សុន្ទរកថាស្វាគមន៍ និងរបាយការណ៍ ឯកឧត្តម ថោង ខុន ថ្លែងក្នុងពិធីសន្និបាតបូកសរុបការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ អមជាមួយពិធីអបអរសាទរទិវាជាតិទីក្រុងស្អាតលើកទី៦

805

សុន្ទរកថាស្វាគមន៍ និងរបាយការណ៍ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធាន គណៈកម្មាធិការជាតិវាយតម្លៃទីក្រុងស្អាត ថ្លែងក្នុងពិធីសន្និបាតបូកសរុបការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ អមជាមួយពិធីអបអរសាទរទិវាជាតិទីក្រុងស្អាតលើកទី៦ ក្រោមប្រធានបទ
“ទីក្រុងស្អាតដើម្បីទាំងអស់គ្នា” និងពិធីប្រគល់ជ័យលាភីទីក្រុងស្អាតលើកទី២ (សម្រាប់ឆ្នាំ២០១៨-២០២១)
សណ្ឋាគាររ៉េស៊ីដង់សុខាភ្នំពេញ ថ្ងៃទី២៨ ខែកុម្ភៈ ឆ្នាំ២០១៨

សូមគោរព៖
– សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា-ណាចក្រកម្ពុជា ជាទីគោរពដ៏ខ្ពង់ខ្ពស់បំផុត!
– សម្តេច ឯកឧត្ដម លោកជំទាវឧបនាយករដ្ឋមន្រ្តី ទេសរដ្ឋមន្ត្រី រដ្ឋមន្ត្រី!
– ឯកឧត្ដម លោកជំទាវ អគ្គរាជទូត អគ្គរដ្ឋទូត ភ្ញៀវកិត្តិយសជាតិ និងអន្តរជាតិ និងអង្គសន្និបាត ជាទីគោរព និងជាទីមេត្រី!

ថ្ងៃនេះ តាងនាមថ្នាក់ដឹកនាំ មន្ត្រីរាជការទាំងអស់នៃក្រសួងទេសចរណ៍ និងសមាជិក សមាជិកានៃអង្គសន្និបាតទាំងមូល និងខ្លួនខ្ញុំបាទផ្ទាល់ យើងខ្ញុំសូមថ្លែងអំណរគុណយ៉ាងជ្រាលជ្រៅបំផុតចំពោះ សម្តេចអគ្គមហា-សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឆ្លៀតឱកាសដ៏មមាញឹក ផ្តល់កិត្តិយសអញ្ជើញជាអធិបតីដ៏ខ្ពង់ខ្ពស់ ក្នុងពិធីបិទសន្និបាតបូកសរុបការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ អមជាមួយពិធីអបអរសាទរទិវាជាតិទីក្រុងស្អាត ក្រោមប្រធានបទ “ទីក្រុងស្អាត ដើម្បីទាំងអស់គ្នា” និងពិធីចែកជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១ ដ៏មានសារៈសំខាន់នេះ។
ខ្ញុំបាទសូមថ្លែងអំណរគុណចំពោះ សម្តេច ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី ភ្ញៀវជាតិ និងអន្តរជាតិ ដែលបានអញ្ជើញចូលរួមក្នុងពិធីនេះ។
ខ្ញុំបាទមានកិត្តិយសដ៏ខ្ពង់ខ្ពស់សូមគោរពរាយការណ៍ជូន សម្តេចតេជោ-នាយករដ្ឋមន្ត្រី និងអង្គសន្និបាតមេត្តាជ្រាបថា សន្និបាតលើកនេះ មានការចូលរួមពីក្រសួង-ស្ថាប័ន រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ សាកលវិទ្យាល័យ សាលាបណ្តុះបណ្តាលវិជ្ជាជីវៈ ផ្នែកឯកជនពាក់ព័ន្ធ យុវជន អង្គការក្រៅរដ្ឋាភិបាល អង្គការជាតិ-អន្តរជាតិ និងអង្គទូតនានាសរុបប្រមាណ ១០០០នាក់។ ពិធីបើក
សន្និបាតបានប្រព្រឹត្តទៅក្រោមអធិបតីភាពឯកឧត្តម ហោ ណាំហុង ឧបនាយរដ្ឋមន្រ្តី ហើយអង្គសន្និបាតបានដំណើរការយ៉ាងសកម្មអស់រយៈ ០៣ពេល ចាប់ពីព្រឹកថ្ងៃទី២៧ ដល់ថ្ងៃទី២៨ ខែកុម្ភៈ ឆ្នាំ២០១៨។
អង្គសន្និបាតបានពិភាក្សាលើប្រធានបទមួយចំនួន ដែលពាក់ព័ន្ធនឹងចំណុចគន្លឹះសំខាន់ៗ ដូចខាងក្រោម៖
១. ការអភិវឌ្ឍផលិតផលទេសចរណ៍ ការជំរុញការវិនិយោគទេសចរណ៍ និងការផ្សព្វ​ផ្សាយ​
២. ការពង្រឹងគុណភាពឧស្សាហកម្មទេសចរណ៍ ពិសេសពិភាក្សា ស៊ីជម្រៅក្នុងការអនុវត្ត​សៀវភៅសស្តីពី China Ready និងប្រព័ន្ធបញ្ជាក់គុណភាព China Ready Accreditation System ដើម្បីត្រៀមទទួលទេសចរចិន ដែលកំពុងមានកំណើនខ្ពស់
៣. ការអភិវឌ្ឍធនធានមនុស្ស ពិសេសការអនុវត្តផែនការយុទ្ធសាស្ត្រអភិវឌ្ឍន៍ធន​ធាន​មនុស្សផ្នែកជំនាញវិជ្ជាជីវៈទេសចរណ៍ ឆ្លើយតបនឹង កិច្ចព្រមព្រៀងអ្នកជំនាញទេសចរណ៍អាស៊ាន (MRA)
៤. ការសម្រួលការធ្វើដំណើរ និងដឹកជញ្ជូនទេសចរ
៥. ការពង្រឹងការគ្រប់គ្រងមន្ត្រីរាជការ
៦. អបអរសាទរទិវាជាតិទីក្រុងស្អាតលើកទី៦ ក្រោមប្រធានបទ “ទីក្រុងស្អាត ដើម្បីទាំងអស់គ្នា”។

– សម្តេចតេជោនាយករដ្ឋមន្ត្រី ជាទីគោរពដ៏ខ្ពង់ខ្ពស់បំផុត!
