ភ្នំពេញ ថ្ងៃទី០៤ ខែកញ្ញា ឆ្នាំ២០១៩ -បន្ទាប់ពីបញ្ចប់ទស្សនកិច្ចផ្លូវការរយៈពេល៣ថ្ងៃចាប់ពីថ្ងៃទី២ ដល់ថ្ងៃទី៤ ខែកញ្ញា ឆ្នាំ២០១៩ប្រកបដោយជោគជ័យ នៅលើទឹកដីនៃព្រះរាជាណាចក្រកម្ពុជានោះ ឯកឧត្ដម មហាធា មហាម៉ាត់ (Mahathir Mohamad) នាយករដ្ឋមន្ត្រីម៉ាឡេស៊ី និងលោកជំទាវ បានដឹកនាំគណៈប្រតិភូចាកចេញពីកម្ពុជាតាមជើងយន្តហោះពិសេស នាព្រឹកពុធ ៦កើត ខែភទ្របទ ឆ្នាំកុរ ឯកស័ក ព. ស ២៥៦៣ ត្រូវនឹងថ្ងៃទី០៤ ខែកញ្ញា ឆ្នាំ២០១៩នេះ។
អញ្ជើញជូនដំណើររបស់គណៈប្រតិភូជាន់ខ្ពស់នៃប្រទេសម៉ាឡេស៊ី ដល់ព្រលានយន្ត ហោះអន្តរជាតិភ្នំពេញ មានវត្តមាន ឯកឧត្ដម អូស្មាន់ ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងមន្ត្រីអ្នកមុខអ្នកការជាច្រើនរូបទៀត។ ក្នុងអំឡុងពេលបំពេញទស្សកិច្ចនៅកម្ពុជា ឯកឧត្ដមនាយករដ្ឋមន្រ្តីម៉ាឡាស៊ី បាន អញ្ជើញធ្វើបឋកថា ពិសេសនៅសាកលវិទ្យាល័យភូមិន្ទភ្នំពេញ ចូលជួបស្ដែងការគួរសមជា មួយ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី នៃព្រះរាជាណាចក្រកម្ពុជា និងជួបប្រជុំទ្វេភាគីជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា ដែលនៅក្នុងឱកាសនោះ នាយករដ្ឋមន្រ្តីនៃប្រទេសទាំងពីរ ក៏បានអញ្ជើញជាអធិបតីក្នុងពិធីចុះហត្ថលេខាលើឯកសារចំនួនពីរ ស្ដីពីកិច្ចសហប្រតិបត្តិការរវាងប្រទេសទាំងពីរ ព្រមទាំងធ្វើសន្និសីទសារព័ត៌មានរួមគ្នាផងដែរ។
ដំណើរទស្សនកិច្ចផ្លូវការរបស់ឯកឧត្ដម មហាធា មហាម៉ាត់ នាយករដ្ឋមន្ត្រីនៃប្រទេស ម៉ាឡេស៊ីនៅកម្ពុជា បានរួមចំណែកកាន់តែប្រសើរក្នុងការពង្រឹង និងធ្វើឱ្យកាន់តែស៊ីជម្រៅ បន្ថែមទៀត នូវចំណងមិត្តភាព និងកិច្ចសហប្រតិបត្តិការជិតស្និទ្ធ ដ៏ល្អរវាងកម្ពុជានិងម៉ាឡេស៊ី ទាំងនៅក្នុងក្របខ័ណ្ឌទ្វេភាគី តំបន់ និងអន្តរជាតិ៕
ដោយជឹម ណារី
