ភ្នំពេញ ថ្ងៃទី១៣ ខែឧសភា ឆ្នាំ២០១៩ — ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានចាត់ទុក ដំណើរទស្សនកិច្ចរបស់នាយករដ្ឋមន្ត្រីនេប៉ាល់មកកាន់កម្ពុជានាពេលនេះ គឺជាការបើកទំព័រថ្មីរវាងប្រទេសទាំងពីរ(កម្ពុជា-នេប៉ាល់) ដើម្បីជំរុញឲ្យទំនាក់ទំនងទ្វេរភាគី និងកិច្ចសហប្រតិបត្តិលើគ្រប់វិស័យឱ្យកាន់តែរឹងមាំបន្ថែមទៀត។
ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងដូច្នេះប្រាប់អ្នកយកព័ត៌មាន បន្ទាប់ពីជំនួនទ្វេភាគីរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្ដម ឯកឧត្តម ខេ ភី សាម៉ា អូលី (The Rt. Hon’ble K. P. Sharma Oli) នាយករដ្ឋមន្រ្តីនៃសាធារណរដ្ឋសហព័ន្ធប្រជាធិបតេយ្យនេប៉ាល់ នាល្ងាចថ្ងៃទី ១៣ ខែឧសភា ឆ្នាំ២០១៩ ក្នុងខណៈដែលឯកឧត្ដមដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវការនៅព្រះរាជាណាចក្រកម្ពុជា។ ឯកឧត្តមនាយករដ្ឋមន្ត្រីនេប៉ាល់ បានចាត់ទុកថា ទំនាក់ទំនងរវាងប្រទេសទាំងពីរ មានសក្តានុពលលើគ្រប់វិស័យ។ ឯកឧត្តមបន្តថា ប្រទេសកម្ពុជា ជាប្រទេសដែលប្រជាជនភាគច្រើនកាន់ព្រះពុទ្ធសាសនា រីឯនេប៉ាល់វិញ ជាទីកន្លែងដែលព្រះពុទ្ធប្រសូត្រនោះ នឹងធ្វើឱ្យទំនាក់ទំនងប្រទេសទាំងពីរកាន់តែរីកចម្រើន ជាពិសេសនៅក្នុងវិស័យកសិកម្ម និងទេសចរណ៍ ដែលនេប៉ាល់ អាចរៀនពីប្រទេសកម្ពុជា។ នៅក្នុងជំនួបនោះសម្តេចតេជោនាយករដ្ឋមន្ត្រីបានគូសបញ្ជាក់ថា យើងគួរតែខិតខំក្នុងការបង្កើននូវកិច្ចសហការលើវិស័យសេដ្ឋកិច្ច វិនិយោគ និងទេសចរណ៍ ដោយធ្វើយ៉ាងណាកំណត់គោលដៅ ក្នុងការជំរុញកិច្ចសហប្រតិបត្តិការ លើវិស័យដែលយើងមានផលប្រយោជន៍រវាងគ្នា ទៅវិញទៅមក។
សម្តេចបន្តថា បច្ចុប្បន្នថ្វីត្បិតតែ ទំហំពាណិជ្ជកម្មប្រទេសទាំងពីរ មានតិចក៏ពិតមែន ប៉ុន្តែនៅមានសក្កានុពល និងឱកាសជាច្រើនដែលអាចពង្រីកកាន់តែធំជាងនេះ បន្ថែមទៀត។ សម្តេចបានបញ្ជាក់ថា នៅក្នុងដំណើរទស្សនកិច្ចរបស់ឯកឧត្តមមកកាន់កម្ពុជានៅពេលនេះ សភាពាណិជ្ជកម្មរវាងប្រទេសទាំងពីរអាចចុះហត្ថលេខា ដើម្បីពង្រឹងវិស័យឯកជន និងវិស័យឯកជន រវាងប្រទេសទាំងពីរបន្ថែមទៀត ហើយនៅថ្ងៃស្អែក នឹងមានវេទិកាពាណិជ្ជកម្ម ដែលសភាពាណិជ្ជកម្មរវាងប្រទេសទាំងពីរ បានសហការគ្នា រៀបចំដើម្បីជំរុញកិច្ចសហប្រតិបត្តិការវិនិយោគ និងវិស័យផ្សេងៗទៀតផងដែរ។ សម្តេចតេជោ បានបញ្ជាក់ផងដែរថា យើងគួរតែជំរុញធ្វើយ៉ាងណា