សុន្ទរកថា ឯកឧត្តម ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីស្តីទី ទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងារថ្នាក់ជាតិចុះជួយ ខេត្តតាកែវ ថ្លែងក្នុងពិធីខួបលើកទី ១៥៤ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០១៧ – សាខាកាកបាទក្រហមកមកម្ពុជា ខេត្តតាកែវ
តាកែវ ថ្ងៃទី ០៤ ខែ ឧសភា ឆ្នាំ ២០១៧
- ឯកឧត្តម លោកជំទាវ លោកឧកញ៉ា លោក លោកស្រី ភ្ញៀវកិត្តិយសជាតិ-អន្តរជាតិ
- សមាជិក-សមាជិកា យុវជន និងអ្នកស្ម័គ្រចិត្ត សាខាកាកបាទក្រហមកម្ពុជាខេត្ត យុវជន កាយរិទ្ធិខេត្ត យុវជននៃសហភាពសហព័ន្ធយុវជនកម្ពុជាខេត្តតាកែវ បងប្អូនជនរួមជាតិទាំងអស់ ជាទីមេត្រី!
ថ្ងៃនេះ ខ្ញុំមានកិត្តិយស និងមានសេចក្តីរីករាយជាអនេកដោយបានមកចូលរួមនៅក្នុងពិធី ខួបលើកទី ១៥៤ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០១៧ នៅ សាខាកាកបាទក្រហមកម្ពុជា ខេត្តតាកែវ ដែលតែងបានប្រារព្វធ្វើឡើងក្នុងគោលដៅ រួមចំណែក លើកទឹកចិត្តខ្ពស់ដល់កិច្ចប្រតិបត្តិការនានា នៅក្នុងបុព្វហេតុមនុស្សធម៌ ជាពិសេសការជួយសំរាលទុក្ខលំបាករបស់បងប្អូនប្រជាជន ដែលទទួលរងនូវគ្រោះថ្នាក់ដោយសារគ្រោះមហន្តរាយគ្រោះអាសន្ននានា ហើយកំពុងត្រូវការនូវជំនួយសង្រ្គោះបន្ទាន់។
ជាការពិត ការប្រារព្វមីទ្ទិញនាពេលនេះ បានបង្ហាញឱ្យប្រជាជនខេត្តតាកែវគ្រប់ៗរូបបានយល់ និងជ្រួតជ្រាបកាន់តែច្បាស់បន្ថែមទៀត អំពីសកម្មភាពមនុស្សធម៌ និងបញ្ហាប្រឈមជាសកលនានា ដែលបានក្លាយជាក្តីកង្វល់រួមនៃចលនាកាកបាទក្រហម-អឌ្ឍចន្ទក្រហម ហើយចាំបាច់ត្រូវរួមគ្នាគិតគូរ និងរកដំណោះស្រាយ សម្រាប់ជួយសង្រ្គោះជនរងគ្រោះឱ្យបានទាន់ពេលវេលា និងមានប្រសិទ្ធិភាព។ កិច្ចការទាំងនេះ គឺជាការរួមចំណែកយ៉ាងសំខាន់ជាមួយអាជ្ញាធរខេត្ត ក្នុងការកាត់បន្ថយនូវអត្រា នៃភាពក្រីក្រ និងដោះស្រាយបាននូវ ទុក្ខលំបាកមួយចំនួនរបស់ប្រជាជន និងជនរងគ្រោះក្នុងខេត្ត។
