ភ្នំពេញ ថ្ងៃទី០៥ ខែតុលា ឆ្នាំ២០១៩ — បន្ទាប់ពីបានបំពេញទស្សនកិច្ចផ្លូវការរយៈពេលពីរថ្ងៃ នៅលើទឹកដីនៃសាធារណរដ្ឋសង្គមនិយមវៀតណាមប្រកបដោយជោគជ័យនោះ នារសៀលថ្ងៃទី ៥ ខែតុលា ឆ្នាំ២០១៩ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានដឹកនាំគណៈប្រតិភូជាន់ខ្ពស់ អញ្ជើញនិវត្តន៍មកដល់កម្ពុជាវិញប្រកបដោយសុវត្ថិភាព តាមជើងយន្តហោះពិសេស។
អញ្ជើញទទួលដំណើរនិវត្តន៍របស់គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា នៅឯព្រលានយន្តហោះអន្តរជាតិភ្នំពេញ មានវត្តមានសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឥស្សរជនជាន់ខ្ពស់ក្នុងជួររាជរដ្ឋាភិបាលជាច្រើនរូបទៀត។ ដោយឡែកមន្ត្រីស្ថានទូតវៀតណាមប្រចាំនៅកម្ពុជា ក៏មានវត្តមានក្នុងឱកាសនោះផងដែរ។ ក្នុងអំឡុងទស្សនកិច្ចនៅប្រទេសវៀតណាម សម្ដេចតេជោនាយករដ្ឋមន្ត្រី បានចូលជួបសម្ដែងការគួរសមដាច់ដោយឡែកពីគ្នាជាមួយ ឯកឧត្ដម ង្វៀន ហ្វូ ជុង អគ្គលេខាធិការបក្សនិងជាប្រធានរដ្ឋវៀតណាម និងលោកជំទាវ ង្វៀន ធី គីម ងិន ប្រធានរដ្ឋសភាវៀតណាម។ ជាមួយនេះដែរ សម្ដេចតេជោ ហ៊ុន សែន ក៏បានជួបពិភាក្សាទ្វេភាគីជាមួយសមភាគីវៀតណាម ឯកឧត្ដម ង្វៀន សួនហ្វុក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម ដែលក្នុងឱកាសនោះ ប្រមុខរដ្ឋាភិបាលនៃប្រទេសទាំងពីរ បានឯកភាពធ្វើឱ្យទំនាក់ទំនងនយោបាយ កាន់តែស៊ីជម្រៅ ថែមទៀត តាមរយៈការបង្កើនការផ្លាស់ប្តូរទស្សនកិច្ច និងទំនាក់ទំនងកម្រិតខ្ពស់ រក្សានូវយន្តការ កិច្ចសហប្រតិបត្តិការទ្វេភាគីដែលមានស្រាប់ ពង្រឹងការផ្លាស់ប្តូររវាងប្រជាជននិងប្រជា ជន ពង្រឹងកិច្ចសហប្រតិបត្តិការមិត្តភាព និងជំនួបដែលមានសារសំខាន់រវាងក្រសួង ស្ថាប័នពាក់ព័ន្ធ និងខេត្តនៃប្រទេសទាំងពីរ ក៏ដូចជាបន្តរៀបចំព្រឹត្តិការណ៍អបអរសាទរផ្សេងៗរួមគ្នា។
ជាងនេះទៀត ដោយទទួលស្គាល់នូវកាលានុវត្តន៍ដ៏ល្អប្រពៃ សម្រាប់កិច្ចសហប្រតិបត្តិការសេដ្ឋកិច្ច ពាណិជ្ជកម្មទ្វេភាគី និងការវិនិយោគនៃប្រទេសជិតខាង ភាគីទាំងពីរបានឯកភាពប្រើប្រាស់សក្តានុពលទាំងអស់ ដើម្បីជំរុញសេដ្ឋកិច្ច នៃប្រទេសទាំងពីរទៅជាសសរស្តម្ភ នៃទំនាក់ទំនងទ្វេភាគីកម្ពុជា-វៀតណាម។ជាមួយគ្នានេះ ភាគីទាំងពីរបានឯកភាពជំរុញការតភ្ជាប់ សេដ្ឋកិច្ចរវាងប្រទេសទាំងពីរ តាមរយៈការបញ្ចប់ឲ្យបានឆាប់នូវផែនការមេស្តីពីការតភ្ជាប់សេដ្ឋកិច្ចកម្ពុជា-វៀតណាមរហូតដល់ឆ្នាំ២០៣០ និងការអនុវត្តកិច្ចព្រមព្រៀងដែលបានចុះហត្ថលេខារួច ស្តីពីការតភ្ជាប់ការដឹកជញ្ជូន រួមទាំងអនុស្សារណៈយោគយល់គ្នា ស្តីពីយុទ្ធសាស្រ្តកិច្ចសហប្រតិបត្តិការលើវិស័យដឹកជញ្ជូន សម្រាប់ឆ្នាំ២០១៨-២០២៥ ជាមួយចក្ខុវិស័យឆ្នាំ២០៣០។ នៅក្នុងទស្សនកិច្ចនេះដែរ ក៏មានកិច្ចព្រមព្រៀង និងអនុស្សរណៈចំនួន ៧ ដែលគ្របដណ្ដប់លើកិច្ចសហប្រតិបត្តិការទ្វេភាគី រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ព្រមទាំងឯកសារសំខាន់ ចំនួន២ផ្សេងទៀត គឺទី១-សន្ធិសញ្ញាបំពេញបន្ថែម លើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងសាធារណរដ្ឋសង្គមនិយមវៀតណាម និងព្រះរាជាណាចក្រកម្ពុជា និង ទី២-ពិធីសារខណ្ឌសីមានិង បោះបង្គោលព្រំដែនគោក រវាងសាធារណរដ្ឋសង្គមនិយមវៀតណាម និងព្រះរាជាណាចក្រកម្ពុជា ក៏ត្រូវបានចុះហត្ថលេខា ក្នុងដំណើរទស្សនកិច្ចផ្លូវការរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់សាធារណរដ្ឋសង្គមនិយមវៀតណាម ដែលក្នុងពីធីនោះសម្ដេចតេជោ ហ៊ុន សែន មានប្រសាសន៍ថា «ពិធីចុះហត្ថលេខាលើឯកសារជាប្រវត្តិសាស្ត្រទាំងពីរថ្ងៃនេះ បានបញ្ជាក់យ៉ាងច្បាស់ថា ដំណោះស្រាយព្រំដែនរវាប្រទេសយើងទាំងពីរ បានបោះជំហានទៅមុខជាលំដាប់គួរឱ្យមោទនភាព»។ ជាមួយគ្នានេះដែរ «ក្នុងអំឡុងពេល១៤ឆ្នាំកន្លងមក បន្ទាប់ពីការចុះហត្ថលេខាលើសន្ធិសញ្ញាបំពេញបន្ថែមឆ្នាំ២០០៥ រហូតមកដល់ពេលនេះ យើងសម្រេចបានលទ្ធផលប្រមាណជា ៨៤ភាគរយ នៅសល់តែ ១៦ភាគរយទៀត នឹងខិតខំបន្តដោះស្រាយបញ្ចប់នាពេលខាងមុខ៕
ដោយ ជឹម ណារី
