នាយករដ្ឋមន្ត្រីម៉ាឡេស៊ី អញ្ជើញមកដល់កម្ពុជា សម្រាប់ដំណើរទស្សនិកច្ចផ្លូវការរយៈពេល៣​ថ្ងៃនៅក្នុងប្រទេសកម្ពុជា

13

ភ្នំពេញ ថ្ងៃទី០២ ខែកញ្ញា ឆ្នាំ២០១៩ -ឯកឧត្ដមបណ្ឌិត មហាធា មហាម៉ាត់ នាយករដ្ឋមន្ត្រីម៉ាឡេស៊ី និងលោកជំទាវ បាន​ដឹក​នាំ​គណៈប្រតិភូជាន់ខ្ពស់មកដល់កម្ពុជាហើយ នាព្រឹកថ្ងៃទី០២ ខែកញ្ញា ឆ្នាំ២០១៩ តាមជើង​យ​ន្ត​​ហោះពិសេស ដើម្បីបំពេញទស្សនកិច្ចផ្លូវការនៅព្រះរាជាណាចក្រកម្ពុជារយៈ​ពេលបីថ្ងៃ​(ពី​ថ្ងៃ​ទី០២ ដល់ថ្ងៃទី០៤ ខែកញ្ញា ឆ្នាំ២០១៩) ដែលជាការតបតាមការអញ្ជើញ​របស់សម្ដេច​អគ្គ​មហា​​សេ​នាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានោះ។

អញ្ជើញទទួលដំណើរមកដល់របស់គណៈប្រតិភូជាន់ខ្ពស់នៃប្រទេសម៉ាឡេស៊ី នៅ​ព្រ​លា​​ន​យន្តហោះអន្តរជាតិភ្នំពេញ មានវត្តមាន ឯកឧត្ដម អូស្មាន់ ហាស្សាន់ រដ្ឋមន្ត្រីប្រតិភូអម​នា​យ​ក​រដ្ឋមន្ត្រី និងមន្ត្រីអ្នកមុខ អ្នការជាច្រើនរូបទៀត។ បើតាមកម្មវិធីដែលបាន​គ្រោង​ទុក ក្នុងអំឡុងទស្សនកិច្ចនេះ ឯកឧត្ដមនាយករដ្ឋមន្រ្តីម៉ាឡាស៊ី នឹងអញ្ជើញធ្វើបឋកថា ​ពិ​សេ​​សនៅសាកលវិទ្យាល័យភូមិន្ទភ្នំពេញ ចូលជួបសម្ដែង​ការគួរ​ស​ម ដាច់ដោយឡែក​ពីគ្នាជា​មួ​យ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីនៃព្រះ​រា​ជា​ណាចក្រកម្ពុជា និងសម្តេច​អ​គ្គ​មហាពញាចក្រី ហេង សំរិន ប្រធានរដ្ឋសភា។ ឯកឧត្ដម ម​ហាធា មហាម៉ាត់ ក៏នឹង​ជួប​ប្រ​ជុំ​ទ្វេ​ភាគីជាមួយសម្តេចតេជោ ហ៊ុន សែន ដែលនៅក្នុង​ឱកាសនោះ នាយករដ្ឋមន្រ្តីទាំងពីរ នឹ​ង​​ពិភាក្សាលើទិដ្ឋភាពផ្សេងៗ នៃកិច្ចសហប្រតិ​បត្តិ​ការ​ទ្វេ​ភា​គី។ ជាមួយនេះដែរ នា​យក​រដ្ឋ​ម​ន្រ្តី​​​ទាំ​ងពីរ ក៏នឹងផ្លាស់ប្តូរទស្សនគ្នាលើបញ្ហាតំបន់ និងអន្តរ​ជា​តិ​ដែលមានផល​ប្រយោជន៍​រួម​ផ​ង​ដែរ។ បន្ទាប់មក នាយករដ្ឋមន្រ្តីទាំងពីរ នឹងអញ្ជើញ​ជាអ​ធិ​បតីក្នុងពិធីចុះហត្ថលេខាលើឯក​ សា​រ​មួ​យចំនួន និងធ្វើការប្រកាសព័ត៌មានរួមគ្នា។ ក្នុង​អំ​ឡុ​ង​ពេលស្នាក់នៅរាជធានីភ្នំពេញ    ឯ​ក​​ឧត្ដមនាយករដ្ឋមន្រ្តីម៉ាឡេស៊ី នឹងអញ្ជើញដាក់កម្រងផ្កា នៅ​វិមានឯករាជ្យ និងគោរព​ព្រះ​វិញ្ញា​ណក្ខន្ធ នៅមណ្ឌបព្រះករុណា ព្រះបាទ​សម្ដេចព្រះ​ន​រោ​ត្ដ​ម​ សីហនុ «ព្រះបរមរតនកោដ្ឋ» អតី​តព្រះមហាក្សត្រ នៃព្រះរាជាណាចក្រកម្ពុជា។

ជាមួយគ្នានេះ ក្នុងដំណើរ​ទ​ស្ស​​​​នកិច្ចផ្លូវការ របស់ឯកឧត្ដម ម​ហា​ធា មហាម៉ាត់ នាយក​រដ្ឋ​មន្ត្រីនៃប្រទេសម៉ាឡេស៊ី នៅ​កម្ពុ​ជា នឹងរួមចំណែកកាន់​តែប្រ​សើ​រ​ក្នុ​ងការពង្រឹង និងធ្វើឱ្យ​កាន់តែស៊ីជម្រៅបន្ថែមទៀតនូវចំណ​ង​មិត្តភាព និងកិច្ចសហប្រតិបត្តិ​ការ​ជិតស្និទ្ធ ដ៏ល្អរវាង​កម្ពុជា​និងម៉ាឡេស៊ី ទាំងនៅក្នុងក្រប​ខ័​ណ្ឌ​​ទ្វេភាគី តំបន់ និងអន្តរជាតិ៕

ដោយ ជឹម ណារី