– សម្តេចឯកឧត្ដម លោកជំទាវ លោក លោកស្រី ជាទីមេត្រី!

ក្រោយពីបានធ្វើការពិភាក្សា និងផ្លាស់ប្តូរយោបល់គ្នារួចមក ខ្ញុំបាទមានកិត្តិយសដ៏ខ្ពង់ខ្ពស់សូមគោរពរាយការណ៍នូវលទ្ធផលអង្គសន្និបាត ដូចតទៅ៖
១. អង្គសន្និបាតរីករាយ ប្រកបដោយមោទនភាព និងសូមគាំទ្រយ៉ាងពេញ ទំហឹងចំពោះ​ការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចតេជោនាយករដ្ឋមន្រ្តី ដែលបានពុះពារឧបសគ្គគ្រប់បែបយ៉ាង នាំមកនូវសន្តិភាពជូនប្រទេស ជាតិ មាតុភូ​មិ​ និងប្រជាជន។ អង្គសន្និបាតសូមអបអរសាទរចំពោះការជ្រើសតាំង សម្តេចតេជោ​នាយករដ្ឋមន្ត្រី ជាឯកអគ្គរដ្ឋទូតសុច្ឆន្ទៈពិភពលោកសម្រាប់វិស័យទេសចរណ៍ និងគោលដៅនៃការអភិវឌ្ឍប្រកបដោយចីរភាព កាលពីថ្ងៃទី០៩ ខែធ្នូ ឆ្នាំ២០១៧ ដោយក្រុមប្រឹក្សាទេសចរណ៍ និងពាណិជ្ជកម្មអឺរ៉ុប ដែលបានឆ្លុះបញ្ជាំងពីកិច្ចខិតខំប្រឹងប្រែង​ ការយកចិត្តទុកដាក់ និងការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចតេជោនាយករដ្ឋមន្ត្រី ក្នុងការអភិវឌ្ឍវិស័យទេសចរណ៍កម្ពុជាឱ្យក្លាយជា “មាសបៃតង”។
២. អង្គសន្និបាតបានឯកភាពលើរបាយការណ៍បូកសរុបលទ្ធផលការងារទេសចរណ៍ឆ្នាំ​២០១៧ និងទិសដៅអនុវត្ដបន្ដឆ្នាំ២០១៨ និងវាយតំលៃខ្ពស់ចំពោះសមិទ្ធផលធំៗដែលវិស័យទេសចរណ៍សម្រេចបាន និងអបអរសាទរចំពោះគម្រោងធំៗនានា ដូចជា គម្រោង​ពង្រីកកំពង់ផែទេសចរណ៍ ផ្លូវល្បឿនលឿន ភ្នំពេញ-ខេត្តព្រះសីហនុ គម្រោង​សាង​សង់កំពង់ផែទេសចរណ៍អន្តរជាតិខេត្តកំពត ការកែលំអ អាកាសយានដ្ឋានអន្តរ​ជាតិភ្នំពេញ និងខេត្តព្រះសីហនុ គម្រោងសាងសង់អាកាសយាន្តដ្ឋានអន្តរជាតិថ្មីនៅរាជធានីភ្នំពេញ សៀមរាប ការសាងសង់អាគារអ្នកដំណើរថ្មីនៅច្រកទ្វារប៉ោយប៉ែតដែលកំពុងដំណើរការសាងសង់បច្ចុប្បន្ន និងការកសាង ហេដ្ឋារចនាសម្ព័ន្ធគាំទ្រនានា ដូចជា ផ្លូវថ្នល់ ស្ពាន ផ្លូវរថភ្លើង …។ល។
៣. អង្គសន្និបាតរីករាយ ដោយឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិចំនួនជាង ៥,៦លាននាក់ កើនឡើង ១១,៨% បានរួមចំណែកប្រមាណ ១៣% នៃផលិតផលក្នុងស្រុកសរុបរបស់កម្ពុជា និងតំណាងឱ្យប្រមាណ ៣០% នៃវិស័យសេវាកម្មនៅកម្ពុជា។
អង្គសន្និបាតឯកភាពគាំទ្រចក្ខុវិស័យប្រកបដោយសុទិដ្ឋិនិយម គឺកម្ពុជាអាចនឹងទទួលបានទេសចរអន្តរជាតិប្រមាណ ៦,១លាននាក់ នៅឆ្នាំ២០១៨, ៧លាននាក់ នៅឆ្នាំ២០២០, ១១លាននាក់ នៅឆ្នាំ២០២៥ និង ១៥លាននាក់ នៅឆ្នាំ២០៣០ ព្រមជាមួយនឹងការរីកចំរើនខ្លាំងក្លានៃចលនាទេសចរក្នុងស្រុក។ កំណើនទេសចរណ៍នេះ នឹងបានចូលរួមចំណែកជាវិជ្ជមានដល់ការអភិវឌ្ឍសេដ្ឋកិច្ច-សង្គមនៅកម្ពុជា។
ឈរលើទស្សនៈទាន “ទេសចរណ៍ជាមាសបៃតង” អង្គសន្និបាតបានទទួលស្គាល់កាល្លានុ​វត្តភាពថ្មីៗ ដែលកម្ពុជាអាចចាប់យកក្នុងបរិបទនៃការធ្វើសមាហរណ-កម្មតំបន់ និងសាកលភាវូបនីយកម្ម (Globalization) ពីព្រោះថា ផ្អែកលើស្ថានភាពភូមិសាស្រ្ត-នយោបាយ និងភូមិសាស្ត្រ-សេដ្ឋកិច្ចក្នុងពិភពលោក បានបង្ហាញឱ្យឃើញអំពីតួនាទីកាន់តែសំខាន់ឡើងរបស់ទ្វីបអាស៊ី ក្នុងការជម្រុញកំណើនសេដ្ឋកិច្ចពិភព​លោក។ ប្រការនេះ បានធ្វើឱ្យតំបន់អាស៊ី ពិសេសប្រទេសចិន ឥណ្ឌា កំពុងក្លាយទៅជា​ប្រភពទីផ្សារទេសចរណ៍ដ៏មានសក្តានុពល ដែលនឹងផ្តល់ “ឱកាសមាស” សម្រាប់ការ​អភិវឌ្ឍវិស័យទេសចរណ៍កម្ពុជា។
