សម្ដេចតេជោនាយករដ្ឋមន្ត្រី ឯកភាពទៅនឹងសំណើមួយចំនួន របស់សមាគមគ្រឹះស្ថានឧត្ដមសិក្សា ដើម្បីពង្រឹងគុណវុឌ្ឍិជាតិ

ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានឯ​ក​ភា​ព​ទី​១. បង្កើតក្រុមការងារគុណវុឌ្ឍិជាតិ ដើម្បីចូលរួមពិនិត្យកែសម្រួល​គុណវុឌ្ឍិជាតិកម្ពុជា, ទី២. ប​ង្កើតក្រុមការងាររវាងសមាគមគ្រឹះស្ថានឧត្តមសិក្សាកម្ពុជា ជាមួយក្រសួងអប់រំ និងទី៣. ប​ង្កើ​ត​ក្រុ​មការងាររវាងសមាគមគ្រឹះស្ថានឧត្តមសិក្សា ជាមួយក្រសួងសុខាភិបាល ដែលជាសំ​ណើ​របស់សមាគមគ្រឹះស្ថានឧត្ដមសិក្សា សំដៅបង្កើនគុណភាព និងប្រសិទ្ធភាពវិស័យអប់រំ​នៅ​កម្ពុ​ជា​។

ឯកឧត្ដម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានថ្លែង​ដូច្នេះប្រាប់​អ្ន​ក​​យកព័ត៌មាន បន្ទាប់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បា​ន​អនុញ្ញាតឱ្យសមាគមគ្រឹះស្ថានឧត្តមសិក្សា ដែលដឹកនាំ ដោយលោក ហេង វ៉ាន់ដា ចូល​ជួ​ប​​សម្ដែងការគួរសម នាព្រឹកថ្ងៃពុធ ១១រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹង​ថ្ងៃ​ទី០២ ខែមករា ឆ្នាំ២០១៩ នៅវិមានសន្តិភាព។ ក្នុង ជំនួបនោះ លោក ហេង វ៉ាន់ដា បា​ន​ជ​ម្រា​ប​ជូនសម្តេចតេជោនាយករដ្ឋមន្ត្រីអំពីសកម្ម ភាពរបស់សមាគមគ្រឹះស្ថានឧត្តមសិក្សានា​ឆ្នាំ​ក​ន្ល​​ងមក ដែលពាក់ព័ន្ធទៅនឹងវិស័យអប់រំ វិស័យមនុស្សធម៌ រួមទាំងបញ្ហាសង្គមផងដែរ។

លើ​ស​ពីនោះទៅទៀត​ លោកក៏បានជម្រាបជូនសម្ដេចតេជោ​អំពីយុទ្ធសាស្ត្ររបស់ សមាគមគ្រឹះ​ស្ថា​​ន​ឧត្តមសិក្សាផងដែរ។ ជាងនេះទៀតនៅក្នុងជំនួបនោះ លោក ហេង វ៉ាន់ដា ក៏​បានគោរព​ស្នើ​សុំសម្ដេចតេជោនាយករដ្ឋមន្រ្តី ទីមួយៈ មេត្តាពិចារណា បង្កើតក្រុមការងារគុណវុឌ្ឍិជាតិ ដើ​​ម្បី​ចូលរួមពិនិត្យកែសម្រួលគុណវុឌ្ឍិជាតិកម្ពុជា។ ទីពីរៈ ស្នើសុំបង្កើតក្រុមការងាររវាង​ស​មា​គ​ម​គ្រឹះ​​ស្ថានឧត្តមសិក្សាជាមួយក្រសួងអប់រំ និង ទីបីៈ បង្កើតក្រុមការងាររវាង​សមាគម​គ្រឹះ​​ស្ថាន​ឧត្ត​មសិក្សាជាមួយក្រសួងសុខាភិបាល។

ការឆ្លើយតប សម្តេចតេជោនាយករដ្ឋមន្ត្រី បានវាយតម្លៃខ្ពស់ចំពោះការចូលរួមចំណែក​របស់​សមាគមគ្រឹះស្ថានឧត្តមសិក្សាលើវិស័យអប់រំនៅកម្ពុជា លើវិស័យមនុស្សធម៌ និងលើវិស័​យ​​សង្គមផងដែរ។ ពាក់ព័ន្ធជាមួយនឹងសំណើដែលលោក ហេង វ៉ាន់ដា បានលើកឡើង សម្ដេ​ច​​តេជោនាយករដ្ឋមន្រ្តីបានមានប្រសាសន៍សម្រេចថា៖ ទី១- សម្តេចបានយល់ស្រប​បង្កើតឱ្យ​មា​​នគណៈកម្មការរួមមួយរវាងស្ថាប័នដែលពាក់ព័ន្ធ និងគ្រឹះស្ថានឧត្តមសិក្សាទាំងអស់, ទី២- ប្រ​​គ​​ល់ការងារជូន​ ឯកឧត្តម​ រដ្ឋមន្រ្តីក្រសួងអប់រំ យុវជន និងកីឡា ហង់ ជួនណារ៉ុន​ ជា​ប្រ​ធា​ន​គ​ណៈកម្មការ និងទី៣- បង្កើតលេខាធិការដ្ឋានមួយនៅក្រោមចំណុះក្រសួងអប់រំ ដែល​នឹង​មា​ន​គណៈកម្មការមួយចំណុះ។ បន្ទាប់ពីគណៈកម្មាធិការនេះបង្កើតរួចហើយ​ គណៈកម្មការ​ត្រូវ​ពិ​និ​ត្យបង្កើតយន្តការ​ និងរៀបចំពិនិត្យឡើងវិញ នូវអនុក្រឹត្យពាក់ព័ន្ធទៅនឹងអនុក្រឹត្យស្ដីពី​គុណ​វុឌ្ឍ​​ជាតិដែលជាធម្មនុញ្ញភាពសម្រាប់វិស័យអប់រំ។

ទន្ទឹមនឹងនេះដែរ​នៅក្នុងជំនួបនោះ​សម្តេច​តេ​ជោបានកត់សម្គាល់ឃើញថា ឆ្នាំកន្លងមក គឺមានសំណើយ៉ាងច្រើន ពាក់ព័ន្ធទៅនឹង​ការអនុ​​គ្រោះពន្ធលើបរិក្ខាអប់រំ។ល។ ប៉ុន្តែជំនួបលើក នេះគឺពុំមានសំណើរច្រើនឡើយ តែផ្ទុ​យ​ទៅ​វិញ​គឺមានតែ​សំ​ណូមពរដែលទាក់ទងទៅនឹងការ បង្កើនគុណភាព ប្រសិទ្ធភាពនៃដំណើរ​ការ​ការ​ងារ​លើវិ​ស័​យ​អប់រំ។

គួរបញ្ជាក់ដែរថា សមាគមគ្រឹះស្ថានឧត្តមសិក្សា គឺជាអង្គការក្រៅរដ្ឋាភិបាលមួយ ដែល​ចងក្រងឡើងដោយគ្រឹះស្ថានឧត្តមសិក្សាជាច្រើននៅកម្ពុជា ក្នុងបំណងចូលរួមជាមួយរាជ រដ្ឋាភិ​បា​ល​​​​ក្នុងការលើកកម្ពស់ការសិក្សានៅថ្នាក់ឧត្តមសិក្សាឱ្យកាន់តែល្អប្រសើរឡើង៕

ដោយ ជឹម ណារី

ពត៌មានទាក់ទង

ពត៌មានផ្សេងៗ