ភ្នំពេញ ថ្ងៃទី០៥ ខែតុលា ឆ្នាំ២០១៩ — មុននឹងបញ្ចប់ដំណើរទស្សនកិច្ចផ្លូការនៅសាធារណរដ្ឋសង្គមនិយមវៀតណាម នារសៀលថ្ងៃទី០៥ ខែតុលា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានអញ្ជញចូលជួបជាមួយ លោកជំទាវ ង្វៀន ធី គីមងិន ប្រធានសភាវៀតណាម។
ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា ក្នុងជំនួបសម្ដែងការគួរសម និងពិភាក្សាការងារនេះ លោកជំទាវស្រីប្រធានរដ្ឋសភា បានសម្ដែងនូវការស្វាគម ន៍ សម្ដេចតេជោនាយករដ្ឋមន្ដ្រី ក្នុងការបំពេញទស្សនកិច្ចផ្លូវការ នៅប្រទេសវៀតណាមដោយចាត់ទុកថា ទស្សនកិច្ចផ្លូវការនេះ ជាទស្សនកិច្ចប្រវត្តិសាស្ដ្រដ៏មានសារៈសំខាន់ណាស់ ហើយជាប្រទេសដែលមានទំនាក់ទំនងជិតស្និទ្ធលើគ្រប់វិស័យ។ លោកជំទាវប្រធានរដ្ឋសភា បាន គូសបញ្ជាក់ផងដែរថា អ្វីដែលប្រទេសវៀតណាមចង់បាន គឺចង់បន្ដឱ្យមានការពង្រឹង ពង្រីកទំនាក់ទំនងទ្វេភាគី ហើយផ្អែកទៅលើការជួយគ្នាទៅវិញទៅមក ក្នុងនាមប្រទេសភូមិផងរបងតែមួយ។ លោកជំទាវក៏បានអបអរសាទរ និងវាយតម្លៃខ្ពស់ ចំពោះការជោគជ័យ នៃការបំពេញ ទស្សនកិច្ចរបស់ សម្ដេចតេជោនាយករដ្ឋមន្ដ្រីនៅប្រទេសវៀតណាម ជាពិសេសសម្ដេចក៏បានជួបជាមួយអគ្គលេខាធិការបក្ស ប្រធានរដ្ឋវៀតណាម ជួបជាមួយនាយករដ្ឋមន្ដ្រីវៀតណាម ពិសេសការចុះហត្ថលេខាលើឯកសារជាច្រើន រួមទាំងការចុះហត្ថលេខា ពាក់ព័ន្ធខណ្ឌសីមាព្រំដែនផងដែរ។ លោកជំទាវ ង្វៀន ធី គីមងិន បានលើកឡើងផងដែរថា រដ្ឋសភាវៀតណាម ជំរុញការពិនិត្យមើលឯកសារច្បាប់ និងការគាំទ្រលើការងាររបស់រដ្ឋាភិបាលវៀតណាម សហ ការ ជាមួយប្រទេសកម្ពុជា។
សម្ដេចតេជោនាយករដ្ឋមន្ដ្រី ក៏បានអរគុណដល់លោកជំទាវប្រធានរដ្ឋសភា ដែលបានទទួលសម្ដេច និងគណៈប្រតិភូកម្ពុជា។ សម្ដេចតេជោក៏អរគុណផងដែរចំពោះ ឱកាសនៃការបំពេញទស្សនកិច្ចរបស់សម្ដេចជាប្រវត្តិសាស្ដ្រ និងមានសារៈសំខាន់។ សម្ដេចមានប្រសាសន៍ ផងដែរថា សម្ដេចក៏ចាត់ទុកឱកាសទស្សនកិច្ចនេះ ជាផ្លូវការប្រវត្តិសាស្ដ្រ និងសារៈសំខាន់ រួមទាំងចូលរួមពង្រឹងពង្រីក ទំនាក់ទំនងកិច្ចសហប្រតិបត្តិការនៃប្រទេសទាំងពីរផង និងធ្វើឱ្យកិច្ចសហការកាន់តែស៊ីជម្រៅ ជាពិសេសទៀតដោយសារការទទួលបាន នៃការចុះហត្ថលេខាទៅលើឯកសារខណ្ឌសីមាព្រំដែន ដែលបានបញ្ចប់៨៤ភាគរយហើយនោះ។ សម្ដេចនាយករដ្ឋមន្ដ្រី ក៏បានមានប្រសាសន៍លើកឡើងដែរថា រឿងព្រំប្រទល់ជារឿងមួយដ៏សំខាន់ និងមិន ងាយស្រួលទេ ហើយការងារនេះបានធ្វើជាមួយគ្នាចរចារជាច្រើនឆ្នាំមកហើយ ទម្រាំដោះស្រាយបានធ្វើយ៉ាងណាជំរុញឱ្យព្រំដែនរបស់យើងនេះមានស្ថិរភាពល្អ ជាពិសេសទៀត គឺមានសន្ដិភាព ហើយកិច្ចសហប្រតិបត្តិការ ជាពិសេសទៀតក្នុងដំណើរការនៃទំនាក់ទំនង រវាងប្រជាពលរដ្ឋនៃប្រទេសទាំងពីរ។ លើសពីនេះទៀត មិនត្រឹមតែប៉ុណ្ណោះទៀត បច្ចុប្បន្នយើងឃើញហើយថា តាមខ្សែបន្ទាត់ព្រំដែននេះមានផ្សារ ហើយយើងអាចឃើញនៃបង្គោលខ្សែភ្លើង និងបង្គោលទូរស័ព្ទជាដើម នេះជាតំបន់កំពុងមានការអភិវឌ្ឍ។ សម្ដេចតេជោក៏បានមានប្រសាសន៍ដែរថា ឥឡូវយើងខិតខំជំរុញដើម្បីឱ្យពាណិជ្ជកម្មទ្វេភាគីឱ្យបានច្រើនឡើង មិនមែនត្រឹម៥ពាន់លានដុល្លារ ដែលយើងអាចរាប់បញ្ចូលការទិញភ្លើងអគ្គិសនី នោះទំហំពាណិជ្ជកម្មឡើងដល់ជាង៥.០០០លានដុល្លារទៅហើយ។ សម្ដេចតេជោក៏បានមានប្រសាសន៍ថា សម្ដេចខិតខំប្រឹងប្រែងណាស់ ក្នុងការជំរុញទំនាក់ទំនងទ្វេភាគីជាមួយប្រទេសជិតខាង ជាពិសេសជាមួយប្រទេសវៀតណាមតែម្ដង ធ្វើយ៉ាងណាឲ្យប្រទេសទាំងពីរ ជំរុញការចរចារធ្វើយ៉ាងណាឱ្យមានខ្សែព្រំដែនច្បាស់លាស់ ជាពិសេសទៀត គឺជំរុញការអភិវឌ្ឍ ហើយនឹងជំរុញការធ្វើពាណិជ្ជកម្ម វិនិយោគជាមួយគ្នា។ សម្ដេចតេជោនាយករដ្ឋមន្ត្រីក៏បានបន្ដថា ការពិតទៅសក្ដានុពលរវាងប្រទេសទាំងពីរ អាចធ្វើឡើងដល់១០ពាន់លានដុល្លារ ទំហំ ពាណិជ្ជកម្មរវាងប្រទេសទាំងពីរ។ សម្ដេចតេជោក៏បានថ្លែងអំណរគុណផងដែរ ដល់ប្រទេសវៀតណាម ដែលជំរុញការវិនិយោគនៅកម្ពុជា ជាពិសេសការគាំទ្រដល់ការអភិវឌ្ឍធនធានមនុស្សកម្ពុជា ពិសេសនិស្សិតកម្ពុជា ដែលបច្ចុប្បន្នសិក្សានៅប្រទេសវៀតណាមមានចំនួនជាង៤.៣០០នាក់៕