ភ្នំពេញ ថ្ងៃទី០៧ ខែវិច្ឆិកា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានអំពាវនាវដល់ថ្នាក់ដឹកនាំ និងមន្ត្រីរាជការនៅគ្រប់ក្រសួង-ស្ថាប័ន កងកម្លាំងប្រដាប់ឤវុធ និងឤជ្ញាធរដែន ដីគ្រប់លំដាប់ថ្នាក់ ដៃគូអភិវឌ្ឍន៍ សង្គមស៊ីវិល អង្គការមិនមែនរដ្ឋាភិបាល និងវិស័យឯកជន បន្តផ្តល់កិច្ចសហការ និងការគាំទ្រគ្រប់បែបយ៉ាងឱ្យកាន់តែសកម្ម ដើម្បីក្រសួងផែនការឤចដំណើរការតាមដាន ត្រួតពិនិត្យការអនុវត្ត និងរៀបចំគោលនយោបាយជាតិ ត្រួតពិនិត្យ និង វាយតម្លៃ ផែនការយុទ្ធសាស្ត្រអភិវឌ្ឍន៍ជាតិ ២០១៩- ២០២៣ ទទួលបានជោគជ័យ និងមានប្រសិទ្ធភាពខ្ពស់។ ការអំពាវនាវរបស់សម្ដេចតេជោនាយករដ្ឋមន្ត្រីនេះ ត្រូវបានធ្វើឡើង ក្នុងពិធីផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការ «ផែនការយុទ្ធសាស្ដ្រអភិវឌ្ឍន៍ជាតិ ២០១៩-២០២៣» កាលពីព្រឹកថ្ងៃព្រហស្បតិ៍ ១១កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០៧ ខែវិច្ឆិកា ឆ្នាំ២០១៩ នៅសណ្ឋាគារសុខាភ្នំពេញ។
សម្ដេចអគ្គមហាសេនាបតីតេជោ ហ៊ុន សែន បានថ្លែងថា ដើម្បីសម្រេចបាននូវការអភិវឌ្ឍសង្គម-សេដ្ឋកិច្ច ប្រកបដោយចីរភាព និងបរិយាប័ន្ន ស្របតាម ផែនការយុទ្ធសាស្ត្រ អភិវឌ្ឍន៍ជាតិ ២០១៩-២០២៣ ត្រូវបន្តបង្កើនការសម្របសម្រួលគោលនយោបាយជាតិជាមួយសហគមន៍ដៃគូអភិវឌ្ឍន៍ អ្នកផ្តល់ហិរញ្ញប្បទាន ដោយបង្កើនអភិបាលកិច្ច ជំរុញអនុវត្តន៍កម្មវិធីកែទម្រង់លើគ្រប់វិស័យប្រកបដោយប្រសិទ្ធភាព តាមរយៈការពួត ផ្តុំគ្នាជាប្រព័ន្ធប្រទាក់ក្រឡាគ្នាតែមួយ និងយោងគ្នាទៅវិញទៅមក ដើម្បីសម្រេចបានគោលដៅអភិវឌ្ឍន៍សេដ្ឋកិច្ច សង្គមកិច្ច គ្រប់គ្រងធនធានធម្មជាតិ បរិស្ថាន ឱ្យបានកាន់តែល្អប្រសើរ។ សម្ដេចតេជោបន្ដថា គ្រប់ក្រសួង-ស្ថាប័នញក់ព័ន្ធទាំងអស់ ត្រូវរៀបចំផែនការយុទ្ធសាស្ត្រអភិវឌ្ឍន៍តាមវិស័យរៀងៗខ្លួន តាមរយៈការពិនិត្យមើលឡើងវិញនូវរាល់គម្រោង ឬកម្មវិធីកំពុងដំណើរការ ព្រមទាំងគម្រោង ឬកម្មវិធីថ្មីៗ ដែលនៅបន្តគាំទ្រ ដោយធនធានពីក្នុង និង ក្រៅប្រទេស ដើម្បីធានាសង្គតិភាព, ឤទិភាព