សម្តេចតេជោ ហ៊ុន សែន ញ្ជើញជួបពិភាក្សាការងារជាមួយ លោក ហ៊ីរ៉ូយូគី អ៊ីស្សីហ្គេ ប្រធាន និងជានាយកប្រតិបត្តិការអង្គការពាណិជ្ជកម្មក្រៅប្រទេសជប៉ុន (JETRO)

49

បន្ទាប់មក នៅព្រឹកថ្ងៃទី៨ ខែតុលា ដដែលនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឲ្យ លោក ហ៊ីរ៉ូយូគី អ៊ីស្សីហ្គេ ប្រធាន និងជានាយកប្រតិបត្តិការអង្គការពាណិជ្ជកម្មក្រៅប្រទេសជប៉ុន (JETRO) ចូលជួបសំដែងការគួរសម និងពិភាក្សាការងារ។ លោក ហ៊ីរ៉ូយូគី អ៊ីស្សីហ្គេ មានប្រសាសន៍ជំរាបជូនសម្តេចតេជោ នាយករដ្ឋមន្រ្តី ពីការរៀបចំសិក្ខាសាលាស្តីពីការទាក់ទាញអ្នកវិនិយោគជប៉ុន នៅក្នុងក្របខណ្ឌនៃ កិច្ចប្រជុំកំពូលមេគង្គ-ជប៉ុន លើកទី១០ នៅទីក្រុងតូក្យូប្រទេសជប៉ុន។ លោកប្រធានមានប្រសាសន៍បន្តថា ប្រសាសន៍របស់សម្តេចដែលថ្លែងសុន្ទរកថាគន្លឹះ ក្នុងសិក្ខាសាលានេះនឹងបន្តជំរុញ លើកទឹកចិត្តអ្នកវិនិយោគជប៉ុនមកកាន់កម្ពុជាកាន់តែច្រើនឡើងថែមទៀត។ លោកប្រធានបន្តថា នៅកម្ពុជាពិតជាមានបរិយាកាសវិនិយោគល្អ ដោយមិនមានការបែងចែករវាងសហគ្រាសបរទេស និងក្នុងស្រុក ឫក្រៅស្រុកនោះទេ។ លោកប្រធានបន្តថា អ្នកវិនិយោគជប៉ុនមានចរិកលក្ខណៈផ្សារភ្ជាប់ទៅនិង តំបន់ មានចក្ខុវិស័យវែងឆ្ងាយ និងបណ្តុះបណ្តាលធនធានមនុស្ស។

ជាការឆ្លើយតប សម្តេចតេជោ នាយករដ្ឋមន្រ្តីមានប្រសាសន៍វាយតម្លៃខ្ពស់ និងចាត់ទុកថា អង្គការចិត្រូ បានដើរតួនាទីយ៉ាងខ្លាំងក្នុងការគៀងគរវិនិយោគជប៉ុន មកកម្ពុជាក្នុងពេលកន្លងមក។ សម្តេចបន្តថា ជាមួយនិងការហោះហើរត្រង់របស់ក្រុមហ៊ុនអាកាសចរណ៍ជប៉ុន អាណា គឺពិតជាបានរួមចំណែក ជួយនាំយកនូវអ្នកវិនិយោគជប៉ុន និងអ្នកទេសចរណ៍ជប៉ុន មកកាន់កម្ពុជា។ សម្តេចតេជោបន្តថា រាជរដ្ឋាភិបាលកម្ពុជាបានខិតខំប្រឹងប្រែងយ៉ាងខ្លាំង ពិសេសបន្តពិនិត្យមើល ថែមទៀត លើគ្រប់លទ្ធភាពក្នុងការជួយសំរួលដោយអ្នកវិនិយោគិនជប៉ុន នៅកម្ពុជា ក្នុងនោះរួម ទាំងការបង្កើតឡើងនូវវេទិការពិសេសវាងក្រុមប្រឹក្សាអភិវឌ្ឍន៍កម្ពុជា ជាមួយ និងស្ថានឯកអគ្គរដ្ឋទូតជប៉ុន ដោយមិនចាំបាច់រងចាំវេទិការវាងរាជរដ្ឋាភិបាល និងវិស័យឯកជន។ សម្តេចតេជោ បន្តថា សម្តេចមានយុទ្ធសាស្រ្តគឺទាក់ទាញវិនិយោគមកកម្ពុជា គឺធ្វើយ៉ាងណាឲ្យអ្នកវិនិយោគទាំង អស់បន្ត និងពង្រីកសកម្មភាពរបស់ខ្លួននៅកម្ពុជា និងទាក់ទាញវិនិយោគជប៉ុន ថែមទៀតមកកម្ពុជា។ សម្តេចតេជោបន្តថា ពីមុនមានអ្នវិនិយោគជប៉ុនតែប្រមាណ២០ក្រុមហ៊ុនទេ តែមកដល់ពេលនេះ មានក្រុមហ៊ុនជប៉ុនប្រមាណជាង២០០ក្រុមហ៊ុន នៅកម្ពុជា៕