ប្រធានរដ្ឋវៀតណាមកត់សម្គាល់ពីការរីកចម្រើនរបស់កម្ពុជា

9

ភ្នំពេញ ថ្ងៃទី០៥ ខែតុលា ឆ្នាំ២០១៩ — ឯកឧត្ដម Nguyen Phu Trong អគ្គលេខាធិការបក្ស និងជាប្រធានរដ្ឋនៃសាធារ​ណ​រដ្ឋ ស​ង្គមនិយមវៀតណាម បានកត់សម្គាល់ពីការរីកចម្រើនរបស់ព្រះរាជាណាចក្រកម្ពុជា ពិសេ​ស​កំណើសេដ្ឋកិច្ចមានការកើនឡើងជាបន្តបន្ទាប់។

ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងដូច្នេះ បន្ទាប់ពីស​ម្តេ​ច​ អគ្គមហាសេនាបតីតេជោ ហ៊ុន សែន នាយករដ្នមន្ត្រីនៃព្រះរាជាណាចក្រកម្ពុជា បាដឹកនាំ​គ​ណៈ​ប្រ​តិភូចូលជួបសម្ដែងការគួរសម ជាមួយឯកឧត្ដម Nguyen Phu Trong អគ្គលេខាធិការ​ប​ក្ស​ និងជាប្រធានរដ្ឋនៃសាធារណរដ្ឋសង្គមនិយមវៀតណាម កាលពីរសៀលថ្ងៃទី០៤ ខែតុលា ឆ្នាំ​២​០​​១៩ នៅទីក្រុងហាណូយ ក្នុងខណៈដែលសម្ដេចតេជោនាយករដ្ឋមន្ត្រីអញ្ជើញ​បំពេញទស្សន​កិច្ច​ផ្លូវការនៅសាធារណរដ្ឋសង្គមនិយមវៀតណាមនោះ។

ក្នុងជំនួបនោះដែរ ឯកឧត្តម Ngu​ye​n​ Phu Trong) បានមានប្រសាសន៍ស្វាគមន៍ សម្តេច​តេជោនាយករដ្ឋមន្ត្រី ចំពោះដំណើរ​បំ​ពេ​ញ​ទស្សនកិច្ចផ្លូវការរបស់សម្ដេចតេជោ​និង​គណៈប្រតិភូកម្ពុជា។ ឯកឧត្តមបានបញ្ជាក់ថា ឯកឧត្តមបានតាមដានយកចិត្តទុកដាក់ នៃជំនួបទ្វេភាគីរវាងនាយករដ្ឋមន្ត្រីនៃប្រទេសទាំងពីរ ក៏ដូចជាការធ្វើសន្និសីទរួមរវាង​ថ្នាក់ដឹក​នាំនៃប្រទេសទាំងពីរ ព្រមទាំងលទ្ធ​ផ​ល​​ដ៏ល្អរបស់កម្ពុជា-វៀតណាម ស្ដីអំពីការជំរុញវិនិយោគ និងពាណិជ្ជកម្មផង​ដែ​រ​។ ឯកឧត្តមប្រធានរដ្ឋវៀតណាម ក៏បានកោតសរសើរចំពោះ​ប្រទេស​កម្ពុជា​ដែលមានការរីក​ចម្រើ​ន​​យ៉ាងឆាប់រហ័ស ក្រោមការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រី ជាពិសេ​ស​​កំណើនសេដ្ឋកិច្ចមានការកើនឡើងជាបន្តបន្ទាប់។

នៅក្នុងជំនួបនេះដែរ សម្ដេចតេជោ ហ៊ុន សែន ក៏បានគូសបញ្ជាក់ផងដែរថា សម្តេច​ពិត​ជា​រីក​រាយ​ដែលបានជួបឯកឧត្តមប្រធានរដ្ឋវៀតណាម។ សម្ដេចតេជោនាយ​ករដ្ឋមន្ត្រី​ក៏​បាន​ជម្រា​បជូន​អំពីលទ្ធផលនៃដំណើរបំពេញទស្សនកិច្ចរបស់​សម្ដេចមកកាន់ប្រទេស​វៀត​ណាម​នា​ពេ​ល​នេះ ហើយសម្តេចបានចាត់ទុកថានេះ គឺជាប្រវត្តិសាស្ត្រមួយសម្រាប់​ប្រទេស​ទាំងពីរកម្ពុជា-វៀ​តណាមផងដែរ ក្នុងការចូលរួមពង្រឹងនិងពង្រីកនូវកិច្ចសហប្រតិបត្តិ​ការរវាង​ប្រទេសទាំង​ពី​រ​។ ស​ម្ដេ​ច​​តេជោនាយករដ្ឋមន្ត្រី ​ក៏បានកោតសរសើរចំពោះប្រទេសវៀតណាម​ដែលមាន​ការ​អភិ​វឌ្ឍ​រីកចំរើនជឿនលឿន​ ពិសេសកំណើនសេដ្ឋកិច្ចរីកលូតលាស់យ៉ាង​ឆាប់​រហ័ស ដែល​ទាក់​​ទាញ​ការវិនិយោគពីបរទេសបានយ៉ាងច្រើន។ សម្តេចតេជោគូសបញ្ជាក់ថា កម្ពុជា-វៀត​ណា​ម នឹងរួមគ្នាអនុវត្តន៍ឱ្យបានម៉ឺងម៉ាត់បំផុត នូវរាល់ទិសដៅដែលបានដាក់ចេញ និងការព្រម​ព្រៀ​ងគ្នា ហើយនឹងប្រឹងប្រែងបន្តដោះស្រាយបញ្ចប់ឱ្យបានឆាប់ នូវបញ្ហាដែល​មាន ដូចជា​ការ​ងា​​រ ខណ្ឌសីមា​ និងបោះបង្គោលព្រំដែនគោកដែលនៅសេសសល់១៦ភាគរយ ដើម្បីកសាងព្រំដែន​ប្រទេស​ទាំងពីរឱ្យទៅជាតំបន់ដែលមានសន្តិភាព មិត្តភាព សហប្រតិ​បត្តិការ និងវិបុល​ភាព​ជា​និ​រ​ន្តន៍។ សម្តេចតេជោក៏បានអរគុណចំពោះវៀតណាម​ដែលបាន​ចូលរូមក្នុងការ​ជួយ​រំ​ដោះប្រជាជនកម្ពុជាចេញពីរបបប្រល័យពូសាសន៍ ការស្វែងរកសន្តិភាព  ក៏ដូចជាការ​ស្តា​រ​ និងអភិវឌ្ឍន៍កម្ពុជារហូតមកដល់ពេលបច្ចប្បន្ន៕

ដោយ ជឹម ណារី