ពិធី​សំណេះ​សំណាល​ជាមួយ​​កម្មករ ​កម្មការិនី​ បុគ្គលិក​​​​កំពុង​ផែ​ស្វយ័ត ​ក្រុង​ព្រះសីហនុ នាឱកាស​ទិ​វា​ពលកម្ម​​អន្តរ​ជាតិ​​លើក​ទី​​១៣១

នៅព្រឹកថ្ងៃទី ០១ ខែឧសភា ឆ្នាំ ២០១៧ ឯកឧត្តម ប៊ិន ឈិន ឧបនាយករដ្ឋមន្រ្តី​ប្រចាំការ និងជា​រដ្ឋមន្រ្តីស្តីទី ទទួលបន្ទុក​ទីស្តីការគណៈ រដ្ឋមន្រ្តី​ តំណាង​ដ៏ខ្ពង់ខ្ពស់​ សម្តេច​អគ្គ​មហាសេនាបតី​តេជោ​ ហ៊ុន សែន នាយករដ្ឋមន្រ្តី​ នៃ​ព្រះ​រាជាណាចក្រ​កម្ពុជា បានអញ្ជើញ​ ជាអធិបតីក្នុង​ពិធីសំណេះសំណាល​ជាមួយ​កម្មករ កម្មារិនី បុគ្គលិក​កំពង់ផែ​ស្វយ័ត​ក្រុង​ព្រះសីហនុ នា​ឱកាស​ទិវាពលកម្ម​អន្តរជាតិ លើកទី១៣១។

ថ្លែងក្នុងឱកាសនេះ ឯកឧត្តម​ ស៊ុន ចាន់​ថុល ទេសរដ្ឋមន្រ្តី​ រដ្ឋមន្រ្តី​ក្រសួង​សាធារណៈ​ការ​ និង​ដឹកជញ្ជូន​បានមាន​ប្រសាសន៍ថា ក្រោយពី​ប្រទេស​ជាតិ​ទទួលបាន​សុខ​សន្តិភាព​ពេញ​លេញ​ ក្រោម​ការដឹកនាំ​ដ៍ឈ្លស​វៃ​  របស់​ សម្តេច​តេជា​ នាយករដ្ឋមន្រ្តី បានធ្វើឱ្យកំពង់​ផែ​ស្វយ័តក្រុងព្រះសីហនុ មានលទ្ធភាព​អភិវឌ្ឍ​ និង​ពង្ក្រីក​សមត្ថភាព​របស់ខ្លួន​ជា​បន្តបន្ទាប់​ នា​ឆ្នាំ​២០០២ ដល់​ ឆ្នាំ ២០០៥ បានសាង​សង់​ផែ​កុងតេន័រ​ ប្រវែង​ ២៤០ ម៉ែត្រ​ ជម្រៅ​ទឹក​ ១១. ៥ ម៉ែត្រ ចំណាយ​ថវិកាអស់ចំនួន ៣៣.​៧លាន​ដុល្លារ​អាមេរិក​។ នៅឆ្នាំ ២០០៥ ដល់​ឆ្នាំ ២០០៩ បាន​សាង​សង់​ផែ​កុងតេន័រ​បន្ថែម​ប្រវែង​១៦០ ម៉ែត្រ​ (បង្រ្គប់ ៤០០ម៉ែត្រ) ជម្រៅទឹក ១១.៥ម៉ែត្រ និង​បំពាក់​មធ្យោបាយ​លើក​-ដាក់​កុងតេន័រ ចំណាយ​ថវិកា​អស់​ចំនួន​៣៤.​៨​លាន​ដុល្លារ​។ ឆ្នាំ ២០០៩ ដល់​ឆ្នាំ ២០១២ បានសាងសង់​តំបន់​សេដ្ឋកិច្ច​ពិសេស​ចំណាយ​ថវិកាអស់ ចំនួន​៣៥.៩លាន​ដុល្លារ​អាមេរិក ។​ ឆ្នាំ ២០១៥ ដល់ ឆ្នាំ ២០១៨ កំពុង​សាងសង់ផែ​ពហុ​បំណង​ប្រវែង​៣៣០​ម៉ែត្រ​ ជម្រៅទឹក​១៣.៥​ម៉ែត្រ និង​ចំណត​មូល​ដ្ឋាន​ផ្គត់​ផ្គង់​ភស្តុភា​រ​ សម្រាប់​ការរុក​រក​ប្រេង​ ដែល​មាន​បណ្តោយ​ ២០០ ម៉ែត្រ ជម្រៅ​ទឹក​៧.៥ម៉ែត្រ ដោយ​គ្រោង​ចំណាយ​ថវិកា​ចំនួន​៧៤.២​លាន​ដុល្លារ​អាមេរិក។ នៅ​ចុង​ឆ្នាំ ២០១៦​ និង​ខែ​មករា ឆ្នាំ ២០១៧ បាន​បំពាក់​មធ្យោបាយ​លើក​ដាក់​កុងតេន័រ​ទំនើប ចំនួ​​ន​០២​ សម្រាប់​ប្រភេទ QC (០២ គ្រឿង) និង​RTG (០៩​គ្រឿង) សម្រាប់​ការ​បង្កើន​សមត្ថភាព​ និង​គុណ​ភាព​សេវាកម្ម លើក-ដាក់​កុងតេន័រ ដោយប្រើប្រាស់​ថវិកា​កំពង់​ផែ ចំនួន ២២​លាន​ដុល្លារ​អាមេរិក។ សរុប​មក​ដល់​បច្ចុប្បន្ន​នេះ​ កំពង់​ផែ​ស្វយ័តក្រុង​ព្រះសីហនុ​ ទទួលបាន​ប្រាក់​កម្ចី​ពី​រាជ​រដ្ឋាភិបាល​ជប៉ុន​ តាម​រយៈ​ភ្នាក់​ងារ​ JICA  របស់ជប៉ុន ប្រមាណ​១៧៨.៦​លានដុល្លារ​អាមេរិក​ និង​វិនិយោគ​ថវិកា​កំពង់​ផែ​ផ្ទាល់​ចំនួន​២២​លាន​ដុល្លា​រអាមេរិក​។

