សុន្ទរកថា
របស់
ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្ត្រីស្តីទី ទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងក្នុងពិធីសំណេះសំណាលជាមួយ កម្មករ-កម្មការិនី បុគ្គលិក កំពង់ផែស្វយ័តក្រុងព្រះសីហនុ នាឱកាសអបអរសាទរខួបលើកទី ១៣១ នៃទិវាពលកម្មអន្តរជាតិ ១ ឧសភា ២០១៧
- សូមក្រាបថ្វាយបង្គំ ព្រះវិមលសាគរ ហ្វាន់ ហឿន ព្រះមេគណខេត្តព្រះសីហនុ ព្រះថេរានុថេរៈ គ្រប់ព្រះអង្គជាទីសក្ការៈ
– ឯកឧត្តម លោកជំទាវ សមាជិក សមាជិកា នៃព្រឹទ្ធសភា រដ្ឋសភា និងរាជរដ្ឋាភិបាល
– ឯកឧត្តម លោកជំទាវ លោក លោកស្រី ភ្ញៀវជាតិ អន្តរជាតិ បងប្អូន កម្មករ កម្មការិនី និងបុគ្គលិក នៃកំពង់ផែស្វយ័តក្រុងព្រះសីហនុ ជាទីស្នេហា
- ថ្ងៃនេះ ក្នុងនាមរាជរដ្ឋាភិបាល និងក្នុងនាមខ្លួនខ្ញុំផ្ទាល់ ខ្ញុំព្រះករុណាខ្ញុំ សូមចូលរូមអបអរសាទរដោយក្តីសោមនស្សរីករាយជាអនេកប្បការ ជាមួយបងប្អូន កម្មករ និយោជិត និយោជក នៅទូទាំងប្រទេស ជាពិសេសជាមួយនឹងថ្នាក់ដឹកនាំ មន្រ្តីរាជការ បុគ្គលិក កម្មករ និងកម្មការិនីទាំងអស់ នៃកំពង់ផែស្វយ័តក្រុងព្រះសីហនុរបស់យើង ក្នុងឱកាសទិវាពលកម្មអន្តរជាតិ ១ ឧសភា ឆ្នាំ ២០១៧ នេះ។ ខ្ញុំព្រះករុណាខ្ញុំ សូមឧទ្ទិសទិវាដ៏មានអត្ថន័យនេះ អោយក្លាយទៅជាទិវានៃសាមគ្គីភាព ភាតរភាព សមភាព សម្រាប់ពលករកម្ពុជា ក៏ដូចជាសម្រាប់មហាគ្រួសារ នៃសង្គមជាតិកម្ពុជាទាំងមូល។ ជាមួយនេះ ខ្ញុំព្រះករុណាខ្ញុំសូមអំពាវនាវដល់គ្រប់ភាគីពាក់ព័ន្ធទាំងអស់សូមមេត្តា ខិតខំពង្រឹងនូវភាពសុខដុមរមនា រវាងគ្នា និងគ្នា អោយបានជាអតិបរមា ដើម្បីភាពសុខដុមរមនា នៃមហាគ្រួសារ សង្គមជាតិខ្មែរយើងទាំងមូល។
