សម្តេចតេជោនាយករដ្ឋមន្រ្តី ហ៊ុន សែន ជួបនាយករដ្ឋមន្រ្តីវៀតណាម មុនពិធី គោរពវិញ្ញាណក្ខន្ធ ឯកឧត្តម ឡេ ឌឹកអាញ់ នៅទីក្រុងហាណូយ

28

ភ្នំពេញ ថ្ងៃទី០៣ ខែឧសភា ​ឆ្នាំ២០១៩ -ក្នុងខណៈអញ្ជើញដឹកនាំគណៈប្រតិភូទៅដល់ទីក្រុងហាណូយ សាធារណរដ្ឋសង្គម   ​និ​យ​​មវៀតណាម នារាត្រីថ្ងៃព្រហស្បតិ៍ ១៣រោច ខែចេត្រ ឆ្នាំកុរ ​ឯកស័ក ព.ស ២៥៦២ ត្រូវនឹងថ្ងៃទី០២ ខែឧសភា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែ​​ន នាយករដ្ឋ មន្រ្តី នៃ​ព្រះរាជាណាចក្រកម្ពុជា បានអញ្ជើញជួបពិភាក្សាជាមួយ ឯកឧត្តម ង្វៀ​​ន សួនហ៊្វុក នាយករដ្ឋ​មន្រ្តី នៃសាធារណរដ្ឋសង្គមនិយមវៀតណាម។

ប្រភពពីទូរទស្សន៍ជាតិកម្ពុជា (TVK) បានឱ្យដឹងថា ក្នុងជំនួបពិភាក្សាគ្នានោះ ឯកឧត្តម នាយក​រដ្ឋ​មន្រ្តីវៀតណាម បានមានប្រសាសន៍ថា ក្នុងនាមរដ្ឋាភិបាលនិងប្រជាជនវៀតណាម និង ឯក​ឧ​ត្ត​​ម​ផ្ទាល់​សូម​សម្ដែងនូវការគោរពយ៉ាងជ្រាលជ្រៅបំផុត ជូនចំពោះសម្តេចតេជោ នាយក​រដ្ឋម​ន្រ្តី​ ដែលបាន​ឆ្លៀតពេលវេលាដ៏មានតម្លៃបំផុត ​ដឹកនាំគណៈប្រតិភូជាន់ខ្ពស់រាជ រដ្ឋាភិបាល និ​ង​​កងទ័ពនៃប្រ​ទេសកម្ពុជា អញ្ជើញមកគោរពវិញ្ញាណក្ខន្ធ ឯកឧត្តម ឡេ ឌឹក អាញ់ ដែលជាមេដឹក​នាំ​ដ៏​ឆ្នើមរបស់ប្រទេស និងប្រជាជនវៀតណាមជាបងប្អូន។

សម្តេចតេជោនាយករដ្ឋមន្រ្តីមានប្រសាសន៍ អរគុណជូនចំពោះឯកឧត្តមនាយករដ្ឋមន្រ្តី វៀ​តណាម ដែលបានជួយសម្រួលដល់គណៈប្រតិភូកម្ពុជា បានអញ្ជើញគោរពវិញ្ញាណក្ខន្ធ  ​ស​ព​​ ឯ​ក​ឧត្តម ឡេ ឌឹកអាញ់ ដែលជាមេដឹកនាំកំពូលមួយរូបរបស់ប្រទេសវៀតណាម ដែល ​មា​ន​គុ​ណបំណាច់ជួយរំដោះប្រទេសកម្ពុជាចេញពីរបបប្រល័យពូជសាសន៍ ប៉ុល ពត និងការ ទប់​ស្កា​ត់​មិនឱ្យវិលត្រឡប់មកវិញ នៃរបបប៉ុល ពត។ សម្តេចតេជោនាយករដ្ឋមន្រ្តី​មានប្រ​សា​សន៍​បន្តថា សម្តេចនឹងសរសេរសារដ៏មានសារៈសំខាន់ លើសៀវភៅក្រាំងមាស នៃការចូលរួម រំ​លែ​ក​ទុក្ខ ដើម្បីជាការជូនដំណើរជាលើកចុងក្រោយ ជូនដល់វិញ្ញាណក្ខន្ធ ឯកឧត្តម ឡេ ឌឹក អា​ញ់​។​ សម្តេចតេជោនាយករដ្ឋមន្រ្តីក៏បានរៀបរាប់ពីប្រវត្តិ នៃការជួបសន្ទនាជាមួយ ឯកឧត្តម ឡេ ឌឹក​អាញ់ ទាំងក្នុងពេលនៅមន្ទីរពេទ្យ និងការងារផ្សេងៗ ដោយបានចាត់ទុកថា ឯកឧត្តម ឡេ ឌឹក​អាញ់ គឺជាមេដឹកនាំកំពូលរបស់វៀតណាម ដែលបានជួយដល់កម្ពុជាទាំងផ្នែកស៊ីវិល និង​កង​កម្លាំងប្រ​ដាប់អាវុធ។ សម្តេចតេជោមានប្រសាសន៍សង្កត់ធ្ងន់ថា នេះគឺជាលើកចុង ក្រោយ​នៃ​ការអញ្ជើញមកគោរពវិញ្ញាណក្ខន្ធ ឯកឧត្តម ឡេ ឌឹកអាញ់ ពិសេសការបញ្ជាក់​ពីការ​គោរ​ព​ស្រ​ឡាញ់ក្នុងនាមជាប្រទេសដែលមានភូមិផងរបងជាមួយ។

សម្តេចតេជោមានប្រសាសន៍​ប​ន្ត​​​ថា វត្តមានរបស់សម្តេច និងគណៈប្រតិភូនៅពេលនេះ ក៏បានបញ្ជាក់ពីការគោរព​ស្រឡាញ់​ពី​គ្នាទៅវិញទៅមក ក្នុងនាមជាប្រជាជនដែលធ្លាប់តែ ជួយគ្នាក្នុងគ្រាមានការលំបាកដូចគ្នា​កា​ល​ពី​អតីតកាល។ ក្នុង​ជំនួបពិភាក្សាគ្នានោះដែរ មេដឹក នាំនៃប្រទេសទាំងពីរកម្ពុជា-វៀតណាម ក៏​​​បានពិភាក្សាគ្នាផងដែរ ពីជំនួបក្នុងអាហារពេលព្រឹក នៅទីក្រុងប៉េកាំង ប្រទេសចិន ក្នុង​ឱ​កា​ស​ដែលមេដឹកនាំទាំងពីរ អញ្ជើញចូលរួមវេទិកាខ្សែ ក្រវាត់ និងផ្លូវ លើកទី២ ស្តីពីកិច្ចសហប្រតិ​ប​ត្តិ​ការអន្តរជាតិ។ ជាមួយគ្នានេះភាគីទាំងពីរក៏បាន ធ្វើការពិភាក្សាផងដែរ ទាក់ទិនទៅនឹង​ទំនាក់​ទំនងទ្វេភាគី ពហុភាគី បញ្ហាតំបន់ និងអន្តរជាតិ ដែលមានការយកចិត្តទុកដាក់ដូចគ្នា ៕

ដោយជឹម ណារី