ឯកឧត្តម​បាន​មាន​ប្រសាស​ន៍​បន្ថែមទៀតថា ផ្អែកលើ​អត្រា​កំណើន​សេដ្ឋ​កិច្ច​ របស់​ប្រទេស​កម្ពុជា​ ប្រកប​ដោយ​ស្ថេរភាព​ និង​រឹង​មាំ​ក្នុងរង្វង់​ជា​មធ្យម​ ៧% ប្រចាំ​ឆ្នាំ​ បាន​ធ្វើ​ឱ្យ​បរិមាណ​កុង​តេន័រ​ឆ្លង​កាត់​កំពង់​ផែ​កើន​ឡើង​ ជា​រៀង​រាល់​ឆ្នាំ​ ជាក់​ស្តែង​ ឆ្នាំ​២០១៤​ មាន​កំណើន១៦% ឆ្នាំ​២០១៥ មាន​កំណើន​ជាង១៧% និង​ឆ្នាំ​២០១៦ មាន​កំណើន​ជាង​៣% ។​រួម​ជាមួយ​គោល​នយោបាយ​អភិវឌ្ឍន៍ឧស្សាហកម្ម​ ឆ្នាំ ២០១៥-២០២៥ តាមនិទស្សន៍បរិមាណ​កុង​តេន័រ​ឆ្លង​កាត់​កំពង់​ផែ​ស្វយ័ត​ក្រុង​ព្រះសីហនុ នៅ​ឆ្នាំ​២០២៣ ខាងមុខ​ នឹង​កើន​លើស​ ៧០០,០០០ TEUs (TEUs=Twenty Equivalent Units) ដែល​លើស​ពីសមត្ថភាព​កំពង់​ផែនា​ពេល​បច្ចុប្បន្ន​។​ ដូច្នេះ​ដើម្បី​ឆ្លើយ​តប​នឹង​កំណើន​នេះ​នៅ​ឆ្នាំ​២០២២ កំពង់​ផែ​ស្វយ័ត​ក្រុង​ព្រះ​សីហនុ  ត្រៀម​សាង​សង់​ចំណត​ផែកុងតេន័រ​ប្រវែង​ ៣៥០ ម៉ែត្រ ជម្រៅទឹក​១៤.​៥ម៉ែត្រ និង​បំពាក់​ដោយ​មធ្យោបាយ​គ្រឿងចក្រ​ទំនើបៗ​ដែល​គ្រោង​ចំណាយថវិការ​ប្រមាណ​ ២០០​លាន​ដុល្លារអាមេរិក។​

