ព្រះករុណា ព្រះមហាក្សត្រ ស្ដេចយាងចូលរួមថ្ងៃដំបូង នៃព្រះរាជពិធីបុណ្យអុំទូក​បណ្ដែតប្រទីប និងសំពះព្រះខែ អកអំបុក

125

ភ្នំពេញ ថ្ងៃទី១០ ខែវិច្ឆិកា ឆ្នាំ២០១៩ — ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំ​បុក ក្នុងឆ្នាំ២០១៩ ដែ​ល​ធ្វើ​ឡើងនៅរាជធានីភ្នំពេញ បានប្រព្រឹត្តទៅក្រោមបរិយាកាសសប្បាយរីករាយក្រៃលែ​ង និង​ទឹ​ក​ចិត្តត្រេកអររបស់ប្រជាពលរដ្ឋ ដែលមកពីបណ្ដាខេត្តនានា រួមទាំងទេសចរណ៍បរទេសដែ​ល​មក​ចូល​រួមយ៉ាងច្រើនកុះករផងដែរ។

នៅឯព្រះពន្លាជ័យខាមុខព្រះបរមរាជវាំងនារសៀល ថ្ងៃទី១០ ខែវិច្ឆិកា ឆ្នាំ២០១៩ ដែល​ជា​​ទីកន្លែងគណៈកម្មាធិការជាតិរៀបចំបុណ្យជាតិ-អន្តរជាតិ បានរៀបចំប្រារព្ធព្រះរាជ​ពិ​ធី​​បុណ្យអុំទូក បណ្ដែតប្រទីប និងសំពះព្រះខែ អកអំបុកនោះ ព្រះរាជពិធីនេះ បានធ្វើឡើងក្រោ​ម​ព្រះរាជាអធិតីភាពដ៏ខ្ពង់ខ្ពស់ របស់ព្រះករុណា ព្រះបាទសម្ដេចព្រះបរមនាថ នរោត្ដម សី​ហ​មុនី ព្រះមហាក្សត្រនៃព្រះរាជាណាចក្រកម្ពុជា និងមានការអញ្ជើញ ចូលរួមរបស់ សម្ដេចវិបុ​ល​សេ​នាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិ​ន ប្រធាន​រដ្ឋ​ស​ភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា​​ណាចក្រកម្ពុជា ស​ម្ដេ​ចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងសមាជិក សមាជិកា ព្រឹទ្ធសភា រដ្ឋ​សភា រាជរដ្ឋាភិបាល មន្ត្រីរាជការ នាម៉ឺនសព្វមុខមន្ត្រី រាជវង្សានុវង្ស ឧត្ដមទីប្រឹក្សា ព្រះ​ម​ហា​ក្សត្រ អង្គទូតនៃបណ្ដាប្រទេស ជាមិត្តប្រចាំនៅកម្ពុជា ភ្ញៀវជាតិ-អន្តរជាតិ និងប្រជាពលរដ្ឋ​មក​ពីបណ្ដាខេត្តនិងរាជធានីជាច្រើន។ ក្នុងឆ្នាំនេះ ព្រះរាជពិធីបុណ្យអុំទូក បណ្ដែតប្រទីប និង​សំ​ពះព្រះខែ អកអំបុក រយៈពេល៣ថ្ងៃ ចាប់ពីថ្ងៃទី ១០ រហូតដល់ថ្ងៃទី១២ ខែវិច្ឆិកា ឆ្នាំ២០១៩ ដែលមា​​នទូកមកពីបណ្ដារាជធានី ខេត្ត ​ចូលរួម​សរុប ២៩៧​ទូក ក្នុងនោះមាន ​ទូក​អុំ​បុរស​មាន ១៦៧​ទូ​​ក ទូក​អុំ​នារី មាន១​ទូក។​ ទូក​ចែវ​បុរស​មាន ៣០​ទូក ទូក​ចែវ​នារី​មាន ២​ទូក​។ ទូក​ខ្នាត​អ​ន្តរ​ជា​តិ​​​​បុរស ៩៥​ទូក ទូក​ខ្នាត​អន្តរជាតិ​នារី ២​ទូក ដែលមាន​អ្នក​កីឡាករ កីឡាការិនី សរុបជិត ២​ម៉ឺន​នា​ក់។ ក្នុងចំណោមទូកទាំង២៩៧ទូក ដែលបានមកចូលរួមប្រកួតនាឆ្នាំនេះ មានទូក​របស់​​រា​ជ​​ធា​នីភ្នំពេញចំនួន៥០ ទូក ខេត្តកណ្ដាល៧៥ទូក  ខេត្ដកំពង់ចាម៤២ ទូក ខេត្ដត្បូងឃ្មុំ ០៩ទូក ខេត្ដកំពង់ធំ​១​៣​​​ទូក ខេត្ដព្រៃវែង៣៦ទូក ខេត្ដកំពង់ឆ្នាំង២៥ទូក ខេត្ដក្រចេះ១៦ ទូក ខេត្ដតាកែវ០៤ទូក ខេត្តបាត់ដំបង០៣ទូក ខេ​ត្ត​ស្វាយរៀងមាន០២ ទូក ខេត្ដបន្ទាយមានជ័​យ០១ទូក ខេត្ដព្រះវិហារ០២ទូក ខេត្តមណ្ឌលគិរី ០១​ទូ​ក​ ខេត្តកំពត០១ទូក ខេត្តកំពង់ស្ពឺ​០៣ទូក ខេត្តពោធិសាត់០១ទូក ខេត្តសៀមរាប០១ទូក ខេ​ត្ត​​​ព្រះសីហនុ០១ទូក ទីស្ដីការ​គណៈ​រដ្ឋ​មន្ត្រី០១ទូក បញ្ជាការដ្ឋានកងទ័ពជើងទឹក០២ទូក ប​ញ្ជា​​ការដ្ឋានកងទ័ពជើងគោក​០១ទូក កងរាជអាវុធហត្ថលើផ្ទៃប្រទេសមាន០២ទូក កីឡា​ន​គរ​បា​ល​ជាតិ០១ទូក និង វត្ត​មហោនន្ទិយ​នេញ្ចរារាមនិវេទ (ហៅវត្តព្រែកប្រាំង)ចំនួន០៣ទូក។

បន្ទាប់ពីការប្រកួតពេញមួយថ្ងៃ ដោយធ្វើការផ្លាស់ប្ដូរខ្សែទឹកក្នុង និងក្រៅរួចមក នៅ​រា​ត្រី​ថ្ងៃដដែលនេះដែរ ជាមួយនឹងការសម្ដែងព្រះទ័យទុកដាក់អបអរសាទរចំពោះកីឡាករ កីឡា​កា​រិនី ដែលបានចូលរួមក្នុងការ ប្រណាំងទូកថ្ងៃទីមួយនេះមក ព្រះករុណា ព្រះបាទសម្ដេ​ច​ព្រះ​​បរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គ បាន​សព្វ​ព្រះ​រាជហឫទ័យ ស្ដេចយាងប្រទាន ភ្លើងទៀនជ័យ លើប្រទីបព្រះបរមរាជវាំង ដើម្បីឱ្យ​ប្រ​ទីប​ដែ​ល​​មកពីស្ថាប័នចំនួន១៤ ដែលក្នុងនោះមាន ប្រទីបព្រះបរមរាជវាំង ប្រទីបព្រឹទ្ធសភា ប្រទី​បរដ្ឋសភា ប្រទីបរាជរដ្ឋាភិបាល ប្រទីបក្រសួងយុត្តិធម៌ ប្រទីបក្រសួងការពារជាតិ ប្រទីប​ក្រ​សួងមហាផ្ទៃ ប្រទីបក្រសួងសេដ្ឋកិច្ច និងហិរញ្ញវត្ថុ ប្រទីបក្រសួង ឧស្សាហកម្ម និងសិប្បកម្ម ប្រទីបក្រសួងពាណិជ្ជកម្ម ប្រទីបក្រសួងទេសចរណ៍ ប្រទីបក្រសួងរ៉ែនិងថាមពល ប្រទីប​ក្រ​សួ​ង​វប្បធម៌ និងវិចិត្រសិល្បៈ  និងប្រទីបសាលារាជធានី ភ្នំពេ​ញ ចាប់ផ្ដើមចេញដំណើរ បណ្ដែ​ត​ឡើង​តាមដងទន្លេសាប ពីត្បូងទៅជើង ដែលអមដោយពិធីអុជកាំជ្រួច អបអរសាទរ ព្រះរាជ​ពិ​ធី​បុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទីមួយនេះផងដែរ។ ទន្ទឹមនឹង​នេះ​ដែរ នៅរាត្រីថ្ងៃទីមួយនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក​នេះដែរ ក៏មានការសម្ដែងសិល្បៈ និងការប្រគុំតន្ត្រី របស់ក្រសួងវប្បធម៌ និងវិចិត្រ សិល្បៈ និងស្ថានីយទូរទស្សន៍ មួយចំនួន ជូនប្រជាពលរដ្ឋទស្សានាកម្សាន្តនៅរមណីយដ្ឋានវត្តភ្នំ តំប​ន់​​អភវឌ្ឍន៍ជ្រោយចង្វារ មជ្ឈមណ្ឌលកោះពេជ្រ និងតាមទីធ្លាសាធារណៈ មួយចំនួន​ទៀ​តផង​ដែ​រ៕

ដោយ ជឹម ណារី