ឲ្យមានការដឹកជញ្ជូនតាមរយៈដែនអាកាស រវាងប្រទេសទាំងពីរ ដោយសារតែប្រទេសទាំងពីរមានសក្តានុពល។ លើសពីនេះ សម្តេចបានគូសបញ្ជាក់ថា កម្ពុជានៅខេត្តសៀមរាប មានទេសចរណ៍ច្រើន រីឯទីក្រុងជាដែនដី ដែលព្រះពុទ្ធប្រសូត្រវិញ ក៏មានភ្ញៀវទេសចរច្រើនផងដែរ ដូច្នេះយើងអាចសហការគ្នា ឱ្យបានទូលំទូលាយ។ សម្តេចតេជោ បានបន្តថា កិច្ចសហប្រតិបត្តិការទេសចរណ៍ គឺជាកិច្ចសហប្រតិបត្តិការដ៏សំខាន់មួយ ដែលប្រទេសទាំងពីរ អាចពង្រឹងនិងពង្រីក ដោយមិនត្រឹមតែទ្វេរភាគីប៉ុណ្ណោះទេ យើងអាចធ្វើជាមួយនឹងប្រទេសទី៣បានផងដែរ។ សម្តេចតេជោបានគូសបញ្ជាក់ដែរថា នៅឆ្នាំ២០១៨កន្លងទៅនេះ ទេសចរណ៍កម្ពុជា បានធ្វើដំណើរទេសចរទៅក្រៅប្រទេសចំនួនជិត២លាននាក់ ដោយចំនួននេះ គឺមានការកើនឡើង ជាបន្តបន្ទាប់ ហើយចំនួនអ្នកទៅទេសចរណ៍ នៅកម្ពុជា ទៅកាន់នេប៉ាល់ក៏មានការកើនឡើងផងដែរ ដោយសារទីនោះគឺជាទឹកដីដែលព្រះពុទ្ធបានប្រសូត្រ ហើយជាទីចាប់អារម្មណ៍ សម្រាប់អ្នកកាន់ព្រះពុទ្ធសាសនា។ ព្រមជាមួយនោះ សម្តេចតេជោក៏បានជំរុញអោយមានការអនុវត្តន៍ នូវការសហប្រតិបត្តិការគ្នា លើវិស័យវប្បធម៌ ឲ្យកាន់តែទូលំទូលាយបន្ថែមទៀត ស្របទៅតាមអនុស្សារណៈដែលបានចុះហត្ថលេខាកាលពីពេលកន្លងទៅ។
ដោយឡែក កិច្ចសហប្រតិបត្តិការលើវិស័យអប់រំវិញសម្ដេចតេជោនាយករដ្ឋមន្ត្រី បានគូសបញ្ជាក់ថា ថ្វីត្បិតតែយើងមិនទាន់មាននៅឡើយ ប៉ុន្តែយើងអាចធ្វើយ៉ាងណាឲ្យមាននៅពេលអនាគត ជាពិសេសក្នុងការផ្លាស់ប្ដូរបញ្ញវន្តនិងនិស្សិត រវាងប្រទេសទាំងពីរ។ ឯកឧត្តមនាយករដ្ឋមន្ត្រីនេប៉ាល់ បានឯកភាព លើសំណើ និងយោបល់របស់សម្ដេចតេជោ ឯកឧត្តមចង់ឃើញទំនាក់ទំនងទ្វេរភាគី កាន់តែធំគ្រប់កម្រិត និងគ្រប់វិស័យ។ ឯកឧត្តមបានគូសបញ្ជាក់ថា វប្បធម៌រវាងប្រទេសទាំងពីរ មានភាពស្រដៀងគ្នាច្រើន ជាពិសេសទៅទៀត ឯកឧត្តមចង់ឃើញការបើកស្ថានកុងស៊ុល រវាងប្រទេសទាំងពីរ ដោយសារតែកាលពីពេលកន្លងមកយើងបានភ្ជាប់ទំនាក់ទំនងការទូត ជាមួយគ្នា ប៉ុន្តែពុំទាន់មានបើកស្ថានទូត រវាងប្រទេសទាំងពីរ នៅឡើយនោះទេ។ ក្នុងជំនួបដែរនេះ សម្ដេចតេជោនាយករដ្ឋមន្ត្រីបានបន្តថា ការតភ្ជាប់វិស័យអាកាសចរណ៍នេះ គឺមានសារៈសំខាន់ ជាពិសេសផ្ដោតទៅលើកិច្ចសហប្រតិបត្តិការទ្វេភាគីរវាងប្រទេសទាំងពីរ ហើយឯកឧត្តមនាយករដ្ឋមន្ត្រីនេប៉ាល់បានបញ្ជាក់ថា អ្វីដែលឯកឧត្តម ចង់ឃើញគឺការហោះហើរផ្ទាល់រវាងប្រទេសទាំងពីរ៕
ដោយ ជឹម ណារី