- ដូចដែលបងប្អូនកម្មករ និយោជិត ជ្រាបស្រាប់នៅទីកន្លែងនេះ បងប្អូនកម្មករ និងនិយោជិត នៃកំពង់ផែស្វយ័តក្រុងព្រះសីហនុរបស់យើង តែងតែបានរីករាយជួបជុំគ្នាអបអរសាទរ ទិវាពលកម្មអន្តរជាតិនេះ ជារៀងរាល់ឆ្នាំ។ ការប្រារព្ធពិធីអបអរទិវាពលកម្មអន្តរជាតិនៅថ្ងៃនេះ នៅទីនេះ គឺនៅតែមានអត្ថន័យយ៉ាងជ្រាលជ្រៅបំផុតសម្រាប់ រាជរដ្ឋាភិបាល និងពិសេសសម្រាប់រូបខ្ញុំព្រះករុណាខ្ញុំផ្ទាល់ ហើយក៏ជាឱកាសដ៏ល្អមួយដែលខ្ញុំព្រះករុណាខ្ញុំបានមក ចូលរួមជួបជុំសប្បាយរីករាយ និងចូលរួមលើកទឹកចិត្ត បងប្អូនជា កម្មករ កម្មការិនី បុគ្គលិក នៃកំពង់ផែស្វយ័តក្រុង ព្រះសីហនុ ដែលជាអង្គភាពសហគ្រាសសាធារណៈមួយ ក្នុងចំណោមអង្គភាពទំាងឡាយ ដែលមានស្នាដៃខ្ពស់គួរ អោយកោតសរសើរ ដោយបានអនុវត្តនូវតួនាទីភារកិច្ចរបស់ខ្លួនប្រកបដោយភាពជោគជ័យ។
- កំពង់ផែស្វយ័តក្រុង ព្រះសីហនុ គឺជាច្រកសេដ្ឋកិច្ចជាតិដែលមានចរិតជាអង្គភាពយុទ្ធសាស្រ្ត ក្នុងការ ទ្រទ្រង់សកម្មភាពពាណិជ្ជកម្ម អន្តរជាតិរបស់កម្ពុជាសម្រាប់ជំរុញកំណើនសេដ្ឋកិច្ចជាតិកន្លងមក និងនាពេលបច្ចុប្បន្ន ហើយនិងបន្តទៅអនាគត។ ក្នុងន័យនេះ ក្នុងនាមរាជរដ្ឋាភិបាល និងក្នុងនាមខ្ញុំព្រះករុណាខ្ញុំផ្ទាល់ សូមសំដែងនូវការកោតសរសើរចំពោះថ្នាក់ដឹកនាំ ក្រសួងសាធារណការនិងដឹកជញ្ជូន ជាពិសេសថ្នាក់ដឹកនាំ មន្ត្រី បុគ្គលិក កម្មករ កម្មការិនី កំពង់ផែស្វយ័តក្រុង ព្រះសីហនុទាំងអស់ ដែលបានខិតខំបំពេញការងារយ៉ាងសស្រាក់សស្រាំបំផុត ប្រឹងអស់កម្លាំងកាយចិត្តរហូតទទួល បាននូវលទ្ធផលអាជីវកម្មកើនឡើងជារៀងរាល់ឆ្នាំ។ បច្ចុប្បន្ននេះ ថ្វីត្បិតកំពង់ផែ ស្វយ័តក្រុងព្រះសីហនុមានទំហំតូច ធៀបនឹងកំពង់ផែផ្សេងៗក្នុងតំបន់ ប៉ុន្តែគុណភាព និងល្បឿនសេវាកម្មលើកដាក់ នៅកំពង់ផែស្វយ័តក្រុងព្រះសីហនុ បានលើកកំពស់ជាបន្តបន្ទាប់ដែលធ្វើអោយគុណភាពសេវាកម្មបច្ចុប្បន្ននេះ អនុវត្តបានដូចកំពង់ផែផ្សេងៗក្នុងតំបន់ ផងដែរ។ ទាំងនេះគឺជាចំណែកនៃការចូលរួមលើកកំពស់កំណើនសេដ្ឋកិច្ចជាតិយ៉ាងពិតប្រាកដ។
- ឯកឧត្តម លោកជំទាវ លោកឧកញ៉ា លោក លោកស្រី និងបងប្អូនកម្មករ កម្មការិនី និងនិយោជិតទាំងអស់ !
