ក្រុងប៊ូសាន ថ្ងៃទី២៥ ខែវិច្ឆិកា ឆ្នាំ២០១៩ — រដ្ឋាភិបាលសាធារណរដ្ឋកូរ៉េ បានសន្យាបង្កើនការបើកផ្តល់ហិរញ្ញប្បទានសហ ប្រតិបត្តិការឱ្យបានទ្វេដងដល់បណ្តាប្រទេសអាស៊ានចំនួន៥ ដើម្បីអនុវត្តន៍គោលនយោបាយ ភាគខាងត្បូងថ្មី ដោយផ្តោតលើអាទិភាពចំនួន៥។
ការសន្យាបង្កើនការបើកផ្តល់ហិរញ្ញប្បទានសហប្រតិបត្តិការរបស់រដ្ឋាភិបាលសាធារណរដ្ឋកូរ៉េនេះ ធ្វើឡើងតាមរយៈការចុះអនុស្សរណៈយោគយល់ស្តីពីកិច្ចសហប្រតិបត្តិការអភិវឌ្ឍន៍រវាងសាធារណរដ្ឋកូរ៉េ និងបណ្តាប្រទេសអាស៊ានចំនួន៥គឺ៖ ប្រទេសកម្ពុជា ឡាវ មីយ៉ាន់ម៉ា វៀតណាម និងប្រទេសហ្វ៊ីលីពីន នារសៀលថ្ងៃចន្ទ ១៤រោច ខែកត្តិក ឆ្នាំកុរ ឯកស័ក ព. ស.២៥៦៣ ត្រូវនឹងថ្ងៃទី២៥ ខែវិច្ឆិកា ឆ្នាំ២០១៩ នៅទីក្រុងប៊ូសានដែលភាគី កម្ពុជាតំណាងដោយ ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រីបានអញ្ជើញចូលរួមចុះហត្ថលេខានេះ។
ផ្អែកលើក្របខ័ណ្ឌអនុស្សរណៈនេះ រដ្ឋាភិបាលសាធារណរដ្ឋកូរ៉េនឹងផ្តល់ហិរញ្ញប្បទានសហប្រតិបត្តិការឱ្យបានទ្វេដងដល់ បណ្តាប្រទេសអាស៊ានទាំង៥ ដើម្បីអនុវត្តន៍គោលនយោបាយភាគខាងត្បូងថ្មី ដោយផ្តោតលើអាទិភាព ៥គឺ៖ ១-ភាពជាដៃគូលើវិស័យឌីជីថលសម្រាប់កិច្ចអភិវឌ្ឍន៍ប្រកបដោយចីរភាព, ២- ការលើកកម្ពស់គុណភាពអប់រំថ្នាក់ឧត្តមសិក្សាដើម្បីអនាគតប្រកបដោយវិបុលភាព, ៣- អនាគតសហគមន៍សន្តិភាព មេគង្គ – សាធារណ រដ្ឋកូរ៉េ, ៤-ការកសាងទីក្រុងវៃឆ្លាត ដើម្បីប្រជាជន និងភពផែនដី និង ៥- ការសាងសង់ហេដ្ឋារចនាសម្ព័ន្ធប្រកបដោយបរិយាប័ន្ន ដើម្បីធានាកំណើនប្រកបដោយតុល្យភាព។
ក្នុងន័យនេះ គណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា នឹងខិតខំ ប្រឹងប្រែងបន្តកិច្ចសហប្រតិបត្តិការជាមួយភាគីមិត្ត ដើម្បីធានាឱ្យកម្ពុជាទទួលបានផលប្រយោជន៍ជាអតិប្បរមា ពីការអនុវត្តអនុស្សរណៈយោគយល់នេះ។
នារសៀលថ្ងៃដដែលនេះ ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រីក៏បានបន្តដឹកនាំគណៈប្រតិភូកម្ពុជា ដើម្បីចូលរួមវេទិកាប្រចាំឆ្នាំ២០១៩ ស្តីពីកិច្ចសហប្រតិបត្តិការអភិវឌ្ឍន៍។ ឯកឧត្តមរដ្ឋមន្រ្តីបានអញ្ជើញចូលរួមជាវាគ្មិន ដើម្បីចែករំលែកបទពិសោធន៍របស់កម្ពុជាពាក់ព័ន្ធនឹងកិច្ចសហប្រតិបត្តិការអភិវឌ្ឍន៍ដើម្បីរក្សាសន្តិភាព៕