ប្រសាសន៍​សំខាន់ៗ របស់​សម្តេច​តេជោ ហ៊ុន សែន អញ្ជើញ​បិទ​សន្និបាត ប្រចាំឆ្នាំ​របស់ក្រសួង​កសិកម្ម នៅវិមានសន្តិភាព

290

(FN)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នឹងអញ្ជើញ​បិទ​សន្និ​បាត​បូក​សរុប​ការងារ ឆ្នាំ២០១៦-២០១៧ និងលើក ទិសដៅឆ្នាំ២០១៧-២០១៨ ក្រសួងកសិកម្ម រុក្ខា​ប្រមាញ់ និងនេសាទ នៅវេលាម៉ោង ៣:០០រសៀល ថ្ងៃទី១០ ខែមេសា ឆ្នាំ២០១៧នេះ នៅ​វិមាន​សន្តិភាព។

វិស័យកសិកម្ម​បានចូល​រួមចំណែក​ប្រមាណ ២៦,៣% (ថ្លៃបច្នុប្បន្ន) នៃ​ផលិត​ផល​ក្នុង​ស្រុក​សរុប ក្នុងឆ្នាំ២០១៦នេះ។ ដោយឡែក វិស័យឧស្សាហកម្ម បានរួមចំណែក​ប្រមាណ ៣១,៣% និងវិស័យសេវាកម្មប្រមាណ ៤២,៤%។ ការចូលរួមចំណែករបស់វិស័យកសិកម្ម មានការ​ប្រែប្រួលពី ៣៥,៦%-២៦,៣% ក្នុងចន្លោះឆ្នាំ ២០១២-២០១៦ ដោយ​សារ​តែ​វិស័យ​ឧស្សាហ​កម្ម សំណង់ និងវិស័យសេវា​កម្មមាន​ការកើនឡើង។

ក្រសួង​កសិកម្ម​បានផ្សព្វផ្សាយថា បើទោះបីជាកសិកម្ម បានជួបប្រទះនូវគ្រោះធម្មជាតិ ពិសេស​គ្រោះរាំង​ស្ងួត​នៅ​ដើមរដូវ និងជំនន់នៅ​ចុងរដូវ​វស្សា​ក៏ដោយ ក៏កម្ពុជា​ទទួល​បាន​នូវ​សមិទ្ធ​ផល ជាវិជ្ជមានប្រកប​ដោយ​មោទន​ភាព ដូចបាន​រៀបរាប់​ខាង​លើ ពោល​គឺវិស័យក​សិកម្ម​ ឆ្នាំ២០១៦ នេះមានកំណើន​រហូតទៅដល់ ៣% ល្អប្រសើរ​ជាងឆ្នាំ២០១១៥ មុន​នេះដែ​ល​ទទួល​បានត្រឹមតែ០,២៤%។

​ប្រសាសន៍សំខាន់ៗរបស់សម្តេចតេជោ ហ៊ុន សែន៖

– សម្តេចនាយករដ្ឋមន្រ្តី ស្នើឲ្យក្រសួងកសិកម្ម រុក្ខាប្រមាញ់ និងនេសាទ ត្រូ​វ​សហកា​ជាមួយ​ក្រសួង​ធនធាន​ទឹក ដើម្បីបង្កើនប្រព័ន្ធធារាសាស្រ្ត ឲ្យបានកាន់តែច្រើន ជួយសម្រួល​ដល់​ការ​ដាំដុះរបស់ប្រជាកសិករ។

– សម្តេចនាយករដ្ឋមន្រ្តី បានថ្លែងថា ស្ថានភាពដាំដុះរបស់ប្រជាកសិករ បាន​វិវឌ្ឍន៍​ពីការ​ផលិត​ត្រឹមតែ ដើម្បីទទួលទានក្នុងគ្រួសារ មកកាន់​ការ​ផលិត​សម្រាប់​តម្រូវ​ការ​ទីផ្សារ​ក្នុង​ស្រុក​ផង និងនាំចេញ​ទៅក្រៅ​ប្រទេស​សម្តេច​គូស​បញ្ជាក់ថា បើចង់បាន​តម្លៃស្រូវ​ខ្ពស់ ត្រូវ​ដាំដុះ​ពូជស្រូវ ដែលល្អ និងអាច​លក់បាន​តម្លៃថ្លៃ។

– សម្តេចនាយករដ្ឋមន្ត្រី អំពាវនាវ​ដោយ​ទទូច​ដល់ប្រ​ជាពល​រដ្ឋកុំប្រើ​ប្រាស់ថ្នាំគីមី ដែល​នាំឲ្យ​ខូច​គុណភាពអង្ករ។