- ថ្ងៃទី ១ ឧសភា គឺជាទិវាប្រវត្តិសាស្ត្ររបស់ពិភពលោកទាំងមូលដែលត្រូវបានប្រារព្ធឡើង ដើម្បីរំលឹកឡើងវិញអំពីភាពជោគជ័យរបស់ពលករកាលពី ១៣១ ឆ្នាំ ដែលបានទាមទារឱ្យមានការទទួលស្គាល់តម្លៃនៃពលកម្ម និងគោរពតាមលក្ខខណ្ឌស្មើភាព ក្នុងការប្រកបការងារគ្រប់ប្រភេទដោយគ្មានការរើសអើង។ ចំពោះប្រទេសកម្ពុជាយើងវិញ ចាប់តាំងពីថ្ងៃ ៧ ខែមករា ឆ្នាំ១៩៧៩ ដែលជាថ្ងៃរំដោះប្រជាជនកម្ពុជាពីរបបប្រល័យពូជសាសន៍មក រាជរដ្ឋាភិបាលបានប្រារព្ធពិធីទិវាពលកម្មអន្តរជាតិ ជារៀងរាល់ថ្ងៃទី ១ ខែឧសភា ដែលជាថ្ងៃបុណ្យការងាររបស់ប្រជាពលករ និងជាថ្ងៃឈប់សម្រាករបស់មន្រ្តីរាជការ និងកម្មករ និយោជិតទាំងអស់ ដែលនេះជាការបញ្ជាក់យ៉ាងច្បាស់ អំពីការយកចិត្តទុកដាក់របស់រាជរដ្ឋាភិបាល ចំពោះកម្មករ និយោជិត និងអង្គការសហជីពទាំងអស់នៅកម្ពុជា។ ឆ្នាំនេះ យើងបានបន្តចូលរួមជាមួយគ្នា អបអរសាទរខួបលើកទី ១៣១ នៃទិវាពលកម្មអន្តរជាតិ ១ ឧសភា ទាំងអស់ គ្នាក្នុងបរិការណ៏មួយ ដែលព្រះរាជាណាចក្រកម្ពុជាយើងកំពុងបន្តក្រេបជញ្ជក់នូវសន្តិភាព ឯកភាពទឹកដី ស្ថិរភាព នយោបាយ លទ្ធិប្រជាធិបតេយ្យ សន្តិសុខ សណ្តាប់ធ្នាប់សង្គម និង ស្ថិរភាពម៉ាក្រូសេដ្ឋកិច្ច ជាមួយការរក្សាបានទាំងស្រុងនូវអធិបតេយ្យភាព បូរណភាពទឹកដី និងការអភិវឌ្ឍឥតឈប់ឈររបស់ជាតិមាតុភូមិ និងសុភមង្គលនៃ ប្រជាជនកម្ពុជាគ្រប់រូប។
- ជាការពិត រាជរដ្ឋាភិបាលកម្ពុជាបានរក្សាស្ថិរភាពម៉ាក្រូសេដ្ឋកិច្ច និង សម្រេចកំណើនសេដ្ឋកិច្ចខ្ពស់ប្រកបដោយភាពធន់។ ជាពិសេស ក្នុងរយៈពេល ២០ ឆ្នាំចុងក្រោយនេះ ផលិតផលក្នុងស្រុកសរុប (ផផស) កម្ពុជា មានកំណើនជាមធ្យមប្រមាណ ៧% ក្នុងមួយឆ្នាំ ជាមួយនឹងការរក្សាបាននូវស្ថិរភាពអាត្រាប្ដូរប្រាក់ជាមធ្យមប្រមាណ ៤០០០ រៀល ក្នុង ១ដុល្លារ និង អតិផរណាជាមធ្យម គឺមានកម្រិតទាបក្នុងរង្វង់ ៥% ហើយជាងនេះទៅទៀត ទោះបីជាមានវិបត្តិហិរញ្ញវត្ថុ និងសេដ្ឋកិច្ចសកលឆ្នាំ ២០០៨-២០០៩ យ៉ាងណាក្តី ក៏កម្ពុជានៅតែឤចជម្នះបាននូវ បញ្ហាប្រឈម និងសម្រេចបានកំណើនសេដ្ឋកិច្ចគួរឱ្យកត់សម្គាល់បើប្រៀបធៀបជាមួយប្រទេសដទៃក្នុងតំបន់ និង ពិភពលោក ។
