សម្តេចតេជោនាយករដ្ឋមន្រ្តី អញ្ជើញចាកចេញពីទីក្រុងសូហ្វីយ៉ា សាធារណរដ្ឋប៊ុលហ្ការី ក្នុងដំណើរនិវត្តន៍មកកាន់រាជធានីភ្នំពេញ ព្រះរាជាណាចក្រកម្ពុជា

14

បន្ទាប់ពីស្នាក់អាស្រ័យបំពេញទស្សនកិច្ចផ្លូវការ រយៈ​ពេល​៣ថ្ងៃ នៅទីក្រុងសូហ្វីយ៉ា សាធា​រណ​រដ្ឋ​ប៊ុល​ហ្ការី ប្រកបដោយ​លទ្ធផល​ដ៏ត្រចះត្រចង់រួចមក នៅរសៀលថ្ងៃទី១៧តុលា សម្តេចអគ្គ មហា​សេនា​បតី​តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈ​ប្រតិភូជាន់​ខ្ពស់ រាជ​រដ្ឋា​ភិបាល​កម្ពុជា អញ្ជើញធ្វើដំណើរ ចាកចេញ​ពីទីក្រុង​សូហ្វីយ៉ា សាធារណ​រដ្ឋប៊ុលហ្ការី ក្នុង​ដំណើរ​និវត្តន៍​មកកាន់​រាជធានីភ្នំពេញ ព្រះរាជាណាចក្រកម្ពុជា។

នៅអាកាសយាន​ដ្ឋានអន្តរជាតិ សូ ហ្វីយ៉ា វត្តមាន នៃការ​អញ្ជើញ​ជូនដំណើរ​សម្តេច​តេជោ​នាយក​រដ្ឋមន្រ្តី​រួមមាន ឯកឧត្តម ហ្គ័រ ហ្គ័រហ្គើ​អេវ អនុរដ្ឋមន្រ្តីក្រសួង​ការបរទេស​ប៊ុលហ្ការី លោកជំទាវ Marinela Petkova ឯកអគ្គរដ្ឋទូតវិសាមញ និង​ពេញសមត្ថភាព នៃសាធារណរដ្ឋប៊ុលហ្ការី ប្រចាំព្រះរាជា​ណាចក្រកម្ពុជា ដែលមាន​និវេសនដ្ឋាន នៅទីក្រុងហាណូយ សាធារ​ណ​រដ្ឋ​សង្គម​និយម​វៀទណាម លោក ប៉ូល សេងគី ភារ:ធារី នៃស្ថាន​ឯក​អគ្គ​រាជទូត​កម្ពុជា ប្រចាំសាធារណរដ្ឋប៊ុលហ្ការី ព្រម​ទាំងឥ​ស្សរជនការទូត នៃ ប្រទេសកម្ពុជាជាច្រើន​រូបទៀត។

សូមបញ្ជាក់ថា សម្តេចតេជោនាយករដ្ឋមន្រ្តី បានចាកចេញពីរាជធានីភ្នំពេញ ព្រះរាជាណា​ចក្រ​កម្ពុជា កាលពីថ្ងៃទី១៣ តុលា ក្នុងការអញ្ជើញបំពេញ​ទស្សនកិច្ចផ្លូវការ ទៅកាន់ប្រទេសអឺរ៉ុបខាង កើត​ចំនួន​៣ រួមមានសាធារណរដ្ឋឆែក ហុងគ្រី និងសាធារណរដ្ឋប៊ុលហ្ការី។ ដំណើរបំពេញ​ទស្សន​កិច្ចផ្លូវ​ការ​ទៅ​កាន់​ប្រទេស​អឺរ៉ុបខាងកើតទាំងបី របស់សម្តេចតេជោនាយករដ្ឋមន្រ្តី ទទួលបាន​នូវលទ្ធ​ផល​ដ៏​ត្រចះ​ត្រចង់​បំផុត ពិសេសការ​ជំរុញ​កិច្ចសហប្រតិបត្តិការ​ទ្វេភាគី តំបន់ និងអន្តរជាតិ ដែលមាន ការ​យក​ចិត្ត​ទុកដាក់ និងផ្តល់ផលប្រយោជន៍ឲ្យគ្នាទៅវិញទៅមក។