ភ្នំពេញ ថ្ងៃទី០១ ខែកក្កដា ឆ្នាំ២០១៩ — ប្រមុខរាជរដ្ឋាភិបាលកម្ពុជា បានថ្លែងថា ឥឡូវនេះ អ្នកដែលមានផ្ទៃពោះទៅពិនិត្យ៤ដង ដោយពិនិត្យម្តងទទួលបានប្រាក់ ដែលពីមុនទៅពិនិត្យគេទារលុយ ឥឡូវទៅពិនិត្យហើយគេឱ្យលុយមកវិញ។
ថ្លែងនៅក្នុងពិធីផ្ទេរសាលាពិការភ្នែក និងគថ្លង់នៃអង្គការគ្រួសារថ្មី ឱ្យទៅក្រោមការគ្រប់គ្រងរបស់ក្រសួងអប់រំ យុវជន និងកីឡា នាព្រឹកថ្ងៃទី០១ ខែកក្កដា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានគូសបញ្ជាក់ថា បច្ចុប្បន្ននេះ ស្រីមានផ្ទៃពោះ និងស្រ្តីមានកូនអាយុក្រោម២ឆ្នាំ ទទួលបានការគាំពារសង្គម ជាបីផ្នែក គឺផ្នែកទីមួយដំណាក់កាលមានគភ៌ ទទួលបានការគាំពារម្តង ដំណាក់កាលទី២ ការឆ្លងទន្លេ និងដំណាក់កាលទី៣ ការថែទាំទារកអាយុក្រោម២ឆ្នាំ។
សម្ដេចតេជោបានបញ្ជាក់ថា ឥឡូវនេះកម្មវិធីគាំពារសង្គមទៅលើបញ្ហាស្ត្រីមានផ្ទៃពោះ បាន និងកំពុងអនុវត្តន៍ហើយ ដែលក្នុងរយៈពេលតែមួយខែទេ គិតមកដល់ថ្ងៃទី៣០ ខែមិថុនាម្សិលមិញ ស្ត្រីដែលមកពិនិត្យផ្ទៃពោះ ឆ្លងទន្លេ និងអ្នកមានកូនក្រោមអាយុ២ឆ្នាំ មានចំនួន១៨.៧២៥ករណី។ សម្តេចតេជោបន្ដថា “យើងមានការឧបត្ថម្ភចែកជា ៣ផ្នែក ដោយផ្នែកទី១ អ្នកដែលមានផ្ទៃពោះទៅពិនិត្យ៤ដង ដោយពិនិត្យម្តងទទួលបានប្រាក់ ដែលពីមុនទៅពិនិត្យគេទារលុយ ឥឡូវទៅពិនិត្យហើយគេឱ្យលុយមកវិញ ដើម្បីធានាថាសុខភាពរបស់កុមារ ដែលជាផ្នែកមួយ នៃអាហារូបត្ថម្ភមុនពេលសម្រាល ដល់ថ្ងៃសម្រាលយើងឧបត្ថម្ភម្តងទៀត និងបន្ទាប់ពីសម្រាលរួចហើយ យើងត្រូវឧបត្ថម្ភ ៨ដងទៀត”។
សម្ដេចតេជោបានបន្ថែមថា ចំនួនអ្នកដែលបានកើតឡើងហើយមានបញ្ញាខ្សោយ ឬមានកាយសម្បទាមិនគ្រប់គ្រាន់ នឹងអាចកាត់បន្ថយតាមរយៈនយោបាយគាំពារសង្គមនេះ។ សម្ដេចតេជោបានលើកឡើងថា ការពិនិត្យផ្ទៃនេះ ដើម្បីធានាថាសុខភាពកុមារនោះជាផ្នែកមួយនៃអាហារូបបត្ថម្ភមុនពេលសម្រាល៕
ដោយ ប៊ុនរិទ្ធ