- ជាមួយនឹងកំណើនសេដ្ឋកិច្ចខ្ពស់ រាជរដ្ឋាភិបាលក៏បានអនុវត្តនូវគោលនយោបាយបែងចែកផ្លែផ្កា និង ផលនៃកំណើនសេដ្ឋកិច្ច ឱ្យដល់ប្រជាជនគ្រប់ស្រទាប់វណ្ណៈ តាមរយៈការយកចិត្តទុកដាក់លើការអភិវឌ្ឍវិស័យ ហេដ្ឋារចនាសម្ព័ន្ធ ថាមពលអគ្គិសនី ផ្លូវថ្នល់ ប្រព័ន្ធធារាសាស្ត្រ ទឹកស្អាត សាលារៀន មន្ទីរពេទ្យ ៘ ជាលទ្ធផល សូចនាករសំខាន់ៗជាច្រើនបានបង្ហាញលទ្ធផលល្អប្រសើរជាងមុន ជាពិសេស អត្រាភាពក្រីក្រនៅកម្ពុជាបានធ្លាក់ ចុះពី ៥៣% នៅឆ្នាំ ២០០៤ មកត្រឹមតែប្រមាណ ១៣,៥% នៅឆ្នាំ២០១៤ ។ សូចនាករវិស័យអប់រំក៏បានឆ្លុះ បញ្ចាំងនូវលទ្ធផលល្អប្រសើរខ្លាំង ប្រៀបធៀបពីឆ្នាំ ២០០៤ ដល់ឆ្នាំ ២០១៦ អត្រាអក្ខរកម្មនៃយុវជន-យុវនារី ឤយុពី ១៥ ឆ្នាំឡើង មានកម្រិតខ្ពស់ជាងមុន ចំនួនសិស្សចុះឈ្មោះ និងចូលរៀននៅបឋមសិក្សាកើនឡើង ព្រមទាំង អត្រាចុះឈ្មោះចូលរៀននៅអនុវិទ្យាល័យ ក៏បានកើនឡើងផងដែរ ខណៈពេលវិស័យសុខាភិបាលក៏បានបង្ហាញនូវ លទ្ធផលល្អប្រសើរគួរឱ្យកត់សម្គាល់ ពីឆ្នាំ ២០០៥ ដល់ ២០១៦ រួមមានការធ្លាក់ចុះនៃអត្រាមរណភាពរបស់មាតា ទារក និង កុមារ ជាដើម ។
- ជាមួយគ្នានេះដែរ រាជរដ្ឋាភិបាលក៏តែងតែបានយកចិត្តទុកដាក់ និង ប្តេជ្ញាចិត្តខ្ពស់ ក្នុងការលើកកម្ពស់សិទ្ធិស្របច្បាប់របស់ពលករគ្រប់ៗរូប ជាក់ស្តែង សិទ្ធិកម្មករ និងសេរីភាពសហជីពត្រូវបានអនុវត្តយ៉ាងម៉ឹងម៉ាត់ ។ រាជរដ្ឋាភិបាលបាននឹងកំពុង ពង្រឹងការអនុវត្តច្បាប់ស្តីពីការងារ និងអនុសញ្ញាអន្តរជាតិ ខាងការងារយ៉ាងខ្ជាប់ខ្ជួនព្រមទាំងបានបង្កើតនូវយន្តការជាច្រើនដើម្បីលើកកម្ពស់ទំនាក់ទំនងវិជ្ជាជីវៈ អោយមានភាពកាន់តែប្រសើរឡើង ។ ជាពិសេសរាជរដ្ឋាភិបាលតែងតែបានយកចិត្តទុកដាក់លើជីវភាពរស់នៅរបស់បងប្អូនពលករយើង ដូចជាបានដំឡើងប្រាក់ឈ្នួលអប្បបរិមា ជាបន្តបន្ទាប់នាពេលកន្លងមក ព្រមទាំងបានផ្តល់នូវសំណាញ់សុវត្ថិភាពសង្គមជូនដល់កម្មករ កម្មការិនី និង យុវជន យុវនារី ដែលបានបាត់បង់ និងគ្មានការងារធ្វើ តាមរយៈមូលនិធិពិសេសជាដើម ។
- ឯកឧត្តម លោកជំទាវ លោកឧកញ៉ា លោក លោកស្រី បងប្អូនកម្មករ កម្មការិនី និងនិយោជិតទាំងអស់ !
