ភ្នំពេញ ថ្ងៃទី០៤ ខែធ្នូ ឆ្នាំ២០១៩ — ឯកឧត្តម Amjad ALi sher ឯកអគ្គរដ្ឋទូតសាធារណរដ្ឋឥស្លាមប៉ាគីស្ថានដែលបញ្ចប់អាណត្តិការទូតនៅកម្ពុជា ត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា អនុញ្ញាតឱ្យចូលជួបសម្តែងការគួរសម និងជម្រាបលា នាព្រឹកថ្ងៃទី០៤ ខែធ្នូ ឆ្នាំ២០១៩ នៅវិមានសន្តិភាព។
ឯកឧត្ដម អ៊ាង សុផល្លែត ជំនួយការសម្ដេចតេជោបានឱ្យដឹងក្រោយជំនួបនោះថា ឯកឧត្តម Amjad ALi sher បានជម្រាបជូនសម្តេចតេជោថា រយៈពេល៦ឆ្នាំកន្លះនៅកម្ពុជា ហើយឯកឧត្តមបានរួមចំណែកជាច្រើនក្នុងការពង្រឹង ពង្រីកកិច្ចសហប្រតិបត្តិការរវាងកម្ពុជា និងប៉ាគីស្ថាន ក្នុងការលើកស្ទួយ និងជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគ។ ឯកឧត្ដមក៏បានលើកឡើងពីការចូលរួមចំណែក ក្នុងការរៀបចំឱ្យមានការផ្លាស់ប្ដូរទស្សនកិច្ចរវាងថ្នាក់ដឹកនាំនៃប្រទេសទាំងពីរ ដូចជាការនាំមកនូវទស្សនកិច្ចរវាងប្រធានព្រឹទ្ធសភាប៉ាគីស្ថានមកកម្ពុជា និងការចូលរួមសន្និសីទផ្សេងៗទៀតរបស់ថ្នាក់ដឹកនាំប៉ាគីស្ថាននៅកម្ពុជា។ ឯកឧត្តមឯកអគ្គរដ្ឋទូតបានសម្ដែងនូវក្តីរីករាយចំពោះការទទួលបានបទពិសោធន៍ពីកម្ពុជា ជាពិសេសបទពិសោធន៏នៃនយោបាយឈ្នះ ឈ្នះ របស់សម្ដេចតេជោនាយករដ្ឋមន្ត្រី ដែលនេះគប្បីជាមេរៀនរបស់ប្រទេស ដទៃផ្សេងទៀតសិក្សារៀនសូត្រជាបទពិសោធន៍មួយ ក្នុងការនាំមកនូវសន្តិភាព ស្ថិរភាព និងការអភិវឌ្ឍ រួមជាមួយភាពសុខដុមរមនា រវាងប្រជាជននិងប្រជាជន រវាងសាសនា និងសាសនាផងដែរ។ ឯកឧត្តមបានបញ្ជាក់ដែរថា កម្ពុជាជាប្រទេសដ៏ស្រស់បំព្រងដែលគួរឱ្យចង់រស់នៅ និងស្នាក់អាស្រ័យ។ ឯកឧត្ដមឯកអគ្គរដ្ឋទូតបានចាត់ទុក នេះជាបេសកកម្មកាទូតរបស់ឯកឧត្ដមលើកទីមួយ ហើយក៏ជាលើកចុងក្រោយរបស់ឯកឧត្តមមកកាន់កម្ពុជា ក្នុងន័យនេះឯកឧត្តមមានប្រសាសន៍ថា អារម្មណ៍ និងចងចាំនូវអ្វីដែលបានចូលរួមចំណែកជាមួយកម្ពុជា និងអ្វីដែលទទួលបានតាមរយៈបទពិសោធន៍ពីព្រះរាជាណាចក្រកម្ពុជា ហើយបន្តចូលរួមចំណែកបន្ថែមទៀតក្នុងការបន្តជំរុញទំនាក់ ទំនងទ្វេភាគីឱ្យកាន់តែរឹងមាំទ្វេឡើងថែមទៀត។
ជាការឆ្លើយតបសម្ដេចតេជោ ហ៊ុន សែន បានមានប្រសាសន៍ថា ឯកឧត្ដមឯកអគ្គរដ្ឋទូតប៉ាគីស្ថាន បានធ្វើការយ៉ាងច្រើន នៅក្នុងការជំរុញពង្រឹង និងពង្រីកកិច្ចសហប្រតិបត្តិការ រវាងប្រទេសទាំងពីរ។ សម្ដេចតេជោបានថ្លែងថា ឯកឧត្តម បានចូលរួមរៀបចំខួបអនុស្សាវរីយ៍នៃទំនាក់ទំនងការទូតរវាងប្រទេសទាំងពីរលើកទី៦៥ និងជំរុញឱ្យមានទស្សនកិច្ចរបស់ប្រធានរដ្ឋសភាមកកាន់កម្ពុជា និងទស្សនកិច្ចរបស់ថ្នាក់ដឹកនាំកំពូលៗរបស់ប៉ាគីស្ថានមកកាន់កម្ពុជាផងដែរ។ ជាងនេះទៀត ឯកឧត្តមថែមទាំងបានចូលរួមចំណែក ក្នុងការលើកស្ទួយទំនាក់ទំនងសេដ្ឋកិច្ច ពាណិជ្ជកម្ម វិនិយោគជាមួយ កម្ពុជា។ សម្ដេចតេជោបានបន្ថែមថា ទំនាក់ទំនងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគនេះហើយ ដែលជាមូលដ្ឋាន សម្រាប់ការពង្រឹងទំនាក់ទំនងការទូតរវាងប្រទេសទាំងពីរ៕
ដោយ ជឹម ណារី
