ភ្នំពេញ ថ្ងៃទី០៤ ខែតុលា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន និងឯកឧត្ដម ង្វៀន សួនហ៊្វុក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានអះអាងពីការប្ដេជ្ញាចិត្ត បន្តជំរុញកិច្ចសហប្រតិបត្តិការលើគ្រប់វិស័យ រវាងប្រទេសទាំងពីរឱ្យកាន់តែប្រសើរឡើងថែម ទៀត។
យោងតាមការឱ្យដឹងរបស់អ្នកយកព័ត៌មានទូរទស្សន៍ជាតិកម្ពុជាបានឱ្យដឹងថា បន្ទាប់ពីបានចំណាយពេលប្រមាណ១០នាទី នៅក្នុងពិធីបដិសណ្ឋារកិច្ចផ្លូវការរួចមក សម្តេចអគ្គមហាសេនាបតីតេជោ ហ៊ុន សែន និងសមភាគីនាយករដ្ឋមន្រ្តីវៀតណាម ឯកឧត្តម ង្វៀន សួនហ៊្វុក បានអញ្ជើញក្នុងជំនួបនៃកិច្ចប្រជុំកំពូលចង្អៀត និងអញ្ជើញចូលរួមក្នុងកិច្ចប្រជុំកំពូលទ្វេភាគី សម្រាប់ប្រមុខដឹកនាំរដ្ឋាភិបាលនៃប្រទេសទាំងពីរកម្ពុជា-វៀតណាម។ នៅក្នុងជំនួបកំពូលទាំងពីរ ដែលបានចំណាយពេលប្រមាណ១ម៉ោង ប្រមុខរដ្ឋាភិបាលនៃប្រទេសទាំងពីរ បានឈានទៅចេញសេចក្តីថ្លែងការណ៍រួម រវាងសាធារណរដ្ឋសង្គមនិយមវៀតណាម និងព្រះរាជាណាចក្រកម្ពុជា ក្នុងដំណើរទស្សនកិច្ចផ្លូវការរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នៅសាធារណរដ្ឋសង្គមនិយមវៀតណាម ដែលមាន៦ទំព័រ។ ក្នុងសេចក្តីថ្លែងការណ៍រួមនោះ ប្រមុខរដ្ឋាភិបាលនៃប្រទេសទាំងពីរ បាន ឯកភាពធ្វើឱ្យទំនាក់ទំនងនយោបាយ កាន់តែស៊ីជម្រៅថែមទៀត តាមរយៈការបង្កើនការ ផ្លាស់ប្តូរទស្សនកិច្ច និងទំនាក់ទំនងកម្រិតខ្ពស់ រក្សានូវយន្តការ កិច្ចសហប្រតិបត្តិការទ្វេភាគី ដែលមានស្រាប់ ពង្រឹងការផ្លាស់ប្តូររវាងប្រជាជន និងប្រជាជន ពង្រឹងកិច្ចសហប្រតិបត្តិការ មិត្តភាព និងជំនួបដែលមានសារសំខាន់រវាងក្រសួង ស្ថាប័នពាក់ព័ន្ធ និងខេត្តនៃប្រទេស ទាំងពីរ ក៏ដូចជាបន្តរៀបចំព្រឹត្តិការណ៍អបអរសាទរផ្សេងៗរួមគ្នា។ ដោយទទួលស្គាល់នូវ កាលានុវត្តន៍ដ៏ល្អប្រពៃ សម្រាប់កិច្ចសហប្រតិបត្តិការសេដ្ឋកិច្ច ពាណិជ្ជកម្មទ្វេភាគី និងការវិនិយោគនៃប្រទេសជិតខាង ភាគីទាំងពីរបានឯកភាពប្រើប្រាស់សក្តានុពលទាំងអស់ ដើម្បី ជំរុញសេដ្ឋកិច្ច នៃប្រទេសទាំងពីរទៅជាសសរស្តម្ភ នៃទំនាក់ទំនងទ្វេភាគីកម្ពុជា-វៀតណាម។
ជាមួយគ្នានេះ ភាគីទាំងពីរបានឯកភាពជំរុញការតភ្ជាប់សេដ្ឋកិច្ចរវាងប្រទេសទាំងពីរ តាមរយៈការបញ្ចប់ឱ្យបានឆាប់នូវផែនការមេស្តីពីការតភ្ជាប់សេដ្ឋកិច្ចកម្ពុជា-វៀតណាមរហូត ដល់ឆ្នាំ២០៣០ និងការអនុវត្តកិច្ចព្រមព្រៀងដែលបានចុះហត្ថលេខារួច ស្តីពីការតភ្ជាប់ការ ដឹកជញ្ជូន រួមទាំងអនុស្សរណៈយោគយល់គ្នា ស្តីពីយុទ្ធសាស្រ្តកិច្ចសហប្រតិបត្តិការលើវិស័យ ដឹកជញ្ជូន សម្រាប់ឆ្នាំ២០១៨-២០២៥ ជាមួយចក្ខុវិស័យឆ្នាំ២០៣០។ នៅក្នុងជំនួបទ្វេភាគី នោះដែរ ភាគីទាំងពីរបានសម្ដែងនូវសេចក្តីសោមន្សចំពោះការកើនឡើងគួរឱ្យកត់សម្គាល់ នៃទំហំពាណិជ្ជកម្មទ្វេភាគី ដែលមានការកើនឡើង២៤ភាគរយ ក្នុងឆ្នាំ២០១៨ ជាមួយទំហំទឹកប្រាក់ជាង៤.