ថ្ងៃទី១៤ ខែតុលា ឆ្នាំ២០១៩ — ក្នុងឱកាសស្នាក់អាស្រ័យ និងបំពេញទស្សនកិច្ចផ្លូវការនៅសាធារណរដ្ឋឆែក នារសៀល ថ្ងៃទី១៤ ខែតុលា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជួបពិភាក្សាការងារជាមួយឯកឧត្តម Jaroslav Kubera ប្រធានព្រឹទ្ធសភា នៃសាធារណរដ្ឋឆែក។
តាមប្រភពពីអ្នកយកព័ត៌មានរបស់ទូរទស្សន៍ជាតិកម្ពុជាបានឱ្យដឹងថា ក្នុងជំនួបដែលធ្វើឡើងនៅវិមានព្រឹទ្ធសភា ក្នុងទីក្រុងប្រាក ឯកឧត្តម Jaroslav Kubera មានប្រសាសន៍ជម្រាបជូនសម្តេចតេជោនាយករដ្ឋមន្រ្តីថា សភានៃសាធារណរដ្ឋឆែក គឺជាស្ថាប័ននីតិបញ្ញត្តិ នៃសាធារណរដ្ឋឆែក ដែលត្រូវបានបែងចែកជា២ថ្នាក់ គឺ១សភាជាន់ខ្ពស់ (ព្រឹទ្ធសភា) និង២សភា ជាន់ទាប (រដ្ឋសភា)។ ឯកឧត្តមមានប្រសាសន៍បន្តថា ព្រឹទ្ធសភាត្រូវបានបង្កើតឡើងនៅឆ្នាំ១៩៩៦ និងមានសមាជិកចំនួន៨១រូប ដែលត្រូវបានជ្រើសរើសតាមរយ:ការបោះឆ្នោតចំនួន២ជុំ ពោលប្រសិនបើគ្មានបេក្ខជនណាមួយទទួលបានសម្លេងគាំទ្រភាគច្រើន នៅក្នុងជុំទី១នោះទេ បេក្ខជនដែលមានការគាំទ្រច្រើនជាងគេ២រូប នឹងត្រូវបានបោះឆ្នោតជ្រើសរើសក្នុងជុំទី២។ នៅក្នុងកិច្ចសន្ទនាគ្នានោះដែរ ភាគីទាំងពីរបានស្នើឲ្យមានការផ្លាស់ប្តូរទស្សនកិច្ចកម្រិត គណ:កម្មការជំនាញរវាងព្រឹទ្ធសភា នៃប្រទេសទាំងពីរ និងគាំទ្រគ្នាទៅវិញទៅមក ក្នុងក្របខណ្ឌកិច្ចសហប្រតិបត្តិការអន្តរជាតិ ជាពិសេសក្នុងក្របខណ្ឌសហភាពអន្តរសភា (IPU) និងវេទិកាផ្សេងៗទៀត។មេដឹកនាំទាំងពីរក៏បានធ្វើការពិភាក្សាគ្នាផងដែរ ទាក់ទិនទៅនឹងស្ថាប័នរដ្ឋសភា នៃប្រទេសទាំងពីរ តាមរយ:ការស្នើបង្កើត ឲ្យមានក្រុមមិត្តភាពរដ្ឋសភាកម្ពុជា-ឆែក និង ស្នើឲ្យមានការផ្លាស់ប្តូរទស្សនកិច្ចកម្រិតថ្នាក់ដឹកនាំ គណ: កម្មការជំនាញ និងក្នុងក្របខណ្ឌអគ្គលេខាធិការដ្ឋាន រវាងរដ្ឋសភានៃប្រទេសទាំងពីរ។
សម្តេចតេជោនាយករដ្ឋមន្រ្តី មានប្រសាសន៍ថ្លែងនូវអំណរគុណយ៉ាងជ្រាលជ្រៅ ចំពោះថ្នាក់ ដឹកនាំព្រឹទ្ធសភា រដ្ឋាភិបាល និងប្រជាជន នៃសាធារណរដ្ឋឆែក ចំពោះការស្វាគមន៍និងបដិសណ្ឋារកិច្ចដ៏កក់ក្តៅចំពោះសម្តេចផ្ទាល់ និងគណៈប្រតិភូកម្ពុជា ក្នុងអំឡុងពេលស្នាក់នៅទីក្រុងប្រាក។ ក្នុង ជំនួបគ្នានោះ សម្តេចតេជោនាយករដ្ឋមន្រ្តី បានពាំនាំការអញ្ជើញរបស់សម្តេចវិបុលសេនា ភក្តី សាយ ឈុំ ប្រធានព្រឹទ្ធសភាកម្ពុជា ជូនចំពោះឯកឧត្តម Jaroslav Kubera ប្រធានព្រឹទ្ធសភា នៃសាធារណរដ្ឋឆែក ដើម្បីបំពេញទស្សនកិច្ចផ្លូវការនៅកម្ពុជា ដែលការអញ្ជើញនេះត្រូវបានឯកឧត្តម ប្រធានព្រឹទ្ធសភាឆែក ទទួលយកនូវការអញ្ជើញ និងឆ្លើយតបតាមពេលវេលាដ៏សមស្របខាងមុខ។ ក្នុងនាម សម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចតេជោនាយករដ្ឋមន្រ្តី បានអញ្ជើញភាគី ឆែកឲ្យមកបំពេញទស្សនកិច្ច និងចូលរួមកិច្ចប្រជុំភាពជាដៃគូសភាអាស៊ី-អឺរ៉ុប(ASEM) លើកទី១១ នៅកម្ពុជាក្នុងឆ្នាំ២០២០ខាងមុខនេះ។ ក្នុងជំនួបនោះដែរ ភាគីទាំងពីរក៏បានវាយតម្លៃខ្ពស់អំពីកិច្ចសហប្រតិបត្តិការលើគ្រប់ វិស័យសម្រាប់ប្រទេសទាំងពីរ ទាំងស្ថាប័ននីតិបញ្ញត្តិ និងទាំងស្ថាប័ននីតិប្រតិបត្តិ៕
ដោយ ជឹម ណារី
