ឯកឧត្តមកិត្តិនីតិកោសលបណ្ឌិត ប៊ិន ឈិន អញ្ជើញគោរពព្រះវិញ្ញាណក្ខ័ន្ធ ព្រះករុណា ព្រះបរមរតនកោដ្ឋ នៅមណ្ឌលតម្កល់ព្រះបរមរូប និងនៅទីស្តីការគណៈរដ្ឋមន្ត្រី

36

ស្របពេលដែលមន្ត្រីជាន់ខ្ពស់ និងថ្នាក់​ដឹកនាំ​​សំខាន់ៗ ក្នុងជួររាជរដ្ឋាភិបាលកម្ពុជា បានអញ្ជើញ​គោរព​ព្រះវិញ្ញាណ​ក្ខ័ន្ធ ក្រាបថ្វាយមហាព្រះរាជកុសល ថ្វាយព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរម​រតន​កោដ្ឋ ជាទី​សក្ការៈ​ដ៏​ខ្ពង់​​ខ្ពស់បំផុត នៅមណ្ឌលតម្កល់ព្រះបរមរូប ជិតវិមានឯករាជ្យ រាជធានីភ្នំពេញ ព្រមទាំង​នៅតាមបណ្តា​ខេត្តក្រុង​ទូទាំង​ប្រទេស ក្នុងឱកាសនៃព្រះរាជាពិធីបុណ្យខួបគម្រប់៧ឆ្នាំ នៃការយាងសោយព្រះទីវង្គត់ របស់ព្រះអង្គ។ ​ថ្ងៃនេះ គឺជាថ្ងៃដែលព្រះវររាជបិតា​ឯករាជ្យជាតិខ្មែរ សម្តេចព្រះនរោត្តម សីហនុ បានយាងសោយ​ព្រះទីវង្គត​ ​ចាក​ចោល​ប្រជារាស្រ្ត និងដែនដីកម្ពុជាដ៏ជាទីស្នេហារបស់ព្រះអង្គ ហើយក៏ថ្ងៃជាដែលកូនខ្មែរ និងជាតិខ្មែរទាំង​មូលសោកសៅ​ជាទី​បំផុត។

ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ បាន​យាង​សោយ​ព្រះ​ទិវង្គត នៅ​វេលា​ម៉ោង ​១​ និង​២០​នាទី រំលង​អធ្រាត្រឈានចូល​ថ្ងៃ​ទី​១៥ ខែ​តុលា ឆ្នាំ​២០១២ (ម៉ោងនៅក្នុងប្រទេសកម្ពុជា) ក្នុង​ព្រះជន្មាយុ៩០​ព្រះវស្សា ដោយ​ព្រះជរាពាធ នៅ​មន្ទីរពេទ្យនាទីក្រុង​ប៉េកាំង ប្រទេស​​ចិន។  នៅព្រឹកថ្ងៃទី១៥ ខែតុលា ឆ្នាំ២០១៩នេះដែរ ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋ​មន្រ្តី​ប្រចាំការ ​រដ្ឋមន្ត្រីទទួល​បន្ទុក​ទីស្តី​ការគណៈរដ្ឋមន្ត្រី រួមនិង ឯកឧត្តម លោកជំទាវ អស់លោក លោកស្រី ជាថ្នាក់ដឹកនាំ និងមន្ត្រីរាជ​ការ​អ្នកមុខ អ្នកការនៃទីស្តីការគណៈរដ្ឋមន្ត្រី បានអញ្ជើញទៅ​គោរព​ព្រះវិញ្ញាណ​ក្ខ័ន្ធ ក្រាបថ្វាយមហាព្រះរាជកុសល ថ្វាយព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរម​រតន​កោដ្ឋ ជាទី​សក្ការៈ​ដ៏​ខ្ពង់​​ខ្ពស់បំផុត នៅមណ្ឌលតម្កល់ព្រះបរមរូប ជិតវិមានឯករាជ្យ រាជធានីភ្នំពេញ។  ហើយក៏បាន​អញ្ជើញគោរព​ព្រះវិញ្ញា​ណ​ក្ខ័ន្ធក្រាបថ្វាយមហាព្រះរាជកុសល ថ្វាយ​ព្រះ​ករុណា ព្រះមហាវីរក្សត្រ ព្រះវររាជ​បិតាជាតិខ្មែរ ព្រះបរម​រតន​កោដ្ឋជាទីសក្ការៈដ៏ខ្ពង់ខ្ពស់បំផុតនាទីស្តីការ​គណៈរដ្ឋមន្ត្រីផងដែរ។