ឆ្លៀតឱកាសនេះ ខ្ញុំសូមថ្លែងអំណរគុណ និងកោតសរសើរចំពោះ Éកឧត្តម លោកជំទាវ អ្នកឧកញ៉ា លោក លោកស្រី អ្នកនាងកញ្ញា ជាសប្បុរសជនជាតិ-អន្តរជាតិ ដែលជានិច្ចកាលតែងតែ អញ្ជើញចូលរួមក្នុងអង្គមីទ្ទិញ ដ៏មានសារៈសំខាន់របស់សាខាកាកបាទក្រហមកម្ពុជាខេត្តតាកែវ និងជានិច្ចកាលតែងតែផ្តល់នូវការគាំទ្រ ក្តីសង្ឃឹម និងភាពកក់ក្តៅដល់ជនរងគ្រោះ គ្រួសារងាយរងគ្រោះទាំងឡាយ ជាពិសេសជនចាស់ជរា ជនគ្មានទីពឹង ស្រ្តីមេម៉ាយ កុមារកំព្រា អ្នករស់នៅ ជាមួយមេរោគអេដស៍-ជម្ងឺអេដស៍ ជាដើម។ ជាការពិត ទឹកចិត្ត និងកាយវិការដ៏សប្បុរសទាំងអស់នេះ គឺជាចរិតស្តែងចេញឱ្យឃើញ នូវការអនុវត្តតាមស្មារតីនៃ «វប្បធម៌ចែករំលែក» ក្នុងការជួយគ្នាទៅវិញទៅមក ដែលត្រូវធ្វើនៅគ្រប់ទីកន្លែង និងនៅគ្រប់ពេលវេលាដោយមិនរើសអើង នៅក្នុងគ្រាមានអាសន្ន ។ ជាងនេះទៅទៀតកិច្ចខិតខំប្រឹងប្រែងទាំងអស់នេះ គឺជាការរួមចំណែកដ៏ធំធេងដល់ការពូតផ្តុំកម្លាំងមនុស្សធម៌ និងសាមគ្គីធម៌ ដែលជាយន្តការជួយជំរុញឱ្យ សាខាកាកបាទក្រហមកម្ពុជាខេត្តតាកែវ កាន់តែមានកម្លាំងចិត្ត និងស្មារតី ទ្វេឡើងថែមទៀត ក្នុងការបន្តបំពេញ តួនាទី និងភារកិច្ច របស់ខ្លួនឱ្យកាន់តែសកម្មខ្លាំងក្លា និងមានប្រសិទ្ធិភាពខ្ពស់ ។
ជាមួយគ្នានេះ ខ្ញុំសូមកោតសរសើរ និងសូមវាយតម្លៃខ្ពស់ ជាពិសេសជូនចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលមានទឹកចិត្ត មោះមុត សណ្តោសប្រណី ធ្វើការដោយឥតខ្លាចនឿយហត់ ក្នុងដំណើការសកម្មភាពមនុស្សធម៌ រួមជាមួយថ្នាក់ដឹកនាំ គ្រប់លំដាប់ថ្នាក់ មន្ត្រី បុគ្គលិក បណ្តាញអ្នកស្ម័គ្រចិត្ត និងក្រុមយុវជនស្ម័គ្រចិត្តទាំងអស់ នៃកាកបាទក្រហមកម្ពុជា ដែលបានផ្តល់ការគាំទ្រដ៏មុតមាំ និងសហការយ៉ាងជិតស្និទ្ធ ដើម្បីអនុវត្តសកម្មភាពមនុស្សធម៌ ក្នុងក្របខ័ណ្ឌនៃផែនការយុទ្ធសាស្រ្តទាំងអស់របស់កាកបាទក្រហមកម្ពុជា រហូតសម្រេចបាននូវសមិទ្ធិផលជាច្រើន ក្នុងការបំពេញបេសកកម្មជាប្រវត្តិសាស្រ្តរបស់ខ្លួនជូនជាតិ និងប្រជាជនយើង។