ខណៈដែលកម្ពុជាស្ថិតនៅចំកណ្តាលនៃតំបន់ និងស្ថិតនៅជុំវិញដោយប្រទេសដែលមាន​ចំនួនប្រជាជនច្រើន និងខណៈដែលអាស៊ានត្រូវបានមើលឃើញថាជាគោលដៅទេសចរណ៍ដែលបើកចំហរទូលាយ ធ្វើឱ្យអាស៊ានបានកំពុងក្លាយជាតំបន់មួយដែលកាន់តែមានភាពទាក់ទាញចំពោះការវិនិយោគ និងទេសចរណ៍ដែលនឹងផ្តល់ឱកាសដល់​កម្ពុជា ក្នុងការស្រូបយកភ្ញៀវទេសចរឱ្យមកទស្សនាកំសាន្ត កាន់តែច្រើនថែមទៀត ពិសេសទេសចរមកពីតំបន់អាស៊ាន (Intra – ASEAN Travelers) ស្របតាមយុទ្ធសាស្ត្រ “ASEAN for ASEAN” ទេសចរមកពីប្រទេស អាស៊ាន+៣ (ចិន ជប៉ុន កូរ៉េ) អាស៊ាន-ឥណ្ឌា ពិសេសប្រទេសចិន និងប្រទេសឥណ្ឌា ដែលជាប្រភពចំបងនៃទីផ្សារទេសចរណ៍អាស៊ាន។
៤. អង្គសន្និបាតក៏បានឆ្លុះបញ្ចាំងអំពីបញ្ហាប្រឈមនានា ដែលវិស័យទេស-ចរណ៍កម្ពុជា​បាននិងកំពុងជួបប្រទះ។ អង្គសន្និបាតបានលើកឡើងអំពីភាពចាំបាច់នៃការបង្កើនឧត្តមភាពប្រៀបធៀប និងការប្រកួតប្រជែងនៃវិស័យទេសចរណ៍កម្ពុជា ដោយ​បានលើកឡើងនូវគំនិតមួយចំនួន សំដៅបង្កើនភាពទាក់ទាញ និងផ្តល់បដិ-
សណ្ឋារកិច្ចល្អដល់ភ្ញៀវទេសចរ ក្នុងការមកទស្សនាកម្ពុជា ស្របតាមការទទួលស្គាល់ជាអន្តរជាតិ ដូចតទៅ៖
ទី១. អំពីការអភិវឌ្ឍផលិតផលទេសចរណ៍៖
– អង្គសន្និបាតគាំទ្រលើយុទ្ធសាស្ត្រពិពិធកម្មទេសចរណ៍ពីតំបន់ទេសចរណ៍វប្បធម៌-ប្រវត្តិ​សាស្ត្រសៀមរាប-អង្គរ តំបន់ជុំវិញសៀមរាប តំបន់ភ្នំពេញ ទៅកាន់តំបន់ឆ្នេរសមុទ្រ និងតំបន់អេកូទេសចរណ៍ ដែលបាននិងកំពុងទាក់ទាញការវិនិយោគ ផលិតផលទេសចរណ៍ប្រកបដោយច្នៃប្រឌិត និងនិវានុវត្តភាពនាពេលបច្ចុប្បន្ន។
• តំបន់សៀមរាប-អង្គរ៖ អង្គសន្និបាតវាយតម្លៃខ្ពស់ចំពោះកំណើនទេសចរមកកាន់តំបន់សៀមរាប-អង្គរ និងគាំទ្រលើផែនការអភិវឌ្ឍទេសចរណ៍ប្រកប ដោយនិរន្តរភាពនៅតំបន់នេះ ទាំងនៅទីក្រុង ទាំងនៅតំបន់ប្រាសាទអង្គរ ដើម្បីត្រៀមទទួលទេសចរជាតិ អន្តរជាតិដែលកំពុងមានកំណើន។ អង្គសន្និបាតគាំទ្រឲ្យទីក្រុងសៀមរាប មានការរៀបចំបន្ថែមហេដ្ឋារចនាសម្ព័ន្ធគាំទ្រនានា ដូចជា ផ្លូវតូចៗ ការដាក់ភ្លើងបំភ្លឺផ្លូវឱ្យបានច្រើន ការរៀបចំចំណតរថយន្តធំៗ សណ្តាប់ធ្នាប់ ចរាចរសន្តិសុខ អានាម័យ និងភាពស្អាតក្នុងទីក្រុង ដើម្បីបញ្ចៀសការកកស្ទះចរាចរ និងបង្កើនសោភណ្ឌភាពទីក្រុង។ ទន្ទឹមនឹងនេះ អង្គសន្និបាតគាំទ្រនូវការអភិវឌ្ឍតំបន់អង្គរប្រកបដោយការប្រុងប្រយ័ត្ន និងចីរភាព ប៉ុន្តែសូមស្នើឱ្យមានការពិចារណាលើការបង្កើតព្រឹត្តិការណ៍ទាក់ទាញទេសចរណ៍បន្ថែមទៀតនៅពេលរាត្រីក្នុងតំបន់អង្គរ។ អង្គសន្និបាតក៏បានស្នើឱ្យមានការខិតខំជំរុញពិពិធកម្មទេសចរណ៍ទៅកាន់តំបន់ជុំវិញ ដូចជា ទន្លេសាប ព្រែកទាល់ ភ្នំគូលេន ប្រាសាទព្រះវិហារ កោះកេរ បឹងមាលា តភ្ជាប់មកតំបន់បេតិកភណ្ឌសំបូរព្រៃគុក បង្កើតជាខ្សែទស្សនកិច្ចបេតិកភណ្ឌ (Heritage Network) ដើម្បីបង្កើនតម្លៃបន្ថែមនៃវិស័យទេសចរណ៍។
• តំបន់ភ្នំពេញ និងតំបន់ជុំវិញ៖ អង្គសន្និបាតវាយតម្លៃខ្ពស់ចំពោះកំណើននៃភ្ញៀវទេសចរមកកាន់តំបន់ភ្នំពេញ និងតំបន់ជុំវិញ។ ទន្ទឹមនឹងនេះ អង្គសន្និបាតស្នើឱ្យមានការអភិវឌ្ឍផលិតផលទេសចរណ៍ឱ្យកាន់តែច្រើនថែមទៀត ពិសេសទេសចរណ៍ទីក្រុងផ្សារភ្ជាប់ជាមួយទេសចរណ៍តាមដងទន្លេមេគង្គ និងតំបន់ជុំវិញ។
• តំបន់ឆ្នេរសមុទ្រកម្ពុជា៖ អង្គសន្និបាតគាំទ្រចំណាត់ការរបស់គណៈកម្មា-ធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ក្នុងការរៀបចំផែនការជំរុញអភិវឌ្ឍតាមកោះ និងកែលំអការគ្រប់គ្រងឆ្នេរខ្សាច់ ដើម្បីបង្កើនភាពទាក់ទាញទេសចរណ៍មកកាន់តំបន់ឆ្នេរឱ្យបានកាន់តែច្រើនឡើង។ អង្គសន្និបាតអបអរសាទរ ចំពោះការរៀបចំឯកសារគតិយុត្តទ្រទ្រង់មួយចំនួន ជាអាទិ៍៖ សេចក្តីសម្រេចរបស់រាជរដ្ឋាភិបាលកម្ពុជាស្តីពី “គោលការណ៍ណែនាំស្តីពីការអភិវឌ្ឍរមណីយដ្ឋានឆ្នេរ” ដោយក្នុងនោះ បានឯកភាពដាក់ចេញនូវការកំណត់ប្រភេទឆ្នេរនីមួយៗដើម្បីជាមូលដ្ឋានសម្រាប់ការអភិវឌ្ឍ។ អង្គសន្និបាតស្នើរាជរដ្ឋាភិបាលបង្កើតសារៈមន្ទីរឆ្នេរសមុទ្រកម្ពុជា (Maison de la baie) ដូចបណ្តាឆ្នេរជាសមាជិកក្លឹបឆ្នេរសមុទ្រដែលស្អាតជាងគេបំផុតលើពិភពលោក។
• តំបន់អេកូទេសចរណ៍៖ អង្គសន្និបាតមានការកត់សំគាល់អំពីការរីកចំរើនជាបន្តបន្ទាប់នៃវិស័យអេកូទេសចរណ៍ និងសហគមន៍ទេសចរណ៍។ អង្គសន្និបាតគាំទ្ររាជរដ្ឋាភិបាលដែលបានបង្កើតក្រុមការងារអន្តរក្រសួងគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ ដែលមានក្រសួងទេសចរណ៍ជាប្រធាន ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ជាអនុប្រធាន។ អង្គសន្និបាតគាំទ្រការរៀបចំឯកសារបទដ្ឋានគតិយុត្តជាមូលដ្ឋាន រួមមាន៖ សេចក្តីព្រាងគោលនយោបាយជាតិអេកូទេសចរណ៍ សេចក្តីព្រាងច្បាប់ស្តីពីអេកូទេសចរណ៍ សេចក្តីព្រាងគោលការណ៍ណែនាំអភិវឌ្ឍគម្រោងទេសចរណ៍ក្នុងតំបន់អភិរក្ស និងតំបន់ការពារ។ អង្គសន្និបាតសំណូមពរឱ្យមានការកំណត់តំបន់អេកូទេសចរណ៍ធំៗឱ្យបានរហ័ស។
អង្គសន្និបាតគាំទ្រឲ្យមានការបង្កើតតំបន់ទេសចរណ៍ពិសេស ដែលអាចអនុញ្ញាតឱ្យវិនិយោគិនទេសចរណ៍ ឬប្រតិបត្តិករទេសចរណ៍ ដែលមានស្នាដៃឆ្នើមក្នុងកិច្ចគាំពារបរិស្ថាន សង្គម និងក៏ដូចជាទាក់ទាញនូវទេសចរណ៍ប្រភេទផ្ទះទី២ មកកម្ពុជា។
អង្គសន្និបាតបានអបអរសាទរចំពោះព្រឹត្តិការណ៍បុណ្យទន្លេ បុណ្យសមុទ្រ និងព្រឹត្តិការណ៍កីឡាសំខាន់ៗ មានដូចជា៖ Angkor International Half Marathon, Ful Marathon, Ultra Trail ដែលពីមួយឆ្នាំទៅមួយឆ្នាំកាន់តែមានការរីកចំរើន។ អង្គសន្និបាតគាំទ្រចំពោះគំនិតផ្តួចផ្តើមឱ្យមានការបង្កើតព្រឹត្តិការណ៍ កីឡាទេសចរណ៍ (Triathlon) នៅទីក្រុងកែបប្រចាំឆ្នាំ ហើយអង្គសន្និបាតក៏បានគាំទ្រ នូវគំនិតផ្តួចផ្តើមឱ្យមានការរៀបចំបុណ្យអេកូទេសចរណ៍ នៅតំបន់អេកូទេសចរណ៍ សំខាន់ៗផងដែរ។
អង្គសន្និបាតបានគាំទ្រឱ្យរួមគ្នា រៀបចំ និងផ្សព្វផ្សាយម្ហូបអាហារខ្មែរជាផលិតផលទេសចរណ៍វប្បធម៌ដ៏ទាក់ទាញមួយសម្រាប់ភ្ញៀវទេសចរ ក្នុងនោះ ស្នើបង្កើតឱ្យមានមហោស្របម្ហូបអាហារប្រចាំឆ្នាំ (Foods Festivel)។ អង្គសន្និបាតស្នើឱ្យរដ្ឋបាលថ្នាក់ក្រោមជាតិ និងស្ថានប័នពាក់ព័ន្ធ ជំរុញការត្រួតពិនិត្យគុណភាពម្ហូបអាហារឱ្យបានហ្មត់ចត់ ស្រាវជ្រាវម្ហូបអាហារដែលជាអត្តសញ្ញាណនៅតាមមូលដ្ឋានរបស់ខ្លួន ដោយគួររៀបចំឱ្យមានការលក់ដូរម្ហូបអាហារតាមដងផ្លូវ (Street Food) ឱ្យមានសណ្តាប់ធ្នាប់ អនាម័យល្អ ស្របតាមស្តង់ដា និងគោលការណ៍ទេសចរណ៍អាស៊ាន ព្រោះអាហារតាមដងផ្លូវជាអាហារកំពុងពេញនិយមរបស់ទេសចរ។
ទី២. អំពីគុណភាពសេវាកម្មទេសចរណ៍៖ អង្គសន្និបាតបានពិភាក្សាស៊ីជម្រៅស្តីពីការអនុវត្តសៀវភៅសស្តីពី China-Ready ហើយប្តេជ្ញាបន្តចូលរួម ក្នុងការវាយតម្លៃប្រព័ន្ធបញ្ជាក់គុណភាព (China Ready Accreditation System) ដើម្បីត្រៀមទទួលទេសចរចិនដែលកំពុងមានកំណើនខ្ពស់។ អង្គសន្និបាតបានឯកភាពចំពោះវឌ្ឍនភាពនៃការដាក់ចេញនូវយុទ្ធនាការ “សេវាមួយ ស្តង់ដាមួយ” ដែលជាការចាប់យកទស្សនៈទានថ្មីនៃទំនួលខុសត្រូវផ្នែកសង្គម និងបរិស្ថាន (Corporate Social Responsibility-CSR)។ អង្គសន្និបាតគាំទ្រយន្តការជាកញ្ចប់របស់ក្រសួងទេសចរណ៍ក្នុងការពង្រឹងគុណភាពសេវាកម្មទេសចរណ៍ ដោយត្រូវគិតគូរលើការគ្រប់គ្រង (១). អាជ្ញាបណ្ណទេសចរណ៍ (២). ចំណាត់ថ្នាក់សេវាកម្មទេសចរណ៍ និង (៣). ស្តង់ដាបៃតង។ អង្គសន្និបាតអបអរសាទរចំពោះក្រសួងទេសចរណ៍ ក្នុងការរៀបចំឱ្យមានស្តង់ដាគុណភាពទេសចរណ៍ (ស្របតាមស្តង់ដាអាស៊ាន) ជាអាទិ៍ស្តង់ដាសណ្ឋាគារបៃតងអាស៊ាន (ASEAN Green Hotel Standard) ស្តង់ដាផ្ទះស្នាក់អាស៊ាន (ASEAN Green Home-Stay Standard) ស្តង់ដាទីក្រុងទេសចរណ៍ស្អាតអាស៊ាន (ASEAN Clean Tourist City Standard) ស្តង់ដាស្ប៉ាអាស៊ាន (ASEAN Spa & Wellness Standard) ស្តង់ដាបង្គន់សាធារណៈអាស៊ាន (ASEAN Public Toilet Standard) និងស្តង់ដាទេសចរណ៍សហគមន៍អាស៊ាន (ASEAN Community-based Tourism Standard) និងគោលការណ៍ណែនាំ (ASEAN Sustainable Tourism Award) ។ អង្គសន្និបាតបានអបអរសាទរ និងគាំទ្រចំពោះការរៀបចំឱ្យមានការប្រលងប្រណាំងភោជនីយដ្ឋាន រមណីយដ្ឋានគំរូប្រចាំឆ្នាំ និងអបអរសាទរចំពោះការបង្កើតស្តង់ដារបដិសណ្ឋារកិច្ចល្អ ស្តង់ដារធុរកិច្ចបៃតងក្នុងវិស័យទេសចរណ៍។
អង្គសន្និបាត មានការវាយតម្លៃខ្ពស់ចំពោះការដាក់ចេញនូវស្តង់ដាបង្គន់
សាធារណៈកម្ពុជា និងស្នើឱ្យរៀបចំចលនាប្រឡងប្រណាំងបង្គន់សាធារណៈកម្ពុជាលើកទី១ ក្នុងឆ្នាំ២០១៨ ។
ទន្ទឹមនឹងនេះ អង្គសន្និបាតស្នើឱ្យមានការរៀបចំគោលនយោបាយហិរញ្ញប្ប-ទានទ្រទ្រង់គំរោងអាជីវកម្មទេសចរណ៍ខ្នាតតូចៗ និងសហគ្រាសធនតូច និងមធ្យម (SME’s) ក្នុងវិស័យទេសចរណ៍ និងបង្កើនសកម្មភាពបញ្ជ្រាបការយល់ដឹងជា
សាធារណៈឱ្យកាន់តែទូលំទូលាយថែមទៀត ដោយគាំទ្រឱ្យបង្កើតមូលនិធិទ្រទ្រង់គុណភាពទេសចរណ៍កម្ពុជា។ អង្គសន្និបាតគាំទ្រសេចក្តីព្រាងអនុក្រឹត្យស្តីពីការបង្កើត ការគ្រប់គ្រង និងការចាត់ចែង “មូលនិធិទ្រទ្រង់ និងអភិវឌ្ឍគុណភាពសេវាកម្មទេសចរណ៍” និងការរៀបចំ និងការប្រព្រឹត្តិទៅនៃគណៈកម្មាធិការទ្រទ្រង់ និងអភិវឌ្ឍគុណភាពសេវាកម្មទេសចរណ៍។
ទី៣. ការអភិវឌ្ឍធនធានមនុស្សក្នុងវិស័យទេសចរណ៍៖ អង្គសន្និបាតបានប្រមូលផ្តុំយកចិត្តទុកដាក់ដល់ការអភិវឌ្ឍធនធានមនុស្ស “បុគ្គលិកម្នាក់ ជំនាញមួយ” ក្នុងវិស័យទេសចរណ៍ (ទាំងផ្នែកសាធារណៈ និងឯកជន) សំដៅជំរុញឱ្យអ្នកជំនាញទេសចរណ៍ទាំងអស់ មានវិញ្ញាបនបត្រ ឬសញ្ញាបត្របញ្ជាក់សមត្ថភាព ស្របតាមស្តង់ដាជាតិ និងអាស៊ាន (៥០% នៅឆ្នាំ២០២០ និង ១០០% នៅឆ្នាំ២០២៥)។
ពាក់ព័ន្ធមគ្គុទ្ទេសក៍ទេសចរណ៍៖ អង្គសន្និបាតអបអរសាទរលើវឌ្ឍនភាពនៃការអនុវត្តឯកសារយុទ្ធសាស្ត្រស្តីពី “ការបណ្តុះបណ្តាល និងគ្រប់គ្រងមគ្គុទ្ទេសក៍ទេសចរណ៍កម្ពុជា ២០១៥-២០២០” និងបានអបអរសាទរលើការរៀបចំប្រព័ន្ធចុះបញ្ជីមគ្គុទ្ទេសក៍ទេសចរណ៍តាមប្រព័ន្ធអនឡាញ។ អង្គសន្និបាតអបអរសាទរចំពោះការធ្វើកំណែទម្រង់ស៊ីជម្រៅលើការប្រឡងជ្រើសរើសបេក្ខជនចូលរៀនវគ្គមគ្គុទ្ទេសក៍ទេសចរណ៍។
ទី៤. ការងារសិក្សាទីផ្សារ និងផ្សព្វផ្សាយទេសចរណ៍៖ អង្គសន្និបាតសូមកោតសរសើរចំពោះការខិតខំប្រឹងប្រែងរបស់ក្រសួងទេសចរណ៍ និងផ្នែកឯកជន ក្នុងការជំរុញសកម្មភាពឃោសនាផ្សព្វផ្សាយទេសចរណ៍ “កម្ពុជាៈ ព្រះរាជាណាចក្រអច្ឆរិយៈ ផ្តល់ភាពកក់ក្តៅ” ពិសេសអបអរសាទរចំពោះជោគជ័យនៃការរៀបចំ ព្រឹត្តិការណ៍ពិពរណ៍ទេសចរណ៍កម្ពុជា (Cambodia Travel Mart-CTM 2017) នៅសៀមរាបកន្លងមក ហើយគាំទ្រឱ្យមានការរៀបចំព្រឹត្តិការណ៍ទេសចរណ៍ អន្តរជាតិ CTM នេះ ជារៀងរាល់ឆ្នាំ។
អង្គសន្និបាតស្នើឱ្យផ្នែកឯកជនលើកកម្ពស់ស្មារតី និងបង្កើនការទទួលខុសត្រូវចូលរួមក្នុងយុទ្ធនាការផ្សព្វផ្សាយទេសចរណ៍ឱ្យបានកាន់តែខ្លាំងក្លាថែមទៀត ទាំងក្នុងក្របខណ្ឌតំបន់ និងពិភពលោក ឆ្ពោះទៅកាន់ទីផ្សារយុទ្ធសាស្រ្តធំៗ ពិសេស យកចិត្តទុកដាក់ដល់ទីផ្សារទេសចរណ៍ដែលមានស្រាប់ (ដូចជា ទីផ្សារអាស៊ាន អាស៊ានបូកបី ទីផ្សារអឺរ៉ុប អាមេរិក មជ្ឈឹមបូព៌ា) និងទីផ្សារទេសចរណ៍លេចធ្លោ ដូចជាទីផ្សារចិន និងឥណ្ឌា។ អង្គសន្និបាតគាំទ្រលើសេចក្តីព្រាងអនុក្រឹត្យស្តីពី “ការបង្កើតក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា។