– សម្តេចតេជោ ហ៊ុន សែន បានថ្លែងថា ការប្រកួតប្រជែង​លក់អង្ករ​ទៅកាន់ទី​ផ្សារ​បរទេស កម្ពុជា​ពិបាកប្រកួត​ប្រជែង​ដោយសារតែ​តម្លៃរបស់ក​ម្ពុជា​ខ្ពស់​ជាងគេ សម្តេច​នាយក​រដ្ឋមន្រ្តី​បាន​ថ្លែង​ថា រាជរដ្ឋា​ភិបាល​មិនបាន​ព្រងើយ​កន្តើយ​សម្រាប់​កសិផល​របស់​កសិករ​នោះ​ឡើយ​ ហើយពេលទៅណា គឺតែងតែអំពាវនាវនៅទីនោះឲ្យជួយទិញកសិផលរបស់កម្ពុជា ដើម្បី​ងាយ​ស្រួលក្នុង​ការប្រកួតប្រជែងនេះ សម្តេចតេជោ ស្នើប្រជាពលរដ្ឋដាំដុះ​ស្រូវដែល​មាន​គុណ​ភាពល្អ ហើយកុំប្រើប្រាស់ថ្នាំពុល ដែលនាំឲ្យប៉ះពាល់គុណភាព និងបាត់​បង់​ទីផ្សារ​។

– សម្តេចនាយករដ្ឋមន្រ្តី បានសុំឲ្យមានការយោគយល់ពីប្រជាកសិករ។ សម្តេចតេជោថា រាជរដ្ឋា​ភិបាល​ប្រឹងប្រែង និងចង់បានណាស់ការនាំចេញអង្ករ ព្រមទាំងតម្លៃក​សិផល​នានា​ទៅ​កាន់​ទីផ្សាររបស់​ពិភពលោក។ សម្តេចតេជោ បានអំពាវនាវឲ្យប្រទេសកំពុងអភិវឌ្ឍន៍ ត្រូវប្រឹងប្រែង​ចរចាជាមួយ​អង្គការពាណិជ្ជកម្ម ពិភពលោក ក្នុងការ​សម្រួល​ដល់​លំហូរ​ទំនិញពី​ប្រទេស​នានា ក៏ដូចជាការបញ្ចញទំនិញពីប្រទេសកំពុងអភិវឌ្ឍន៍ ទៅប្រទេស​អភិវឌ្ឍន៍​។

– សម្តេចតេជោ បានភ្ញាក់ផ្អើល​យ៉ាងខ្លាំង នៅក្នុងវេទិកាសេដ្ឋកិច្ច​ពិភពលោ​ក​នាទីក្រុង​ដាវ៉ូស បន្ទាប់​ពីប្រទេស​អភិវឌ្ឍន៍​ជឿនលឿន​ត្អូញត្អែរ​ថា តម្លៃកសិផល​មាន​តម្លៃខ្ពស់ ខណៈ​ប្រទេស​កំពុង​អភិវឌ្ឍន៍ថា ទំនិញ​កសិផល​របស់ពួក​គេមាន​តម្លៃទាបខ្លាំង។

– សម្តេចតេជោ ហ៊ុន សែន បានថ្លែងថា ប្រទេសកំពុងអភិវឌ្ឍន៍​ប្រកួត​ប្រជែង​តែគ្នា​ឯង ខណៈ​ប្រទេស​មាន​ការ​អភិវឌ្ឍន៍ មិនសូវជាមាន​ការប្រកួត​ប្រជែង​គ្នាខ្លាំង​នោះទេ ដោយ​សារ​តែប្រទេស​ទាំង​នោះផលិត​តែផលិត​ដែលកម្រ។

– សម្តេចតេជោ ហ៊ុន សែន បានថ្លែងថា នៅប្រទេស​ថៃសល់អ​ង្ករ​រហូត​ដល់​ប្រមាណ​១២​លាន​តោន ព្រោះតែការប្រកួតប្រជែងទីផ្សារ និងការចាល់​អង្ករ​ពីបណ្តា​ប្រទេស​ផលិត​អង្ករ​ដទៃ​ទៀត។

– សម្តេចតេជោ បានថ្លែងថា ការនាំចេញកសិផល គឺនៅ​តែជា​ចំណោទ​បញ្ហា​សម្រាប់​ប្រជា​កសិករ​។ បញ្ហាប្រឈមនេះគឺមិនមែនតែកម្ពុជានោះទេ ប្រទេស​ជិតខាង​ក៏ជួប​បញ្ហា​ក្នុងការ​នាំ​ចេញកសិផលដូចកម្ពុជាផងដែរ។