ក្នុងឱកាសនេះដែរ ខ្ញុំក៏សូមសម្តែងនូវការអបអរសាទរ និងសូមវាយតម្លៃខ្ពស់ចំពោះÉកឧត្តមប្រធានកិត្តិយស លោកជំទាវប្រធានគណៈកម្មាធិការសាខា ថ្នាក់ដឹកនាំ មន្រ្តី បុគ្គលិក អ្នកស្ម័គ្រចិត្ត យុវជនសាខាកាកបាទក្រហមកម្ពុជាខេត្តតាកែវទាំងអស់ ដែលបានលៈបង់កម្លាំងកាយចិត្ត ស្មារតី ដើម្បីគាំទ្រ និងលើកកម្ពស់នូវកិច្ចប្រតិបត្តិការយ៉ាងសកម្ម លើការងារមនុស្សធម៌របស់សាខាកាកបាទក្រហមកម្ពុជាខេត្តតាកែវ ។ ពិតណាស់ថា សកម្មភាពទាំងអស់នេះបាន និងកំពុងជំរុញឱ្យសាខាកាកបាទក្រហមកម្ពុជាខេត្តតាកែវ ក៏ដូចជានៅអនុសាខា កាន់តែមានកម្លាំងចិត្តថែមទៀតក្នុងការបន្តបំពេញតួនាទី និងភារកិច្ចរបស់ខ្លួនឱ្យកាន់តែសកម្ម និងមានប្រសិទ្ធិទភាពទ្វេឡើង។
ខ្ញុំសូមស្ងើចសរសើរ និងវាយតម្លៃខ្ពស់ ចំពោះអ្នកស្ម័គ្រចិត្ត យុវជនសាខាកាកបាទក្រហម ខេត្ត កន្លងមកនេះ តែងបានធ្វើការប្រមូលផ្តុំកម្លាំង ផ្តោតការយកចិត្តទុកដាក់ខ្ពស់ចំពោះកិច្ចការមនុស្សធម៌ ដោយបំពេញភារកិច្ចដោយការស្ម័គ្រចិត្ត លះបង់កម្លាំងកាយពេលវេលា ប្រើអស់លទ្ធភាពធនធាន សម្ភារៈ ថវិកា ដែលមានក្នុងបុព្វហេតុ ជួយសម្រាលទុក្ខលំបាកជនងាយរងគ្រោះ និងជនរងគ្រោះនៅគ្រប់ទីកន្លៃង ។ ដោយឡែក ប្រសិនបើយើងពិនិត្យមើលសកម្មភាពនៃអ្នកស្ម័គ្រចិត្ត យុវជនសាខាកាកបាទក្រហមកម្ពុជាខេត្តវិញ យើងក៏មានមោទនភាពដែរដែលនៅក្នុងរយៈកាលកន្លងទៅនេះ សកម្មភាពភាពរបស់ពួកគេ ពិតជាបានចូលរួមចំណែកយ៉ាងសំខាន់ជាមួយអាជ្ញាធរខេត្ត ក្នុងការកាត់បន្ថយនូវអត្រានៃក្រីក្រ ការលើកកម្ពស់សុខុមាលភាព និង កម្រិតជីវភាពរស់នៅរបស់ប្រជាជនយើងកាន់តែប្រសើរឡើងថែមទៀត ។ ជាក់ស្តែងក្នុងឆ្នាំ ២០១៦ កន្លងទៅនេះសាខាកាកបាទក្រហមកម្ពុជាខេត្តតាកែវ បានបំពេញនូវតួនាទីរបស់ខ្លួនយ៉ាងសកម្ម ដោយទទួលបានជោគជ័យយ៉ាងច្រើន និងប្រកបដោយប្រសិទ្ធិភាពខ្ពស់ ក្នុងបេសកកម្មមនុស្សធម៌ជួយសង្គ្រោះប្រជាជនរងគ្រោះ ។ ជាក់ស្តែងក្នុងឆ្នាំ ២០១៦ កន្លងទៅនេះដែរ យើងក៏មើលឃើញថា