ដោយផ្សារភ្ជាប់ជាមួយ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ព្រមទាំងរៀបចំកម្មវិធីវិនិយោគសាធារណៈ តាមរយៈការប៉ាន់ស្មានតម្លៃតាមវិស័យឱ្យបានទាន់ពេលវេលា ដើម្បីដាក់បញ្ចូលក្នុងកម្មវិធីវិនិយោគសាធារណៈបីឆ្នាំរំកិល។ ជាមួយគ្នានេះ គ្រប់រាជធានី ខេត្ត ត្រូវរៀបចំផែនការយុទ្ធសាស្ត្រអភិវឌ្ឍខេត្ត រាជធានីរបស់ខ្លួន និងត្រូវគិតគូររៀបចំ កម្មវិធីវិនិយោគសាធារណៈបីឆ្នាំរំកិល ស្របតាមឤណត្តិរបស់ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ដើម្បីអនុវត្តន៍វិមជ្ឈការ និងវិសហមជ្ឈការ និងការសម្រេចចិត្តលើការស្នើសុំធ្វើវិនិយោគ ដែលបានកំណត់ដោយច្បាប់ស្តីពីការ គ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ ។ ទន្ទឹមនេះ ដៃគូអភិវឌ្ឍន៍ ទាំងពហុភាគី និង ទ្វេភាគី ព្រមទាំងអង្គការមិនមែនរដ្ឋាភិបាល ត្រូវបន្តធានាថា ក្របខ័ណ្ឌនៃជំនួយសម្រាប់ការអភិវឌ្ឍរបស់ខ្លួន បានតម្រឹម និងតម្រង់ទិសដៅចំជាមួយនឹងឤទិភាពទាំងឡាយនៃ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ហើយហិរញ្ញប្បទានអភិវឌ្ឍន៍ត្រូវបានតម្រឹមជាមួយនឹងកម្មវិធីវិនិយោគសាធារណៈផងដែរ។ សម្ដេចតេជោបានលើកឡើងថា ដៃគូអភិវឌ្ឍន៍ទាំងអស់ ត្រូវធានាថា ធនធានទាំងឡាយ ដែលត្រូវផ្តល់ទៅអង្គការមិនមែនរដ្ឋាភិបាល ត្រូវសមស្របទៅនឹងឤទិភាព និងគោលដៅអភិវឌ្ឍន៍ ដូចមានចែងក្នុងផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ហើយធនធានទាំងនោះ ត្រូវបានយកទៅប្រើប្រាស់ប្រកបដោយតម្លាភាព និងការទទួលខុសត្រូវ ។ ចំពោះក្រសួង-ស្ថាប័ន និងដៃគូអភិវឌ្ឍទាំងអស់ ដែលកំពុងផ្តល់ហិរញ្ញប្បទានដល់សកម្មភាព កម្មវិធីគម្រោងនានា ត្រូវត្រូតពិនិត្យ និងវាយតម្លៃយ៉ាងទៀតទាត់ ប្រកបដោយស្មារតីទទួលខុសត្រូវខ្ពស់លើការអនុវត្តផែនការសកម្មភាពកម្មវិធី គម្រោងទាំងនោះ ហើយត្រូវផ្ញើរបាយការណ៍ស្តីពីលទ្ធផលនៃការតាមដានត្រួតពិនិត្យ និង វាយតម្លៃ មកក្រសួងផែនការ ដើម្បីដាក់បញ្ចូលទៅក្នុងការវាយតម្លៃស្តីពីវឌ្ឍនភាព ក្នុងការសម្រេចបានគោលដៅ និងចំណុចដៅនៃការអភិវឌ្ឍ ដែលមានចែងក្នុងផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ។
