ភ្នំពេញ ថ្ងៃទី២៥ ខែកញ្ញា ឆ្នាំ២០១៩សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កម្ពុជាប្រកាន់នយោបាយចិនមួយយ៉ាងខ្ជាប់ខ្ជួន ខណៈដែលចិនគោរពយ៉ាងម៉ឺងម៉ាត់នូវឯករាជ្យ និងអធិបតេយ្យរបស់កម្ពុជា។ ការលើកឡើងរបស់សម្ដេចតេជោនេះ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ជាមួយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងពិធីរម្លឹកខួបលើកទី ៧០ នៃការបង្កើតសាធារណរដ្ឋប្រជាមានិតចិន នារាត្រីថ្ងៃពុធ ១២ រោច ខែ ភទ្របទ ឆ្នាំ កុរ ឯកស័ក ព.ស.២៥៦៣ ត្រូវនឹងថ្ងៃទី ២៥ ខែ កញ្ញា ឆ្នាំ ២០១៩ នៅមជ្ឈមណ្ឌលកោះពេជ្រ។
សម្ដេចតេជោនាយករដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះមហាមិត្តចិនដែលជានិច្ចកាលតែងតែផ្តល់ការគាំទ្រចំពោះកម្ពុជានាពេលកន្លងមក និងបច្ចុប្បន្ន។ សម្ដេចតេជោថ្លែងថា កម្ពុជា និងចិនមានកិច្ចសហប្រតិបត្តិការល្អប្រកបដោយផ្លែផ្កា ទាំងក្នុងកម្រិតទ្វេភាគី និងពហុភាគី ដើម្បីផលប្រយោជន៍ប្រជាជនយើងទាំងពីរ ក៏ដូចជាបុព្វហេតុ សន្តិភាព ស្ថិរភាព និងវិបុលភាពរួម នៅក្នុងតំបន់ និងពិភពលោក។ ជាមួយគ្នានេះ សម្រាប់ទំនាក់ទំនងរវាងប្រទេសយើងទាំងពីរឈរលើមូលដ្ឋានស្មើភាពគ្នា និងមានការជឿជាក់លើគ្នាទៅវិញទៅមក ដើម្បីឧត្តមប្រយោជន៍រួម។ សម្ដេចតេជោក៏បានសម្ដែងនូវការអបអរសាទរ និងកោតសរសើររដ្ឋាភិបាល និងប្រជាជនចិនចំពោះសមិទ្ធផលដ៏អស្ចារ្យច្រើនឥតគណនា ដែលមហាមិត្តចិនសម្រេចបានជោគជ័យកន្លងមក ក្រោមការដឹកនាំប្រកបដោយសមត្ថភាពរបស់បក្សកុម្មុយនីស្តចិន ចាប់តាំងពីឆ្នាំ ១៩៤៩។ សម្ដេចតេជោបន្ដថា បច្ចុប្បន្នក្រោមមាគ៌ាដឹកនាំដ៏ឈ្លាសវៃរបស់ ឯកឧត្តមប្រធានាធិបតី ស៊ី ជីនពីង ចិនសម្រេចបាននូវការអភិវឌ្ឍយ៉ាងធំធេង និងឆាប់រហ័សលើគ្រប់វិស័យហើយបានក្លាយជាប្រទេសមហាអំណាចសេដ្ឋកិច្ច ពិភពលោក។
សម្ដេចតេជោថ្លែងរម្លឹកថា កម្ពុជា និងចិន បានភ្ជាប់ទំនាក់ទំនងការទូតជាផ្លូវការនៅថ្ងៃទី ១៩ ខែ កក្កដា ឆ្នាំ ១៩៥៨ បន្ទាប់ពីជំនួបទ្វេភាគីលើកទី១ រវាងព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ និងឯកឧត្តមយករដ្ឋមន្ត្រី ជូ អេនឡាយ ក្នុងអំឡុងពេលចូលរួមសន្និសីទនៅទីក្រុងបាន់ឌួង ខែមេសា ឆ្នាំ ១៩៥៤ នៅប្រទេសឥណ្ឌូណេស៊ី។ បន្ទាប់មកទំនាក់ទំនងមិត្តភាពជាប្រវត្តិសាស្ត្រនេះ បានកសាងឡើងរួមគ្នា រវាងព្រះករុណាព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ និងឯកឧត្តមប្រមុខរដ្ឋ ម៉ៅ សេទុង ក៏ដូចជាឥស្សជនកម្ពុជា និងចិនជំនាន់មុនៗ និងបច្ចុប្បន្ន។ សម្ដេចតេជោគូសបញ្ជាក់ថា ជាក់ស្តែងខ្លួនសម្ដេចផ្ទាល់ចាប់តាំងពីឆ្នាំ១៩៩៩ មកបានទៅធ្វើទស្សនកិច្ចនៅប្រទេសចិនចំនួន១៩លើកហើយ។ សម្ដេចតេជោបានចាត់ទុកថា នេះបង្ហាញឱ្យឃើញថាកម្ពុជា និងចិនបានរួមគ្នាថែរក្សាអភិវឌ្ឍន៍ និងបង្កើនចំណងមិត្តភាពរឹងមាំ និងកាន់តែរីកចម្រើនរហូតឈានដល់ការបង្កើតចំណងមិត្តភាពរឹងមាំ និងកាន់តែរីកចម្រើនរហូតឈានដល់ការបង្កើត«ភាពជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយកម្ពុជា-ចិន» នៅថ្ងៃទី១៣ ខែ ធ្នូឆ្នាំ ២០១០ កន្លងមក។
សម្ដេចតេជោនាយករដ្ឋមន្រ្ដីបានបន្ដទៀតថា ក្នុងស្មារតីនេះការកែទម្រង់ និងការរីកចម្រើនយ៉ាងឆាប់រហ័ស លើគ្រប់វិស័យរបស់ប្រទេសចិន ពិតជាបានផ្តល់ផលប្រយោជន៍ជាច្រើន មិនត្រឹមតែប្រជាជនចិនប៉ុណ្ណោះទេ ប៉ុន្តែសម្រាប់មនុស្សជាតិទាំងមូល។ ជាការពិត គំនិតផ្តួចផ្តើមខ្សែក្រវាត់ និងផ្លូវ ដែលរដ្ឋាភិបាលចិនបានដាក់ចេញពិតជាបានពង្រីក និងលើកកម្ពស់«ភាពជាដៃគូដែលមានប្រយោជន៍ទៅវិញទៅមក» «កិច្ចសហប្រតិបត្តិការឈ្នះឈ្នះ» និង «វិបុលភាពរួមគ្នា» រវាងបណ្តាប្រទេសនៅតាមខ្សែក្រវាត់ និងផ្លូវតាមរយៈការតភ្ជាប់ហេដ្ឋារចនាសម្ព័ន្ធរូបវន្ត ស្ថាប័ននិងប្រជាជន ក៏ដូចជាសហប្រតិបត្តិការផ្នែកធុរកិច្ច វប្បធម៌ និងវិស័យសំខាន់ៗដទៃទៀតទាំងបច្ចុប្បន្ន និងអនាគត។សម្ដេចតេជោនាយករដ្ឋមន្ត្រីមានជឿជាក់ថា មហាមិត្តចិននឹងក្លាយជាប្រទេសមហាអំណាចពិភពលោក ក្នុងវិស័យបច្ចេកទេស និងនវានុវត្តន៍នៅឆ្នាំ២០៥០៕
ដោយ ជឹម ណារី