៧០០លានដុល្លាអាម៉េរិក និងរំពឹងសម្រេចបានជាង៥.០០០លានដុល្លាអាម៉េរិក ក្នុងឆ្នាំ២០១៩។ ទន្ទឹមនឹងនេះ ភាគីទាំងពីរបានឯកភាពរក្សាកំណើននៅឆ្នាំបន្តបន្ទាប់ទៀត តាមរយៈការលើកកម្ពស់វិធានការជំរុញពាណិជ្ជកម្ម និងការគាំទ្រសហគ្រាសរបស់ខ្លួន ក្នុងការចូលរួមព្រឹត្តិការណ៍ ជំរុញវិនិយោគ និងពាណិជ្ជកម្ម ផ្សារណាត់ និងការតាំងពិព័រណ៍ក្នុង ប្រទេសនីមួយៗ។ ក្នុងជំនួបកំពូលនោះដែរ ប្រមុខរដ្ឋាភិបាលនៃប្រទេសទាំងពីរកម្ពុជា-វៀតណាម បានធ្វើការពិភាក្សាគ្នាយ៉ាងយកចិត្តទុកដាក់ ជាពិសេសចំពោះការចុះហត្ថលេខា នៃឯកសារច្បាប់ទាំងពីរ ដែលទទួលស្គាល់ពីវឌ្ឍនភាព នៃខ័ណ្ឌសីមា និងការបោះបង្គោលព្រំដែនគោក ដែលសម្រេចបានមកដល់បច្ចុប្បន្នប្រមាណ៨៤ភាគរយ និងបានបញ្ជាក់ជាថ្មីថា សកម្មភាពនេះបានរម្លឹកនូវព្រឹត្តិការណ៍ជាប្រវត្តិសាស្រ្ត ក្នុងដំណើរការដោះស្រាយបញ្ហាព្រំដែនគោករវាងប្រទេសទាំងពីរ។ លើសពីនេះទៀត មេដឹកនាំទាំងពីរ បានឯកភាពគ្នាផងដែរ ក្នុងការបញ្ចប់នូវការងារខ័ណ្ឌសីមា និងបោះបង្គោលព្រំដែនលើកំណាត់ព្រំដែនដែលនៅសេសសល់នាពេលអនាគតឆាប់ៗ។ ក្នុងជំនួបកំពូលនោះដែរ ភាគីទាំងពីរ បានអះអាងជាថ្មីអំពីការប្តេជ្ញាចិត្ត ក្នុងការពិនិត្យឱ្យបានពេញលេញនូវសន្ធិសញ្ញាកំណត់ព្រំដែន និងកិច្ចព្រមព្រៀងពាក់ព័ន្ធនឹងព្រំដែន ដែលបានចុះហត្ថលេខារវាងប្រទេសទាំងពីរ។ ទន្ទឹមនេះ ភាគីទាំងពីរក៏បានឯកភាពជំរុញកិច្ចសហប្រតិបត្តិការ ស្តីពីការគ្រប់គ្រងព្រំដែន ដោយផ្អែកលើយន្តការនិងក្របខ័ណ្ឌច្បាប់ដែលមានស្រាប់ ដើម្បីកសាងខ្សែបន្ទាត់ព្រំដែនសន្តិភាព ស្ថិរភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព។
ក្នុងបរិយាកាសមិត្តភាព ការយោគយល់គ្នា និងការទុកចិត្តគ្នាទៅវិញទៅមក ប្រមុខថ្នាក់ដឹកនាំទាំងពីរ បានពិភាក្សាគ្នាយ៉ាងស៊ីជម្រៅ ព្រមទាំងសម្រេចបានជំហររួមគ្នាយ៉ាងសំខាន់ចំពោះទំនាក់ទំនងទ្វេភាគីវៀតណាម-កម្ពុជា និងការសម្របសម្រួលរវាងប្រទេសទាំងពីរនៅក្នុងវេទិកាតំបន់ និងអន្តរជាតិ។ ពិសេសទៅទៀតនោះ ភាគីទាំងពីរបានកត់សម្គាល់ដោយពេញចិត្តចំពោះសមិទ្ធផល សេដ្ឋកិច្ច និងសង្គម គួរឱ្យកត់សម្គាល់ដែលកម្ពុជា និងវៀតណាម សម្រេចបានក្នុងរយៈពេលប៉ុន្មានឆ្នាំចុងក្រោយ ពិសេសប្រទេសទាំងពីរ បានរក្សានូវស្ថិរភាពនយោបាយ និងសន្តិសុខ ដែលឈានទៅបង្កើនការរីកចម្រើនសេដ្ឋកិច្ចរបស់ខ្លួន និងបានធ្វើឱ្យប្រសើរនូវជីវភាពរស់នៅរបស់ប្រជាជន ដែលរួមចំណែកដល់ការបន្តពង្រឹងតួនាទីជំហររបស់ខ្លួន នៅក្នុងតំបន់ និងនៅលើពិភពលោក។ ក្នុងស្មារតីនេះ ភាគីទាំងពីរបានឯកភាពរក្សាការគាំទ្រ និងជួយគ្នាទៅវិញទៅមក និងបន្តផ្លាស់ប្តូរឧត្តមនវានុវត្តន៍ សម្រាប់ការគ្រប់គ្រងម៉ាក្រូសេដ្ឋកិច្ច និងសមាហរណកម្មអន្តរជាតិ ក្នុងបរិបទពិភពលោកថ្មី៕
ដោយ ជឹម ណារី
