ភ្នំពេញ ថ្ងៃទី១០ ខែកញ្ញា ឆ្នាំ២០១៩ — សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្ដម ធីត លីន អន (Thit Linn Ohn ) ឯកអគ្គរដ្ឋទូតថ្មីនៃសហភាពមីយ៉ាន់ម៉ាប្រចាំនៅកម្ពុជា ចូលជួបសម្ដែងការគួរសម នាព្រឹកថ្ងៃទី១០ ខែកញ្ញា ឆ្នាំ២០១៩ នៅវិមានសន្តិភាព។
ឯកឧត្ដម ស្រ៊ី ថាមរង្គ រដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងក្រោយជំនួបនោះថា សម្ដេចតេជោ ហ៊ុន សែន បានស្វាគមន៍ឯកឧត្តមឯកអគ្គរដ្ឋទូតថ្មីនៃប្រទេសមីយ៉ាន់ម៉ា ប្រចាំនៅកម្ពុជាយ៉ាងកក់ក្តៅ និងអបអរសាទរចំពោះឯកឧត្តម ដែលត្រូវបានតែងតាំងជាឯកអគ្គរដ្ឋទូតប្រចាំនៅប្រទេសកម្ពុជា ហើយសម្ដេចតេជោសង្ឃឹមថាសម្រាប់វត្តមានឯកឧត្តមនៅក្នុងអាណត្តិនេះ និងបានចូលរួមចំណែកយ៉ាងសំខាន់ក្នុងការជំរុញបន្ថែមទៀត នូវទំនាក់ទំនងក៏ដូចជាកិច្ចសហប្រតិបត្តិការរវាងកម្ពុជា និងមីយ៉ាន់ម៉ាឱ្យកាន់តែប្រសើរឡើង។
សម្ដេចតេជោ បានមានប្រសាសន៍ថា ប្រទេសយើងទាំងពីរ គឺមានទំនាក់ទំនង ជាមួយគ្នាជាយូរលង់ណាស់មកហើយៗ នៅឆ្នាំក្រោយនេះក៏ជាខួបលើកទី៦៥ ឆ្នាំនៃការ បង្កើតទំនាក់ទំនងរវាងប្រទេសទាំងពីរផងដែរ។សម្ដេចតេជោបានលើកឡើងថា ទំហំពាណិជ្ជ កម្មរវាងប្រទេសទាំងពីរ នៅមានទំហំតូចនៅឡើយ ដោយក្នុង១ឆ្នាំៗមាន ប្រហែលជា១០លានដុល្លារអាម៉េរិកប៉ុណ្ណោះ មិនទាន់សក្ដិសមនឹងសក្ដានុពលដែល ប្រទេសទាំងពីរមាននោះទេ ដូច្នេះសូមឱ្យពិនិត្យថែមទៀត ដើម្បីជំរុញនូវកិច្ចសហប្រតិបត្តិការក្នុងវិស័យសេដ្ឋកិច្ចរបស់យើង។
ជាមួយគ្នានេះដែរ យើងក៏ត្រូវពិនិត្យមើលនូវកិច្ចព្រមព្រៀងខ្លះ ដែលអាចនឹង ចុះហត្ថលេខា ដើម្បីជំរុញនូវកិច្ចសហប្រតិបត្ដិការគ្រប់វិស័យថែមទៀត ដែលនៅក្នុងនោះអាចមានកិច្ចព្រមព្រៀងទាក់ទងនឹង អនុស្សរណៈមួយចំនួន ដែលមានរួចមកហើយត្រូវតែបន្តអនុវត្តន៍ ហើយមើលកិច្ចព្រមព្រៀង និងអនុស្សរណៈថ្មី ដែលយើងអាចបន្ថែមទៀត ដើម្បីបង្កើនកិច្ចសហការក្នុងវិស័យសេដ្ឋកិច្ចក៏ដូចជាការវិនិយោគ ទេសចរណ៍ ដែលជាចំណុចសំខាន់ ជាចំណុចស្នូល នៃកិច្ចសហប្រតិបត្តិការរបស់ប្រទេសយើងទាំងពីរ។
សម្តេចបានមានប្រសាសន៍បន្ថែមថា កន្លងមកយើងមានកិច្ចព្រមព្រៀងក្នុងឱកាសដែលទស្សនកិច្ចរបស់ លោកជំទាវ អ៊ុង សានស៊ូជី នៅកម្ពុជាកន្លងមកនេះ គ្រាន់តែយើងត្រូវការជំរុញអភិវឌ្ឍន៍កន្លងមក គឺយើងមានកិច្ចព្រមព្រៀងខ្លះ និងអនុស្សរណៈជំរុញអនុវត្តន៍។ សម្តេចតេជោថ្លែងបន្តថា កន្លងមកយើងបានបញ្ជូននិស្សិត ភាគច្រើនជាសង្ឃ ទៅបំពេញ កម្មសិក្សា ឬក៏សិក្សាបន្ថែម នៅមីយ៉ាន់ម៉ា ពិសេសខាងព្រះពុទ្ធសាសនា ហើយក្នុងឱកាសទស្សនកិច្ចរបស់លោកជំទាវ អ៊ុង សានស៊ូជី កម្ពុជាបានសម្រេចផ្ដល់ អាហារូបករណ៍ ចំនួន១០កន្លែង ឱ្យនិស្សិតមីយ៉ាន់ម៉ា ដូច្នេះស្នើជំរុញការអនុវត្តផ្លាស់ប្ដូរនិស្សិតទៅវិញទៅមក ទាំងអស់នេះក៏ជាការជំរុញនូវទំនាក់ទំនង ផ្នែកសិក្សាធិការ ក៏ដូចជាការជំរុញ ឱ្យមានទំនាក់ទំនងរវាងប្រជាជននិងប្រជាជនផងដែរ។