មានប្រសាសន៍ទៅកាន់​ កម្មករ​ កម្មការិនី និងនិយោជិត​កំពុងផែ​ស្វយ័ត​ក្រុង​ព្រះសីហនុ ឯកឧត្តម ប៊ិន ឈិន បានឱ្យដឹងថា កំពង់ផែស្វយ័តក្រុង ព្រះសីហនុ គឺជាច្រកសេដ្ឋកិច្ចជាតិដែលមានចរិតជា​អង្គភាព​យុទ្ធសាស្រ្ត​ ក្នុងការ ទ្រទ្រង់សកម្មភាពពាណិជ្ជកម្ម អន្តរជាតិ​របស់​កម្ពុជាសម្រាប់ជំរុញកំណើនសេដ្ឋកិច្ចជាតិកន្លងមក និងនាពេលបច្ចុប្បន្ន ហើយនិងបន្តទៅអនាគត។ ក្នុងន័យនេះ ក្នុងនាមរាជរដ្ឋាភិបាល និងក្នុងនាមខ្ញុំព្រះករុណាខ្ញុំផ្ទាល់ សូមសំដែងនូវការ​កោត​សរសើរចំពោះថ្នាក់ដឹកនាំ ក្រសួងសាធារណការនិងដឹកជញ្ជូន ជាពិសេស​ថ្នាក់ដឹកនាំ មន្ត្រី បុគ្គលិក កម្មករ កម្មការិនី កំពង់ផែស្វយ័តក្រុង ព្រះសីហនុ​ទាំងអស់ ដែលបានខិតខំបំពេញ​ការងារយ៉ាងសស្រាក់សស្រាំបំផុត ប្រឹងអស់កម្លាំងកាយចិត្តរហូតទទួល បាននូវលទ្ធផល​អាជីវកម្មកើនឡើងជារៀងរាល់ឆ្នាំ។ បច្ចុប្បន្ននេះ ថ្វីត្បិតកំពង់ផែ ស្វយ័តក្រុងព្រះសីហនុមានទំហំតូច ធៀបនឹងកំពង់ផែផ្សេងៗក្នុងតំបន់ ប៉ុន្តែគុណភាព និងល្បឿនសេវាកម្មលើកដាក់ នៅកំពង់ផែស្វយ័តក្រុងព្រះសីហនុ បានលើកកំពស់ជាបន្តបន្ទាប់ដែលធ្វើអោយគុណភាពសេវាកម្មបច្ចុប្បន្ននេះ អនុវត្តបានដូចកំពង់ផែផ្សេងៗក្នុងតំបន់ ផងដែរ។ ទាំងនេះគឺជាចំណែកនៃការចូលរួមលើកកំពស់កំណើន​សេដ្ឋកិច្ច​ជាតិយ៉ាងពិតប្រាកដ។

ឯកឧត្តម​បានមានប្រសាសន៍បន្ថែមថា ថ្ងៃទី ១ ឧសភា គឺជាទិវាប្រវត្តិសាស្ត្ររបស់ពិភពលោកទាំងមូលដែលត្រូវបានប្រារព្ធឡើង ដើម្បីរំលឹក​ឡើងវិញ​​អំពីភាពជោគជ័យរបស់ពលករកាលពី ១៣១ ឆ្នាំ ដែលបានទាមទារឱ្យមានការទទួលស្គាល់តម្លៃនៃពលកម្ម និងគោរពតាមលក្ខខណ្ឌស្មើភាព ក្នុងការប្រកបការងារគ្រប់ប្រភេទដោយគ្មានការរើសអើង។ ចំពោះប្រទេសកម្ពុជា​យើងវិញ ចាប់តាំងពីថ្ងៃ ៧ ខែមករា ឆ្នាំ១៩៧៩ ដែលជាថ្ងៃរំដោះប្រជាជនកម្ពុជាពីរបបប្រល័យពូជសាសន៍មក រាជរដ្ឋាភិបាលបានប្រារព្ធពិធីទិវាពលកម្មអន្តរជាតិ ជារៀងរាល់ថ្ងៃទី ១ ខែឧសភា ដែលជាថ្ងៃបុណ្យការងារ​របស់​ប្រជាពលករ និងជាថ្ងៃឈប់សម្រាករបស់មន្រ្តីរាជការ និងកម្មករ និយោជិតទាំងអស់ ដែលនេះ​ជាការបញ្ជាក់យ៉ាង​ច្បាស់ អំពីការយកចិត្តទុកដាក់របស់រាជរដ្ឋាភិបាល ចំពោះកម្មករ និយោជិត និងអង្គការសហជីព​ទាំងអស់​នៅកម្ពុជា។

