សម្តេចប្រធានសភាកម្ពុជាជំរុញឱ្យសមាជិកសភាអាស៊ី-ប៉ាស៊ីហ្វិកទាំងអស់ បង្កើនភាគរយសមាជិកភាពជាស្ត្រីឱ្យបានច្រើន

41

សៀមរាប ថ្ងៃទី១៤ ខែមករា ឆ្នាំ២០១៩ — សម្តេចប្រធានរដ្ឋសភាកម្ពុជាបានលើកឡើងថា ការផ្តល់ភាពអង់អាចផ្នែកសេដ្ឋកិច្ចដល់ស្ត្រី គឺជាកត្តាសំខាន់ក្នុងការជំរុញការអភិវឌ្ឍប្រកបដោយចីរភាព និងបរិយាប័ន្ន ហើយជំរុញឱ្យ​សមាជិកសភាអាស៊ី-ប៉ាស៊ីហ្វិកទាំងអស់ ចូលរួមក្នុងការបង្កើនភាគរយសមាជិកភាពជាស្ត្រី ក្នុងក្របខ័ណ្ឌនីតិ ប្បញ្ញត្តិ នីតិប្រតិបត្តិ និងតុលាការ ព្រមទាំងវិស័យឯកជនឱ្យបានកាន់តែ​ច្រើនបន្ថែមទៀត។

ថ្លែងបើកកិច្ចប្រជុំសមាជិកសភាស្រ្តី នៃវេទិកាសភាអាស៊ី-ប៉ាស៊ីហ្វិកលើកទី២៧ នៅខេត្តសៀមរាប នារសៀលថ្ងៃទី១៤ខែមករា ឆ្នំា ២០១៩នេះ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានមានប្រសាសន៍ថា ការផ្តល់ភាព អង់អាចផ្នែកសេដ្ឋកិច្ចដល់ស្ត្រី គឺជាកត្តាសំខាន់ក្នុងការជំរុញការអភិវឌ្ឍប្រកបដោយចីរភាព និងបរិយាប័ន្ន។ សម្ដេចពញាចក្រីបានបញ្ជាក់ថា បើតាមការសិក្សារបស់ធនាគារពិភពលោក​បានធ្វើការសន្និដ្ឋានថា  នៅពេលដែលបណ្តាប្រទេសនានាផ្តល់តម្លៃដល់ស្រ្តី និងក្មេងស្រី ធ្វើការវិនិយោគទៅលើបញ្ហាសុខភាព ការអប់រំ ការបណ្តុះបណ្តាលវិជ្ជាជីវៈ ការចូលរួម​ក្នុង វិស័យសេដ្ឋកិច្ច ការគ្រប់គ្រងចំណូល ការក្លាយជាម្ចាស់ធុរកិច្ចដោយខ្លួនឯង ពេលនោះ មិនមែនតែស្រ្តី និងក្មេងស្រីទំាងនោះទេ ដែលទទួលបានផលប្រយោជន៍ តែផលប្រយោជន៍ នេះ បានដល់ក្រុមគ្រួសារ និងកូនចៅរបស់ពួកគេ ព្រមទាំងសហគមន៍ សង្គម និងសេដ្ឋកិច្ច របស់ប្រទេសទំាងមូលផងដែរ ។

សម្តេចពញាចក្រីបានជំរុញឱ្យសមាជិកសភាអាស៊ី-ប៉ាស៊ីហ្វិកទាំងអស់ ចូលរួមក្នុងការបង្កើន ភាគរយសមា ជិកភាពជាស្ត្រី ក្នុងក្របខ័ណ្ឌនីតិប្បញ្ញត្តិ នីតិប្រតិបត្តិ និងតុលាការ ព្រមទាំង វិស័យឯកជនឱ្យបានច្រើន ព្រោះវាមានសារៈសំខាន់ក្នុងការរួមចំណែកឈាន ទៅសម្រេចបាន សុខុមាលភាពសង្គមសម្រាប់ស្ត្រី និងក្មេងស្រី នៅក្នុងតំបន់អាស៊ី-ប៉ាស៊ីហ្វិក និងពិភពលោក ទាំងមូល។

សម្តេចបានបន្តថា បច្ចុប្បន្ននេះសម្រាប់កម្ពុជា បានយកចិត្តទុកដាក់ក្នុងការប្រកាន់យកនូវ វិធានការច្បាស់លាស់ ក្នុងការផ្តល់ភាពអង់អាចដល់ស្ត្រី និងជំរុញសមភាពយេនឌ័រ ដោយ ដាក់បញ្ចូលបញ្ហានេះក្នុងគោលនយោបាយជាតិ និងតាមស្ថាប័ននានា។ ទន្ទឹមនេះ ក្រសួង​កិច្ចការនារី នៃព្រះរាជាណាចក្រកម្ពុជា ដែលជាសេនាធិការក្នុងការអភិវឌ្ឍស្រ្តី បាន​បំពេញ នូវតួនាទីគួរជាទីមោទនៈ ក្នុងការរៀបចំឱ្យមានក្របខ័ណ្ឌគតិយុត្ត ការផ្តួចផ្តើមគំនិត និងការ​អនុវត្តរបៀបវារៈគោលនយោបាយទាក់ទងនឹងសមភាពយេនឌ័រ ពិសេសផែនការយុទ្ធ សាស្រ្តនារីរតនៈទី១, ទី២, ទី៣ និងទី៤(ឆ្នាំ២០១៨-២០២៤)។

តែទោះជាយ៉ាងណាក្តីប្រទេសកម្ពុជានៅតែ យកចិត្តទុកដាក់បន្តការកែលម្អ នូវចំណុច ជាច្រើនទៀត ដើម្បីឆ្លើយតបទៅនឹងការអនុវត្តគោលនយោបាយលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី សំដៅបង្កើនការចូលរួមរបស់ស្រ្តីក្នុងទីផ្សារពលកម្ម និងចាប់ យកឱ្យបាននូវតំណែងជាអ្នកដឹកនំា ក៏ដូចជាការជំរុញឱ្យស្រ្តីចូលរួមនៅក្នុងការធ្វើសេចក្តី​សម្រេចចិត្តផ្នែកនយោបាយ និងកសាងនូវយន្តការគាំពារសុវត្ថិភាពសង្គមចំពោះស្រ្តី​និងក្មេង ស្រី។ សម្ដេចប្រធានរដ្ឋសភាបានចាត់ទុកកិច្ចប្រជុំនាពេលនេះ ជាវេទិកាមួយដ៏មាន​សារៈសំខាន់ផ្តល់ឱកាសឱ្យប្រតិភូទាំងអស់ អាចចែករំលែកនូវបទពិសោធន៍ សមិទ្ធផលទាំង ឡាយ ដែលប្រទេសនីមួយៗសម្រេចបានរួម និងការពង្រឹងភាពជាដៃគូ ក្នុងតំបន់អាស៊ី-ប៉ាស៊ីហ្វិក ដើម្បីសម្រេចបាននូវគោលការណ៍ដ៏មានប្រសិទ្ធភាពខ្ពស់៕

ដោយ ឃុត សៅ