- ឯកឧត្តម លោកជំទាវ លោក លោកស្រី!
«វិថីសូត្រសតវត្សរ៍ទី ២១ និងគំនិតផ្តួចផ្តើមខ្សែក្រវ៉ាត់មួយ-ផ្លូវមួយ» គ្របដណ្តប់ប្រទេសប្រមាណ ៦០ និង ប្រជាជនប្រហែល ៤,៤ ប៊ីលាននាក់ ក្នុងតំបន់ឤស៊ី, អឺរ៉ុប, អូសេឤនី និងឤហ្វ្រិក។ ប្រជាជាតិទាំងអស់នៅតាមបណ្តោយនៃវិថីសូត្រនេះ ធ្លាប់មានអរិយធម៌មួយរុងរឿងលើពិភពលោក ដែលចែករំលែកប្រវត្តិសាស្ត្រ, វប្បធម៌, សាសនា និងទំនៀមទំលាប់ និងភាសាដ៏សម្បូរបែប។ ក្នុងស្មារតីជំរុញកសាងស្មារតីសាមគ្គីភាព, ការយោគយល់គ្នា និងការគោរពនូវវប្បធម៌ខុសៗគ្នា, សំដៅពង្រឹងទំនាក់ទំនងរវាងប្រជាជន និងប្រជាជន ដែលជាកម្លាំងចលករដ៏សំខាន់សម្រាប់ជំរុញកិច្ចសហប្រតិបត្តិការខ្សែក្រវ៉ាត់ និងផ្លូវ, ខ្ញុំសូមអនុញ្ញាតគូសរំលេចនូវឤទិភាពមួយចំនួនដូចខាងក្រោម៖
ទី ១ ការផ្លាស់ប្តូរទំនាក់ទំនងរវាងស្ថាប័នរដ្ឋ, និស្សិត, សាស្ត្រាចារ្យ, ស្ថាប័នស្រាវជ្រាវ និងសង្គមស៊ីវិល ដោយផ្តោតលើសក្តានុពលនៃកម្លាំងយុវជន, បញ្ញាវន្ត និងបច្ចេកវិទ្យា៖ ការពង្រឹងមិត្តភាព និងចំណងទាក់ទងក្នុង ស្រទាប់យុវជន និងបញ្ញាវន្ត ឤចអនុវត្តបានក្នុងច្រើនរូបភាព ដូចជា ការផ្លាស់ប្តូរផ្នែកសង្គម, វប្បធម៌, សិល្បៈ និងកីឡា, ការផ្លាស់ប្តូរផ្នែកសិក្សាធិការ និងការស្រាវជ្រាវ ពិសេសតាមរយៈការផ្តល់ឤហារូបករណ៍, ការចែករំលែកចំណេះដឹងលើឧត្តមានុវត្តន៍សំខាន់ៗ ព្រមទាំងកិច្ចសហប្រតិបត្តិការផ្នែកវិទ្យាសាស្ត្រ និងបចេ្ចកវិទ្យា ជាដើម សំដៅលើកកម្ពស់ការយល់ដឹងអំពីគ្នាទៅវិញទៅមក។
ទី ២ ការជំរុញ និងលើកកម្ពស់ទេសចរណ៍តំបន់ យើងត្រូវចាប់យកកាលានុវត្តភាពពីការអភិវឌ្ឍនៃ «គំនិត ផ្តួចផ្តើមខ្សែក្រវ៉ាត់ និងផ្លូវ» ព្រមទាំងសក្តានុពលទេសចរណ៍នៃតំបន់ ដែលកើតចេញមកពីការតភ្ជាប់ហេដ្ឋារចនា សម្ព័ន្ធរូបវ័ន្តប្រទាក់ក្រឡា ព្រមទាំងមរតកប្រវត្តិសាស្ត្រ និងវប្បធម៌ដ៏ច្រើនសន្ធឹកសន្ធាប់។ កំណើនភ្ញៀវទេសចរនឹងរួមចំណែកយ៉ាងសំខាន់ដល់កំណើនសេដ្ឋកិច្ចជាតិ និងតំបន់។ ជាមួយគ្នានេះ, ភ្ញៀវទេសចរនឹងដើរតួនាទីដ៏សំខាន់ ជាភ្នាក់ងារពាំនាំផ្សព្វផ្សាយ និងចែករំលែកនូវប្រពៃណី, ទំនៀមទំលាប់ និងវប្បធម៌របស់ជាតិសាសន៍នីមួយៗ។
ទី ៣ ការបង្កើតទិវាបង្ហាញវប្បធម៌តំបន់ និងការផ្សព្វផ្សាយឱ្យបានទូលាយ៖ យើងមិនត្រូវមើលរំលងនូវសារៈសំខាន់នៃគុណតម្លៃវប្បធម៌ចម្រុះជាតិសាសន៍ផ្សេងៗគ្នានោះឡើយ។ ការទទួលស្គាល់គុណតម្លៃនេះ នឹងឤច
ជួយជំរុញទំនាក់ទំនងរវាងប្រជាជន និងប្រជាជន ឱ្យបានកាន់តែល្អប្រសើរថែមទៀត។ ប្រាកដណាស់, ការទទួលស្គាល់គុណតម្លៃវប្បធម៌ចម្រុះជាតិសាសន៍ ឤចសម្រេចទៅបាន លុះត្រាមានការផ្សព្វផ្សាយទូលំទូលាយ ។ ដូច្នេះ យើងត្រូវពង្រឹងកិច្ចសហប្រតិបត្តិការក្នុងវិស័យសំខាន់ៗនានា ដូចជា សិល្បៈចម្រុះ, ភាពយន្ត, ការតាំងពិពណ៌ វប្បធម៌ចម្រុះជាតិសាសន៍ និងការជំរុញឱ្យបានខ្លាំងក្លានូវការប្រាស្រ័យទាក់ទងសហការគ្នា ក្នុងចំណោមសារមន្ទីរវិចិត្រសិល្បៈ, សាលមហោស្រព, បណ្ណាល័យ, កម្មវិធីវិទ្យុ, ទូរទស្សន៍, រោងពុម្ព, ភ្នាក់ងារសារព័ត៌មាន និងអង្គការសិល្បៈនានា ។
កម្ពុជា, ក្នុងឋានៈជាអរិយធម៌ចំណាស់មួយក្នុងតំបន់, មាននូវមរតកប្រវត្តិសាស្ត្រ, សម្បត្តិវប្បធម៌ និងសិល្បៈជាច្រើន ដែលឤចចែករំលែកជាមួយប្រជាជាតិក្នុងតំបន់ ជាពិសេស ភាពរួសរាយរាក់ទាក់ និងស្នាមញញឹម របស់ប្រជាជនខ្មែរ សម្រាប់ការចូលរួមលើកកម្ពស់ទំនាក់ទំនងរវាងប្រជាជន និងប្រជាជនទាំងអស់ នៅក្នុងតំបន់នៃវិថីសូត្ររបស់យើង។ កម្ពុជាតែងតែបើកទូលាយ និងមានទស្សនៈវិជ្ជមាន ចំពោះការស្ថាបនាទំនាក់ទំនងរវាង ប្រជាជន និងប្រជាជន ក្នុងតំបន់ និងផ្តល់ការស្វាគមន៍យ៉ាងកក់ក្តៅ ចំពោះប្រជាជនទាំងអស់ដែលអញ្ជើញទៅ ទស្សនាប្រទេសយើងខ្ញុំ ។
សូមអរគុណ !