ឯកឧត្តមក៍បានសង្កត់ធ្ងន់ផងដែរថា ក្នុងនីតិកាលទី ៥ នេះ រាជរដ្ឋាភិបាលបានបន្តការវិនិយោគ​លើវិស័យហេដ្ឋារចនាសម្ព័ន្ធ​គមនាគមន៍ និង ការកែលម្អថែមទៀតនូវកិច្ចសម្រួលពាណិជ្ជកម្ម ដើម្បីកសាងប្រព័ន្ធទ្បូជិស្ទីកដ៏រស់រវើក តាមរយៈ​ការសាងសង់​បណ្តាញ​ដឹកជញ្ជូនពហុសណ្ឋាន ក្នុងគោលដៅធានាឱ្យបាននូវការតភ្ជាប់ផ្ទៃក្នុងប្រទេស និង ការតភ្ជាប់​ជាមួយប្រទេសក្នុងតំបន់ និង ពិភពលោក ដើម្បីលើកកម្ពស់ការវិនិយោគ និង ពាណិជ្ជកម្ម ពិសេស​ការយក​ចិត្ត​ទុកដាក់​នឹងត្រូវផ្តោតទៅលើការបញ្ចប់ទាំងស្រុងនូវការស្តារ និង ការអភិវឌ្ឍផ្លូវដែក ការបន្តអភិវឌ្ឍ​ហេដ្ឋារចនាសម្ព័ន្ធ​ឤកាសយានដ្ឋាន និង កំពង់ផែ ការសិក្សាអំពីសក្តានុពល និងការវិនិយោគលើការដឹកជញ្ជូនតាមផ្លូវទឹក ព្រមទាំង ការកែសម្រួលសេវាពាក់ព័ន្ធនឹងការដឹកជញ្ជូនមួយចំនួនដែលនឹងនាំមកនូវៈ (១)ការកាត់បន្ថយថ្លៃដឹកជញ្ជូន (២)ការ បង្កើនភាពឤចទុកចិត្តបាន និងភាពស័ក្តិសិទ្ធិ (៣)ការពង្រឹងភាពប្រកួតប្រជែង និង (៤)ការបង្កើនការវិនិយោគ និង ពាណិជ្ជកម្ម។ ជាមួយគ្នានេះ រាជរដ្ឋាភិបាលក៏បន្តជំរុញការ​ចូលរួម​របស់​វិស័យឯកជនក្នុងការអភិវឌ្ឍវិស័យ ហេដ្ឋារចនាសម្ព័ន្ធគមនាគមន៍ តាមរយៈការពង្រឹង និងការកែលម្អយន្តការ​ភាពជាដៃគូ រវាងវិស័យសាធារណៈ និង វិស័យឯកជន ដើម្បីបង្កើនភាពទាក់ទាញ និងសម្រួលដល់ការអនុវត្ត​គម្រោង​ហេដ្ឋារចនាសម្ព័ន្ធដែលហិរញ្ញប្បទាន ដោយវិស័យឯកជន ។ សមិទ្ធផលទាំងឡាយ ដែលយើងរួមគ្នាសម្រេចបានកន្លងមក និងនៅក្នុងស្មារតីសុទិដ្ឋិនិយមដ៏ជ្រាលជ្រៅចំពោះអនាគតដ៏ភ្លឺស្វាងរបស់កម្ពុជា ខ្ញុំព្រះករុណាខ្ញុំ សូមផ្តាំផ្ញើអោយ​ថ្នាក់ដឹកនាំ មន្រ្តី កម្មករ បុគ្គលិកកំពង់ផែទាំងអស់អោយបន្តខិតខំបំពេញការងារកាន់តែខ្លាំងក្លា​ឡើងថែមទៀត ដើម្បី បង្ហាញនូវសុឆន្ទ: សមត្ថភាព និងប្រសិទ្ធភាពការងាររបស់យើងចំពោះមជ្ឈដ្ឋានជាតិ និងអន្តរជាតិ ក្នុងនាមជាកំពង់ផែ បម្រើអោយវិស័យពាណិជ្ជកម្មអន្តរជាតិយ៉ាងពិតប្រាកដ។ ខ្ញុំព្រះករុណាខ្ញុំ ក៏សូមណែនាំចំពោះគ្រប់សមត្ថកិច្ច្ ស្ថាប័ន និង អង្គភាពដែលមានការពាក់ព័ន្ធទាំងអស់នៅទីនេះ សូមបន្តបង្កើន​កិច្ចសហការ និងសម្របសម្រួលជាមួយគ្នាអោយ បានជិតស្និទ្ធ មានតម្លាភាព និង ប្រសិទ្ធភាពខ្ពស់ ដើម្បីកែលំអ​ប្រព័ន្ធ​គ្រប់គ្រង​សេវាកម្មគ្រប់ផ្នែកនៅក្នុងកំពង់ផែនេះ អោយបានកាន់តែល្អប្រសើរឡើង ដែលទាំងអស់នេះ គឺជាប្រការ​ដ៏សំខាន់បំផុតសម្រាប់លើកកំពស់ការជឿទុកចិត្ត ពីសំណាក់អតិថិជន វិនិយោគិនជាតិ អន្តរជាតិ និងអ្នកផ្តល់ជំនួយទាំងឡាយមកលើការប្តេជ្ញារបស់យើងក្នុងការ កសាង និង អភិវឌ្ឍប្រទេសជាតិ ។

ពត៌មានទាក់ទង

ពត៌មានផ្សេងៗ