- កំពង់ផែស្វយ័តក្រុងព្រះសីហនុ បានចូលរួមយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា។ តាមរបាយការណ៏បានឱ្យដឹងថាទំនិញឆ្លងកាត់ផែនេះបានកើនឡើងជាប្រចាំ ក្នុងឆ្នាំ ២០១៤ មានកំណើន ១៦%, ឆ្នាំ២០១៥ មាន កំណើនជាង ១៧%, និង ឆ្នាំ២០១៦ មានកំណើនជាង ៣% ។ តាមនិទស្សន៍បរិមាណកុងតេន័រឆ្លងកាត់កំពង់ផែស្វយ័ត ក្រុងព្រះសីហនុនៅឆ្នាំ ២០២៣ នឹងកើនលើស ៧០០,០០០TEUs ។
- ម្យ៉ាងវិញទៀត ពិនិត្យតាមដំណើរវិវត្តនៃស្ថានការណ៍ យើងឤចវាយតម្លៃបានថា ក្នុងពេលដ៏ខ្លីខាងមុខកំពង់ផែនេះនឹងដើរតួនាទីកាន់តែមានសារៈសំខាន់ទ្វេឡើង សម្រាប់បម្រើឱ្យចរន្តសេដ្ឋកិច្ច និង ពង្រឹងឧត្តមភាពនៃការប្រកួតប្រជែងរបស់កម្ពុជាផងដែរ នៅពេលឤស៊ានអនុវត្តកម្មវិធីតំបន់ពាណិជ្ជកម្មសេរីឤស៊ាន ដែលនឹងធ្វើឱ្យចលនានៃចរាចរទំនិញនាំចេញ-នាំចូល កាន់តែមានសកម្មភាពមមាញឹក ។ លើសពីនេះទៅទៀត រាជរដ្ឋាភិបាលកំពុង អនុវត្តនូវគោលនយោបោយអភិវឌ្ឍវិស័យឧស្សាហកម្ម សំដៅជំរុញឧស្សាហកម្មកម្ពុជាឡើងមួយកម្រិតទៀត ក្នុង ខ្សែចង្វាក់តម្លៃនៃសេដ្ឋកិច្ចតំបន់ និង ពិភពលោក ពិសេសក្នុងទីផ្សារឤស៊ី ដែលកំពុងមានកំណើនខ្ពស់ ដើម្បីរួម ចំណែកជំរុញកំណើនសេដ្ឋកិច្ច ក៏ដូចជាបង្កើតការងារ និង បង្កើនចំណូលជូនប្រជាជន ដែលកត្តានេះនឹងធ្វើឱ្យ សន្ទុះនៃកំណើនការនាំចេញ និងកំណើនសកម្មភាពឆ្លងកាត់ផែ ពិតជានឹងមានតម្រូវការច្រើនលើសេវាកម្មរបស់ កំពង់ផែ។ ក្នុងនាមខ្ញុំព្រះករុណាខ្ញុំផ្ទាល់ និងក្នុងនាមរាជរដ្ឋាភិបាលកម្ពុជា ខ្ញុំព្រះករុណាខ្ញុំ សូមបន្តការឯកភាព និង ការគាំទ្រយ៉ាងពេញទំហឹងចំពោះគម្រោងសាងសង់ ចំណតផែកុងតេន័រថ្មី ប្រវែង ៣៥០ម៉ែត្រ និងជម្រៅទឹក ១៤.