ភ្នំពេញ ថ្ងៃទី២១ ខែតុលា ឆ្នាំ២០១៩ –ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យ ស្ដេចយាងចាកចេញពីកម្ពុជាហើយ នាព្រឹកថ្ងៃ២១ ខែតុលា ឆ្នាំ២០១៩ តាមព្រះទីនាំងពិសេស ឆ្ពោះទៅកាន់ទីក្រុងតូក្យូ ដើម្បីចូលរួមក្នុងព្រះរាជពិធីរាជាភិសេកគ្រងរាជសម្បត្តិរបស់ព្រះចៅអធិរាជថ្មី នៃប្រទេសជប៉ុន ដែលគ្រោងធ្វើឡើងនៅថ្ងៃទី២២ ខែតុលា ឆ្នាំ២០១៩ ខាងមុខនេះ។
យាង និងអញ្ជើញថ្វាយព្រះរាជដំណើររបស់ព្រះអង្គ នៅឯព្រលានយន្តហោះអន្តរជាតិភ្នំពេញ មានវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងមន្ត្រីអ្នកមុខអ្នកការ និងព្រះរាជវង្សានុវង្សជាច្រើនរូបទៀត។ ដោយឡែកឯកអគ្គរាជទូតជប៉ុន ប្រចាំនៅកម្ពុជាក៏មានវត្តមានក្នុងឱកាសនោះផងដែរ។
ក្នុងព្រះរាជសារចុះថ្ងៃទី២០ ខែតុលា ឆ្នាំ២០១៩ ដែលត្រូវបានផ្សព្វផ្សាយតាមទូរទស្សន៍ ជាតិកម្ពុជា(TVK) ផ្ញើជូនជនរួម ជាតិ របស់ព្រះករុណាព្រះមហាក្សត្រ បានគូសបញ្ជាក់ថា «ទូលព្រះបង្គំ ខ្ញុំព្រះករុណាខ្ញុំ សូមព្រះអនុញ្ញាត និងអនុញ្ញាតពីសម្ដេចព្រះអគ្គមហាសង្ឃរាជទាំងពីរគណៈ និងព្រះថេរានុថេរៈគ្រប់ព្រះអង្គ សម្ដេច ឯកឧត្ដម លោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ អវត្តមានពីមាតុប្រទេស ចាប់ពីថ្ងៃទី២១ ដល់ ថ្ងៃទី២៤ ខែតុលា ឆ្នាំ២០១៩ ដើម្បីចូលរួមក្នុងព្រះរាជពិធីរាជាភិសេកគ្រងរាជសម្បត្តិ របស់ព្រះចៅអធិរាជថ្មី នៃប្រទេសជប៉ុន។ នៅក្នុងឱកាសអវត្តមានទូលព្រះបង្គំ ខ្ញុំព្រះករុណាខ្ញុំ ខាងលើនេះ សម្ដេចវិបុលសេនាភក្ដីសាយ ឈុំ ប្រធានព្រឹទ្ធសភា នឹងទទួលជួយទូលព្រះបង្គំ ខ្ញុំព្រះករុណាខ្ញុំ ក្នុងឋានៈជាប្រមុខរដ្ឋស្ដីទី នៃព្រះរាជាណាចក្រកម្ពុជា។ ទូលព្រះបង្គំ ខ្ញុំព្រះករុណាខ្ញុំ សូមថ្វាយព្រះពរសម្ដេចព្រះអគ្គមហាសង្ឃរាជទាំងពីរគណៈ សូមប្រគេនពរព្រះ ថេរានុថេរៈគ្រប់ព្រះអង្គ និងសូមជូនពរ សម្ដេច ឯកឧត្ដម លោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ សូមបានប្រកបតែនឹង ព្រះពុទ្ធពរទាំង៤ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ»។
គួរបញ្ជាក់ដែរថា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គបានសព្វព្រះរាជហឫទ័យថ្វាយព្រះរាជសារអបអរសារទរថ្វាយ ព្រះករុណា ណារូហ៊ីតុ (NARUHITO) ក្នុងឱកាសដ៏វិសេសវិសាលនៃព្រះរាជពិធីគ្រងព្រះបរមសិរីរាជ្យសម្បត្តិជាព្រះចៅអធិរាជថ្មីរបស់ជប៉ុន កាលពីថ្ងៃទី១ ខែឧសភា ឆ្នាំ២០១៩។ ព្រះចៅអធិរាជជប៉ុនថ្មី Naruhito បានឡើងគ្រងរាជសម្បត្តិ Chrysanthemum Throne កាលពីថ្ងៃទី០១ ខែឧសភា ឆ្នាំ២០១៩ កន្លងទៅ បន្ទាប់ពីព្រះបិតារបស់ទ្រង់ Akihito មានព្រះជន្ម ៨៥ព្រះវស្សា បានសម្រេចព្រះទ័យ ដាក់រាជ្យ ដោយសារតែបញ្ហាព្រះរាជសុខភាព។ នៅថ្ងៃទី២២ ខែតុលា ឆ្នាំ២០១៩ ព្រះរាជពិធីឡើងគ្រងរាជ្យសម្បត្តិនៃព្រះរាជបល្ល័ងគ្រីសាន់ធីម៉ាំ (Chrysanthemum) គ្រោងនឹងប្រព្រឹត្តទៅយ៉ាងអធិកអធមតាមព្រះរាជប្រពៃណីរបស់ប្រទេសជប៉ុន៕