នៅក្នុងឱកាសគោរពព្រះវិញ្ញាណក្ខ័ន្ធ ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតន​កោដ្ឋ ជាទីសក្ការៈ ដ៏ខ្ពង់ខ្ពស់បំផុត នាថ្ងៃនេះ ឯកឧត្តមកិត្តិនីតិកោសលបណ្ឌិត ប៊ិន ឈិន និងឯកឧត្តម លោកជំទាវ អស់លោក លោកស្រី ជាថ្នាក់​ដឹកនាំ  នៃទីស្តី​ការគណៈរដ្ឋមន្ត្រីទាំងអស់ បានអញ្ជើញគោរពព្រះវិញ្ញាណក្ខន្ធ និងបានថ្វាយមហាព្រះរាជកុសល ថ្វាយព្រះវិញ្ញាណក្ខន្ធ ព្រះបរមរតនកោដ្ឋ ព្រមទាំង​​​បានបួងសួងសូមឲ្យព្រះអង្គយាងបដិសន្ឋិក្នុង​ព្រះបរមសុគតិភព​កុំបីឃ្លាង​ឃ្លាតឡើយ និងសូមឲ្យព្រះ​វិញ្ញា​ណក្ខន្ធ​ព្រះ​​អង្គ តាមជួយបីបាច់រក្សាការពារ ព្រះរាជាណាចក្រកម្ពុជា និងប្រជារាស្ត្រទាំងមូល បានជួបតែនឹង​សុខ​សន្តិភាព វិបុល​ភាព និងរីកចម្រើនជានិច្ចនិរន្តរ៍តរៀងទៅ។ សម្តេចព្រះបរមរតនកោដ្ឋ ត្រូវបានប្រជា​រាស្ត្រ​ខ្មែរទាំងមូល ចាត់ទុកជាអង្គ​ព្រះមហាក្សត្រ និងជាព្រះមហាវីរក្សត្រខ្មែរ ដែលបានលះបង់ព្រះកាយពល និងព្រះបញ្ញាញាណ​ពេញមួយ ព្រះជន្មរបស់​ព្រះអង្គ ដើម្បីបុព្វហេតុជាតិមាតុភូមិ និងនាំមកនូវឧត្តមប្រយោជន៍សម្រាប់ប្រជារាស្រ្តរបស់ព្រះអង្គ ជាពិសេសព្រះរាជ​បូជ​នីយ​​កិច្ច​ទាម​ទារ​ឯករាជ្យ ពីប្រទេសបារាំងនាថ្ងៃទី០៩ ខែវិច្ឆិកា ឆ្នាំ១៩៥៣ ដែលប្រជាជាតិទាំងមូល មានសេចក្តីរីករាយ​យ៉ាងក្រៃលែង ដោយបានប្រសិទ្ធនាម ព្រះអង្គជាព្រះបិតាឯករាជ្យជាតិខ្មែរ។   សូមបញ្ជាក់ថា នៅឆ្នាំនេះ​ ក៏ដូចជាឆ្នាំមុនៗដែរ​ ប្រជារាស្ត្រទូទាំងប្រទេស ព្រម​ទាំងមន្ត្រីរាជការ កងកម្លាំង​ប្រដាប់​អាវុធ​គ្រប់ជាន់ថ្នាក់ បានលំឱនកាយ សម្តែងនូវសមាណទុក្ខ និងការគោរពនឹករលឹកដឹងគុណដ៏ខ្ពង់ខ្ពស់បំផុតថ្វាយចំពោះ ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ជាទីសក្ការៈដ៏ខ្ពង់ខ្ពស់បំផុត ដែលព្រះអង្គ​បាន​លះ​បង់ និង​បូជាព្រះកាយពលដ៏​ធំធេង​បំផុតចំពោះជាតិមាតុភូមិកម្ពុជា។   កូនចៅប្រជារាស្ត្រទូទាំងប្រទេស និងមន្ត្រីរាជការ ក៏បានចូលរួមថ្វាយមហា​ព្រះរាជកុសល ថ្វាយព្រះវិញ្ញាណក្ខ័ន្ធ ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរម​រតនកោដ្ឋ ជាទី​សក្ការៈ​ដ៏ខ្ពង់ខ្ពស់បំផុត សូមព្រះអង្គស្តេចយាងបដិសន្ឋិក្នុងព្រះបរមសុគតិភព  កុំបីឃ្លាងឃ្លាតឡើយ៕