ប្រធានាធិបតីហុងគ្រីបញ្ជាក់សារជាថ្មីថា ហុងគ្រីនៅតែបន្តគាំទ្រកម្ពុជា និងស្នើសុំឱ្យមិន ឱ្យមានការដកហូត EBA ពីកម្ពុជា

8

ភ្នំពេញ ថ្ងៃទី២៨ ខែតុលា ឆ្នាំ២០១៩ — ឯកឧត្តម យ៉ាណូស អាឌ័រ (Janos Ader) ប្រធានាធិបតីនៃប្រទេសហុងគ្រី បាន​បញ្ជាក់​សា​រ​ជាថ្មីថា ហុងគ្រីនៅតែបន្តគាំទ្រកម្ពុជា និងស្នើសុំមិនឱ្យមានការដកហូតEBA ពីកម្ពុជា​នោះ​ផងដែរ។

ឯកឧត្ដម អ៊ាង សុផ្លែត ជំនួយការសម្ដេចតេជោនាយករដ្ឋមន្ត្រីបានថ្លែងដូ​ច្នេះប្រាប់អ្នក​យ​ក​ព័ត៌មាន បន្ទាប់ពីជំនួបពិភាក្សាការងាររបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង ឯកឧត្តម យ៉ាណូស អាឌ័រ (Janos Ader) ប្រធា​នា​​ធិបតីនៃប្រទេសហុងគ្រី នារសៀលថ្ងៃទី ២៨ ខែតុលា ឆ្នាំ២០១៩ ក្នុងខណៈដែលឯកឧត្ដម ដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា។

