នៅក្នុងជំនួបពិភាក្សាទ្វេភាគី រវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយឯកឧត្តម ស៊ុមកែវ ស៊ីឡាវង្ស រដ្ឋមន្ត្រីសន្តិសុខសាធារណៈ នៃសាធារណៈរដ្ឋប្រជាធិបតេយ្យប្រជាមានិតឡាវ នាព្រឹកថ្ងៃទី២៦ ខែមេសានេះ នៅវិមានសន្តិភាព ភាគីទាំងពីរបានបង្ហាញគោលបំណងដូចគ្នា គឺការពង្រឹងមិត្តភាព និងសាមគ្គីភាព រវាងប្រទេសទាំងពីរបន្ថែមទៀត ជាពិសេសការបន្តកិច្ចសហការនៅតាមព្រំដែន និងការចូលរួមទប់ស្កាត់ សកម្មភាពខុសច្បាប់នានា រួមទាំងការជួញដូរខុសច្បាប់មួយចំនួនទៀតរវាងប្រទេសទាំងពីរ។
តាមការបញ្ជាក់របស់ ឯកឧត្តមបណ្ឌិត កៅ គីមហួន រដ្ឋមន្ត្រីប្រតិភូអមនាយករដ្ឋមន្ត្រី នៅក្រោយជំនួបពិភាក្សាការងារនេះ។ នៅក្នុងជំនួបនេះដែរ ឯកឧត្តម ស៊ុមកែវ ស៊ីឡាវង្ស ក៏បានជម្រាបជូនសម្តេចតេជោដែរថា នៅឆ្នាំ២០១៨ខាងមុខ ប្រទេសឡាវ នឹងទទួលធ្វើជាម្ចាស់ផ្ទះ នៃកិច្ចប្រជុំទ្វេរភាគីនេះរវាងកម្ពុជានិងឡាវ។ ទន្ទឹមនេះប្រទេសកម្ពុជា និងប្រទេសឡាវ នឹងបន្តការផ្លាស់ប្តូរព័ត៌មាន រួមនិងការដោះស្រាយបញ្ហាផ្សេងៗ ដែលអនុវត្តន៍ទៅតាមគោលការណ៍ របស់ប្រទេសទាំងពីរ។
សម្តេចតេជោបានលើកឡើងថា សម្តេចចង់ឃើញការងារមួយចំនួន ដែលប្រទេសទាំងពីរបានឯកភាពគ្នារួចហើយនោះ ត្រូវបានអនុវត្តន៍ឲ្យបានពេញលេញ។ សម្តេចក៏បានថ្លែងបញ្ជាក់ថា បើទោះបីជាអាកាសធាតុមានការប្រែប្រួល យ៉ាងណាក៏ដោយ ប៉ុន្តែមិត្តភាពរវាងប្រទេសទាំងពីរកម្ពុជា និងឡាវ គឺមិនមានការប្រែប្រួលនោះទេ។ ជាមួយគ្នានេះ សម្តេចតេជោ ក៏បានវាយតម្លៃខ្ពស់ ចំពោះជំនួបរវាងសម្តេចក្រឡាហោម ស ខេង ជាមួយឯកឧត្តមរដ្ឋមន្ត្រីឡាវ នៅក្នុងដំណើរទស្សនិច្ចនៅកម្ពុជារបស់ ឯកឧត្តម នាពេលនេះផងដែរ។
គួរបញ្ជាក់ថា ព្រំដែនរួមគ្នារវាងប្រទេសកម្ពុជា និងប្រទេសឡាវ មានប្រវែង ៥៤០គីឡូម៉ែត្រ ដែលមកដល់ពេលនេះភាគីទាំងពីរបានសម្រេចបោះបង្គោលព្រំប្រទល់ បាន៨៧ភាគរយរួចមកហើយ ។ រីឯកិច្ចសហប្រតិបត្តិការរវាងប្រទេសទាំងពីរនៅតាមតំបន់ព្រំដែនក៏ត្រូវបានផ្សារភ្ជាប់ តាមរយៈការបើកច្រកទ្វារអន្តរជាតិ ត្រពាំងក្រៀល-ណងណុកខៀន នៃខេត្តស្ទឹងត្រែងនិងខេត្តចំប៉ាសាក់ ដែលត្រូវបានសម្ពោធបើកអោយប្រើប្រាស់កាលពី ថ្ងៃទី១០ខែមករា ឆ្នាំ២០១៧កន្លងមកផងដែរ។ ច្រកទ្វារអន្តរជាតិ ត្រពាំងក្រៀល-ណងណុកខៀន គឺជាច្រកទ្វារអន្តរជាតិទ្វាភាគីដំបូងរវាងប្រទេសកម្ពុជា និងប្រទេសឡាវ៕