គួរបញ្ជាក់ដែរថា ផែនការយុទ្ធសាស្ដ្រអភិវឌ្ឍន៍ជាតិឆ្នាំ២០១៩-២០២៣ ត្រូវបានរៀបចំឡើងជាប្រាំពីរជំពូក ដែលជំពូកទី២ បង្ហាញពីសមិទ្ធផលជារួមនៃការអនុវត្ត «ផែនការយុទ្ធសាស្ដ្រអភិវឌ្ឍន៍ជាតិឆ្នាំ២០១៤-២០១៨» និងបញ្ហាប្រឈមនានាដែលបានជួបប្រទះ ក្នុងអំឡុងពេលនៃការអនុវត្តផែនការនេះ។ រហូតមកដល់ចប់អាណត្តិកាលនៃ «ផែនការយុទ្ធសាស្ដ្រអភិវឌ្ឍន៍ជាតិឆ្នាំ២០១៩-២០២៣» ស្ថិរភាពនយោបាយ ការអនុវត្តកំណែទម្រង់ស្ទើរតែគ្រប់វិស័យ និងការវិនិយោគក្នុងវិស័យហេដ្ឋារចនាសម្ព័ន្ធសំខាន់ៗ បានបង្កើតឱ្យមានបរិស្ថានអនុគ្រោះក្នុងការទាក់ទាញ ការវិនិយោគ ទាំងពីក្នុងស្រុកនិងពីបរទេស។ ជំពូកទី៣ បង្ហាញពីការវិភាគពីស្ថានភាពរួមនៃដំណើរវិវឌ្ឍន៍របស់ម៉ាក្រូសេដ្ឋកិច្ច និងដំណើរ ការនៃការគ្រប់គ្រងម៉ាក្រូសេដ្ឋកិច្ចនៅក្នុងសេដ្ឋកិច្ចកម្ពុជា ដោយរំលចឡើងអំពីរចនាសម្ព័ន្ធនៃផលិត ផលក្នុងស្រុកសរុប ស្ថានភាពសារពើពន្ធ និងអតិផរណា ភាពបើកចំហនៃសេដ្ឋកិច្ចនិងពាណិជ្ជកម្ម ជញ្ជីងពាណិជ្ជកម្ម ព្រមទាំងភាពក្រីក្រនិងភាពមានការងារធ្វើ។ ក្នុងជំពូកនេះ បានធ្វើការប៉ាន់ស្មាន តម្លៃ សរុបសម្រាប់រយៈពេល៥ឆ្នាំសម្រាប់ផែនការទាំងមូល គឺ៥៩.៩ប៊ីលានដុល្លារអាម៉េរិក សមមូល ២៤៥.៥៧៥ប៊ីលានរៀល។ ចំពោះជំពូកទី៥ ក៏បានបង្ហាញពីការប៉ាន់ស្មាននៃតម្រូវការធនធានវិនិយោគសម្រាប់ការធ្វើឱ្យសម្រេចបាននូវចំណុចដៅទាំងឡាយរបស់ «ផែនការយុទ្ធសាស្ដ្រអភិវឌ្ឍន៍ជាតិឆ្នាំ២០១៩-២០២៣»។ ផែនការនេះ បានធ្វើចំណោលអំពីតម្រូវការធនធានសម្រាប់ដំណាក់កាល៥ឆ្នាំ (២០១៩-២០២៣) ដោយមានការស្នើឡើងនូវប្រភពហិរញ្ញប្បទានដោយធនធានក្នុងស្រុក និងធនធានក្រៅប្រទេស ព្រមទាំងវិនិយោគមូលធនរបស់វិស័យសាធារណៈ និងឯកជន។ តម្លៃប៉ាន់ស្មានសរុបសម្រាប់រយៈពេល៥ឆ្នាំនេះ គឺ ៥៩.៩ប៊ីលានដុល្លារអាម៉េរិក សមមូល ២៤៥.៥៧៥ប៊ីលានរៀលក្នុងនោះ វិនិយោគមូលធនរបស់វិស័យឯកជន មានចំនួន ៤៣.៤ប៊ីលានដុល្លារអាម៉េរិក សមមូល ១៧៨.០៩៦ប៊ីលានរៀល ស្មើនឹង ៧២.៥ភាគរយ នៃទុនវិនិយោគសរុប និង វិនិយោគមូលធននៃវិស័យសាធារណៈ មានចំនួន ១៦.៤ប៊ីលានដុល្លារអាម៉េរិក សមមូល ៦៧.៤៧៩ប៊ីលានរៀល ស្មើនឹង ២៧.៥ភាគរយនៃទុនវិនិយោគសរុប៕
ដោយ ជឹម ណរី