ទី៥. ការផ្សព្វផ្សាយ និងជំរុញចលនាទេសចរណ៍ក្នុងស្រុក៖ អង្គសន្និបាតបានឯកភាពគាំទ្រចំពោះការផ្សព្វផ្សាយ និងជំរុញចលនាទេសចរណ៍ក្នុងស្រុក និងគាំទ្រលើកំណែទម្រង់របស់ក្រសួងទេសចរណ៍ក្នុងការបង្កើតឱ្យមានការីទេសចរណ៍ក្នុងស្រុក និងការរៀបចំឱ្យមានកម្មវិធីដំណើរកម្សាន្តក្នុងស្រុកដល់សិស្ស និស្សិត មន្រ្តីរាជការ បុគ្គលិក កម្មករ ហើយគាំទ្រលើគំនិតផ្តួតផ្តើមបង្កើតឱ្យមានសេចក្តីព្រាងគោល-នយោបាយជាតិជំរុញទេសចរណ៍ក្នុងស្រុក២០១៨-២០៣០។ អង្គសន្និបាតគាំទ្រចំពោះការពង្រឹងការគ្រប់គ្រង និងអភិវឌ្ឍបញ្ជរពត៌មានទេសចរណ៍នៅគ្រប់រាជធានី-ខេត្ត។
ទី៦. ដើម្បីជំរុញការអភិវឌ្ឍទេសចរណ៍ អង្គសន្និបាតប្តេជ្ញាបន្តពង្រឹងកិច្ចសហប្រតិបត្តិការអន្តរជាតិជាមួយពិភពលោក និងតំបន់ ក្នុងក្របខណ្ឌអង្គការទេស-ចរណ៍ពិភពលោក (UNWTO), PATA, ASEAN, Mekong-Japan, Mekong-Ganga, Mekong-Langcang, និងក្របខណ្ឌពហុភាគី ទ្វេភាគី ។ល។
ទី៧. ការជំរុញការតភ្ជាប់ (Connectivity) និងសម្រួលការធ្វើដំណើរ
ទេសចរណ៍៖ អង្គសន្និបាតសូមកោតសរសើរចំពោះការខិតខំប្រឹងប្រែងរបស់
គណៈកម្មការអន្តរក្រសួង ដើម្បីសម្រួលការធ្វើដំណើរ និងដឹកជញ្ជូនទេសចរណ៍ ដែលរួមមាន សមត្ថកិច្ចអន្តោរប្រវេសន៍ គយ ផ្នែកដឹកជញ្ជូន ផ្នែកចត្តាលីស័ក និងផ្នែកពាក់ព័ន្ធ ដែលបានយកចិត្តទុកដាក់ធ្វើការសម្របសម្រួល និងបង្កលក្ខណៈគ្រប់បែបយ៉ាង ដើម្បីឱ្យការដឹកជញ្ជូន និងការធ្វើដំណើរទេសចរណ៍បានប្រព្រឹត្តទៅដោយងាយស្រួលនៅតាមច្រកទ្វារព្រំដែនអន្តរជាតិទាំងផ្លូវគោក ផ្លូវអាកាស និងផ្លូវទឹក។
អង្គសន្និបាតក៏បានស្នើសុំការពិចារណាក្នុងការជំរុញឱ្យមានការវិនិយោគរៀបចំស្ថានីយសំចត (Road Station) នៅតាមបណ្តាផ្លូវសំខាន់ៗដើម្បីសម្រួលការសំចតរបស់អ្នកដំណើរ និងភ្ញៀវទេសចរ។ អង្គសន្និបាតអបអរសាទរ និងគាំទ្រចំពោះការរៀបចំឲ្យមានជំនួបពិភាក្សាគ្នារវាងក្រសួងទេសចរណ៍ អគ្គនាយកដ្ឋានគយ និងរដ្ឋាករ និងផ្នែកឯកជនឱ្យបានរហ័ស ស្តីពីការដោះស្រាយរបាំងមិនចាំបាច់នានាដែលពាក់ព័ន្ធនឹងការសម្រួលដការធ្វើដំណើរ ដូចជាបែបបទធានារ៉ាប់រង និមុត្តធានា ។ល។ អង្គសន្និបាតគាំទ្រជម្រុញ លើកទឹកចិត្ត ប្រភេទទេសចរបើកបរដោយខ្លួនឯង (Self Driving) ស្របតាមយុទ្ធសាស្ត្រ ASEAN for ASEAN។
អង្គសន្និបាតស្នើឱ្យមានការតភ្ជាប់ការហោះហើរបន្ថែមទៀតក្នុងតំបន់ ពិសេសការតភ្ជាប់ជាមួយប្រទេសឥណ្ឌនេស៊ី (កោះបាលី) និងភ្ជាប់ជាមួយប្រទេសឥណ្ឌា អូស្ត្រាលី និងអឺរ៉ុប។
ពាក់ព័ន្ធនឹងបដិសណ្ឋារកិច្ចល្អ៖ អង្គសន្និបាតបានគាំទ្រលើការដាក់ចេញនូវចលនាប្រឡងប្រណាំង “បដិសណ្ឋារកិច្ចល្អ” ជារបៀបវារៈជាតិ (National Agenda) ឆ្ពោះទៅឆ្នាំ២០៣០ ដែលជាការចូលរួមដល់ការជំរុញ និងលើកកម្ពស់ការផ្តល់
សេវាប្រកបដោយភាពញញឹម រួសរាយរាក់ទាក់ និងកក់ក្តៅដល់ភ្ញៀវទេសចរ និងគោរពស្នើសុំឱ្យមានរង្វាន់ពិសេសប្រសិទ្ធនាម “រង្វាន់សម្តេចតេជោនាយករដ្ឋមន្រ្តីសម្រាប់បដិសណ្ឋារកិច្ចល្អ” ដល់បេក្ខភាពដែលទទួលបានស្នាមញញឹមកម្រិតខ្ពស់។ អង្គសន្និបាតបានវាយតំលៃខ្ពស់ និងអរគុណប្រព័ន្ធផ្សព្វផ្សាយក្នុងស្រុកដែលបានជួយផលិតកម្មវិធីទេសចរណ៍ និងជួយផ្សព្វផ្សាយស្ប៉ត ឯកសារ និងបទចំរៀងទេសចរណ៍នានា ឯកសារចលនាប្រឡងប្រណាំង “ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ”។

– សម្តេចតេជោនាយករដ្ឋមន្ត្រី ជាទីគោរពដ៏ខ្ពង់ខ្ពស់បំផុត!
