ភ្នំពេញ ថ្ងៃទី១៨ ខែធ្នូ ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានអំពាវនាវឱ្យនិស្សិត ត្រូវខិតខំប្រឹងប្រែងអភិវឌ្ឍន៍សមត្ថភាពចំណេះដឹងរបស់ខ្លួនបន្ថែមទៀត ដោយសម្ដេចបានអះអាងថា ការសិក្សា និងចំណេះដឹងគ្មានទីបញ្ចប់នោះឡើយ ដូច្នេះទាមទារឱ្យមានការ ខិតខំប្រឹងប្រែង។
ក្នុងពិធីប្រគល់សញ្ញាបត្រដល់និស្សិតចំនួនជិត ៣,០០០នាក់ នៃសាកលវិទ្យាល័យវេស្ទើន នាព្រឹកថ្ងៃទី ១៨ ខែធ្នូ ឆ្នាំ២០១៩ នៅមជ្ឈមណ្ឌលសន្និបាត និងពិព័រណ៍កោះពេជ្រ សម្ដេចតេជោនាយករដ្ឋមន្ត្រីបានគូសបញ្ជាក់ថា ការដាំមនុស្សមានការលំបាក ហើយប្រើដើមទុនច្រើនណាស់ និងមិនងាយស្រួលដូចការដាំដើមឈើនោះឡើយ ខណៈដែលក្រោយរបបប្រល័យពូជសាសន៍ ប៉ុល ពត កម្ពុជាបានប្រឹងប្រែងក្នុងការដាំមនុស្សឡើងវិញ។ សម្ដេចតេជោបានលើកឡើងថា បើនិយាយអំពីការសិក្សាវិញ គឺតាំងពីថ្នាក់បឋមសិក្សា រហូតដល់ចប់ថ្នាក់បរិញ្ញាបត្រជាន់ខ្ពស់ ត្រូវប្រើប្រាស់ពេល១៨ឆ្នាំឯណោះ ប៉ុន្ដែគ្មានជម្រើសអ្វីក្រៅពីការខិតខំឡើយ។
តាមរបាយការណ៍របស់សាកលវិទ្យាល័យបានបង្ហាញថា សាកលវិទ្យាល័យវេស្ទើន ជាសាកលវិទ្យាល័យឯកជនមួយនៅកម្ពុជា ដែលបាននិងកំពុងធ្វើសកម្មភាពរួមចំណែកជាមួយរាជរដ្ឋាភិបាលក្នុងការអភិវឌ្ឍធនធានមនុស្ស។ សាកលវិទ្យាល័យកំពុងបណ្តុះបណ្តាលនិស្សិតថ្នាក់បរិញ្ញាបត្រនិងក្រោយបរិញ្ញាបត្រ ដោយបានអនុវត្តន៍តាមផែនការរបស់ខ្លួន ក្នុងគោលដៅចូលរួមអនុវត្តន៍ តាមគោលនយោបាយ និងផែនការយុទ្ធសាស្រ្តវិស័យអប់រំលើការធានាសេវាអប់រំ ប្រកបដោយគុណភាពខ្ពស់។ ដោយឈរលើមូលដ្ឋានគុណភាពជាចម្បង សាកលវិទ្យាល័យបានខិតខំកែលម្អ និងអភិវឌ្ឍន៍កម្មវិធីសិក្សាជាប្រចាំ ដើម្បីឆ្លើយតបទៅនឹងទីផ្សារការងារ និងការអភិវឌ្ឍសេដ្ឋកិច្ចកម្ពុជានោះ សាកលវិទ្យាល័យ បានធ្វើកិច្ចសហប្រតិបត្តិការ ជាមួយសាកលវិទ្យាល័យនានានៅបរទេស រួមមាន សាកលវិទ្យាល័យកាសេមបណ្ឌិត, សាកលវិទ្យាល័យAssumption, សាកលវិទ្យាល័យ Chiang Mai, សាកលវិទ្យាល័យ Thamasat, សាកលវិទ្យាល័យ Kasem Bundit (Thailand), សាកលវិទ្យាល័យ Yeung Nam ( South Korea) និងសាកលវិទ្យាល័យ Nangyang Institute of Management ( Singapore ) សម្រាប់ការបណ្តុះបណ្តាលថ្នាក់បរិញ្ញាបត្រ កម្មវិធីអន្តរជាតិ សិក្សាជាភាសាអង់គ្លេស។
ជាមួយគ្នានេះដែរ ជារៀងរាល់ឆ្នាំសាកលវិទ្យាល័យ ក៏បានផ្តល់បទពិសោធន៍ដល់និស្សិតកំពុងសិក្សា តាមរយៈការអញ្ជើញវាគ្មិនពីស្ថាប័នរដ្ឋ និងឯកជនមកធ្វើបទឧទ្ទេសនាម ដើម្បីផ្សារភ្ជាប់ទ្រឹស្តីទៅនឹងការអនុវត្តជាក់ស្តែងផងដែរ។ ក្នុងឆ្នាំ២០១៩-២០២០នេះ មាននិស្សិតកំពុងសិក្សាចំនួន ៥,៥១៧នាក់ (នារី ២,២៥១នាក់) ហើយគិតចាប់ពីឆ្នាំសិក្សា២០០៣-២០០៤ដល់ឆ្នាំសិក្សា២០១៨-២០១៩ កន្លងមកនេះ និស្សិតបានបញ្ចប់ការសិក្សា ចំនួន ១៣, ៥០៨នាក់ (នារី ៦,៥៤៣នាក់)។ ទន្ទឹមនេះ ក្នុងចំណោមនិស្សិតដែលបានបញ្ចប់ការសិក្សាទាំងនេះ អ្នកដែលមានការងារធ្វើមានចំនួន៩៤ភាគរយ៕
ជឹម ណារី
