សម្តេចនាយករដ្ឋមន្រ្តី ហ៊ុន សែន អញ្ជើញជួបសំណេះសំណាលជាមួយបង ប្អូនកម្មករ និយោជិក

214

សម្តេច​អគ្គមហា​សេនាបតីតេជោ ហ៊ុន សែន នាយករដ្ឋមន្ត្រី នៃព្រះរា​ជា​ណា​ចក្រ​កម្ពុជា បានប្រកាសថា កម្មករ កម្មការិនី​ រោងចក្រទាំងអស់​នៅរាជធានីភ្នំពេញ នឹងអាច​ធ្វើ​​ដំណើរ​តាម​​រថយន្ត​ក្រុង​​សាធា​រណៈរប​ស់សាលា​រាជធានីភ្នំពេញ ដោយឥតគិត​ថ្លៃ រយៈពេល ២ឆ្នាំ គឺចាប់ពី​ខែសីហា ឆ្នាំ​២០១៧​ ដល់ខែសីហា ឆ្នាំ២០១៩។

ដូចនេះ កម្មករ នយោជិត នឹងអាច​ចំណេញ​ថ្លៃ​ធ្វើដំ​ណើរប្រចាំ​ថ្ងៃទៅ​កាន់រោង​ចក្រ​ធ្វើការ ខណៈ ដែលប្រាក់​ខែរបស់​កម្មករ នយោជិត​រោងចក្រ នឹងត្រូវបាន​ដម្លើង​តិច​បំផុត​១៦៨ដុល្លារ នៅ​ដើមឆ្នាំ​២០១៨ ខាងមុខនេះ បូកនឹង​ប្រាក់​​អត្ថប្រយោជន៍​​ផ្សេងៗទៀត ។ ការប្រកាស​របស់សម្តេច​តេជោ នាយករដ្ឋមន្ត្រី​ដូចនេះ គឺនៅ​ក្នុងពិធីជួប​សំណេះសំណាល​​ជាមួយ​បុគ្គលិក និងកម្មករ​​នយោជិត ជាង​៤ពាន់នាក់ ដែលមក​ពីប​ណ្តា​រោងចក្រ​ចំនួន​៩៣ នៅសាល​មហោ​ស្រពកោះ​ពេជ្រ រាជធានីភ្នំពេញ នាព្រឹកថ្ងៃទី២០ ខែសីហានេះ ។

សម្តេច​តេជោ ​បានប្រកាសផង​ដែរ អំពី​របប​សន្តិសុខសង្គមផ្នែ​កថែទាំសុខភាព របស់​កម្មក​រ​នយោ​ជិត ដោយ​ចាប់ពី​ខែមករា ឆ្នាំ២០១៨ គឺ​និយោជក នៃរោងចក្រ  នឹងទទួល​រាប់រង​​លើ​ការបង់​ថវិកា​ផ្នែក​នេះ​១០០% តែម្តង ដូចនេះ​និយោជិត​ទាំងអស់ មិនចាំបាច់ បង់ថ្លៃ ៥០% ​ដូចពេលបច្ចុប្បន្ន​នេះទេ គឺកម្មក​រនយោជិត នឹងអាច​នៅសល់​ប្រាក់​រវាងពី ៨០០០ ទៅ ១២០០០ រៀលក្នុង​មួយខែ។ ជាងនេះទៀត សម្តេចតេជោ នាយករដ្ឋមន្ត្រី បានចាត់​អោយ​​ក្រសួង​សុខាភិបាល ត្រូវរៀប​ចំអោយ​មាន​មណ្ឌល​សុខភាព ឬមន្ទីរ​ពេទ្យបង្អែក​​នៅជិត​​រោងចក្រ ដើម្បីងាយ​ស្រួលក្នុង​ការផ្តល់សេ​វាកម្ម​ថែរក្សា​សុខភាព​​ដល់ កម្មករ កម្មការិនី រួមទាំងរៀប​ចំអោយ​មានឡានពេទ្យ​ប្រចាំការ​​ដើម្បី​ត្រៀមដឹកក​ម្មករ​​នៅពេលមា​នគ្រោះថ្នាក់​អ្វី​មួយកើតឡើង។ ទន្ទឹមនេះ រាជរដ្ឋា​ភិបាល​កម្ពុជា កំពុងយ​ក​ចិត្តទុក​ដាក់ ចំពោះ​កម្មការិនី​​មាន​ផ្ទៃពោះ ដោយ​តាម​រយៈ​គោលនយោបាយរ​បបសន្តិសុខសង្គម នឹងផ្តល់ប្រាក់​សុខភាព​​សម្រាប់​ស្រ្តី​មាន​ផ្ទៃពោះ និង​ប្រាក់បន្ថែម ១២០% សម្រាប់ពេ​លឆ្លងទន្លេ។

