ភ្នំពេញ ថ្ងៃទី២៥ ខែកញ្ញា ឆ្នាំ២០១៩ -សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសារគាំទ្រ ដោយបញ្ជាក់ពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការទប់ស្កាត់នូវអំពើកេងប្រវ័ញ្ច និងរំលោភបំពានផ្លូវភេទ។
ក្នុងសារដែលបានផ្សព្វផ្សាយនៅលើបណ្ដាញទំនាក់ទំនងសង្គមរបស់សម្ដេចតេជោ នាព្រឹកថ្ងៃពុធ ១២រោច ខែភទ្របទ ឆ្នាំកុរ ឯកស័ក ពស ២៥៦៣ ត្រូវនឹងថ្ងៃទី២៥ ខែកញ្ញា ឆ្នាំ ២០១៩នេះ សម្ដេចអគ្គមហាសេនាបតីតេជោ ហ៊ុន សែន ថ្លែងថា ក្នុងនាមជារង្វង់ភាពជាអ្នកដឹកនាំ ខ្ញុំអះអាងជាថ្មីនូវការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគាំទ្រយ៉ាងខ្លាំងក្លា និង ការអនុវត្តនូវគោលនយោបាយ គ្មានការអត់ឱនចំពោះអំពើកេងប្រវ័ញ្ច និងការរំលោភបំពានផ្លូវភេទ នៅក្នុងប្រតិបត្តិការថែរក្សាសន្តិភាព អង្គការសហប្រជាជាតិ ព្រមទាំងចូលរួមជាមួយសមាជិកដទៃទៀតដើម្បីទប់ស្កាត់នូវអំពើបែបនេះ។ នេះគឺជាភាពចាំបាច់នៃសីលធម៌ និងភាពចាំបាច់នៃប្រតិបត្តិការ ដើម្បីធានាបាននូវប្រសិទ្ធភាព និងភាពដែលអាចជឿទុកចិត្តបានរបស់អង្គការសហប្រជាជាតិ។
សម្តេចតេជោនាយករដ្ឋមន្ត្រី បានថ្លែងទៀតថា ដោយទទួលស្គាល់ថា អ្នកថែរក្សា សន្តិភាព ត្រូវតែទទួលខុសត្រូវចំពោះមុខប្រជាជនដែលពួកគេបម្រើកងទ័ពមួកខៀវកម្ពុជា ដែលកំពុងបំពេញបេសកកម្មនានា នៅសាធារណរដ្ឋអាហ្វ្រិកកណ្តាល ស៊ូដង់ខាងត្បូង ស៊ូដង់ Cyprus លីបង់ និងម៉ាលី បានប្រកាន់ភ្ជាប់យ៉ាងម៉ឺងម៉ាត់នូវគោលនយោបាយខាងលើ ប្រកប ដោយការទទួលខុសត្រូវ គ្មានការអត់ឱនចំពោះអំពើកេងប្រវ័ញ្ច និងការរំលោភបំពានផ្លូវភេទ ប្រកបដោយការទទួលខុសត្រូវ សេចក្តីថ្លៃថ្នូរ និងសីលធម៌ខ្ពស់ ក៏ដូចជាវិន័យដ៏តឹងតែង។
សម្តេចតេជោនាយករដ្ឋមន្ត្រីគូសបញ្ជាក់បន្ថែមថា ទោះបីជាបទល្មើសរបស់ពួកគេ ជាការទទួលខុសត្រូវរួមរបស់អង្គការសហប្រជាជាតិ និងរដ្ឋជាសមាជិកក៏ដោយ ជនល្មើសដែលបានប្រព្រឹត្តអំពើកេងប្រវ័ញ្ច និងរំលោភបំពានផ្លូវភេទ ត្រូវតែទទួលខុសត្រូវដោយផ្ទាល់ ចំពោះមុខច្បាប់ ចំពោះទង្វើរបស់ពួកគេ ៕
ដោយ ជឹម ណារី