សាខាកាកបាទក្រហម កម្ពុជាខេត្តតាកែវ តែងតែចូលរួមយ៉ាងសកម្មក្នុងការងារសង្គម ជួយសង្គ្រោះប្រជាជនរងគ្រោះដោយប្រការផ្សេងៗទៀត ដូចជាខ្យល់កន្រ្តាក់ រន្ទៈបាញ់ស្លាប់ និងរបួស អគ្គិភ័យ លង់ទឹកស្លាប់ ជម្ងឺអេដស៍ ខ្សែភ្លើងឆក់ ធ្លាក់ពីលើដើមឈើស្លាប់ ចាស់ជរាទីទ័លក្រ ពិការ ពុលអាហារ កម្មកររោងចក្រដួលសន្លប់ និងគ្រួសារអតីតយុទ្ធជន បានចំនួន ៤.៤៣៤ គ្រួសារគ្រួសារ។
ដូច្នេះ យើងទាំងអស់គ្នាត្រូវបន្តរួមគ្នាគាំទ្រ ទាំងស្មារតី សម្ភារៈ និង ថវិកាដល់ចលនា និងសកម្ម ភាពរបស់សាខាកាកបាទក្រហមកម្ពុជាខេត្តតាកែវ ជាពិសេស ដើម្បីជំរុញ និងលើកទឹកចិត្តដល់ចលនា និង សកម្មភាព យុវជនកាកបាទក្រហមកម្ពុជា ។ ក្នុងន័យនេះដែរ ខ្ញុំសូមអំពាវនាវដល់កម្លាំងយុវជន ទាំងអស់ត្រូវ ស្វែងយល់ថា ការឈឺចាប់របស់ជនរងគ្រោះ ដែលកំពុងដង្ហើយហៅរកការសង្គ្រោះនោះ គឺជាការឈឺចាប់របស់ សង្គមទាំងមូល ហើយយុវជនយើងទាំងអស់ត្រូវបង្កើននូវសុឆន្ទៈមោះមុត ដើម្បីបុព្វហេតុមនុស្សធម៌ និង ការអភិវឌ្ឍន៍សង្គមតាមរយៈការចូលរួមនៅក្នុងចលនា និងសកម្មភាពរបស់សាខាកាកបាទក្រហមកម្ពុជាខេត្ត ។
ឯកឧត្តម លោកជំទាវ លោកឧកញ៉ា អស់លោក លោកស្រី!
យើងបានដឹងហើយថា ក្នុងពេលបច្ចុប្បន្ននេះ ពិភពលោកកំពុងជួបប្រទះនូវវិបត្តិនានា ទាំង សេដ្ឋកិច្ច នយោបាយ ជម្លោះប្រដាប់អាវុធ ជម្លោះសាសនា និង កំណើននៃសេចក្តីត្រូវការធនធានធម្មជាតិ សម្រាប់បំពេញបន្ថែម ដល់ការអភិវឌ្ឍន៍សង្គម-សេដ្ឋកិច្ចនៃបណ្តាប្រទេសនៅក្នុងតំបន់ និងនៅលើពិភពលោក ហើយជាពិសេស គឺបញ្ហាប្រឈមនឹងការប្រែប្រួលធាតុអាកាស និងការឡើងកម្តៅនៃភពផែនដី ដែលបញ្ហាទាំងអស់នេះ គឺជាប្រធានបទថ្មីសម្រាប់ពិភពលោកទាំងមូល ។ ស្ថិតក្នុងសភាពការណ៍បែបនេះ ខ្ញុំយល់ថា ពិភពលោកនឹងជួបប្រទះគ្រោះមហន្តរាយធម្មជាតិធំៗជាច្រើនទៀត ដែលនឹងកើតឡើងជាយថាហេតុជាបន្តបន្ទាប់ទៀត នៅពេលអនាគតខាងមុខនេះ ព្រមទាំងបង្កើតនូវជនរងគ្រោះជាច្រើនទៀត ដែលបញ្ហាប្រឈមទាំងនេះ ក៏នឹងបង្កជាមូលហេតុនៃការគំរាមដល់សន្តិសុខ សុវត្ថិភាព សណ្តាប់ធ្នាប់សង្គម និងការរស់នៅរបស់មនុស្សជាតិនៅលើកពិភពផែនដីយើងនេះ ។ ក្នុងនោះប្រជាជន និងទឹកដីនៃព្រះរាជាណាចក្រកម្ពុជាយើង ក៏នឹងទទួលផលប៉ះពាល់ពីបញ្ហាទាំងអស់នេះផងដែរ ហើយអាចនឹងបង្កើតជាបន្ទុកសម្រាប់ជាតិទាំងមូលផងដែរ ។
ក្នុងន័យនេះ យើងអាចវាយតម្លៃបានថា យើងនឹងមានតម្រូវការច្រើនថែមទៀតពីសកម្មភាព របស់សាខាកាកបាទក្រហមកម្ពុជាខេត្ត ជាពិសេសតម្រូវការពីការចូលរួម របស់ អ្នកស្ម័គ្រចិត្ត និងយុវជនកាកបាទក្រហម ។ ជារួមយើងបានដឹងហើយថា «នៅគ្រប់សម័យកាល គ្រប់សង្គម យុវជនមិនត្រឹមតែជាកម្លាំងដ៏ស្រួចស្រាវ មានកម្លាំងកាយ កម្លាំងចិត្ត និងស្មារតីភ្លឺស្វាង មានទឹកចិត្តក្លាហាន ពុះពារ ប្រយុទ្ធគ្រប់ឧបសគ្គ និង ទុក្ខលំបាកនានា ដោយគ្មានការរារែកប៉ុណ្ណោះទេ ប៉ុន្តែថែមទាំងច្បាស់ណាស់ ថាយុវជន គឺជាសសរទ្រូងនៃបច្ចុប្បន្នភាព និងអនាគតរបស់ប្រទេសជាតិ» ទៀតផង ។ លក្ខណៈ ដ៏ពិសេសនេះហើយ បានធ្វើឱ្យយុវជនក្លាយទៅជាធនធានដ៏មានតម្លៃ មិនចេះរីងស្ងួត និង មិនអាចខ្វះបានឡើយ ហើយកាន់តែសំខាន់ ក្នុងចលនាមនុស្សធម៌របស់កាកបាទក្រហម-អឌ្ឍចន្ទក្រហម ។
តាមមតិស្វាគមន៍បង្ហាញថា រហូតមកដល់បច្ចុប្បន្ននេះ យុវជនសាខាកាកបាទក្រហមកម្ពុជាខេត្តតាកែវ មានចំនួនកើនដល់ ៣.៣៨៣នាក់ ហើយដែលបាន និងកំពុងធ្វើសកម្មភាពចម្រុះវិស័យក្នុងភារកិច្ចជាភ្នាក់ងារ នៃការផ្លាស់ប្តូរឥរិយាបទក្នុងសហគមន៍ និងជាមិត្តអប់រំមិត្តនៅក្នុងគ្រឹះស្ថានសិក្សា កន្លែងបំពេញការងារ និង សកម្មភាពមនុស្សធម៌ជាច្រើនទៀត ។ តាមរយៈនេះដែរខ្ញុំជឿជាក់ថា សាខាកាកបាទក្រហមកម្ពុជាខេត្តតាកែវ នឹងត្រូវបន្តតួនាទីក្នុងនាមជាសេនាធិការដ៏សំខាន់ឱ្យអាជ្ញាធរខេត្ត លើវិស័យមនុស្សធម៌ ដើម្បីរួមចំណែកជួយដោះស្រាយបញ្ហាទាំងអស់នោះ សម្រាប់ជាឧត្តមប្រយោជន៍ជាតិ និងប្រជាជន ព្រមទាំងការលើកកម្ពស់សេចក្តីថ្លៃថ្នូរគុណធម៌ តម្លៃមនុស្សជាតិ និងការចូលរួមចំណែកដល់ការកាត់បន្ថយភាពក្រីក្រ របស់ប្រជាជនយើងផងដែរ ដូចអ្វីដែលយើងបានលើកឡើងថា (ទីណាមានទុក្ខលំបាក ទីនោះមានកាកបាទក្រហម) ។ ក្នុងស្មារតីនេះដែរ ខ្ញុំសូមអំពាវអំនាវ បន្ថែមទៀតដល់ប្រជាជន មហាជនគ្រប់ស្រទាប់ជាន់ថ្នាក់ មន្ទីរ អង្គភាព អាជ្ញាធរដែនដីពាក់ព័ន្ធទាំងអស់ សូមបន្តខិតខំយកចិត្តទុកដាក់ចូលរួមចំណែក សហការគ្នាឱ្យកាន់តែសកម្ម និងរស់រវើកថែមទៀតជាមួយសាខាកាកបាទក្រហមកម្ពុជាខេត្តតាកែវ ដើម្បីឱ្យ សាខាមានលទ្ធភាពដោះស្រាយបញ្ហាប្រឈមទាំងឡាយ ។ ចំពោះមុខនេះដែរយើងចាំបាច់ត្រូវបន្ត ជំរុញចលនាយុវជនសាខាកាកបាទក្រហមកម្ពុជាខេត្ត នេះឱ្យក្លាយជាកំលាំង ដ៏ស្រួចស្រាវពិតប្រាកដ មានសុឆន្ទៈមុតមាំក្នុងការងារមនុស្សធម៌ ឈានទៅសម្រេចបាននូវស្មារតីដែលយើងបានកំណត់ឡើងគឺ (ធ្វើឱ្យបានកាន់តែច្រើនជាងមុន ធ្វើឱ្យបានកាន់តែល្អជាងមុន និងធ្វើឱ្យបានកាន់តែ ស៊ីជម្រៅ និងទៅឱ្យបានកាន់តែឆ្ងាយជាងមុន)។
ឈរលើទស្សនៈទាំ់ងអស់នេះ ដើម្បីរួមចំណែកដល់ការសម្រេចបានជោគជ័យ តាមចក្ខុវិស័យរបស់កាកបាទក្រហមកម្ពុជា និងស្របតាមចក្ខុវិស័យរួមរបស់រាជរដ្ឋាភិបាល ក្នុងការអភិវឌ្ឍន៍សង្គម-សេដ្ឋកិច្ចជាតិយើង ខ្ញុំសូមលើកឡើងនូវអនុសាសន៍មួយចំនួន សម្រាប់សាខាកាកបាទក្រហមកម្ពុជាខេត្តតាកែវ និងអង្គភាពស្ថាប័នពាក់ព័ន្ធយកទៅអនុវត្ត ឱ្យមានប្រសិទ្ធភាពដូចតទៅៈ
ទី១. ត្រូវបន្តលើកកម្ពស់ស្មារតីជំរុញ និងលើកទឹកចិត្តបន្ថែមទៀតដល់យុវជន អ្នកស្មគ្រ័ចិត្តវ័យក្មេងរបស់យើងដែលបាន និងកំពុងតែសកម្មបំពេញភារកិច្ចរបស់ខ្លួននៅតាមកន្លែងនានា ដើម្បីបង្កើនប្រសិទ្ធភាព និងការទទួលខុសត្រូវ ។ ក្នុងនោះក៏ត្រូវបន្តការយកចិត្តទុកដាក់លើការពង្រឹងគុណភាពការងារដឹកនាំ គ្រប់គ្រងនៅគ្រប់ទីលំដាប់ថ្នាក់ផងដែរ ដើម្បីធានាឱ្យបាននូវវឌ្ឍនភាពនៃកម្លាំងមនុស្សធម៌វ័យក្មេង ឱ្យប្រព្រឹត្តទៅប្រកបដោយចីរភាព ។ ដោយឡែក ត្រូវបន្តជំរុញការបណ្តុះបណ្តាលជំនាញ បំណិនជីវិត ជាក់ស្តែងដើម្បីឆ្លើយតបទៅនឹងសេចក្តីត្រូវការលើការប្រើប្រាស់បចេ្ចកវិជ្ជា លើកកម្ពស់សមត្ថភាព និងការចូលរួមដោះស្រាយបញ្ហាប្រឈមក្នុងសង្គមជាតិ ។ ជារួម ត្រូវធ្វើឱ្យយុវជនមានសមត្ថភាព មុនពេលពួកគេជួយអ្នកដទៃ។
