ភ្នំពេញ ថ្ងៃទី០៣ ខែកញ្ញា ឆ្នាំ២០១៩ — ឯកសារចំនួនពីរដែលសំដៅពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ(កម្ពុជា-ម៉ាឡេស៊ី)ឱ្យកាន់តែប្រសើរឡើងនោះ ត្រូវបានចុះហត្ថលេខាក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្ដមបណ្ឌិត មហាធា មហាម៉ាត់ នាយករដ្ឋមន្ត្រីនៃប្រទេសម៉ាឡេស៊ី នាព្រឹកថ្ងៃអង្គារ៍ ៥កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៣ ខែកញ្ញា ឆ្នាំ២០១២៩ នៅវិមានសន្តិភាព ក្នុងខណៈដែលឯកឧត្ដមបណ្ឌិត មហាធា មហាម៉ាត់ ដឹកនាំគណៈប្រតិភូជាន់ ខ្ពស់មកបំទស្សនកិច្ចផ្លូវការនៅព្រះរាជាណាចក្រកម្ពុជា។
ឯកសារទាំងពីរនោះរួមមាន ១.កិច្ចព្រមព្រៀងស្ដីពីការលុបបំបាត់ការយកពន្ធត្រួតគ្នា ពាក់ព័ន្ធនឹងពន្ធលើប្រាក់ចំណូល និងការគេចវេសពន្ធ និងការចៀសវាងពន្ធ ដែលចុះហត្ថលេខាដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួង សេដ្ឋកិច្ចនិងហិរញ្ញវត្ថុ និង ឯកឧត្តម សៃហ្វូឌីន អាប់ឌុលឡា រដ្ឋមន្ត្រីការបរទេសម៉ាឡេស៊ី។ ទី២. អនុស្សរណៈស្តីពីកិច្ចសហប្រតិបត្តិការលើវិស័យទេសចរណ៍ ចុះហត្ថលេខាដោយឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា និងឯកឧត្តមសៃហ្វូឌីន អាប់ឌុលឡា រដ្ឋមន្ត្រីការបរទេសម៉ាឡេស៊ី។
សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ថា បច្ចុប្បន្ន ទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរ(កម្ពុជា-ម៉ាឡេស៊ី) មានលក្ខណៈល្អ ប្រសើរ និងមានវត្តមានធុរកិច្ចម៉ាឡេស៊ីជាច្រើននៅកម្ពុជា។ ក្នុងឆ្នាំ២០១៨កន្លងមក ទំហំពាណិជ្ជកម្ម នៃប្រទេសទាំងពីរមានចំនួនប្រមាណ៥០០លានដុល្លារអាម៉េរិក ហើយគ្រាន់តែក្នុងឆមាសទី១ ឆ្នាំ២០១៩ ទំហំនេះ បានកើនឡើងដល់ជាង៤០០លានដុល្លារអាម៉េរិក។ សម្ដេចតេជោបានបន្ដថា ដើម្បីបង្កើនទំហំពាណិជ្ជកម្ម និងវិនិយោគកម្ពុជា-ម៉ាឡេស៊ី សម្ដេច និង ឯកឧត្ដម មហាធា មហាម៉ាត់ បានឯភាពឱ្យស្ថាប័នពាក់ព័ន្ធប្រទេសទាំងពីរ រិះរកវិធីពង្រីកសហប្រតិបត្តិការក្នុងវិស័យនេះបន្ថែមទៀត។ ជាងនេះទៀត ថ្នាក់ដឹកនាំនៃប្រទេសទាំងពីរ បានសម្ដែងនូវការពេញចិត្តចំពោះមិត្តភាព និងកិច្ចសហប្រតិបត្តិការកាន់តែជិតស្និទ្ធ រវាង កម្ពុជា និងម៉ាឡេស៊ីលើគ្រប់វិស័យ រួមមាន ពាណិជ្ជកមុ្ម និងការវិនិយោគ ការអភិវឌ្ឍឧស្សា ហកម្មហាឡាល់ ការពារជាតិ សន្តិសុខ ទេសចរណ៍ កសិកម្ម និងការអប់រំផងដែរ។
ជាមួយគ្នានេះ ថ្នាក់ដឹកនាំប្រទេសទាំងពីរបានប្ដេជ្ញាសម្របសម្រួលវិធានការចាំបាច់ នានា ដើម្បីបង្កើនទំហំពាណិជ្ជកម្មទ្វេភាគី និងវិនិយោគរវាប្រទេសទាំងពីរ។ ថ្នាក់ដឹនាំនៃ ប្រទេសទាំងពីរ ក៏បានសម្ដែងនូវការពេញចិត្តចំពោះវឌ្ឍនភាពដែលសម្រេចបានដោយផ្នែក ឯកជន និងសាធារណៈ ក្នុងការជំរុញពាណិជ្ជកមុ្ម និងវិនិយោគ៕
ដោយ ជឹម ណារី
