ប្រមុខរាជរដ្ឋាភិបាលកម្ពុជា លើកទឹកចិត្តឱ្យប្រទេសទាំងពីរកម្ពុជា-ឡាវ យកចិត្តទុកដាក់ ការអភិវឌ្ឍហេដ្ឋារចនាសម្ព័ន្ធតភ្ជាប់ និងការវិនិយោគបន្ថែមទៀត

10

ភ្នំពេញ ថ្ងៃទី២៩ ខែតុលា ឆ្នាំ២០១៩ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បា​ន លើកទឹកចិត្តឱ្យភាគីកម្ពុជា និងឡាវ យកចិត្តទុកដាក់ ក្នុងការអភិវឌ្ឍហេដ្ឋារចនាសម្ព័ន្ធ​ត​ភ្ជា​​ប់ និងការវិនិយោគ ជាពិសេសលើវិស័យអគ្គិសនីបន្ថែមទៀត។

នេះបើយោងតាមការឱ្យដឹង របស់ឯកឧត្ដម អ៊ាង សុផ្លែត ជំនួយការសម្ដេចតេជោ​នា​យ​ក​​រដ្ឋមន្ត្រី បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា​ណាចក្រ​កម្ពុជា បានអនុញ្ញាត ឱ្យឯកឧត្តម ខាំផាន់ ភុំម៉ាថាត  (Khamphanh Phommathat) ស​មា​ជិកការិយាល័យនយោបាយ លេខាមជ្ឈិមបក្សប្រជាជនបដិវត្តន៍ឡាវ ចូលជួបសម្ដែង​ការ​គួរ​ស​ម នាព្រឹកថ្ងៃទី ២៩ ខែតុលា ឆ្នាំ២០១៩ នៅវិមានសន្តិភាព ក្នុងខណៈ ដែលឯកឧត្ដមដឹក​នាំគណៈ​ប្រតិភូមកបំពេញទស្សនកិច្ចនៅព្រះរាជាណាចក្រកម្ពុជា។

ឯកឧត្តម Khamphanh P​h​o​mmathat បានពាំនាំនូវការផ្ដាំផ្ញើសាកសួរសុខទុក្ខ ពី​ឯកឧត្ដម​អគ្គលេខាធិការបក្ស និងនា​យ​ករដ្ឋ​មន្ត្រីឡាវ ជូនចំពោះសម្ដេចតេជោ ហ៊ុន សែន​ នាយករដ្ឋមន្រ្ដីនៃព្រះរាជាណាចក្រកម្ពុជា។ ឯកឧត្ដមបានលើកឡើងថា ឯកឧត្ដម​ពុំបាន​មក​បំពេ​ញទស្សនកិច្ចនៅកម្ពុជា រយៈពេលជាយូរដែរមកហើយៗ នៅពេលនេះ​ឯកឧត្ដមបាន​ឃើ​ញ​កម្ពុជា មានមុខមាត់ថ្មី និងសម្ដែងនូវការអបអរសាទរ ក្រោមការដឹកនាំរបស់​គណ​បក្ស​ប្រជា​ជនម្ពុជា ជាពិសេសសម្ដេចតេជោ ដែលធ្វើឱ្យកម្ពុជាមានសន្ទុះរីក​ចម្រើនយ៉ាង​លឿ​ន​ជាទីបំផុត និងបានកែប្រែមុខមាត់កម្ពុជា ទៅជាកម្ពុជាថ្មីមួយ។ ឯកឧត្ដមក៏បានជម្រាប​ជូន​សម្ដេចតេជោ​នាយករដ្ឋមន្ត្រីបន្តថា ថ្នាក់ដឹកនាំឡាវ ក៏ដូចជាប្រជាជនឡាវផងដែរ បាន​ស​ម្ដែង​នូវការរីករាយ និងអបអរសាទរយ៉ាងខ្លាំង ចំពោះការលើកតម្កើងទំនាក់ទំនង​ប្រទេស​ទាំ​ង​ពីរ ឱ្យទៅជាដៃគូ​ជាយុទ្ធសាស្ត្រគ្រប់ជ្រុងជ្រោយ ហើយដំណើរទស្សនកិច្ចរបស់ឯកឧត្ដមមក​កាន់​ព្រះរាជាណា​ចក្រកម្ពុជានាពេលនេះ គឺដើម្បីជំរុញទំនាក់ទំនង និងកិច្ចសហប្រតិបត្តិការ​ឱ្យ​កាន់តែស៊ីជម្រៅ​ថែមទៀត ឱ្យស្របតាមកម្រិតនៃទំនាក់ទំនងនៃប្រទេសទាំងពីរ។ ទន្ទឹមនេះ​​ជំរុញការងារដែល​​បានចុះហត្ថលេខារួចហើយ រវាងថ្នាក់ដឹកនាំនៃប្រទេសទាំងពីរ ឱ្យមាន​ដំ​ណើរ​ការទៅមុខ និងទទួលបានជោគជ័យ។ ឯកឧត្តម Khamphanh Phommathat ក៏បាន​ជ្រមា​ប​​ជូន​សម្ដេចតេជោនាយករដ្ឋមន្ត្រី ជាសង្ខេបនូវដំណើរវិវត្តន៍របស់ប្រទេសឡាវ ជាពិសេសលើ​​វិស័យម៉ាក្រូសេដ្ឋកិច្ច និងស្នើសុំការណែនាំ និងអនុសាសន៍រៀនសូត្របទពិសោធន៍​របស់​ក​ម្ពុ​ជា ពីសម្ដេចតេជោ ហ៊ុន សែន ផងដែរ។