ឯកឧត្ត​ម​​ប្រធា​នាធិបតីហុង​គ្រីបានជម្រាបជូនសម្ដេចតេជោថា ក្នុងដំណើរទស្សន​កិច្ច​នេះ ឯក​ឧត្ដ​​ម​​បាន​ចូល​គាល់ ​ព្រះ​ករុ​ណា​ ព្រះបាទសម្ដេចព្រះបរមនាថន រោត្តម សីហមុនី ព្រះមហាក្ស​ត្រ​​​នៃ​​ព្រះរា​ជាណាចក្រកម្ពុជា ហើយក៏បានយាងព្រះអង្គដើម្បីយាងធ្វើព្រះរាជ​ទស្សនកិច្ចទៅ​កាន់​​ប្រទេ​សហុងគ្រីនាពេលខាងមុខ។ ឯកឧត្តម Janos Ader បានមាន​ប្រសាសន៍​ថា នេះជា​លើ​កទី៣ហើយ ដែលឯកឧត្តមបានជួបសម្ដេចតេជោ ក្នុងរយៈពេលតែ​០៦ខែ​ប៉ុណ្ណោះ ហើយ​ក្នុង​ជំនួបនេះ គឺជាជំនួសពិសេសមួយ។ ទន្ទឹមនេះ ក្នុងដំណើរទស្សន​កិច្ច​របស់ឯកឧត្តម​មកកាន់​កម្ពុ​ជា គឺឯកឧត្តមពិតជាមិនអាចស្មានដល់ពីការរីកចម្រើននៃទីក្រុង​ភ្នំពេញ ដែល​កា​ល​ពី​ឆ្នាំ ១៩៧៩ ភ្នំពេញគឺមានមនុស្សតែ៧០នាក់តែប៉ុណ្ណោះ ក៏ប៉ុន្តែពេលនេះ ភ្នំពេញមានការ​រីក​ច​ម្រើន និងមានសកម្មភាពយ៉ាង​មមាញឹក ជាពិសេសការអភិវឌ្ឍ​យ៉ាងឆាប់​រហ័ស គួរជាទី​ចា​ប់​​អារម្មណ៍ផងដែរ។ នៅក្នុងជំនួបនេះដែរ ឯកឧត្តមប្រធានាធិបតីនៃប្រទេស​ហុងគ្រី បានបង្ហា​ញ​ពីការចូលរួមរបស់ហុងគ្រី ជាមួយនឹងការអភិវឌ្ឍរបស់កម្ពុជា ដែលក្នុង​នោះ ឯកឧត្តមនឹង​បញ្ជូ​នអ្នកជំនាញការរបស់ហុងគ្រី ដើម្បីមកជួយកម្ពុជាក្នុងការសិក្សា លើ​​បញ្ហា​ទឹកស្អាត សំរា​ម សំណល់រឹង និងសំណល់រាវ និងបញ្ហាផ្សេងៗទៀតពាក់ព័ន្ធ នឹងការ​​អភិវឌ្ឍទីក្រុង។ បន្ទាប់ពី​ការ​​សិក្សាហើយ ក្រុមអ្នកជំនាញរបស់ហុងគ្រី នឹងផ្ដល់ជូននូវ​បច្ចេកវិទ្យា​ និងដំណោះស្រាយ​ដើម្បី​ដោះស្រាយបញ្ហាទឹកស្អាត បញ្ហាសំណល់រឹង សំណល់រា​វនៅកម្ពុជា។ ជាងនេះទៀត ហុ​​ងគ្រី នឹងជួយជំរុញការអភិវឌ្ឍកម្ពុជារយៈពេលវែង ដូចជាការ​បណ្ដុះបណ្ដាល ធនធានមនុ​ស្ស​ និងវិស័យ​សុខភាពផងដែរ។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណចំពោះ​ឯកឧត្តមប្រធា​នា​ធិបតីហុងគ្រីចំពោះអ្វីដែលឯកឧត្តមបានលើក​ឡើង។ សម្តេចតេជោបានមានប្រសាសន៍ថា ជំនួប​លើកទី៣នេះ គឺជាការភ្ជាប់ទំនាក់ទំនង ក៏ដូចជាការកសាងទំនាក់ទំនងមិត្តភាពឡើងវិញ ដែលកម្ពុជា និងហុងគ្រី មានអស់រយៈពេលជាង៦០ឆ្នាំមកហើយ។ សម្តេចតេជោនាយក​រដ្ឋ​ម​ន្ត្រី​ក៏បាន​ជម្រាបជូន អំពីប្រវត្តិសាស្ត្ររបស់កម្ពុជាយ៉ាងសង្ខេបថា កម្ពុជាកន្លងមក​តែង​តែ​មាន​ការ​បែកបាក់គ្នា ហើយរហូតមកដល់ប៉ុន្មានឆ្នាំចុងក្រោយនេះ កម្ពុជាក៏ទទួលបានសុខសន្តិភាព និ​ង​​ស្ថិរភាពពេញលេញ ថែមទាំងមានកំណើនសេដ្ឋកិច្ចរហូតដល់ជាង៧ភាគរយ​។ សម្តេច​តេជោក៏​បា​នថ្លែង​អំណរគុណផងដែរ ជូនចំពោះហុងគ្រីដែលបានផ្ដល់នូវការគាំទ្រដល់កម្ពុជា ជាពិ​សេ​ស​លើឯកសារដែលបានចុះហត្ថលេខាកន្លងមកនោះ ដែលក្នុងនោះមាន ទី១- គម្រោង​​តេជោ ភូមិ១០០ ទី២- សកម្មភាពដោះមីន ដើម្បីជំរុញឱ្យកម្ពុជាក្លាយជា​ប្រទេស​គ្មាន​មីន​នៅឆ្នាំ២០២៥ និងទី៣- អាហារូបករណ៍ជូនដល់និស្សិតកម្ពុជាចំនួន១៥កន្លែង ក្នុង១ឆ្នាំ។ ពាក់ព័ន្ធនឹង​បញ្ហាទឹ​ក​ស្អាត និងសំរាម សម្ដេចតេជោបានស្នើឱ្យភាគីហុងគ្រី បញ្ជូនអ្នកជំនាញ​ដើម្បីមកធ្វើការ​សិ​ក្សា​ ផ្តល់យោបល់ និងចូលរួមសហការជាមួយកម្ពុជា លើទាំងបញ្ហាទឹក ស្អាត សំណ​ល់​រឹង និង​សំ​ណល់រាវ។ សម្ដេចតេជោបានគូសបញ្ជាក់ថា ត្រូវផ្តល់អទិភាព​លើកិច្ចសហប្រតិបត្តិការ ទៅ​លើ​​បញ្ហាសំណល់រឹង និងសំណល់រាវ នៅក្នុងទីក្រុងភ្នំពេញ និងទីក្រុងផ្សេងៗ​ទៀតទៅ​តា​ម​មា​ត់​សមុទ្រនិងតាមដងទន្លេមេគង្គ។ សម្ដេចតេជោ ក៏បានផ្តល់​ ការ​ងារនេះ​ជូនដល់ក្រសួង​បរិ​ស្ថា​ន​ ​ដើម្បីបន្តការពិភាក្សាជាមួយនឹងភាគីហុងគ្រី ដើម្បីស្នើឱ្យ​ភាគីហុងគ្រី​បញ្ជូនអ្នកជំនាញ​ការ​មក​កម្ពុជាក្នុងសិក្សា និងពិភាក្សារួមគ្នាជាមួយក្រសួងបរិស្ថាន​ក្នុងពេលដ៏ឆាប់ៗខាងមុខនេះ៕

ដោយ ជឹម ណារី