ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ ទទួលជួបជាមួយគណៈប្រតិភូខេត្តយូណាន

117

ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ទទួលគណៈប្រតិភូខេត្តយូណាន ដឹកនាំដោយ ឯកឧត្តម Zhang Guohua អភិបាលរងខេត្តយូណាន នៃសាធារណរដ្ឋប្រជាមានិតចិន ចូលជួបសម្តែងការគួរសម និងពិភាក្សា ការងារអំពីដំណើរការសាងសង់អាកាសយានដ្ឋានអន្តរជាតិសៀមរាប-អង្គរ។

នារសៀលថ្ងៃទី៣ ខែធ្នូ ឆ្នាំ២០១៩ នៅទីស្តីការគណៈរដ្ឋមន្រ្តី ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានទទួលជួបជាមួយគណៈប្រតិភូខេត្តយូណាន ដែលដឹកនាំដោយ ឯកឧត្តម Zhang Guohua អភិបាលរងខេត្តយូណាន នៃសាធារណរដ្ឋប្រជាមានិតចិន ក្នុងឱកាសបំពេញទស្សនកិច្ចការងារនៅក្នុងព្រះរាជាណាចក្រកម្ពុជា ដើម្បីជួបសម្តែងការគួរសម និងពិភាក្សាការងារមួយចំនួនទាក់ទងនឹងដំណើរការសាងសង់អាកាសយានដ្ឋានអន្តរជាតិសៀមរាប-អង្គរ ក្នុងគោលបំណងស្នើសុំការគាំទ្រពីរាជរដ្ឋាភិបាលកម្ពុជា ដើម្បីបន្តការគាំទ្រ និងពន្លឿនការងារគម្រោងសាងសង់អាកាសយានដ្ឋានអន្តរជាតិសៀមរាប-អង្គរ ឱ្យសម្រេចជោគជ័យ និងមានប្រសិទ្ធភាព។

សូមបញ្ជាក់ជូនផងដែរថា កិច្ចព្រមព្រៀងសាងសង់អាកាសយានដ្ឋានអន្តរជាតិសៀមរាប-អង្គរនេះ ត្រូវបានចុះហត្ថលេខាកាលពីឆ្នាំ២០១៦ ក្រោមវត្តមានដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងឯកឧត្តម ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិន នៅរាជធានីភ្នំពេញ។

ក្នុងកំឡុងពេលនៃដំណើរទស្សនកិច្ចនេះ គណៈប្រតិភូខេត្តយូណាន និងតំណាងក្រុមហ៊ុនសាងសង់គម្រោង រួមមាន Yunnan Investment Group, Yunnan Construction and Investment Holding Group និង Yunnan Airport Group បានចុះពិនិត្យទីតាំងគម្រោង និងបានជួបប្រជុំពិភាក្សាការងារជាមួយអាជ្ញាធរពាក់ព័ន្ធមួយចំនួន ព្រមទាំងបានឆ្លៀតឱកាសចូលជួបសម្តែងការគួរសមជាមួយឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីផងដែរ។

ក្នុងជំនួបដ៏មានសារសំខាន់នេះ ឯកឧត្តម Zhang Guohua បានរាយការណ៍ពីវឌ្ឍនភាពការងារសាងសង់ និងការយកចិត្តទុកដាក់របស់ថ្នាក់ដឹកនាំខេត្តយូណាន ក៏ដូចជារដ្ឋាភិបាលប្រជាជនចិន ចំពោះគម្រោងសាងសង់អាកាសយានដ្ឋានអន្តរជាតិសៀមរាប-អង្គរនេះ ជាគម្រោងអាទិភាពមួយ នៃកិច្ចសហប្រតិបត្តិការអន្តរជាតិ ផ្លូវមួយខ្សែក្រវាត់មួយ រវាងសាធារណរដ្ឋប្រជាមានិតចិន និងព្រះរាជាណាចក្រកម្ពុជា។

ដោយឈរលើសារៈសំខាន់នៃគម្រោងនេះ ឯកឧត្តមប្រធានគណប្រតិភូ ស្នើសុំរាជរដ្ឋាភិបាលកម្ពុជាបន្តផ្តល់ការគាំទ្រ និងជួយសម្រួលការងារពាក់ព័ន្ធនានា ដើម្បីឱ្យការអនុវត្តគម្រោងដំណើរការបានទៅដោយរលូននិងជោគជ័យ។ បន្ថែមពីនេះ ឯកឧត្តមអភិបាលរងក្នុងនាមថ្នាក់ដឹកនាំខេត្តយូណាន  សូមអោយកម្ពុជាមានការជឿជាក់ចំពោះគម្រោងនេះ និងប្តេជ្ញាអនុវត្តន៍គម្រោងសាងសង់នេះ អោយបានចប់រួចរាល់នៅឆ្នាំ២០២៣ខាងមុខ។

ជាការឆ្លើយតប ឯកឧត្តមកិត្តិនីតិកោសលបណ្ឌិត ឧបនាយករដ្ឋមន្រ្តីប្រចាំការ ស្វាគមន៍យ៉ាងកក់ក្តៅចំពោះដំណើរទស្សកិច្ចរបស់ ឯកឧត្តម Zhang Guohua និងគាំទ្រយ៉ាងពេញទំហឹងចំពោះគម្រោងសាងសង់នះ ព្រមទាំងអរគុណចំពោះការប្តេជ្ញាចិត្តរបស់ថ្នាក់ដឹកនាំខេត្តយូណាន ក្នុងការសម្រចគម្រោងសាងសង់នេះអោយបានឆាប់រហ័ស និងសន្យាជួយសម្រួល និងរួមគ្នាដោះស្រាយនូវរាល់បញ្ហានានា ដើម្បីរួមចំណែកក្នុងការអនុវត្តគម្រោងអោយទទួលបានជោគជ័យខ្ពស់៕