ទី២. ត្រូវទទួលស្គាល់តួនាទីដ៏មានសារៈសំខាន់របស់យុវជន ដែលជាភ្នាក់ងារនាំឱ្យមានការផ្លាស់ប្តូរឥរិយាបថនៅក្នុងគ្រប់ស្រទាប់សង្គម ទាំងនៅក្នុងមជ្ឈដ្ឋានថ្នាក់ដឹកនាំ និងនៅតាមសហគមន៍មូលដ្ឋាន ។ តាមរយៈនេះ យើងត្រូវបន្តបំផុសចលនាយុវជន ឱ្យពួកគេយល់ពីតម្លៃ និង សក្តានុពលរបស់ខ្លួន ដោយធ្វើឱ្យទឹកចិត្តរបស់យុវជន បានផ្សារភ្ជាប់គ្នាជាមួយនឹងការឈឺចាប់របស់ជនរងគ្រោះដើម្បីជំរុញដល់ការចូលរួមក្នុងចលនាមនុស្សធម៌របស់កាកបាទក្រហម-អឌ្ឍចន្ទក្រហម។
ទី៣. ជំរុញយុវជនឱ្យកាន់តែខ្លាំងថែមទៀត ក្នុងការកសាង និងអនុវត្តផែនការលើកម្ពស់សមត្ថភាពសហគមន៍ និងការងារសង្រ្គោះជនរងគ្រោះ ទាំងយុវជននៅក្នុងគ្រឹះស្ថានសិក្សា កន្លែងការងារ និងសហគមន៍។
ទី៤. ត្រូវបន្តផ្តោតការយកចិត្តទុកដាក់បន្ថែមទៀតដល់យុវជន ក្នុងសកម្មភាព មិត្តអប់រំមិត្ត ទាំងក្នុង និងក្រៅប្រពន្ធ័ ទាំងនៅក្នុងសហគមន៍ សាលារៀន កន្លែងការងារ ដែលកិច្ចការនេះជាវិធានការទប់ស្កាត់ និង លុបបំបាត់ចោលនូវសកម្មភាពអវិជ្ជមាននានា ដែលបង្កផលប៉ះពាល់ដល់សុខសុវត្តិភាព និងសណ្តាប់ធ្នាប់នៅក្នុងសង្គម និងជាពិសេស ជួយសហគមន៍ ក្នុងការឆ្លើយតបបានយ៉ាងប្រសើរទៅនឹងគ្រោះមហន្តរាយ លើកកម្ពស់ការអប់រំ ថែទាំសុខភាព និងការកសាងវប្បធម៌អហិង្សា និង សន្តិភាព។
ក្នុងន័យដូចបានលើកឡើងមកនេះ ខ្ញុំសង្ឃឹមយ៉ាងមុតមាំថា យើងទាំងអស់គ្នានឹងបន្តអនុវត្តសកម្មភាពមនុស្សធម៌ដ៏ល្អប្រពៃនេះ ទៅតាមតួនាទី និងភារកិច្ចរបស់ខ្លួន និងប្រកាន់ជាប់ជានិច្ចនូវការប្តេជ្ញាចិត្តបំពេញបេសកកម្មរបស់ខ្លួន ដោយឈរលើស្មារតីយកចិត្តទុកដាក់បន្តពង្រឹង និងពង្រីកការទទួលខុសត្រូវខ្ពស់ អភិវឌ្ឍស្ថាបន័ និងធនធាន ឈានទៅការកសាងបាននូវសង្គមមួយ ដែលគោរពដល់គោលការណ៍គ្រឺះ និងតម្លៃមនុស្សធម៌ មានការរស់នៅប្រកបដោយសុខមាលភាព សេចក្តីថ្លៃថ្នូរ និង សេចក្តីសុខក្សេមក្សាន្ត ក្នុងនាមជាមនុស្សជាតិនៅលើភពផែនដី ។ ទន្ទឹមនេះ យើងក៏ត្រូវចូលរួមចំណែកធានាឱ្យបាននូវភាពគ្រប់គ្រាន់ និងស្ថិរភាពហិរញ្ញវត្ថុរបស់សាខាកាកបាទក្រហមកម្ពុជាខេត្ត ដើម្បីឱ្យស្ថាបន័មួយនេះបន្តបេសកកម្មក្នុងបុព្វហេតុសង្រ្គោះប្រជាជនរបស់យើង ឱ្យរួចផុតពីភាពងាយរងគ្រោះ ការឈឺចាប់ និង បង្កើនបាននូវទំនាក់ទំនងកាន់តែស្អិតរមួតជាមួយបណ្តាសហគមន៍ប្រជាជនងាយរងគ្រោះនៅទូទាំងខេត្ត។
ឯកឧត្តម លោកជំទាវ លោកឧកញ៉ា អស់លោក លោកស្រី! ជាថ្មីម្តងទៀត ខ្ញុំសូមថ្លែងអំណរគុណ និងសេចក្តីកោតសរសើរដោយស្មោះជូនចំពោះថ្នាក់ដឹកនាំ មន្រ្តី បុគ្គលិក អ្នកស្មគ្រ័ចិត្ត និងយុវជនសាខាកាកបាទក្រហមកម្ពុជាខេត្ត ព្រមទាំងមន្ទីរ អង្គភាពពាក់ពន្ធ័ទាំងអស់ ដែលជានិច្ចកាលតែងបានខិតខំប្រឹងប្រែងអស់ពីកម្លាំងកាយចិត្ត ក្នុងការបំពេញតួនាទី និងភារកិច្ចរបស់ខ្លួនឱ្យទទួលបាននូវជោគៃជ័យ និងសមិទ្ធផលដ៏ធំធេង ដែលឆ្លើយតបបានយ៉ាងស័កិ្តសម និងទាន់ពេលវេលាទៅនឹងតម្រូវការជាបន្ទាន់ នៃការងារជួយសង្រ្គោះជនរងគ្រោះ។
ឆ្លៀតក្នុងឳកាសនេះដែរ ខ្ញុំក៏សូមថ្លែងអំណរគុណយ៉ាងជ្រាលជ្រៅចំពោះ ឯកឧត្តម លោកជំទាវ លោកឧកញ៉ា អស់លោក លោកស្រី នាងកញ្ញា សប្បុរសជន អង្គការមិនមែន រដ្ឋាភិបាលជាតិ អន្តរជាតិ និងដៃគូសហប្រតិបត្តិការទាំងអស់ ដែលបានចូលរួមជួយគាំទ្រជាថវិកា សម្ភារៈ ស្មារតី និង បចេ្ចកទេស សម្រាប់ប្រតិបត្តិការមនុស្សធម៌របស់សាខាកាកបាទក្រហមកម្ពុជាខេត្តតាកែវ នៅគ្រប់កាលៈទេសៈ។
នៅទីបញ្ចប់នេះ ខ្ញុំសូមជូនពរ ឯកឧត្តម លោកជំទាវ លោកឧកញ៉ា លោក លោកស្រី នាងកញ្ញា ភ្ញៀវកិត្តយសជាតិ-អន្តរជាតិ សប្បុរសជន អ្នកស្មគ្រ័ចិត្ត យុវជនសាខាកាកបាទក្រហមកម្ពុជាខេត្តតាកែវ និង សមាជិក-សមាជិកា អង្គមីទិ្ទញទាំងមូល សូមប្រកបដោយព្រះពុទ្ធពរទាំង ៤ ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូមអរគុណ!
