នៅព្រឹកថ្ងៃទី១៨ ខែសីហានេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានជួបសំណេះសំណាលលើកទឹកចិត្ត និងផ្តល់រង្វាន់ដល់កីឡាករ កីឡាការិនីជនពិការកម្ពុជា ចំនួនពីរក្រុមតែម្តង នៅវិមានសន្តិភាព គឺក្រុមកីឡាករ ដែលបានដណ្តើមមេដាយក្នុងការប្រកួតកីឡាប៉ារ៉ាឡាំពិកយុវជនជនពិការរដូវក្ដៅនៅសាធារណៈរដ្ឋកូរ៉េ និងក្រុមកីឡាករប៉ារ៉ាឡាំពិកកម្ពុជា ដែលនឹងទៅចូលរួមប្រកួតកីឡាអាស៊ានប៉ារ៉ាហ្គេម រឺកីឡាជនពិការអាស៊ានលើកទី៩ នៅទីក្រុងកូឡាឡាំពួរ ប្រទេសម៉ាឡេស៊ី នាខែកញ្ញាខាងមុខនេះ។
តាមការលើកឡើងរបស់ ឯកឧត្តម យី វាសនា អគ្គលេខាធិការសហព័ន្ធកីឡាជនពិការកម្ពុជា បានបញ្ជាក់ថា នាពេលថ្មីៗនេះ កីឡាករជនពិការកម្ពុជាចំនួន៣រូប បានទៅចូលរួមការប្រកួតក្នុងព្រឹត្តិការណ៍ជើងឯកយុវជនអាស៊ី នៅសាធារណៈរដ្ឋកូរ៉េ។ ក្នុងនោះមានកីឡាករ២រូប ដណ្តើមបានមេដាយមាស និងមេដាយសំរិទ្ធ។ ចំណែកកីឡាករប៉ារ៉ាឡាំពិកកម្ពុជា ចំនួន១០១រូប នឹងធ្វើដំណើរទៅចូលរួមប្រកួតកីឡាអាស៊ានប៉ារ៉ាហ្គេមលើកទី៩ នៅប្រទេសម៉ាឡេស៊ី។ ជាការផ្តល់កម្លាំងចិត្តយ៉ាងធំធេងដល់កីឡាករជនពិការកម្ពុជា សម្តេចតេជោ នាយករដ្ឋមន្ត្រី បានផ្តល់ថវិកាផ្ទាល់ខ្លួនចំនួន៣ម៉ឺនដុល្លារអាមេរិក ជូនដល់កីឡាករជនពិការ យ៉ាវ វណ្ណៈ ដែលដណ្តើមបានមេដាយមាសក្នុងវិញ្ញាសារហែលទឹក ក្នុងការប្រកួតកីឡានៅសាធារណៈរដ្ឋកូរ៉េ ដើម្បីយកទៅដោះស្រាយបំណុល របស់គ្រួសារ ដោយសារតែអគ្គិភ័យបានឆេះលំនៅដ្ឋាននាពេលកន្លងមក។
បន្ថែមពីនេះ កីឡាករ យ៉ាវ វណ្ណៈ ក៏ទទួលបានថវិកាគោលនយោបាយពីក្រសួងអប់រំ យុវជន និងកីឡា ចំនួន៨០លានរៀល និង ថវិការបន្ថែមរបស់សម្តេចតេជោ ចំនួន១ម៉ឺនដុល្លារផងដែរ។ ចំណែក កីឡាករ យយ សំរិទ្ធ ដែលទទួលបានមេដាយសំរិទ្ធ ទទួលបានថវិកាគោលនយោបាយរបស់ក្រសួងអប់រំ ចំនួន២៤លានរៀល រួមនិងថវិការបស់សម្តេចតេជោ ចំនួន៣ពាន់ដុល្លារអាមេរិក។
ដោយឡែក សម្តេចតេជោ បានផ្តល់ថវិកាលើកទឹកចិត្តម្នាក់ ៥រយដុល្លារអាមេរិក ជូនដល់ គ្រូបង្វឹក និងកីឡាករជនពិការដែលមានវត្តមាន នៃការជួបសំណេះសំណាលនេះដែរ។ មិនត្រឹមតែយកចិត្តទុកដាក់តាមរយៈការផ្តល់ជាថវិកាលើកទឹកចិត្តដល់កីឡាករ ដែលទទួលបានមេដាយមាសពីការប្រកួតកំរិតអន្តរជាតិនោះទេ សម្តេចតេជោក៏បានសម្រេចអោយមានការរៀបចំក្បួនម៉ូតូអមដង្ហែរក្នុងរាជធានីភ្នំពេញសម្រាប់កីឡាករជ័យលាភីមេដាយមាស ទៅតាមស្តង់ដារផងដែរ គឺជ័យលាភីមេដាយមាស នៃការប្រកួតកំរិតពិភពលោកត្រូវមានក្បួនម៉ូតូដង្ហែរចំនួន១២គ្រឿង និងកំរិតអាស៊ីត្រូវមានក្បួនម៉ូតូដង្ហែរចំនួន១០គ្រឿង។
គួរកត់សំគាល់ថា សម្តេចតេជោ នាយករដ្ឋមន្ត្រីកម្ពុជាតែង ផ្តាំផ្ញើរនូវចំនុចសំខាន់ចំនួន២ ទៅកាន់កីឡាករ កីឡាការិនី ដែលត្រូវចូលរួមប្រកួតកីឡាកំរិតអន្តរជាតិ គឺទី១ត្រូវជៀសវាងដាច់ខាត ការប្រើប្រាស់សារធាតុជំនួយកម្លាំង ដែលមានសារធាតុញៀន និងទី២ ត្រូវតែគោរពទៅតាមលក្ខណ្ឌ នៃការប្រកួតក្នុងវិញ្ញាសារនីមួយៗដែលត្រូវបានកំណត់ ព្រោះការចូលរួមប្រកូតនេះ គឺជាតំណាងមុខមាត់របស់ប្រទេសជាតិ។ ការចូលរួមប្រកួតកីឡាអន្តរជាតិ ត្រូវបានចាត់ទុកថា គឺជាទំនាក់ទំនងការទូតដ៏មានប្រសិទ្ធភាព ដោយប្រទេសកម្ពុជាបានបង្ហាញអត្តសញ្ញាណជាតិ និងលើកទង់ជាតិស្មើមុខស្មើមាត់នៅលើឆាកអន្តរជាតិ។