៥ម៉ែត្រ និងការបំពាក់គ្រឿងចក្រធុនធ្ងន់បន្ថែម ។ នៅពេលគម្រោងនេះសាងសង់រួចរាល់ នៅចុងឆ្នាំ ២០២២ ឬចុងឆ្នាំ ២០២៣ នឹងអនុញ្ញាតអោយនាវាខ្នាតធំប្រមាណ ៩៣% ក្នុងតំបន់ចូលចតនៅកំពង់ផែស្វយ័តក្រុងព្រះសីហនុបាន ធ្វើអោយ ឧបសគ្គជម្រៅទឹកសម្រាប់កំពង់ផែត្រូវបានដោះស្រាយ ព្រមទាំងតម្លៃដឹកជញ្ជូនតាមសមុទ្រ (Ocean Freight Fee) នឹងមានតម្លៃប្រហាក់ប្រហែលជាមួយប្រទេសផ្សេងៗក្នុងតំបន់ ព្រមទាំងផ្តល់លទ្ធភាពសម្រាប់ការនាំទំនិញ ចេញ-ចូល ដោយផ្ទាល់ពីកម្ពុជា ទៅកាន់សហគមន៍អឺរ៉ុប។
- ក្នុងស្មារតីនេះ ក្នុងនីតិកាលទី ៥ នេះ រាជរដ្ឋាភិបាលបានបន្តការវិនិយោគលើវិស័យហេដ្ឋារចនាសម្ព័ន្ធគមនាគមន៍ និង ការកែលម្អថែមទៀតនូវកិច្ចសម្រួលពាណិជ្ជកម្ម ដើម្បីកសាងប្រព័ន្ធទ្បូជិស្ទីកដ៏រស់រវើក តាមរយៈការសាងសង់បណ្តាញដឹកជញ្ជូនពហុសណ្ឋាន ក្នុងគោលដៅធានាឱ្យបាននូវការតភ្ជាប់ផ្ទៃក្នុងប្រទេស និង ការតភ្ជាប់ជាមួយប្រទេសក្នុងតំបន់ និង ពិភពលោក ដើម្បីលើកកម្ពស់ការវិនិយោគ និង ពាណិជ្ជកម្ម ពិសេសការយកចិត្តទុកដាក់នឹងត្រូវផ្តោតទៅលើការបញ្ចប់ទាំងស្រុងនូវការស្តារ និង ការអភិវឌ្ឍផ្លូវដែក ការបន្តអភិវឌ្ឍហេដ្ឋារចនាសម្ព័ន្ធឤកាសយានដ្ឋាន និង កំពង់ផែ ការសិក្សាអំពីសក្តានុពល និងការវិនិយោគលើការដឹកជញ្ជូនតាមផ្លូវទឹក ព្រមទាំង ការកែសម្រួលសេវាពាក់ព័ន្ធនឹងការដឹកជញ្ជូនមួយចំនួនដែលនឹងនាំមកនូវៈ (១)ការកាត់បន្ថយថ្លៃដឹកជញ្ជូន (២)ការ បង្កើនភាពឤចទុកចិត្តបាន និងភាពស័ក្តិសិទ្ធិ (៣)ការពង្រឹងភាពប្រកួតប្រជែង និង (៤)ការបង្កើនការវិនិយោគ និង ពាណិជ្ជកម្ម។ ជាមួយគ្នានេះ រាជរដ្ឋាភិបាលក៏បន្តជំរុញការចូលរួមរបស់វិស័យឯកជនក្នុងការអភិវឌ្ឍវិស័យ ហេដ្ឋារចនាសម្ព័ន្ធគមនាគមន៍ តាមរយៈការពង្រឹង និងការកែលម្អយន្តការភាពជាដៃគូ រវាងវិស័យសាធារណៈ និង វិស័យឯកជន ដើម្បីបង្កើនភាពទាក់ទាញ និងសម្រួលដល់ការអនុវត្តគម្រោងហេដ្ឋារចនាសម្ព័ន្ធដែលហិរញ្ញប្បទាន ដោយវិស័យឯកជន ។
- ឯកឧត្តម លោកជំទាវ លោកឧកញ៉ា លោក លោកស្រី បងប្អូនកម្មករ កម្មការិនី និងនិយោជិតទាំងអស់ !