ក្រៅពីការ​គិតគូពីសុខមាលភាព របស់កម្មករនយោជិតតាមរយៈ គោលនយោបាយ​របប​សន្តិសុខ​សង្គម​នេះ សម្តេច​តេជោ នាយករដ្ឋមន្ត្រី ក៏បាន​ប្រកាស​ថា រាជរដ្ឋាភិបាល​​កម្ពុជា នឹងចាប់អនុវត្ត​ការផ្តល់​ប្រាក់​សោធន​និវត្តន៍ ចាប់ពីឆ្នាំ​២០១៩ ទៅដល់​កម្មករ​និយោជិត​​ទាំងអស់ គឺមានន័យ​ថានៅ​ពេល​កម្មក​រនយោជិត ចូលដល់​អាយុ​ចូល​និវត្តន៌ និង​ធ្វើការ​មិន​កើត ក៏មាន​ប្រាក់សោធននិវត្តន៍ រឺប្រាក់ រឺត្រែត ដូចជា​មន្ត្រីរាជ​ការដែរ។

សម្តេចតេជោ នាយករដ្ឋមន្ត្រី បានលើក​ឡើងថា រាជរដ្ឋាភិបាលក​ម្ពុជាមា​ន​លទ្ធភាព​​ក្នុងការ​បន្តជួយ​សម្រួល​ដល់​ជីវភាព និងលក្ខខណ្ឌ​ការងារ​របស់​កម្មក​រនយោជិតបាន គឺដោយ​សារ​កម្ពុជាមាន​ស្ថេរភាព​នយោបាយ និងសន្តិសុខ​សណ្តាប់​ធ្នាប់ល្អ ព្រមទាំង មានការ​អនុគ្រោះ​ដល់ការវិនិយោគ​ទុន ពីបរទេស ទើប​មាន រោង​ចក្រជា​ច្រើន​ត្រូវ​បាន​បង្កើតឡើងជាប​ន្តបន្ទាប់។

សូមបញ្ជាក់ថា នៅក្នុង​ចំណោម សហគ្រាស​គ្រឹះស្ថាន ដែលបាន​ចុះបញ្ជី​ស្របតាម​បទ​ប្បញ្ញាតិ្ត​នៃ​ច្បាប់ ស្តីពី​ការងារ​សរុប​ចំនួន​១១១៦៨​គ្រឹះស្ថាន គឺមានរោង​ចក្រវាយ​នភណ្ឌ​កាត់ដេរ និងផលិត​​ស្បែក​ជើង​ ចំនួន១១០៧គ្រឹះស្ថាន ដែលមាន​កម្មករនិ​យោជិត​សរុបចំនួនជា​ង​៧៤ម៉ឺននាក់។ បើគិតប្រា​ក់​ឈ្នួល ជាមធ្យមក្នុង​វិស័យ​ទាំងពីរ​នេះគឺមាន​ទឹកប្រាក់​សរុប​ជាង​១ពាន់​លាន​ដុល្លារ​​អាមេរិក​ក្នុងមួយឆ្នាំ។ រីឯតម្លៃសរុប​នៃការនាំចេញ​ផលិតផល​ផ្នែកកាត់​ដេរសម្លៀកបំពាក់ និង​ផលិត​ស្បែក​​​​ជើងក្នុងឆ្នាំ២០១៦ គឺមានចំនួនជាង៧ពាន់ ៣រយលាន​ដុល្លារអាមេរិក។ ក្រៅពីការងារ​ក្នុងស្រុក​នៅឆ្នាំ២០១៦​កន្លងទៅនេះ ក៏មានពលក​រកម្ពុជា​ប្រមាណ​ជាង ១លាននាក់១៥ម៉ឺន​នាក់​ទៀត ដែលកំពុង​ធ្វើការ​នៅ​បរទេស ដោយបាននាំយក​ប្រាក់ចំណូល​មកក្នុង​​ប្រទេស​ប្រមាណ​ជាង ១ពាន់៧រយលាន​ដុល្លារ​អាមេរិកក្នុង១​ឆ្នាំផងដែរ៕