ភ្នំពេញ ថ្ងៃទី០២ ខែតុលា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានអញ្ជើញ ជាអធិបតីភាពដ៏ខ្ពង់ខ្ពស់ ក្នុងពិធីប្រគល់សញ្ញាបត្រដល់សិស្សថ្នាក់វិជ្ជាជីវៈគរុកោសល្យ និងនិស្សិតថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ចំនួន១.១៨៣នាក់ ក្នុងនោះនារីចំនួន ៦៣៥នាក់ នៃសាកលវិទ្យាល័យ ប៊ែលធី អន្តរជាតិ និងប្រកាសផ្សព្វផ្សាយសៀវភៅ «ហ៊ុន សែន កម្ពុជា» នាព្រឹកថ្ងៃពុធ ៤កើត ខែអស្សុជ ឆ្នាំកុរ ឯកស័ក ព.ស ២៦៣ ត្រូវនឹងថ្ងៃទី ០២ ខែ តុលា ឆ្នាំ២០១៩ នៅមជ្ឈមណ្ឌលសន្និបាត និងពិព័រណ៍កោះពេជ្រ។
តាមរបាយកាណ៍របស់សាកលវិទ្យាធិការសាកលវិទ្យាល័យ ប៊ែលធី អន្តរជាតិ បានឱ្យដឹងថា និស្សិតជ័យលាភីនេះ មានឱកាសទទួលបានការងារធ្វើប្រមាណ៩៦.៥៣ភាគរយ។ គិតមកដល់ឆ្នាំសិក្សា២០១៨-២០១៩ សិស្សថ្នាក់វិជ្ជាជីវៈគរុកោសល្យ និងនិស្សិត បានបញ្ចប់ការសិក្សាសរុបចំនួន១.៩១៨នាក់ ក្នុងនោះនារី៩៤៩នាក់។ សាកលវិទ្យាល័យ «ប៊ែលធីអន្តរជាតិ» បាននិងកំពុងបណ្តុះបណ្តាលលើកម្មវិធីសិក្សាជាភាសាជាតិ និងកម្មវិធីសិក្សាអន្តរជាតិ។ ទន្ទឹមនេះ សម្រាប់កម្មវិធីសិក្សាជាភាសាជាតិ បង្រៀនជាពីរភាសា គឺភាសាខ្មែរ និងភាសាអង់គ្លេស និងកម្មវិធីសិក្សាអន្តរជាតិ បង្រៀនជាភាសាអង់គ្លេស១០០ភាគរយ និងមានបង្រៀន៥កម្មវិធីសិក្សាធំៗ ដូចជា ថ្នាក់បំប៉នភាសាអង់គ្លេស-ចិន-ជប៉ុន ថ្នាក់វិជ្ជាជីវៈគរុកោសល្យ ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត។ ក្រៅពីនេះ សាកលវិទ្យាល័យ បានយកចិត្តទុកដាក់លើកកម្ពស់វិស័យអប់រំ ដោយផ្តោតទៅលើសីលធម៌ និងគុណធម៌ និងអប់រំនិស្សិតឱ្យស្គាល់ច្បាស់ពីអត្តសញ្ញាណជាតិរបស់ខ្លួន ឱ្យចេះស្រឡាញ់ប្រទេសជាតិ មាតុភូមិ គោរពច្បាប់រដ្ឋ មិនរើសអើងជាតិសាសន៍ អនុវត្តន៍តាមបទបញ្ជាផ្ទៃក្នុងរបស់ប៊ែលធី និងអប់រំឱ្យមានទាំងចំណេះដឹង និងចំណេះធ្វើ ដែលមានលក្ខណៈវិទ្យាសាស្ត្រខ្ពស់ ស្របតាមការរីកចម្រើន ផ្នែកបច្ចេកវិទ្យា និងបដិវត្តន៍ឧស្សាហកម្មជំនាន់ទី៤.០ របស់សកលលោកនាពេលបច្ចុប្បន្ន។ ជាមួយនឹងការចែកសញ្ញាបត្រ ក៏មានពិធីប្រកាសផ្សព្វផ្សាយសៀវភៅ «ហ៊ុន សែន កម្ពុជា» ផងដែរ ដែលសៀវភៅ «ហ៊ុន សែន កម្ពុជា» នេះ ត្រូវបានចាប់ផ្តើមស្រាវជ្រាវនិពន្ធ កាលពីខែសីហា ឆ្នាំ២០១៥ ហើយបានបញ្ចប់ជាស្ថាពរនៅខែឧសភា ឆ្នាំ២០១៩។ សៀវភៅនេះ រៀបរៀងឡើងក្នុងគោលបំណងចងក្រង ឯកសារជាប្រវត្តិសាស្ត្រដ៏មានសារៈសំខាន់ និងគោលនយោបាយបង្រួបបង្រួមជាតិ និងអភិវឌ្ឍន៍ប្រទេសពីគំនរបាក់បែក ដោយសារសង្គ្រាម និងការបំផ្លាញខ្ទេចខ្ទីក្នុងរបបប្រល័យពូជសាសន៍ ប៉ុល ពត។ ក្រៅពីនេះ ប្រមូលចងក្រង នូវអនុសាសន៍ប្រកបដោយគតិបណ្ឌិត របស់សម្តេចតេជោនាយករដ្ឋមន្ត្រី ដើម្បីទុកជាឯកសារដ៏មានតម្លៃបំផុតជូនដល់សិស្ស-និស្សិត និងអ្នកសិក្សាគ្រប់មជ្ឈដ្ឋាន ធ្វើការសិក្សាស្រាវជ្រាវអំពីប្រវត្តិពិស្តារ និងការតស៊ូរបស់ថ្នាក់ដឹកនាំ ដែលបានលះបង់គ្រប់បែបយ៉ាង និងហ៊ានពលីជីវិត ដើម្បីបុព្វហេតុជាតិ មាតុភូមិនិងប្រជាជន ហើយបន្តការពារ កសាង ស្វែងរកសុខសន្តិភាព និងអភិវឌ្ឍន៍ជូនប្រទេសជាតិ រហូតមកដល់បច្ចុប្បន្ន។ ជាមួយគ្នានេះ សៀភៅ «ហ៊ុន សែន កម្ពុជា» នេះបោះពុម្ភជាលើកទី១ ចំនួន ៣៣.៩៨៧ក្បាល៕
ដោយ ជឹម ណារី