ភ្នំពេញ ថ្ងៃទី១៨ ខែធ្នូ ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតី តេជោ ហ៊ុន សែន បានមានប្រសាសន៍ ស្នើឱ្យប្រជាពលរដ្ឋកុំឱ្យមានការព្រួយបារម្ភ និងអ្នកប្រើប្រាស់បណ្ដាញសង្គមទាំងអស់កុំធ្វើការឃោសនាអកុសលណាមួយ ទៅលើការធ្វើសមយុទ្ធពីរ ដែលកំពុងចាប់ផ្ដើមនៅខេត្ត សៀមរាប និងខេត្តស្វាយរៀង នាថ្ងៃទី ១៨ ខែធ្នូ ឆ្នាំ២០១៩នោះ។
ក្នុងពិធីប្រគល់សញ្ញាបត្រដល់និស្សិតចំនួន ២,៨៣១នាក់ នៃសាកលវិទ្យាល័យវេស្ទើន នាព្រឹកថ្ងៃទី ១៨ ខែធ្នូ ឆ្នាំ២០១៩ នៅមជ្ឈមណ្ឌលសន្និបាត និងពិព័រណ៍កោះពេជ្រ សម្ដេចតេជោនាយករដ្ឋមន្ត្រីមានប្រសាសន៍ថា ថ្ងៃនេះមានសមយុទ្ធពីរកើតឡើងផ្ទួនគ្នាតែម្ដង ដែលចង់ជម្រាបជូនប្រជាពលរដ្ឋរបស់យើងឱ្យបានជ្រាបគឺសមយុទ្ធទីមួយ គឺការសង្គ្រោះគ្រោះមហន្តរាយសម្រាប់ពេលដែលមានឧបទ្ទវហេតុនៃការធ្លាក់យន្តហោះ ដែលកិច្ចការនេះប្រព្រឹត្តទៅនៅឯព្រលានយន្តហោះអន្តរជាតិខេត្តសៀមរាប។ ដូច្នេះ សូមប្រជាពលរដ្ឋកុំមានការភ័យព្រួយ ឬក៏ការប្រើប្រាស់នៅបណ្ដាញសង្គមដែលលើកឡើងអំពីការមួលបង្កាច់ ទាក់ទងនឹងការធ្លាក់យន្តហោះជាដើម ព្រោះកិច្ចការដែលធ្វើនៅទីនោះ ជាសមយុទ្ធជាក់ស្ដែងដែលមានការធ្លាក់យន្តហោះ ប៉ុន្តែមិនមែនយកយន្តហោះបើកទៅឱ្យធ្លាក់នោះទេ។ សម្ដេចតេជោបានបន្តថា ចំណែកសមយុទ្ធទីពីរ ក៏កំពុងតែចាប់ផ្ដើមដែរគឺនៅឯខេត្តស្វាយរៀង គឺសមយុទ្ធរួមគ្នារវាងកងទ័ពកម្ពុជា និងកងទ័ពវៀតណាម ដើម្បីសង្គ្រោះគ្រោះមហន្តរាយនៅតាមព្រំដែន។ ដូច្នេះសូមកុំឱ្យមានការព្រួយបារម្ភ ឬការធ្វើការឃោសនាអកុសលណាមួយទៅលើសមយុទ្ធទាំងពីរនេះ។
គួរបញ្ជាក់ដែរថា នៅថ្ងៃទី១៨ ខែធ្នូ ឆ្នាំ២០១៩ នៅអាកាសយានដ្ឋានអន្តរជាតិសៀម រាប មានរៀបចំធ្វើលំហាត់សមយុទ្ធទ្រង់ទ្រាយធំគ្រប់គ្រងគ្រោះអាសន្នប្រចាំឆ្នាំ (Full Scale Airport Emergency Exercise REPEX-19) ដោយធ្វើការហ្វឹកហាត់ សាកល្បង