– សម្តេចតេជោ ហ៊ុន សែន បានថ្លែងគូសបញ្ជាក់ថា ឧស្សាហកម្ម​នៅកម្ពុជា​នា​ពេល​បច្ចុប្បន្ន​មាន​ការជឿនលឿន ប៉ុន្តែតម្រូវការកែច្នៃនៅមាន កម្រិតនៅឡើយ ដែល​ជាហេតុ​ធ្វើឲ្យ​ផលិត​ផល​កសិកម្ម ពុំមានការច្នៃគ្រប់គ្រាន់នោះទេសម្តេចតេជោ បានថ្លែងថា ឧស្សា​ហកម្ម​ដែល​សម្តេច​ចង់ បានបំផុត គឺឧស្សាហកម្មកែច្នៃ ដើម្បីបង្កើនការងារ។

– សម្តេចនាយករដ្ឋមន្រ្តី បានស្នើឲ្យមាន​ការទាក់​ទាញដៃគូ​វិនិយោគ​បង្កើត​តំបន់​សេដ្ឋកិច្ច​ពិសេស​ផ្នែក​កសិកម្ម និងកសិ-ឧស្សាហកម្ម ធ្វើយ៉ាងណា​ឲ្យការ​នាំចេញ​ទំនិញ​ផ្នែក​កសិកម្ម​ឲ្យបាន​១២​ភាគរយ នៃទំនិញនាំចេញ​សរុបនៅឆ្នាំ២០២៥​។

– សម្តេចនាយករដ្ឋមន្រ្តី បានអំពាវនាវដល់ក្រសួងកសិកម្ម ត្រូវបាន​ប្រឹង​ប្រែង​ស្វែង​រក​បច្ចេក​ទេស​ខ្ពស់ និងធ្វើទំនើបកម្មទៅលើវិស័យកម្ម ដើម្បីឲ្យ​ការ​ធ្វើ​កសិកម្ម​ទទួល​បាន​ផល​ល្អ​ប្រសើរ​ និងធនជាមួយការបម្រែបម្រួលអាកាសធាតុ។

– សម្តេចតេជោ ហ៊ុន សែន បានណែនាំដល់​មន្រ្តីបច្ចេកទេស​កសិកម្ម​ប្រឹងប្រែង​រកវិធីសាស្រ្ត និង​រកពូជស្រូវ ព្រមទាំងដំណាំផ្សេងៗទៀត ឲ្យសមស្រប​ទៅនឹង​ស្ថានភាព​នៃបម្រែ​បម្រួល​អាកាស​ធាតុ។

– ប្រមុខរាជរដ្ឋាភិបាលសម្តេចតេជោ បានថ្លែងកត់សម្គាល់ថា រយៈពេល​ប៉ុន្មាន​ឆ្នាំចុង​ក្រោយ​នេះ​ វិស័យកសិកម្មជាពិសេសដំណាំស្រូវ ទទួលបានទិន្នផលល្អប្រសើរ។

– សម្តេចតេជោ បានកោតសរសើរដ​ល់ក្រសួង​កសិកម្ម និងដៃគូពាក់ព័ន្ធ ដែល​បាន​រួម​គ្នា​ប្រឹង​ប្រែង​ជួយធ្វើឲ្យវិស័យ​កសិកម្ម​នៅកម្ពុជា កាន់តែល្អប្រសើរ ហើយ​សម្តេច​ក៏បាន​កោត​សរសើរ​ដល់ប្រជា​កសិករខ្មែរ ដែលបាន​ប្រឹងប្រែង​ក្នុងការដាំដុះ។

– សម្តេចតេជោ បានថ្លែងថា សន្និបាតរបស់ក្រសួងមិនត្រឹមតែ ជាការបូក​សរុប​លទ្ធផល​របស់​ក្រសួង​នោះទេ តែក៏ជាវេទិកា​ផ្លាស់​ប្តូរ​បទ​ពិសោធន៍ ទស្សនៈ និង​យោ​បល់​នានា សម្រាប់​​អភិវឌ្ឍន៍​លើវិស័យ​កសិកម្ម​ឲ្យកាន់​តែល្អ​ប្រសើរ។

– សម្តេចតេជោ ហ៊ុន សែន បានថ្លែងថា ការជ្រើសរើសយកវិមានសន្តិភាព ធ្វើពិធី​បិទ​សន្និបាត​របស់ក្រសួងកសិកម្ម រុក្ខាប្រមាញ់ និងនេសាទ ដើម្បីផ្តល់ឱកាសដល់ប្រជាកសិករ មាន​ឱកាស​ទស្សនាវិមានសន្តិភាព។

* សម្តេចតេជោ ហ៊ុន សែន បានថ្លែងបញ្ចប់សន្ទរកថា នៅវេលាម៉ោង៤៖៤៤នាទី៕