- នៅក្នុងស្មារតីមោទនភាពដ៏ខ្ពង់ខ្ពស់ ចំពោះសមិទ្ធផលទាំងឡាយ ដែលយើងរួមគ្នាសម្រេចបានកន្លងមក និងនៅក្នុងស្មារតីសុទិដ្ឋិនិយមដ៏ជ្រាលជ្រៅចំពោះអនាគតដ៏ភ្លឺស្វាងរបស់កម្ពុជា ខ្ញុំព្រះករុណាខ្ញុំ សូមផ្តាំផ្ញើអោយថ្នាក់ដឹកនាំ មន្រ្តី កម្មករ បុគ្គលិកកំពង់ផែទាំងអស់អោយបន្តខិតខំបំពេញការងារកាន់តែខ្លាំងក្លាឡើងថែមទៀត ដើម្បី បង្ហាញនូវសុឆន្ទ: សមត្ថភាព និងប្រសិទ្ធភាពការងាររបស់យើងចំពោះមជ្ឈដ្ឋានជាតិ និងអន្តរជាតិ ក្នុងនាមជាកំពង់ផែ បម្រើអោយវិស័យពាណិជ្ជកម្មអន្តរជាតិយ៉ាងពិតប្រាកដ។ ខ្ញុំព្រះករុណាខ្ញុំ ក៏សូមណែនាំចំពោះគ្រប់សមត្ថកិច្ច្ ស្ថាប័ន និង អង្គភាពដែលមានការពាក់ព័ន្ធទាំងអស់នៅទីនេះ សូមបន្តបង្កើនកិច្ចសហការ និងសម្របសម្រួលជាមួយគ្នាអោយ បានជិតស្និទ្ធ មានតម្លាភាព និង ប្រសិទ្ធភាពខ្ពស់ ដើម្បីកែលំអប្រព័ន្ធគ្រប់គ្រងសេវាកម្មគ្រប់ផ្នែកនៅក្នុងកំពង់ផែនេះ អោយបានកាន់តែល្អប្រសើរឡើង ដែលទាំងអស់នេះ គឺជាប្រការដ៏សំខាន់បំផុតសម្រាប់លើកកំពស់ការជឿទុកចិត្ត ពីសំណាក់អតិថិជន វិនិយោគិនជាតិ អន្តរជាតិ និងអ្នកផ្តល់ជំនួយទាំងឡាយមកលើការប្តេជ្ញារបស់យើងក្នុងការ កសាង និង អភិវឌ្ឍប្រទេសជាតិ ។
- ខ្ញុំព្រះករុណាខ្ញុំ ក៏សូមថ្លែងនូវការកោតសរសើរ និងបន្តជួយជំរុញលើកទឹកចិត្តចំពោះ ថ្នាក់ដឹកនាំ មន្រ្តីរាជការនៃក្រសួងសាធារណការ និងដឹកជញ្ជូន ក្រុមប្រឹក្សាភិបាលកំពង់ផែ និងមន្រ្តីបុគ្គលិក កម្មករ កំពង់ផែ ក្រុងព្រះសីហនុផ្ទាល់ អាជ្ញាធរដែនដី ព្រមទាំងស្ថាប័នពាក់ព័ន្ធនានា ដែលបានខិតខំប្រឹងប្រែងអស់ពីកម្លាំងកាយចិត្តចូលរួមសហការបង្កលក្ខណៈ ដើម្បីធានាសម្រេចបានជោគជ័យនូវ យុទ្ធសាស្រ្តចតុកោណដំណាក់កាលទី ៣ និងយុទ្ធសាស្រ្តផ្សេងទៀត ដែលរាជរដ្ឋាភិបាលបានដាក់ចេញកន្លងមក ។
- ឯកឧត្តម លោកជំទាវ លោកឧកញ៉ា លោក លោកស្រី បងប្អូនកម្មករ កម្មការិនី និងនិយោជិតទាំងអស់ !
- ជាទីបញ្ចប់ ខ្ញុំព្រះករុណាខ្ញុំ សូមប្រគេនពរជ័យ ព្រះថេរានុថេរៈគ្រប់ព្រះអង្គ និងសូមប្រសិទ្ធពរជូន ឯកឧត្តម លោកជំទាវ លោកឧកញ៉ា លោក លោកស្រី ភ្ញៀវជាតិ អន្តរជាតិទាំងអស់ ដែលមានវត្តមានក្នុងពិធីនេះ សូមជួបប្រទះតែនឹងជោគជ័យ សេចក្តីចម្រុងចម្រើន សិរីមង្គល និងវិបុលសុខគ្រប់ ប្រការកុំបីឃ្លៀងឃ្លាតឡើយ។ ជាមួយនេះ ខ្ញុំសូមឆ្លៀតឱកាសដ៏ថ្លៃថ្លានេះ ប្រសិទ្ធពរជូន បងប្អូនកម្មករ កម្មការិនី និយោជិតខ្មែរ ដែលកំពុងធ្វើការក្នុង និងក្រៅប្រទេស ជាពិសេសបងប្អូនមន្ត្រី បុគ្គលិក និងកម្មករ កម្មការិនី នៃកំពង់ផែស្វយ័តក្រុង ព្រះសីហនុទាំងអស់ សូមទទួលបានជោគជ័យ និងវិបុលសុខគ្រប់ប្រការ ។
សូមអរព្រះគុណ និងអរគុណ !