– សម្តេចឯកឧត្ដម លោកជំទាវ លោក លោកស្រី ជាទីមេត្រី!

ពាក់ព័ន្ធនឹងការងារទីក្រុងស្អាត៖ ជាមោទនភាពជាតិថ្មីមួយទៀតសម្រាប់កម្ពុជា អង្គសន្និបាតបានអបអរសាទរទីក្រុងទេសចរណ៍របស់កម្ពុជាចំនួន ៣ រួមមាន ទីក្រុងបាត់ដំបង ទីក្រុងកែប និងទីក្រុងសៀមរាប បានទទួលជ័យលាភីទីក្រុងទេស-ចរណ៍ស្អាតអាស៊ានលើកទី១ នៅក្នុងពិធីចែកជ័យលាភីរង្វាន់ទេសចរណ៍អាស៊ាន ដែលបានប្រព្រឹត្តទៅនាឱកាសវេទិកាទេសចរណ៍អាស៊ាន ឆ្នាំ២០១៨ នៅទីក្រុងឈៀងម៉ៃ ប្រទេសថៃ កន្លងមក។
អង្គសន្និបាតក៏បានអបអរសាទរក្រុង/ខណ្ឌ ៣៨ ដែលទទួលបានជ័យលាភីទីក្រុងស្អាតលើកទី២ សុពលភាព ២០១៨-២០២១។
ព្រឹកម៉ិញនេះ អង្គសន្និបាតបានប្រកាសលទ្ធផលនៃការប្រឡងប្រណាំង
ទីក្រុងស្អាតលើកទី២ ដូចខាងក្រោម៖
ក. ផ្ការំដួល ៣ទង មាន ០៧៖ ០៦ក្រុង និង ០១ខណ្ឌ (កើនឡើងចំនួន ០២ ធៀបនឹងលើកទី១) ក្នុងនោះ៖
 ក្រុង ០៤នៅរក្សាបានផ្ការំដួល ៣ទង (ដោយមានពិន្ទុកើនឡើង)៖
-ក្រុងបាត់ដំបង -ក្រុងកែប -ក្រុងកំពត -ក្រុងសៀមរាប
 ខណ្ឌចំនួន ០១ នៅរក្សាផ្ការំដួល ៣ទង (តែពិន្ទុនៅដដែល)៖
-ខណ្ឌដូនពេញ
 ចំពោះជ័យលាភីថ្មីដែលទទួលបានផ្ការំដួល ៣ទង មាន ០២៖
-ក្រុងកំពង់ចាម -ក្រុងព្រះសីហនុ
ខ. ផ្ការំដួល ២ទង មាន ១៧៖ ១៤ក្រុង និង ០៣ខណ្ឌ (កើនឡើង ០៥ធៀបនឹងលើកទី១) ក្នុងនោះ៖
 ក្រុង ០៤ និងខណ្ឌ ០១ នៅរក្សាបានផ្ការំដួល ២ទង (ដោយមានពិន្ទុកើនឡើង)
-ក្រុងពោធិ៍សាត់ -ក្រុងតាខ្មៅ -ខណ្ឌទួលគោក
-ក្រុងដូនកែវ -ក្រុងក្រចេះ
 ក្រុង ០១ នៅរក្សាផ្ការំដួល ២ទង តែពិន្ទុនៅដដែល៖
-ក្រុងកំពង់ឆ្នាំង
 ក្រុង ០៣ និងខណ្ឌ ០១ នៅរក្សាផ្ការំដួល ០២ទង (ប៉ុន្តែពិន្ទុថយចុះ)៖
-ក្រុងស្ទឹងសែន -ខណ្ឌចំការមន -ក្រុងព្រៃវែង -ក្រុងសិរីសោភ័ណ
 រីឯជ័យលាភីថ្មីដែលទទួលបានផ្ការំដួល ០២ទង មាន ០៧៖ ក្រុង ០៦ និងខណ្ឌ ០១៖
– ក្រុងសំរោង -ក្រុងបានលុង -ក្រុងសែនមនោរម្យ
– ក្រុងស្វាយរៀង – ខណ្ឌ៧មករា – ក្រុងប៉ោយប៉ែត
– ក្រុងខេមរភូមិន្ទ
គ. ផ្ការំដួល ១ទង មាន ១៤៖ ០៦ក្រុង និង ០៨ខណ្ឌ (ថយចុះចំនួន ០៣ ធៀបនឹងលើកទី១) ក្នុងនោះ៖
 ក្រុង ០៣ នៅរក្សាបានផ្ការំដួល ១ទង (ដោយមានពិន្ទុកើនឡើង)៖
– ក្រុងស្ទឹងត្រែង – ក្រុងច្បារមន – ក្រុងបាវិត
 រីឯជ័យលាភីថ្មី (បេក្ខភាពចាស់) ពីមុនគ្មានចំណាត់ថ្នាក់ផ្ការំដួល មកទទួលបានផ្ការំដួល ១ទង មាន ០១ក្រុង៖
– ក្រុងសួង
 ជ័យលាភីថ្មី (បេក្ខភាពថ្មី) ដែលទទួលបានផ្ការំដួល ១ទង មាន ០៣ខណ្ឌ (ខណ្ឌថ្មី)៖
– ខណ្ឌព្រែកព្នៅ – ខណ្ឌច្បារអំពៅ – ខណ្ឌជ្រោយចង្វារ
 ក្រុង ០២ និងខណ្ឌ ០៥ នៅរក្សាបានផ្ការំដួល ១ទង (តែពិន្ទុថយចុះ)៖
– ក្រុងប៉ៃលិន – ក្រុងព្រះវិហារ – ខណ្ឌពោធិ៍សែនជ័យ
– ខណ្ឌមានជ័យ – ខណ្ឌដង្កោ – ខណ្ឌសែនសុខ
