ថ្ងៃទី១៤ ខែវិច្ឆិកា ឆ្នាំ២០១៩ — រោងចក្រផលិតស៊ីម៉ង់តិ៍ថ្មីមួយទៀត នៅកម្ពុជា ដែលតម្លៃប្រមាណ ១១០លានដុល្លារ អាម៉េរិក ដែលមានទីតាំស្ថិតនៅក្នុងខេត្តកំពត ត្រូវដាក់សម្ពោធឱ្យដំណើរការជាផ្លូវការ នាព្រឹកថ្ងៃ ព្រហស្បតិ៍ ទី១៤ ខែវិច្ឆិកា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
រោងចក្រផលិតស៊ីម៉ង់ត៍របស់ហ៊ុនថៃប៊ុនរ៉ុងនេះ មានទីតាំងស្ថិតនៅក្នុងភូមិល្ងាង ឃុំ ល្អាង ស្រុកដងទង់ ខេត្តកំពត។ រោងចក្រស៊ីម៉ង់ត៍នេះបានសាងសង់លើផ្ទៃដីទំហំជិត ៧០០ហិកតា បំពាក់ដោយឧបករណ៍បច្ចេកទេសទំនើប ហើយមានសមត្ថភាពផលិតស៊ីម៉ង់ត៍បានប្រមាណ ២.៥០០តោនក្នុងមួយថ្ងៃ ស្មើនឹងជិត១លានតោនក្នុងមួយឆ្នាំ។ វត្តមានរោងចក្រស៊ីម៉ង់ត៍ថ្មីនេះ នឹងរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជា ក្នុងការលើកម្ពស់សេដ្ឋកិច្ចជាតិ និងជីវភាពរបស់ប្រជាពលរដ្ឋ។ រោងចក្រនេះ អាចផ្តល់ការងារអចិន្ត្រៃយ៍ដល់បុគ្គលិកប្រមាណ ៣៣៥នាក់ ក្នុងនោះមានជនជាតិបរទេសប្រមាណ ៣៥នាក់។ ក្រៅពីផ្តល់ការងារជូនប្រជាពលរដ្ឋខ្មែរបានជាច្រើននាក់ហើយនោះ ក្រុមហ៊ុនត្រូវបង់ថ្លៃសួយសារអាករថ្មកំបោរចូលរដ្ឋប្រមាណ ៦៨ម៉ឺនដុល្លារអាម៉េរិកក្នុងមួយឆ្នាំ ដោយមិនទាន់គិតប្រាក់ចំណូលពន្ធអាករ និងកាតព្វកិច្ចហិរញ្ញវត្ថុផ្សេងៗទៀតនោះឡើយ។
បើតាមការលើកឡើងពីអគ្គនាយកដា្ឋនធនធានរ៉ែ នៃក្រសួងរ៉ែ និងថាមពល បានឱ្យដឹងថា បច្ចុប្បន្នកម្ពុជាមានរោងចក្រស៊ីម៉ង់ត៍ចំនួន៥ រាប់ទាំងរោងចក្រស៊ីម៉ង់ត៍ថៃប៊ុនរ៉ុង ដែលដាក់ឱ្យដំណើរការជាផ្លូវការនាថ្ងៃនេះ ដែលរោងចក្រទាំង៥នេះ អាចផលិតស៊ីម៉ង់ត៍បានជិត ៨លានតោនក្នុងមួយឆ្នាំ។ រោងចក្រទាំង៥នេះ រួមមាន ១- រោងចក្រស៊ីម៉ង់ត៍កំពត ស៊ីមេន ខូអិលធីឌី (Kampot Cement Co., Ltd) មានទីតាំងនៅស្រុកបន្ទាយមាស និងស្រុកដងទង់ ខេត្តកំពត មានសមត្ថភាពផលិតប្រមាណ ២លានតោនក្នុងមួយឆ្នាំ។ ២- រោងចក្រស៊ីម៉ងត៍កម្ពុជា ចក្រីទីង (Cambodia Cement Chakreyting Co., Ltd) មានទីតាំងនៅស្រុកកំពត ខេត្តកំពត មានសមត្ថភាពផលិតប្រមាណ ១.១លានតោនក្នុងមួយឆ្នាំ។ ៣- រោងចក្រស៊ីម៉ង់ត៍ ជីប ម៉ុង អ៊ិនស៊ី ស៊ីមេន ខបភើរេស៊ិន (Chip Mong Insee Cement Corporation) មានទីតាំងនៅស្រុកបន្ទាយមាស ខេត្តកំពត មានសមត្ថភាពផលិតប្រមាណ ២លានតោនក្នុងមួយឆ្នាំ។ ៤- រោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត មានទីតាំងស្ថិតនៅស្រុករតនៈមណ្ឌល ខេត្តបាត់ដំបង មានសមត្ថភាពផលិតស៊ីម៉ង់ត៍ បានជិត ២លានតោនក្នុងមួយឆ្នាំ។ ៥- រោងចក្រស៊ីម៉ង់ត៍ថៃប៊ុនរ៉ុង ស្ថិតនៅស្រុកដងទង់ ខេត្តកំពត មានសមត្ថភាពផលិតស៊ីម៉ង់ត៍ បានជិត ១លានតោនក្នុងមួយឆ្នាំ៕
ដោយ ជឹម ណារី
