្វើការឆែកឆេរ ជំហានទី១០ ការដឹកជញ្ជូន​អ្នកដំណើរ និងក្រុមយានិកទៅកាន់មជ្ឈមណ្ឌលជួបជុំរស់រានមានជីវិត​ ជំហានទី១១ សន្និសីទសារព័ត៌មាន និងជំហានទី១២ ស្ថានការណ៍​ត្រឡប់​​ទៅជាធម្មតា។

ថ្លែងបិទធ្វើ​លំហាត់​សមយុទ្ធទ្រង់ទ្រាយធំ ស្តីពី សន្តិសុខ នៅអាកាសយានដ្ឋានអន្តរជាតិភ្នំពេញ ឯកឧត្តមកិត្តិនីតិកោសល​បណ្ឌិត ប៊ិន ឈិន បានមានប្រសាសន៍គូសបញ្ជាក់ថា តាមរយៈសារាចរណែនាំលេខ០៣ សរណន ស្តីពីការ​គ្រប់​គ្រងគ្រោះអាសន្ននៅក្នុង និងក្បែរអាកាសយានដ្ឋាន នៃព្រះរាជាណាចក្រកម្ពុជា កាលពីឆ្នាំ២០១១ លំហាត់សមយុទ្ធ​សង្គ្រោះ​បន្ទាន់​ចំពោះគ្រោះអាសន្ននេះ ត្រូវបានរៀបចំ និងអនុវត្តឲ្យបានទៀងទាត់ក្នុងរយៈពេល២ឆ្នាំម្តង សម្រាប់សមយុទ្ធទ្រង់ទ្រាយធំ ១ឆ្នាំម្តង​សម្រាប់សមយុទ្ធតាមផ្នែក និង៦ខែម្តងសម្រាប់សមយុទ្ធដែលបង្ហាញនៅលើតុ។ នៅក្នុងឱកាសនេះ ឯកឧត្តមកិត្តិនីតិកោសលបណ្ឌិត ឧប​នា​យករដ្ឋមន្ត្រី បានមាន​ប្រសាសន៍បញ្ជាក់ថា ការធ្វើលំហាត់សមយុទ្ធ ជាព្រឹត្តិការណ៍សេណារីយ៉ូ មួយដែល​រួមចំណែក​យ៉ាង​សំខាន់ក្នុងការធានាសន្តិសុខ និងសុវត្ថិភាពនៃវិស័យអាកាសចរស៊ីវិល ក្នុងករណីមានគ្រោះអាសន្នជាយថាហេតុ។ កន្លងមក រាជរដ្ឋាភិបាលកម្ពុជា តែងតែបាន​រៀបចំ​​ធ្វើលំហាត់សមយុទ្ធជាបន្តបន្ទាប់នៅ​តាមអាកាសយានដ្ឋានអន្តរជាតិទាំង៣ គឺ​អា​កាស​​យានដ្ឋានអន្តរជាតិភ្នំពេញ អាកាស​យាន​ដ្ឋានអន្តរជាតិខេត្តព្រះសីហនុ និងអាកាសយានដ្ឋានអន្តរជាតិសៀមរាប។​ ជាក់ស្តែង​កាលពីថ្ងៃទី១៨ ខែធ្នូ  ឆ្នាំ២០១៩ ថ្មីៗនេះ លំហាត់​សមយុទ្ធទ្រង់ទ្រាយធំត្រូវបានរៀបចំឡើង​នៅអាកាសយានដ្ឋាន​អន្តរ​ជាតិ​សៀមរាប ដោយទទួលបានលទ្ធផល​ប្រកបដោយ​ជោគជ័យ។ នៅក្នុងឱកាសនេះដែរ ឯកឧត្តមកិត្តិនីតិកោសលបណ្ឌិត ប៊ិន ឈិន បានមានប្រសាសន៍លើកឡើងថា អាកាសយានដ្ឋាន​អន្តរ​ជាតិទាំង៣ របស់ព្រះរាជាណាចក្រកម្ពុជា  ជាពិសេសអាកាសយានដ្ឋានអន្តរ​ជាតិភ្នំពេញ និងអាកាសយានដ្ឋានអន្តរជាតិសៀមរាប ដែលជាច្រកទ្វារអន្តរជាតិ បាននិងកំពុងដើរតួនាទីយ៉ាងសំខាន់​ក្នុងការលើក​កម្ពស់កិត្យានុភាពរបស់កម្ពុជាលើឆាកអន្តរជាតិ ក៏ដូចជា​ការធ្វើសមាហរណកម្មកម្ពុជាទៅក្នុងតំបន់ និងពិភពលោក។ ទន្ទឹមនឹងនេះ អាកាសយានដ្ឋានអន្តរជាតិ ក៏បានដើរតួនាទី​សំខាន់​ក្នុង​ការ​រួមចំណែកធ្វើឲ្យមានកំណើនសេដ្ឋកិច្ចជាតិ ដែលរយៈពេល២ទសវត្សរ៍​ចុងក្រោយនេះ កម្ពុជារក្សាបានកំណើនផលិតផលក្នុង​ស្រុកសរុប(ផ.ស.ស)ក្នុងរង្វង់៧%ក្នុង១ឆ្នាំ។  ​             ​​​            ​ ឯកឧត្តមកិត្តិនីតិកោសល បណ្ឌិត ឧបនាយករដ្ឋមន្ត្រីប្រចាំការ បានមាន​ប្រសា​សន៍​បញ្ជាក់បន្ថែមថា គោលបំណងនៃការធ្វើលំហាត់សមយុទ្ធនៅថ្ងៃនេះ  គឺដើម្បីធ្វើការវាយតម្លៃ​លើផែនការគ្រប់គ្រងគ្រោះអាសន្ន ត្រួត​ពិនិត្យទៅលហេ​ដ្ឋារចនាសម្ព័ន្ធនៅបន្ទប់គ្រប់គ្រងគ្រោះអាសន្ន ក៏ដូចជាការត្រួតពិនិត្យ​ទៅលើ​ក្រុម​ការងារ​​គ្រប់គ្រងពេលមាន​គ្រោះ​អាសន្នកើតឡើង ជាអាទិ៍លើការដឹកនាំបញ្ជា ចាត់ចែង និងការសម្រេចចិត្តក្នុងការជួយសង្គ្រោះ​ជនរងគ្រោះ ដែលកើតចេញ​ពី​ឧប្ប​ទ្ធវ​ហេតុនានា នៅក្នុងនិងក្បែរអាកាសយានដ្ឋាន។ ទន្ទឹមនឹងនោះ ការធ្វើលំហាត់សមយុទ្ធនេះ ក៏ជាការវាយតម្លៃលើប្រព័ន្ធ​ផ្សព្វ​ផ្សាយ​ជូនសាធារណៈ​ជន​ជាតិ និងអន្តរជាតិផងដែរ។ ការធ្វើ​សម​យុទ្ធថ្ងៃនេះ គឺជា​លើកទី១​ដែលផ្តោតលើប្រធានបទស្តីពី សន្តិសុខ ដែលបណ្តាឆ្នាំកន្លងមក ការធ្វើសមយុទ្ធ​បានផ្តោត​ការយក​ចិត្ត​ទុក​ដាក់តែ​ទៅ​លើ​ប្រធានបទស្តីពី សុវត្ថិភាព ក្នុងវិស័យអាកាសចរណ៍ស៊ីវិលប៉ុណ្ណោះ។

គួរបញ្ជាក់ថា ការធ្វើ​សម​យុទ្ធនៅថ្ងៃនេះដែរ មានការចូលរួមពីអង្គភាព​អន្តរាមន៍​មកពីខាងក្រៅ រួមមាន ទី១កងពលតូច ង ៧០ ចំនួន៣៤នាក់ មាន​រថ​យន្ត​៤គ្រឿង ទី២កងពលតូចទ័ពពិសេស​ឆត្រយោង​៩១១ ចំនួន៨៨នាក់  មានរថយន្ត៧គ្រឿង ទី៣កងកម្លាំងពិសេសប្រឆាំងភេរវកម្ម ចំនួន៣៥នាក់ មានរថយន្ត៧គ្រឿង ទី៤ទ័ព​អាកាស ចំនន៣៤នាក់ មានរថយន្ត២គ្រឿង និងយន្តហោះប្រភេទ MA60 មួយគ្រឿង  និងព្រមទាំងមានកងកម្លាំងមានសមត្ថកិច្ច និងបុគ្គ​លិក​​ភ្នាក់ការឯកជន ដែលកំពុង​បម្រើ​ការ ក្នុងអាកាសយានដ្ឋានអន្តរជាតិភ្នំពេញ ចូលរួមផងដែរ៕