ជាការឆ្លើយតប សម្ដេចតេជោនាយករដ្ឋមន្ត្រី បានថ្លែងអំណរគុណចំពោះការផ្តាំផ្ញើសា​ក​សួរសុខទុក្ខពីឯកឧត្តមអគ្គលេខាធិការបក្ស ក៏ដូចជានាយករដ្ឋមន្ត្រីនៃប្រទេសឡាវ និងអរគុ​ណ​​ចំពោះការលើកឡើងនូវវឌ្ឍនភាព និងការវិវឌ្ឍរីកចម្រើនរបស់ប្រទេសកម្ពុជា។ សម្ដេចតេ​ជោ​បានសម្ដែ​ងនូវការរីករាយយ៉ាងខ្លាំង ចំពោះដំណើរទស្សនកិច្ចរបស់ឯកឧត្តម ថងលូន ស៊ី​ស៊ូ​​លីត នាពេលកន្លងមក ដែលទាំងនេះ គឺបានចូលរួមលើកម្ពស់នូវទំនាក់ទំនង និងកិច្ចសហ​ប្រ​តិ​​បត្ដិការ​រវាងប្រទេសទាំងពីរ (កម្ពុជា-ឡាវ) ឱ្យកាន់តែល្អប្រសើរឡើងថែមទៀត ជាពិសេស​ដើម្បី​ធ្វើយ៉ាងណាបង្កើនការវិនិយោគបន្ថែមទៀត ដែលក្នុងនោះប្រទេសឡាវក៏បានជំរុញ​នូវ​កិ​ច្ច​សហប្រតិបត្តិការលើវិស័យថាមពល ដោយបានផ្គត់ផ្គង់អគ្គិសនីបន្ថែមទៀតមកកាន់កម្ពុជា។​

សម្តេចតេជោ ក៏បានលើកទឹកចិត្តធ្វើយ៉ាងណាឱ្យភាគីទាំងពីរ កម្ពុជា-ឡាវ បន្តយកចិត្ត​ទុក​​ដា​ក់​​ ក្នុងកិច្ចសហប្រតិបត្តិការទៅវិញទៅមក ជាពិសេសជំរុញការអភិវឌ្ឍហេដ្ឋារ​ចនា​សម្ព័ន្ធ​​តភ្ជា​ប់​ ​រួម​ទាំង​វិស័យអគ្គិសនី និងស្នើឱ្យពិនិត្យមើលលទ្ធភាពលើ​សក្តានុពលផ្សេងទៀត​ដែល​ប្រទេ​ស​ទាំងពីរអាចសហការគ្នាបាន ដើម្បីជំរុញ និងពង្រឹងបន្ថែមទៀតនូវទំនាក់ទំនង​រវាង​​ប្រទេស​ទាំង​ពីរ ឱ្យស្របទៅតាមអ្វីដែលថ្នាក់ដឹកនាំបានលើកឡើងក្នុងកម្រិតទំនាក់ទំនង​ដែល​ជាដៃ​គូ​យុ​​ទ្ធសាស្ត្រគ្រប់ជ្រុងជ្រោយនោះ៕

ដោយ ជឹម ណារី