សម្តេចតេជោនាយករដ្ឋមន្ត្រីបានបន្ថែមទៀតថា ក្រៅពីយន្តការទ្វេភាគី ប្រទេសយើងទាំងពីរ ក៏មានយន្តការតំបន់ និងអនុតំបន់មួយចំនួន ដូចជាយន្តការនៅក្នុងមហាអនុតំបន់មេគង្គ GMS និងក្នុងវេទិកា CLMV Plus T កម្ពុជា ឡាវមីយ៉ាន់ម៉ា វៀតណាម បូកនឹង ថៃ ហើយវេទិកាមួយទៀត គឺ ACMECS ដែលយន្តការទាំងបីនេះគឺជាយន្តការអនុតំបន់ ដែលយើងក៏មានកិច្ចសហប្រតិបត្តិការជាមួយគ្នាផងដែរ។ ក្រៅពីនោះប្រទេសយើងទាំងពីរក៏បានធ្វើការជាមួយគ្នា នៅក្នុងក្របខ័ណ្ឌតំបន់ និងអន្តរជាតិក្រៅតំបន់មួយចំនួន។ សម្ដេចតេជោបានធ្វើការកត់សម្គាល់ទៀតថា កន្លងមកប្រទេសអាស៊ាន មិនសូវបានមើលទីផ្សារក្នុងតំបន់ទេ គឺតែងតែយកចិត្តទុកដាក់ ទៅលើទីផ្សារខាងក្រៅ ដែលបញ្ហានេះធ្វើឱ្យទំហំពាណិជ្ជកម្មរបស់យើងនៅតូច ដូច្នេះយើងគួរតែពិនិត្យមើលប្រទេសក្នុងតំបន់អាស៊ានរបស់យើង នៅក្នុងការធ្វើពាណិជ្ជកម្មរវាងគ្នានឹងគ្នា ដើម្បីបង្កើតទីផ្សារយើងឱ្យកាន់តែទូលំទូលាយ។
ឯកឧត្តមឯកអគ្គរដ្ឋទូត មីយ៉ាន់ម៉ា ក៏បានថ្លែងនូវការអរគុណចំពោះសម្ដេចតេជោនាយករដ្ឋមន្ត្រី ដែលបានផ្ដល់នូវអនុសាសន៍ និងការឆ្លើយតបដ៏កក់ក្ដៅ ក៏ដូចជាការចែករំលែកបទពិសោធន៍ ហើយឯកឧត្តម នឹងជំរុញឱ្យមានការរៀបចំនូវការប្រារព្ធខួបលើកទី៦៥ ឆ្នាំនៃទំនាក់ទំនងការទូតនៃប្រទេសទាំងពីរ និងប្ដេជ្ញាខិតខំយកចិត្តទុកដាក់ជំរុញកិច្ចសហប្រតិបត្តិការនានាបន្ថែមទៀត ជាពិសេសលើការធ្វើពាណិជ្ជកម្មទេសចរណ៍ ការហោះហើរត្រង់ ការផ្លាស់ប្តូរការសិក្សារបស់និស្សិត ក៏ដូចជាប្រជាជន និងប្រជាជនផងដែរ។
ឯកឧត្តម ធីត លីនអន ក៏បានសម្ដែងនូវការអរគុណចំពោះសម្ដេចតេជោ នាយករដ្ឋមន្ត្រី ដែលបានផ្ដល់ឱកាសឱ្យឯកឧត្តមបានជួបសម្ដែងការគួរសមនាពេលនេះ ហើយឯកឧត្តមសន្យាថា នឹងខិតខំប្រឹងប្រែងបំពេញការងារបេសកកម្មការទូត ជាពិសេស លើកកម្ពស់ និងពូនជ្រំទំនាក់ទំនងរវាងប្រទេសទាំងពីរឱ្យកាន់តែមានភាពល្អប្រសើរ។
គួរបញ្ជាក់ដែរថា ឯកឧត្ដម ធីត លីន អន (Thit Linn Ohn ) ឯកអគ្គរដ្ឋទូតថ្មីនៃសហភាពមីយ៉ាន់ម៉ា បានមកដល់កម្ពុជា កាលពីថ្ងៃទី១០ ខែសីហា ឆ្នាំ២០១៩ ហើយបាន ថ្វាយសារតាំងចំពោះព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី២១ ខែសីហាឆ្នាំ២០១៩៕
ដោយ ជឹម ណារី