– ខណ្ឌឬស្សីកែវ

ជារួម សម្រាប់ជ័យលាភីទីក្រុងស្អាតលើកទី២នេះ មិនមានក្រុង/ខណ្ឌ បេក្ខភាពណាមិនបានជ័យលាភីផ្ការំដួលទេ ប៉ុន្តែប្រការគួរឱ្យកត់សំគាល់ មាន ក្រុងខណ្ឌបេក្ខភាពខ្លះរក្សាបានចំណាត់ថ្នាក់ផ្ការំដួល ប៉ុន្តែពិន្ទុកើនឡើង ហើយ ក្រុងខណ្ឌខ្លះទៀតរក្សាបានចំណាត់ថ្នាក់ តែពិន្ទុថយចុះ។

ជារួម អង្គសន្និបាតទាំងមូលសូមសំដែងនូវអំណរគុណចំពោះ រាជរដ្ឋាភិបាល ក្រោមការដឹកនាំដ៏ឈ្លាសវៃរបស់ សម្តេចតេជោនាយករដ្ឋមន្ត្រី ដែលបានគិតគូរជាប់ជាប្រចាំដល់ជីវភាពនិងសុខទុក្ខមន្រ្តីរាជការ បានដំឡើងប្រាក់បៀវត្សរ៍ និងរៀបចំគោលនយោបាយនានា ព្រមទាំងខិតខំប្រឹងប្រែងយកអស់ស្មារតី កំលាំងកាយចិត្ត មិនខ្លាចនឿយហត់ ប្រកបដោយឆន្ទៈនយោបាយមោះមុត ដើម្បីបុព្វហេតុសន្តិភាព ស្ថិរភាពនយោបាយ សន្តិសុខ និងសុវត្ថិភាពជូនប្រទេសជាតិ និងប្រជាជន ដែលនេះជាមូលដ្ឋានគ្រឹះនៃការអភិវឌ្ឍ។ អង្គសន្និបាតមានជំនឿជឿជាក់យ៉ាងរឹងមាំ និងកក់ក្តៅបំផុតចំពោះការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់ សម្តេចតេជោនាយករដ្ឋមន្ត្រី ក្នុងការជំរុញការអភិវឌ្ឍវិស័យទេសចរណ៍កម្ពុជា ដែលបានជាប្រយោជន៍សំខាន់ចូលរួមដល់ការអភិវឌ្ឍសេដ្ឋកិច្ច-សង្គម ការបង្កើតការងារ ការកាត់បន្ថយភាពក្រីក្រ និងការចូលរួមចំណែកដល់ការអភិវឌ្ឍសេដ្ឋកិច្ចនៅកម្ពុជា ដោយឈរលើទស្សនៈទានជំរុញកំណើន និងនិរន្តរភាព។
អង្គសន្និបាតសូមថ្លែងអំណរគុណចំពោះរាជរដ្ឋាភិបាលដែលបានអនុញ្ញាត ឱ្យក្រសួងទេសចរណ៍ទទួលធ្វើជាម្ចាស់ផ្ទះរៀបចំវេទិកាទេសចរណ៍អាស៊ានឆ្នាំ២០២១ (ASEAN Tourism Forum-ATF 2021) ដែលយើងទាំងអស់គ្នាប្តេជ្ញាចិត្តធ្វើឱ្យកម្ពុជាក្លាយជាគោលដៅទេសចរណ៍ស្អាត និងបៃតង សេវាប្រកបដោយគុណភាពខ្ពស់ និងផ្តល់បដិសណ្ឋារកិច្ចល្អដល់ភ្ញៀវទេសចរ សំដៅចូលរួមអបអរ សាទរ ATF 2021 និងព្រឹត្តិការណ៍កីឡា SEA Games 2023។
ឆ្លៀតឱកាសនេះ តាងនាមអង្គសន្និបាតទាំងមូល និងខ្ញុំបាទផ្ទាល់ ខ្ញុំសូម
គោរពជូនពរ សម្តេចតេជោនាយករដ្ឋមន្ត្រី សូមប្រកបដោយសុខភាពល្អបរិបូរណ៍ ប្រាជ្ញាឈ្លាសវៃ កំលាំងខ្លាំងក្លា ដើម្បីបន្តដឹកនាំកម្ពុជា ប្រកបដោយសុខសន្តិភាព ស្ថិរភាព និងការអភិវឌ្ឍលើគ្រប់វិស័យ ឆ្ពោះទៅកាន់ភាពសំបូររុងរឿង និងសុភមង្គលរបស់ប្រជាពលរដ្ឋ។

ដើម្បីបានជាអនុសាសន៍ណែនាំដ៏ខ្ពង់ខ្ពស់ និងជាមូលដ្ឋានត្រីវិស័យក្នុងការបន្តអភិវឌ្ឍវិស័យទេសចរណ៍កម្ពុជាប្រកបដោយប្រសិទ្ធភាព គុណភាព និងនិរន្តរភាព ខ្ញុំបាទក្នុងនាមអង្គសន្និបាតទាំងមូលសូមគោរពអញ្ជើញ សម្តេចតេជោនាយករដ្ឋមន្ត្រី មេត្តាថ្លែងសុន្ទរកថាបិទអង្គសន្និបាត និងមេត្តាផ្តល់អនុសាសន៍ណែនាំដ៏ខ្ពស់ខ្ពស់។
សូមគោរពអញ្ជើញ!