ភ្នំពេញ ថ្ងៃទី៣០ ខែធ្នូ ឆ្នាំ២០១៩ — លោកជំទាវ Felicidade de Sousa Gruterres ឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រខាងកើត ដែលបញ្ចប់អាណត្តិបេសកកម្មការទូតនៅកម្ពុជា ត្រូវបានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ អនុញ្ញាតឱ្យចូលជួបសម្ដែងការគួរសម និងជម្រាបលា នាព្រឹកថ្ងៃទី ៣០ ខែ ធ្នូ ឆ្នាំ២០១៩ នៅវិមានសន្តិភាព។
ឯកឧត្តម អ៊ាង សុផល្លែត ជំនួយការសម្ដេចតេជោថ្លែងឱ្យដឹងក្រោយជំនួបនោះថា លោកជំទាវ បានគោរពថ្លែងអំណរគុណយ៉ាងជ្រាលជ្រៅជាទីបំផុត ក្នុងឱកាសដែលលោកជំទាវបានទទួលនូវគ្រឿងឥស្សរិយយសពីព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា។ លោកជំទាវ បានមានប្រសាសន៍ថា លោកជំទាវពិតជាមានកិត្តិយសយ៉ាងខ្លាំង ដែលបានមកបំពេញបេសកកម្មការទូតនៅព្រះ រាជាណាចក្រកម្ពុជា ហើយបានបញ្ជាក់ថា ក្នុងរយៈពេល៤ឆ្នាំកន្លងនេះ បេះដូងរបស់ លោកជំទាវ គឺស្ថិតនៅក្នុងប្រទេសកម្ពុជា ហើយបានពិនិត្យឃើញថាកម្ពុជាគឺជាប្រទេសដ៏គំរូ មួយ ដែលអាចដកស្រង់បទពិសោធន៍ ហើយយកបទពិសោធន៍នេះ ដើម្បីជាការរៀនសូត្រផង និងជាការចែករំលែក រវាងមិត្តភក្កិ និងប្រទេសដទៃទៀតផងដែរ។ លោកជំទាវបានឃើញនូវ សុខសន្តិភាព ស្ថិរភាពរបស់កម្ពុជា ដែលសុខសន្តិភាព ស្ថិរភាពនេះហើយ ដែលបានជំរុញនូវការអភិវឌ្ឍរបស់កម្ពុជាយ៉ាងឆាប់រហ័ស។ លោកជំទាវឯកអគ្គរដ្ឋទូតបានបន្ដថា កម្ពុជាគឺជាប្រទេសមួយ ដែលមានប្រជាជនរីករាយស្រស់ថ្លា ហើយដែលភាពស្រស់ថ្លា ជាមួយនឹងសុខសន្តិភាព សុវត្ថិភាពនេះហើយ ដែលជាការទាក់ទាញសម្រាប់អ្នកទេសចរមកធ្វើទេសចរណ៍ និងទស្សនានៅកម្ពុជា ព្រមទាំងមកវិនិយោគនៅកម្ពុជា ពោលគឺកត្តាសុវត្ថិភាពនេះហើយដែលជាការទាក់ទាញជាទីបំផុត។ លោកជំទាវក៏បានសម្ដែងនូវការរីករាយ ដែលលោកជំទាវបានក្លាយជាអ្នកការទូតរបស់ទីម័រខាងកើត លើកទីមួយមកកាន់កម្ពុជា។ លោកជំទាវ ក៏បានគោរពថ្លែងអំណរគុណយ៉ាងជ្រាលជ្រៅជាទីបំផុត ជូនចំពោះរាជរដ្ឋាភិបាលកម្ពុជា ដែលបានផ្ដល់អាហារូបករណ៍ដល់និស្សិតទីម័រខាកើត មកសិក្សានៅកម្ពុជា ដែលសព្វថ្ងៃសិស្សទាំងនោះ កំពុងតែបន្តការសិក្សានៅកម្ពុជានាពេលនេះ។
ជាការឆ្លើយតប សម្ដេចតេជោ ហ៊ុន សែន បានសម្តែងនូវការអបអរសាទរជូនចំពោះលោកជំទាវ ដែលបានទទួលឥស្សរិយយស ពីព្រះករុណាព្រះមហាក្សត្រនៃព្រះរាជាណាចក្រកម្ពជា។ សម្តេចតេជោបានមានប្រសាសន៍ថា ប្រទេសកម្ពុជានិងប្រទេសទីម័រខាកើត គឺជាប្រទេសដែលកំពុងអភិវឌ្ឍន៍ ដូច្នេះចាំបាច់យើងត្រូវការចែករំលែកបទពិសោធន៍រវាងគ្នាទៅវិញទៅមក កម្ពុជាមានបទពិសោធន៍សម្រាប់ចែកជូនទីម័រខាងកើត ហើយទីម័រខាកើតក៏មានបទពិសោធន៍សម្រាប់ចែកជូនដល់កម្ពុជាផងដែរ អ្វីដែលជាកត្តាសំខាន់នោះ គឺយើងផ្លាស់ប្ដូរបទពិសោធន៍ទៅវិញទៅមក រៀនសូត្រពីគ្នាទៅវិញទៅមក ហើយប្រើប្រាស់នូវអ្វីដែលយើងមាននោះ ដើម្បីជំរុញកិច្ចសហប្រតិបត្តិការរវាងប្រទេសទាំងពីរដើម្បីទទួលនូវផលប្រយោជន៍រួមទាំងសងខាង។
សម្ដេចតេជោក៏បានមានប្រសាសន៍ផងដែរថា សម្ដេចពិតជាមានការរីករាយណាស់ ដែលសិស្សរបស់ទីម័រខាកើតបានមកសិក្សានៅកម្ពុជា ហើយបានបញ្ជាក់ថា កម្ពុជាចង់ឱ្យមានសិស្សបរទេសច្រើនមកសិក្សានៅកម្ពុជា គឺ ដើម្បីចែករំលែកនូវចំណេះដឹងរវាងនិស្សិត និងនិស្សិត ហើយក៏ដើម្បីជាកម្មវិធីផ្លាស់ប្ដូរនិស្សិតរវាងប្រទេសកម្ពុជានិងប្រទេសដទៃទៀតផង។ សម្ដេចតេជោនាយករដ្ឋមន្ត្រីក៏បាន ជូនពរឱ្យលោកជំទាវបានទទួលជោគជ័យជាបន្តបន្ទាប់ទៀត ជាពិសេសនៅឆ្នាំថ្មីដែលឈានមកដល់ និងបេសកកម្មថ្មីរបស់លោកជំទាវនាពេលអនាគត៕
ដោយ ជឹម ណារី
