សម្តេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខ នាយករដ្ឋមន្រ្តី នៃព្រះរាជាណាចក្រកម្ពុជា នៅព្រឹកថ្ងៃទី១៦ សីហា បានធ្វើដំណើរតាមឧទ្ធម្ភាគចក្រ ទៅកាន់ខេត្តស្ទឹងត្រែង ដើម្បីជួបសំណេះសំណាល សាកសួរសុខទុក្ខចំពោះនាយទាហានជាន់ខ្ពស់ នាយទាហាន និងពលទាហាន នៃបញ្ជាការដ្ឋានយោធភូមិន្ទភាគទី១ ស្ថិតនៅទីរួមខេត្តស្ទឹងត្រែង។
នៅចំពោះមុខនាយទាហានជាន់ខ្ពស់ នាយទាហានរង និងពលទាហាន នៃបញ្ជាការដ្ឋានយោធភូមិន្ទភាគទី១ សម្តេចតេជោនាយករដ្ឋមន្រ្តីមានប្រសាសន៍ថា គោលបំណងនៃការអញ្ជើញចុះ មកកាន់ខេត្តស្ទឹងត្រែងរបស់សម្តេចនៅថ្ងៃនេះ គឺជួបសំណេះសំណាលជាមួយបងប្អូននាយទាហាន ពលទាហានទាំងអស់ នៃយោធភូមិភាគទី១ ដែលបានខិតខំប្រឹងប្រែងយ៉ាងអស់ពីសមត្ថភាព ពិសេសការអត់ធ្មត់ប្រកបដោយការទទួលខុសត្រូវខ្ពស់ ក្នុងការ ការពារបូរណភាពទឹកដីក្នុងដំណាក់កាលដែលកងទ័ពឡាវធ្វើការឈ្លានពានចូលទឹកដីកម្ពុជា នៅតំបន់ព្រំដែនខេត្តស្ទឹងត្រែងកាលពីដើមឆ្នាំ២០១៧កន្លងទៅ។
សម្តេចតេជោនាយករដ្ឋមន្រ្តីមានប្រសាសន៍ បន្តថា ក្រៅពីការជួបសំណេះសំណាលនិងសាកសួរសុខទុក្ខចំពោះបងប្អូនទាំងអស់ សម្តេចនឹងធ្វើការដោះស្រាយនូវ រាល់ការលំបាករបស់បងប្អូនយើង ពិសេសការបង្កើតឡើងនូវកងពលតូចអន្តរាគមន៍ថ្មីមួយទៀត នៅខេត្តស្ទឹងត្រែងដែលមានឈ្មោះថា កងពលតូចអន្តរាគមន៍លេខ១២៨ ចំណុះឲ្យយោធភូមិភាគទី១។ សម្តេចតេជោនាយករដ្ឋមន្រ្តី មានប្រសាសន៍បញ្ជាក់បន្ថែមថា ការរៀបចំនេះមិនមែនសំដៅដល់ការធ្វើសង្រ្គាមជាមួយប្រទេសជិតខាងនោះទេ ផ្ទុយទៅវិញសំដៅលើការពង្រឹងកិច្ចការការពារជាតិ ការពារប្រជាជន និងទំនាក់ទំនងល្អជាមួយប្រទេសជិតខាង។
ជាមួយ និងការថ្លែងនោះដែរ សម្តេចតេជោ នាយករដ្ឋមន្រ្តីមានប្រសាសន៍សំដែងនូវការវាយតម្លៃខ្ពស់ និងកោតសរសើរជូនចំពោះនាយទាហាន និងពលទាហានទាំងអស់ ដែលបានគោរពនូវបទបញ្ជារបស់ថ្នាក់ដឹកនាំរាជរដ្ឋាភិបាល ក្រសួងការពារជាតិ និងអគ្គមេបញ្ជាការ នៃកងយោធពលខេមរភូមិន្ទ ក្នុងរក្សានូវភាពអត់ធ្មត់បំផុត មិនមានការផ្ទុះអាវុធបង្ហូរឈាមគ្នា ក្នុងដំណាក់កាល ដែលមានការចូលឈ្លានពានទឹកដី ពីសំណាក់កងទ័ពឡាវ កាលពីដើមឆ្នាំ២០១៧កន្លងទៅ។ សម្តេចតេជោនាយករដ្ឋមន្រ្តីបានចំណាយពេលប្រមាណ៥ម៉ោង រួមទាំងការទទួលទានអាហារថ្ងៃត្រង់រួមគ្នាជាមួយនឹង បងប្អូននាយទាហានជាន់ខ្ពស់ នាយទាហាន និងពលទាហាន នៃយោធភូមិន្ទភាគទី១ មុនពេលធ្វើដំណើរ វិលត្រឡប់មកកាន់រាជធានីភ្នំពេញវិញនៅរសៀលថ្ងៃដដែលនោះដែរ៕