និងផ្តល់បទពិសោធន៍ដល់ស្ថាប័នពាក់ព័ន្ធនានា សំដៅលើកកម្ពស់ការជួយសង្គ្រោះជនរងគ្រោះ ឱ្យបាន ទាន់ពេលវេលា នៅពេលមានឧបទ្ទវហេតុគ្រោះថ្នាក់ធ្លាក់យន្តហោះ ដែលអាចកើតមានឡើងជាយថាហេតុ។ ក្នុងលំហាត់សមយុទ្ធទ្រង់ទ្រាយធំនេះ មានការដុតប្រេង និងដុតកង់ឡានចាស់ៗ បង្កើតបានជាអណ្តាតភ្លើង និងផ្សែងខ្មួលខ្មាញ់ជាសិប្បនិម្មិត នៃការធ្លាក់យន្តហោះដែលជាប្រធានបទ នៃការធ្វើលំហាត់សមយុទ្ធទ្រង់ទ្រាយធំនេះ។ ទន្ទឹមនេះ ក៏មានការប្រកាសអាសន្នដល់សមត្ថកិច្ច អាជ្ញាធរដែនដី កងកម្លាំងប្រដាប់អាវុធ មន្ទីរ អង្គភាពជុំវិញខេត្ត ក្រុមសង្គ្រោះ រថយន្តសង្គ្រោះបន្ទាន់របស់មន្ទីរពេទ្យនានា ជាពិសេសរថយន្តពន្លត់អគ្គិភ័យ នៅក្នុងខេត្តសៀមរាប។ ដោយឡែក នាព្រឹកថ្ងៃទី១៨ ខែធ្នូ ឆ្នាំ២០១៩នេះដែរ កងយោធពលខេមរភូមិន្ទ និងកងទ័ពប្រជាជនវៀតណាម បានរៀបចំពិធីបើក និងបិទលំហាត់សង្គ្រោះគ្រោះមហន្តរាយ នៅតំបន់ព្រំដែនគោករួមគ្នា និងការងារមនុស្សធម៌ឆ្នាំ២០២០ នៅភូមិដូនទៃ ឃុំទួលស្តី ស្រុកចន្រ្ទា ខេត្តស្វាយរៀង ដែលពិធីនេះ ប្រព្រឹត្តធ្វើឡើងក្រោមវត្តមាន សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងនាយឧត្តមសេនីយ៍ ង៉ូ ស៊ុនលិច្ស រដ្ឋមន្ត្រីក្រសួងការពារប្រទេសវៀតណាម។ ការធ្វើលំហាត់យោធានេះ គឺក្នុងគោលបំណងចែករំលែកបទពិសោធន៍រួមគ្នា និងផ្តល់នូវផលប្រយោជន៍ ដល់ប្រជាជននៃប្រទេសទាំងពីរ នៅពេលដែលមានគ្រោះមហន្តរាយកើតឡើង ដូចជាគ្រោះធម្មជាតិ ទឹកជំនន់ ភ្លើងឆេះព្រៃ ឬគ្រោះធម្មជាតិផ្សេងៗ ដែលកើតឡើងជាយថាហេតុ ព្រមជាមួយនឹងការចូលរួមចំណែកលើកកម្ពស់កិច្ចសហប្រតិបត្តិការ និងការអភិវឌ្ឍនៅតាមតំបន់ព្រំដែន ឱ្យមានការរីកចម្រើន។ ការរៀបចំសមយុទ្ធរវាងកងទ័ពកម្ពុជា និងកងទ័ពវៀតណាម គឺជាគំនិតផ្តួចផ្តើមរបស់សម្តេចតេជោ ហ៊ុន សែន ដែលធ្វើឡើងក្នុងគោលបំណងត្រៀមសហការជួយប្រជាពលរដ្ឋនៅតាមព្រំដែន ក្នុងករណីមានគ្រោះមហន្តរាយផ្សេងៗ៕