ភ្នំពេញ ថ្ងៃទី១១ ខែវិច្ឆិកា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ថា ប្រទេសជាតិមានសុខសន្តិភាព ពិធីបុណ្យក៏បានដំណើរការដោយរលូនដែលផ្តល់នូវភាព សប្បាយរីករាយនៅទូទាំងប្រទេស ចាប់តាំងពីថ្ងៃ៩ វិច្ឆិកា ខួប៦៦ឆ្នាំនៃបុណ្យឯករាជ្យជាតិ និងទិវាហូបអំបុកខ្មែរថែជាតិ សាសនា និងព្រះមហាក្សត្រ ហើយបន្តចូលមកដល់បុណ្យអុំទូកដែលកំពុងផ្តល់នូវភាពសប្បាយរីករាយដល់ពលរដ្ឋនៅទូទាំងប្រទេស។
នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី ១១ ខែវិច្ឆិកា ឆ្នាំ២០១៩ សម្ដេចតេជោបានសរសេរថា ថ្ងៃនេះជាថ្ងៃទី២ ហើយ នៃពិធីបុណ្យអុំទូក និងសូមអញ្ជើញបងប្អូនប្រជាពលរដ្ឋ កូនក្មួយយុវជន និងភ្ញៀវទេសចរអន្តរជាតិចូលរួមកម្សាន្តសប្បាយ និងឈ្វេងយល់ពីវប្បធម៌ប្រពៃណីទំនៀមទម្លាប់ដ៏ល្អ របស់ខ្មែរយើងនៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលមានរយៈពេល៣ថ្ងៃ ចាប់ពីថ្ងៃទី ១០ ដល់ ១២ ខែវិច្ឆិកា ឆ្នាំ២០១៩នេះ។ សម្ដេចតេជោបានបន្តថា ប្រទេសជាតិមានសុខសន្តិភាព ពិធីបុណ្យក៏បានដំណើរការដោយរលូនដែលផ្តល់នូវភាពសប្បាយរីករាយនៅទូទាំងប្រទេស ចាប់តាំងពីថ្ងៃ៩ វិច្ឆិកា ខួប៦៦ឆ្នាំនៃបុណ្យឯករាជ្យជាតិ និងទិវាហូបអំបុកខ្មែរថែជាតិ សាសនា និងព្រះមហាក្សត្រ ហើយបន្តចូលមកដល់បុណ្យអុំទូកដែលកំពុងផ្តល់នូវភាពសប្បាយរីករាយដល់ពលរដ្ឋនៅទូទាំងប្រទេស។ សម្ដេចតេជោបានបន្ថែមថា ទិដ្ឋភាពនៅមាត់ទន្លេមុខព្រះបរមរាជវាំងដែលជាកន្លែងប្រណាំងទូក និងនៅតាមស្តង់តាំងពិព័រណ៍ទំនិញផលិតផល គឺត្រូវបានរៀបចំយ៉ាងគួរជាទីទាក់ទាញ។ ចំណែកបងប្អូនកងកម្លាំងមានសមត្ថកិច្ច ផ្នែកសុខាភិបាល សង្គ្រោះបន្ទាន់ គឺបាននិងកំពុងតែឈរជើងនៅតាមគោលដៅនីមួយៗ ដើម្បីត្រៀមការពារ រៀបចំសណ្ដាប់ធ្នាប់ ក៏ដូចជាការសង្គ្រោះបន្ទាន់ ដើម្បីឱ្យបងប្អូនប្រជាពលរដ្ឋទទួលបានភាពរីករាយ ជាពិសេសនៅរាត្រីទី២ នៃព្រះរាជពិធីបុណ្យអុំទូកនេះ នឹងមានពិធីសំពះព្រះខែ និងអកអំបុកផងដែរ ដែលបងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិអាចមកកម្សាន្តដោយរីករាយ ក្នុងព្រះរាជពិធីបុណ្យអុំទូករយៈពេល៣ថ្ងៃនេះ។ សម្ដេចតេជោនាយករដ្ឋមន្ត្រីក៏បានស្នើឱ្យសមត្ថកិច្ចដែលមាតួនាទីទទួលខុសត្រូវក្នុងពិធីបុណ្យ យកចិត្តទុកដាក់ជួយសម្របសម្រួលសណ្តាប់ធ្នាប់សាធារណៈឱ្យបានល្អ ដើម្បីបងបងប្អូនប្រជាពលរដ្ឋ និងភ្ញៀវទេសចរកាន់តែមានឱកាសបានសប្បាយរីករាយនៅទូទាំងប្រទេស និងអរគុណដល់អាជ្ញាធរ និងសមត្ថកិច្ចគ្រប់ជាន់ថ្នាក់ដែលយកចិត្តទុកដាក់ខ្ពស់ ក្នុងការថែរក្សាសន្តិសុខសណ្តាប់ធ្នាប់ឱ្យបានល្អ ដើម្បីឱ្យប្រជាពលរដ្ឋ និងទេសចរបរទេសមានឱកាសបានសប្បាយរីក រាយនៅក្នុងពិធីបុណ្យអុំទូក ទាំងនៅក្នុងរាជធានីភ្នំពេញ និងតាមបណ្តាខេត្តនានា៕
ដោយ ជឹម ណារី
